1 Ug karon, tan-awa, hinigugma kong kaigsoonan, nagdahom ako nga kamo namalandong sa ubang paagi sa inyong kasingkasing mahitungod sa angay ninyong buhaton human kamo makasulod sa agianan. Apan, tan-awa, ngano nga kamo namalandong man niining mga butanga diha sa inyong kasingkasing?

2 Wala ba kamo mahinumdom nga gisultihan ko kamo nga human kamo makadawat sa Espiritu Santo kamo makapamulong sa pinulongan sa mga anghel? Ug karon, unsaon kaha ninyo sa pagpamulong pinaagi sa pinulongan sa mga anghel kon kini dili pinaagi sa Espiritu Santo?

3 Ang mga anghel mamulong pinaagi sa gahom sa Espiritu Santo; mao nga, mamulong sila sa mga pulong ni Kristo. Mao nga, gisultihan ko kamo nga, pagbusog sa mga pulong ni Kristo; kay tan-awa, ang mga pulong ni Kristo motug-an kaninyo sa tanang butang unsay inyong angay nga buhaton.

4 Mao nga, karon human nga ako makapamulong niini nga mga pulong, kon kamo dili makasabot niini, kana tungod kay kamo wala mangutana, ni kamo manuktok; mao nga, kamo wala madala ngadto sa kahayag, apan malaglag gayod ngadto sa kangitngit.

5 Kay tan-awa, sultihan ko na usab kamo nga kon mosulod kamo agi sa agianan, ug makadawat sa Espiritu Santo, kini mopakita diha kaninyo sa tanang butang nga kinahanglan ninyong buhaton.

6 Tan-awa, kini ang doktrina ni Kristo, ug wala nay laing doktrina nga ihatag hangtod nga iyang ipakita ang iyang kaugalingon diha kaninyo sa unod. Ug kon iyang ipakita ang iyang kaugalingon diha kaninyo sa unod, ang mga butang nga iyang isulti kaninyo maoy inyong buhaton.

7 Ug karon ako, si Nephi, dili makasulti og dugang; ang Espiritu mipugong sa akong pagpamulong, ug nagpabilin akong magbangotan tungod sa pagkawalay pagtuo, ug sa pagkadaotan, ug sa pagkawalay alamag, ug sa pagkatikig og liog sa katawhan; kay dili sila magsiksik og kahibalo, ni makasabot og mahinungdanon nga kahibalo, dihang gihatag kini kanila sa kayano, gani sa labing yano nga pulong.

8 Ug karon, hinigugma kong kaigsoonan, akong nasabtan nga namalandong pa gihapon kamo diha sa inyong kasingkasing; ug kini nakapasubo kanako nga ako kinahanglan nga mamulong mahitungod niini nga butang. Kay kon kamo mopatalinghog sa Espiritu nga motudlo sa usa ka tawo sa pag-ampo, inyong mahibaloan nga kamo kinahanglan nga mag-ampo; kay ang daotang espiritu dili motudlo sa usa ka tawo sa pag-ampo, apan motudlo kaniya nga siya dili gayod mag-ampo.

9 Apan tan-awa, sultihan ko kamo nga kamo kinahanglan gayod nga mag-ampo sa kanunay, ug dili maluya; nga kamo dili mobuhat og bisan unsang butang ngadto sa Ginoo gawas kon unahon ninyo ang pag-ampo sa Amahan pinaagi sa ngalan ni Kristo, aron iyang mapahinungod ang inyong mga gibuhat nganha kaninyo, aron ang inyong mga gibuhat mahimo nga kaayohan sa inyong kalag.