1 Ao ngkai, Ngai ae Nibwaai, I a motika au taetae ni burabeti nakoimi, tariu aika kam tangiraki. Ao I aki koroi bwaai aika a mwaiti ma ti ake I ataia bwa a na koro bukiia; ao I aki naba koroi ana taeka tariu ae Iakobwa ma ti tabeua mai buakoia.

2 Ngaia ae e kukurei nanou ni bwaai ake I a tia ni koroi, ma iai riki taeka tabeua ake I kan taekin iaon ana reirei Kristo; ngaia ae N na kamataatai au taeka nakoim, n aron ootan au taetae ni burabeti.

3 Bwa e kimwareirei tamneiu n te oota; bwa bon aio aron te Uea ae te Atua ni mwammwakuri i buakoia natia aomata. Bwa e anga te oota te Uea ae te Atua nakon te kaantaninga; bwa e taetae nakoia aomata n aia taetae, ao n aron are a na oota iai.

4 Mangaia ae I tangiria bwa kam na uringnga ae I a tia n taetae nakoimi n taekina te burabeti are e a tia ni kaotia te Uea nakoiu, are e na bwabetitoa Ana Tiibu te Teei te Atua, are e na anaa buren te aonaba.

5 Ao ngkai e riai bwa e na bwabetitoaki i nanon te ran Ana Tiibu te Teei te Atua, ae tabu, ibukin kakororaoan raoiroi ni kabane, O ngkanne, a na korakora riki riain bwabetitoakira, ngaira aika tiaki tabu, eng, i nanon te ran.

6 Ao ngkai, tariu aika kam tangiraki, N na titiraki nakoimi, e kangaa Ana Tiibu te Teei te Atua ni kakoroi bukin raoiroi ni kabane ni bwabetitoana i nanon te ran?

7 Kam aki ataia ae tabu? E ngae ngke a ataia ae tabu, ao e kaotia nakoia natia aomata, bwa n ana tai ni maiu n rabwata ao e karinanoa imatan te Tama, ao e kakoaua nakon te Tama bwa e na ongeaba nakoina ni kaawakin ana tua ni kabane.

8 Mangaia are i mwin bwabetitoakina i nanon te ran ao e ruo nakoina te Tamnei are Raoiroi n rabwatana ae te taobe.

9 Ao ikai are e a manga kaotaki riki iai nakoia natia aomata etirurun te kawai, ma warikin te mataroa are ti riai n rin iai, n aron te katoto are karaoia imataia.

10 Ao e taku ana taeka nakoia natiia aomata: Kam na irirai. Mangaia ae tariu aika kam tangiraki, ti na kan n irira Iesu ngkana ti aki tauraoi ni kaawakin ana tua te Tama?

11 Ao e kangai te Tama: rairananom, rairananom, ao bwabetitoaki n aran Natiu ae Tangiraki.

12 Ao e a roko naba bwanaan te Nati nakoiu ae kangai: Ane bwabetitoaki n arau, ao e na anganaki te Tamnei ae Raoiroi iroun te Tama, n arona ngke e anganai; mangaia ae irirai, ao karaoi bwaai ake kam a tia n noori bwa I karaoi.

13 Ngaia ae tariu aika kam tangiraki, I ataia bwa ngkana kam katotonga te Nati, ma nanomi ni kabane, n akea te mwaamwana te aba ke ni kewe imatan te Atua, ma te nano ni koaua, n rairinanomi man ami bure, ao ni kakoaua nakon te Tama bwa kam tauraoi ni katoka iaomi aran Kristo, rinanon te bwabetito—eng, ngkana kam ira kawain ami Uea ma ami Tia Kamaiu nako nanon te ran, n aron ana taeka, taraia, n te tai anne are e na reke iai iroumi te Tamnei ae Raoiroi; eng, ao e na reke iroumi te bwabetitoaki n te ai ma te Tamnei ae Raoiroi; ao kam na kona n taetae n neweia anera, ao N taekina neboan Atuan Iteraera ae Tabu.

14 Ma taraia tariu aika kam tangiraki, e a tia n roko ana taeka te Nati nakoiu, ni kangai: Ngkana kam tia n rairinanomi man ami bure, ao ni kakoaua nakon te Tama bwa kam a tauraoi ni kaawakin au tua, ni karaoan te bwabetito i nanon te ran, ao n tia ni karekea te bwabetitoaki n te ai ma te Tamnei ae Raoiroi, ao ni kona n taetae n taetae ae boou, eng, ae aia taetae anera, ao i mwiin bwaai aikai kam a manga kaakeaai, ao e tamaroa riki ngke arona bwa kam aki ataai.

15 Ao I ongo bwanaan te Tama, ae kangai: Eng, a koaua ao a kakaonimaki ana taeka Natiu ae Tangiraki. Te aomata are teimatoa ni karokoa te toki, boni ngaia are e na kamaiuaki.

16 Ao ngkai tariu aika kam tangiraki, I ataia man bwaai aika I a tia n taekin bwa ngkana e aki teimatoa te aomata ni karokoa te toki, n aron te katoto are e a tia ni karaoia Natin te Atua ae maiu, ao e na aki kamaiuaki.

17 Mangaia ae kam na karaoi bwaai ake I a tia n taekin bwa I nooria bwa e na karaoi ami Uea ma ami Tia Kaboingkami; bwa bon ibukin aio are a tia ni kaotaki iai nakoiu, bwa kam aonga n ataa te mataroa are kam na rin iai. Bwa te mataroa are kam na riai n rin iai bon te rairannano ma te bwabetito i nanon te ran; ao i mwina e reke kamaunan ami bure n te ai ao iroun te Tamnei ae Raoiroi.

18 Ao ngkanne kam na nakonako iaon te kawai ae eti man irariki are e na kairingkami nakon te maiu ae akea tokina; eng, kam a tia n rin rinanon te mataroa; kam a tia ni maiu n aron ana tua te Tama ma te Nati; ao kam a tia ni karekea te Tamnei ae Raoiroi, are e kakokaua ibukin te Tama ao te Nati, are e a kakoroa iai bukin te berita are e a tia n taekinna, ae ngkana ko rin n te mataroa aio ao e na reke iroum.

19 Ao ngkai, tariu aika kam tangiraki, i mwin touan te kawai ae eti man irariki aio, I kan titirakiningkami bwa akea riki te bwai ae kam riai ni karaoia? Taraia, I taekina aio nakoimi, A mwaiti riki; bwa kam na bon aki kona n roko n te mwaneka aio n aki tauan ana taeka Kristo ma te onimaki ae matoatoa irouna, n onimakina teuare e tau, are iai mwaakana ni kamaiu, ma te aki nanokokoraki.

20 Ngaia ae kam waaki nako man teimatoa i nanon Kristo, ma te kaantaninga ae tamaroa ma ni kororaoi, ma tangiran te Atua ma aomata ni kabane. Mangaia ae kam na waaki nako, ni kanuaingkami n ana taeka Kristo, ao n teimatoa ni karokoa te toki, ao taraia, e kangai ana taeka te Tama: E na reke iroumi te maiu ae akea tokina.

21 Ao ngkai, taraia tariu aika kam tangiraki, aio te kawai ao akea riki te kawai teuana ke te ara are e a tia n taekinaki i aan karawa are e na kona ni kamaiuaki iai te aomata i nanon uean te Atua. Ao ngkai, aio ana reirei Kristo, ae ti ngaia ana reirei ni koaua te Tama, ma te Nati, ma te Tamnei ae Raoiroi, are te Atua ae ti temanna, ae aki totoki. Amen.