1 Ang mga pulong ni Jacob, nga igsuong lalaki ni Nephi, nga iyang gipamulong ngadto sa katawhan ni Nephi:

2 Tan-awa, hinigugma kong mga igsoon, ako, si Jacob, kay gitawag sa Dios, ug gi-orden subay sa iyang balaan nga kapunongan, ug kay gipahinungod pinaagi sa akong igsoon nga si Nephi, kinsa giisip ninyo nga usa ka hari o usa ka tigpanalipod, ug kinsa inyong gisaligan alang sa kaseguroan, tan-awa nasayod kamo nga ako namulong nganha kaninyo og labihan ka daghan nga butang.

3 Bisan pa niana, sultihan ko na usab kamo; kay ako nagtinguha sa kaayohan sa inyong mga kalag. Oo, dako ang akong kahingawa alang kaninyo; ug kamo mismo nasayod nga sukad pa kini kaniadto. Kay nag-awhag ako kaninyo pinaagi sa tanang kakugi; ug gitudloan ko kamo sa mga pulong sa akong amahan; ug namulong ako kaninyo mahitungod sa tanan nga butang nga nahisulat, gikan sa pagkalalang sa kalibotan.

4 Ug karon, tan-awa, namulong ako kaninyo mahitungod sa mga butang nga nahitabo na, ug sa mga mahitabo pa; mao nga, akong basahon diha kaninyo ang mga pulong ni Isaias. Ug mao kini ang mga pulong nga gihangyo sa akong igsuong lalaki nga akong ipamulong kaninyo. Ug mamulong ako diha kaninyo alang sa inyong kaayohan, aron makakat-on kamo ug mohimaya sa ngalan sa inyong Dios.

5 Ug karon, ang mga pulong nga akong basahon mao ang mga gipamulong ni Isaias mahitungod sa tibuok balay ni Israel; mao nga, haom kini kaninyo, kay kamo gikan sa balay ni Israel. Ug adunay daghan nga butang nga gipamulong ni Isaias nga haom alang kaninyo, tungod kay kamo gikan sa balay ni Israel.

6 Ug karon, mao kini ang mga pulong: Sa ingon niini miingon ang Ginoong Dios: Tan-awa, akong ipataas ang akong kamot ngadto sa mga Hentil, ug mopabarog sa akong bandila ngadto sa katawhan; ug pagasapnayon nila ang imong mga anak nga lalaki diha sa ilang mga bukton, ug ang imong mga anak nga babaye pagapas-anon diha sa ilang mga abaga.

7 Ug ang mga hari mao ang tigmatuto nimong mga amahan, ug ang ilang mga rayna mao ang tigmatuto nimong mga inahan; moyukbo sila kanimo nga ang ilang mga nawong paingon sa yuta, ug motilap sa abog sa imong mga tiil; ug imong mahibaloan nga ako mao ang Ginoo; kay dili mangaulaw sila nga magahulat kanako.

8 Ug karon ako, si Jacob, mamulong og gamay mahitungod niini nga mga pulong. Kay tan-awa, ang Ginoo mipakita ngari kanako nga kadtong anaa sa Jerusalem, diin kita didto naggikan, gipangpatay ug gipangdala nga mga bihag.

9 Bisan pa niana, gipakita sa Ginoo ngari kanako nga sila mobalik pag-usab. Ug iya usab nga gipakita ngari kanako nga ang Ginoong Dios, ang Usa nga Balaan sa Israel, mopakita sa iyang kaugalingon ngadto kanila diha sa lawas; ug human nga siya mopakita sa iyang kaugalingon, sila mosakit kaniya ug molansang kaniya sa krus, sumala sa mga pulong sa anghel kinsa misulti niini ngari kanako.

10 Ug human nga ipatig-a nila ang ilang mga kasingkasing ug ipatikig ang ilang mga liog batok sa Balaan sa Israel, tan-awa, ang mga paghukom sa Balaan sa Israel modangat ngadto kanila. Ug moabot ang adlaw nga sila silotan ug sakiton.

11 Mao nga, human nga sila maabog ngadto ug nganhi, kay sa ingon niini miingon ang anghel, daghan ang pagasakiton sa lawas, ug dili tugotan nga mamatay, tungod sa mga pag-ampo sa mga matinud-anon; sila pagatibulaagon, ug pagasakiton, ug kayugtan; bisan pa niana, ang Ginoo magmaluluy-on kanila, nga kon makaangkon na sila og kahibalo bahin sa ilang Manunubos, pundokon sila pag-usab ngadto sa mga yuta nga ilang panulundon.

12 Ug bulahan ang mga Hentil, sila nga gisulat sa propeta; kay tan-awa, kon maghinulsol sila ug dili makig-away batok sa Zion, ug dili moipon nianang dako ug salawayon nga simbahan, maluwas sila; kay ang Ginoong Dios motuman sa iyang mga pakigsaad nga iyang gihimo ngadto sa iyang mga anak; ug tungod niini nga hinungdan ang propeta misulat niini nga mga butang.

13 Mao nga, sila nga makig-away batok sa Zion ug sa katawhan sa pakigsaad sa Ginoo motilap sa abog sa ilang mga tiil; ug ang katawhan sa Ginoo dili mangaulaw. Kay ang katawhan sa Ginoo mao kadtong mga nanaghulat kaniya; kay nanaghulat pa gihapon sila sa pag-anhi sa Mesiyas.

14 Ug tan-awa, sumala sa mga pulong sa propeta, ang Mesiyas sa iyang kaugalingon mosugod na usab sa ikaduhang higayon sa pagbawi kanila; mao nga, ipakita niya ang iyang kaugalingon ngadto kanila pinaagi sa gahom ug dakong himaya, ngadto sa kalaglagan sa ilang mga kaaway, kon kana nga adlaw moabot nga sila motuo kaniya; ug siya walay pagalaglagon niadtong motuo kaniya.

15 Ug sila nga dili motuo kaniya pagalaglagon, pinaagi sa kalayo, ug pinaagi sa unos, ug pinaagi sa mga linog, ug pinaagi sa mga pagbanaw sa dugo, ug pinaagi sa kamatay, ug pinaagi sa gutom. Ug ilang mahibaloan nga ang Ginoo mao ang Dios, ang Usa nga Balaan sa Israel.

16 Kay makuha ba ang bihag gikan sa gamhanan, o ang mga bihag sumala sa balaod buhian?

17 Apan sa ingon niini miingon ang Ginoo: Sa tinuod ang mga bihag sa gamhanan pagakuhaon, ug ang bihag sa mabangis pagaluwason; kay ang Makagagahom nga Dios moluwas sa iyang katawhan sa pakigsaad. Kay sa ingon niini miingon ang Ginoo: Makig-away ako kanila nga makig-away kaninyo—

18 Ug pakaonon nako sila sa kaugalingong nilang unod, sila nga modaogdaog kaninyo; ug mangahubog sila sa kaugalingon nilang dugo sama sa tam-is nga bino; ug ang tanang katawhan masayod nga ako ang Ginoo mao ang inyong Manluluwas ug inyong Manunubos, ang Gamhanang Dios ni Jacob.