ບົດທີ 21
ຊາວອິດສະຣາເອນຈະເຕົ້າໂຮມກັນເມື່ອພຣະຄຳພີມໍມອນອອກມາ—ຄົນຕ່າງຊາດຈະໄດ້ຮັບການສະຖາປະນາເປັນຜູ້ທີ່ມີອິດສະລະພາບຢູ່ໃນອາເມຣິກາ—ພວກເຂົາຈະລອດຖ້າຫາກພວກເຂົາເຊື່ອ ແລະ ເຊື່ອຟັງ; ຖ້າບໍ່ດັ່ງນັ້ນ, ພວກເຂົາຈະຖືກຕັດອອກ ແລະ ຖືກທຳລາຍ—ຊາວອິດສະຣາເອນຈະສ້າງເມືອງເຢຣູຊາເລັມໃໝ່ຂຶ້ນ, ແລະ ເຜົ່າຕ່າງໆທີ່ຫາຍໄປຈະກັບຄືນມາ. ປະມານ ຄ.ສ. 34.
1 ແລະ ຕາມຈິງແລ້ວເຮົາກ່າວກັບເຈົ້າວ່າ ເຮົາຈະໃຫ້ເຄື່ອງໝາຍແກ່ເຈົ້າ, ເພື່ອເຈົ້າຈະໄດ້ຮູ້ໃນ ເວລາທີ່ສິ່ງເຫລົ່ານີ້ຈະເກີດຂຶ້ນ—ຄືເຮົາຈະເຕົ້າໂຮມຜູ້ຄົນຂອງເຮົາຈາກການແຕກກະຈັດກະຈາຍໄປເປັນເວລາດົນນານຂອງພວກເຂົາ, ໂອ້ ເຊື້ອສາຍອິດສະຣາເອນ, ແລະ ຈະສະຖາປະນາຊີໂອນຂອງເຮົາຂຶ້ນໃນບັນດາພວກເຂົາອີກ;
2 ແລະ ຈົ່ງເບິ່ງນີ້ຄືສິ່ງທີ່ເຮົາຈະໃຫ້ແກ່ເຈົ້າເປັນເຄື່ອງໝາຍ—ເພາະຕາມຈິງແລ້ວເຮົາກ່າວກັບເຈົ້າວ່າ ເມື່ອສິ່ງເຫລົ່ານີ້ ຊຶ່ງເຮົາໄດ້ປະກາດແກ່ເຈົ້າ, ແລະ ສິ່ງທີ່ເຮົາຈະປະກາດແກ່ເຈົ້າກ່ຽວກັບຕົວເຮົາເອງຕໍ່ຈາກນີ້ໄປ, ແລະ ໂດຍອຳນາດຂອງພຣະວິນຍານບໍລິສຸດ ຊຶ່ງເຈົ້າຈະໄດ້ຮັບຈາກພຣະບິດາຈະເປັນທີ່ຮູ້ຈັກແກ່ຄົນຕ່າງຊາດ ເພື່ອພວກເຂົາຈະໄດ້ຮູ້ກ່ຽວກັບຜູ້ຄົນພວກນີ້ ຊຶ່ງເປັນຜູ້ທີ່ເຫລືອຢູ່ຂອງເຊື້ອສາຍຂອງຢາໂຄບ, ແລະ ກ່ຽວກັບຜູ້ຄົນພວກນີ້ຂອງເຮົາ ຜູ້ທີ່ຈະຖືກພວກເຂົາເຮັດໃຫ້ແຕກກະຈັດກະຈາຍໄປ;
3 ຕາມຈິງ, ຕາມຈິງແລ້ວ, ເຮົາກ່າວກັບເຈົ້າ, ເມື່ອ ເລື່ອງເຫລົ່ານີ້ຈະເປັນທີ່ຮູ້ແກ່ພວກເຂົາຈາກພຣະບິດາ, ແລະ ຈະອອກມາຈາກພຣະບິດາ, ຈາກພວກເຂົາມາເຖິງເຈົ້າ;
4 ເພາະມັນເປັນຄວາມສະຫລຽວສະຫລາດຂອງພຣະບິດາທີ່ພວກເຂົາສົມຄວນຖືກສະຖາປະນາຂຶ້ນໃນແຜ່ນດິນນີ້, ແລະ ຈັດຕັ້ງໃຫ້ເປັນຜູ້ຄົນທີ່ມີ ອິດສະລະພາບໂດຍອຳນາດຂອງພຣະບິດາ, ເພື່ອສິ່ງເຫລົ່ານີ້ຈະໄດ້ອອກມາຈາກພວກເຂົາມາຫາຜູ້ທີ່ເຫລືອຢູ່ຂອງລູກຫລານຂອງເຈົ້າ, ເພື່ອ ພັນທະສັນຍາຂອງພຣະບິດາຊຶ່ງໃຫ້ໄວ້ກັບຜູ້ຄົນຂອງພຣະອົງຈະສຳເລັດ, ໂອ້ ເຊື້ອສາຍອິດສະຣາເອນ;
5 ສະນັ້ນ, ວຽກງານເຫລົ່ານີ້ ແລະ ວຽກງານທີ່ຈະມາເຖິງໃນບັນດາພວກເຈົ້ານັບແຕ່ນີ້ໄປຈະອອກມາ ຈາກຄົນຕ່າງຊາດ, ແລະ ມາຫາ ລູກຫລານຂອງເຈົ້າ ຊຶ່ງຈະເສື່ອມໂຊມຢູ່ໃນຄວາມບໍ່ເຊື່ອຖືເພາະຄວາມຊົ່ວຮ້າຍ;
6 ເພາະພຣະບິດາເຫັນດັ່ງນັ້ນ ວ່າມັນຄວນອອກມາຈາກ ຄົນຕ່າງຊາດ, ເພື່ອພຣະອົງຈະໄດ້ສະແດງອຳນາດຂອງພຣະອົງຕໍ່ຄົນຕ່າງຊາດ, ເພື່ອດ້ວຍເຫດ ຄືຖ້າຫາກຄົນຕ່າງຊາດຈະບໍ່ເຮັດໃຈແຂງກະດ້າງ, ວ່າພວກເຂົາຈະກັບໃຈ ແລະ ມາຫາເຮົາ ແລະ ຮັບບັບຕິສະມາໃນນາມຂອງເຮົາ, ແລະ ຮູ້ເຖິງຫລັກທຳອັນແທ້ຈິງຂອງຄຳສອນຂອງເຮົາ, ເພື່ອພວກເຂົາຈະໄດ້ ນັບເຂົ້າຢູ່ໃນບັນດາຜູ້ຄົນຂອງເຮົາ, ໂອ້ ເຊື້ອສາຍອິດສະຣາເອນ;
7 ແລະ ເມື່ອສິ່ງເຫລົ່ານີ້ເກີດຂຶ້ນຄື ລູກຫລານຂອງເຈົ້າຈະເລີ່ມຮູ້ເລື່ອງເຫລົ່ານີ້—ມັນຈະເປັນເຄື່ອງໝາຍໃຫ້ແກ່ພວກເຂົາ ເພື່ອພວກເຂົາຈະໄດ້ຮູ້ວ່າ ວຽກງານຂອງພຣະບິດາໄດ້ເລີ່ມຕົ້ນແລ້ວ, ເພື່ອເຮັດໃຫ້ພັນທະສັນຍາ ຊຶ່ງພຣະອົງໄດ້ກະທຳໄວ້ກັບຜູ້ຄົນຜູ້ເປັນເຊື້ອສາຍອິດສະຣາເອນສຳເລັດ.
8 ແລະ ເມື່ອມື້ນັ້ນມາເຖິງ, ເຫດການຈະບັງເກີດຂຶ້ນຄື ກະສັດຈະປາກບໍ່ອອກ; ເພາະພວກເພິ່ນຈະໄດ້ເຫັນສິ່ງທີ່ບໍ່ເຄີຍບອກເລົ່າ; ແລະ ພວກເພິ່ນຈະພິຈາລະນາສິ່ງທີ່ບໍ່ເຄີຍໄດ້ຍິນ.
9 ເພາະວ່າໃນມື້ນັ້ນ ເພື່ອເຮົາພຣະບິດາຈະກະທຳວຽກງານຢ່າງໜຶ່ງ, ຊຶ່ງຈະເປັນວຽກງານອັນຍິ່ງໃຫຍ່ ແລະ ໜ້າອັດສະຈັນໃຈໃນບັນດາພວກເຂົາ; ແລະ ຈະມີຄົນໃນບັນດາພວກເຂົາທີ່ຈະບໍ່ເຊື່ອເລື່ອງນີ້, ເຖິງແມ່ນວ່າຈະມີຄົນມາປະກາດເລື່ອງນີ້ແກ່ເຂົາກໍຕາມ.
10 ແຕ່ຈົ່ງເບິ່ງ, ຊີວິດຂອງຂ້າໃຊ້ຂອງເຮົາຈະຢູ່ໃນມືເຮົາ; ສະນັ້ນ ພວກເຂົາຈະບໍ່ທຳຮ້າຍລາວ ເຖິງແມ່ນວ່າລາວຈະໄດ້ ຮັບບາດເຈັບເພາະພວກເຂົາກໍຕາມ. ແຕ່ເຮົາຈະປິ່ນປົວລາວ ເພາະວ່າເຮົາຈະສະແດງໃຫ້ພວກເຂົາເຫັນວ່າ ຄວາມສະຫລຽວສະຫລາດ ຂອງເຮົານັ້ນຍິ່ງໃຫຍ່ກວ່າເລ່ຫລ່ຽມຂອງມານ.
11 ສະນັ້ນ ເຫດການຈະບັງເກີດຂຶ້ນຄື ຜູ້ໃດກໍຕາມທີ່ຈະບໍ່ເຊື່ອໃນຄຳຂອງເຮົາ, ຜູ້ເປັນພຣະເຢຊູຄຣິດ ຊຶ່ງພຣະບິດາຈະເຮັດໃຫ້ ລາວນຳອອກໄປຫາຄົນຕ່າງຊາດ ແລະ ຈະປະທານອຳນາດໃຫ້ລາວເພື່ອລາວຈະນຳມັນອອກໄປຫາຄົນຕ່າງຊາດ, (ມັນຈະເປັນໄປຄືກັນກັບໂມເຊກ່າວໄວ້) ພວກເຂົາຈະຖືກ ຕັດອອກຈາກບັນດາຜູ້ຄົນຂອງເຮົາຜູ້ຢູ່ໃນພັນທະສັນຍາ.
12 ແລະ ຜູ້ຄົນຂອງເຮົາຜູ້ທີ່ເຫລືອຢູ່ຂອງຢາໂຄບຈະຢູ່ໃນບັນດາຄົນຕ່າງຊາດ, ແທ້ຈິງແລ້ວ, ຈະຢູ່ທ່າມກາງພວກເຂົາເໝືອນດັ່ງ ສິງໃນບັນດາສັດໃນປ່າ, ແລະ ດັ່ງສິງໜຸ່ມຢູ່ໃນບັນດາຝູງແກະ ຊຶ່ງຖ້າຫາກມັນຜ່ານໄປ ທັງຈະ ຢຽບຍ່ຳ ແລະ ຈີກເປັນຕ່ອນໆ, ແລະ ບໍ່ມີໃຜປົດປ່ອຍໄດ້.
13 ມືຂອງພວກເຂົາຈະຍົກຢູ່ເທິງຜູ້ປໍລະປັກຂອງພວກເຂົາ, ແລະ ສັດຕູຂອງພວກເຂົາຈະຖືກຕັດອອກໄປທັງໝົດ.
14 ແທ້ຈິງແລ້ວ, ວິບັດແກ່ຄົນຕ່າງຊາດ ຖ້າຫາກພວກເຂົາບໍ່ ກັບໃຈ; ເພາະເຫດການຈະບັງເກີດຂຶ້ນໃນມື້ນັ້ນ, ພຣະບິດາໄດ້ກ່າວ, ວ່າເຮົາຈະເອົາມ້າຂອງເຈົ້າໄປຈາກທ່າມກາງພວກເຈົ້າ, ແລະ ເຮົາຈະທຳລາຍລໍ້ຂອງເຈົ້າ;
15 ແລະ ເຮົາຈະທຳລາຍເມືອງທັງຫລາຍໃນແຜ່ນດິນຂອງເຈົ້າ, ແລະ ຈະຢຽບຍ່ຳທີ່ໝັ້ນທັງໝົດຂອງເຈົ້າ;
16 ແລະ ເຮົາຈະຕັດການໃຊ້ຄາຖາອອກໄປຈາກແຜ່ນດິນຂອງເຈົ້າ, ແລະ ເຈົ້າຈະບໍ່ມີໝໍດູອີກຕໍ່ໄປ;
17 ຮູບຄວັດສະຫລັກຂອງເຈົ້າເຮົາຈະຕັດອອກນຳອີກ, ແລະ ຮູບບູຊາຂອງເຈົ້າອອກຈາກທ່າມກາງພວກເຈົ້າ, ແລະ ເຈົ້າຈະບໍ່ກາບໄຫວ້ວຽກງານຈາກມືຂອງເຈົ້າອີກຕໍ່ໄປ;
18 ແລະ ເຮົາຈະຖອນປ່າອອກຈາກທ່າມກາງພວກເຈົ້າ; ເຮົາຈະທຳລາຍເມືອງຂອງເຈົ້ານຳອີກ.
19 ແລະ ເຫດການຈະບັງເກີດຂຶ້ນຄື ການເວົ້າຕົວະ, ແລະ ການຫລອກລວງ, ແລະ ການອິດສາບັງບຽດ, ແລະ ການຜິດຖຽງກັນ, ແລະ ການຫລອກລວງຂອງປະໂລຫິດ, ແລະ ການໂສເພນີ ຈະສູນສິ້ນໄປທັງໝົດ.
20 ເພາະເຫດການຈະບັງເກີດຂຶ້ນ, ພຣະບິດາໄດ້ກ່າວ, ວ່າໃນມື້ນັ້ນຜູ້ໃດກໍຕາມທີ່ຈະບໍ່ກັບໃຈ ແລະ ບໍ່ມາຫາບຸດທີ່ຮັກຂອງເຮົາ, ເຮົາຈະຕັດເຂົາອອກຈາກບັນດາຜູ້ຄົນຂອງເຮົາ, ໂອ້ ເຊື້ອສາຍອິດສະຣາເອນ;
21 ແລະ ເຮົາຈະທຳການແກ້ແຄ້ນ ແລະ ໂມໂຫຮ້າຍພວກເຂົາດັ່ງທີ່ກັບຄົນນອກສາດສະໜາ, ຢ່າງທີ່ພວກເຂົາບໍ່ເຄີຍໄດ້ຍິນ.
22 ແຕ່ຖ້າຫາກພວກເຂົາຈະກັບໃຈ ແລະ ເຊື່ອຟັງຄຳຂອງເຮົາ, ແລະ ບໍ່ເຮັດໃຈແຂງກະດ້າງແລ້ວ, ເຮົາຈະ ສະຖາປະນາສາດສະໜາຈັກຂອງເຮົາຂຶ້ນໃນບັນດາພວກເຂົາ, ແລະ ພວກເຂົາຈະເຂົ້າມາສູ່ພັນທະສັນຍາ ແລະ ຖືກ ນັບເຂົ້າຢູ່ໃນບັນດາຜູ້ທີ່ເຫລືອຢູ່ນີ້ຂອງຢາໂຄບ, ຊຶ່ງເຮົາໄດ້ມອບແຜ່ນດິນນີ້ໃຫ້ເປັນມູນມໍລະດົກຂອງພວກເຂົາ;
23 ແລະ ພວກເຂົາຈະຊ່ວຍເຫລືອຜູ້ຄົນຂອງເຮົາ, ຜູ້ທີ່ເຫລືອຢູ່ຂອງຢາໂຄບ, ແລະ ຫລາຍຕໍ່ຫລາຍຄົນຂອງເຊື້ອສາຍອິດສະຣາເອນທີ່ຈະກັບມາອີກ, ເພື່ອພວກເຂົາຈະສ້າງເມືອງໜຶ່ງຂຶ້ນ, ຊຶ່ງຈະຖືກເອີ້ນວ່າ ເຢຣູຊາເລັມໃໝ່.
24 ແລະ ແລ້ວພວກເຂົາຈະຊ່ວຍເຫລືອຜູ້ຄົນຂອງເຮົາເພື່ອພວກເຂົາທີ່ແຕກກະຈັດກະຈາຍກັນໄປຕາມຜືນແຜ່ນດິນຈະໄດ້ຖືກເຕົ້າໂຮມມາສູ່ເຢຣູຊາເລັມໃໝ່.
25 ແລະ ແລ້ວ ອຳນາດຂອງສະຫວັນຈະລົງມາເທິງບັນດາພວກເຂົາ; ແລະ ເຮົາຈະຢູ່ໃນທ່າມກາງພວກເຂົາເໝືອນກັນ.
26 ແລະ ແລ້ວວຽກງານຂອງພຣະບິດາຈະເລີ່ມຕົ້ນໃນມື້ນັ້ນ, ເມື່ອພຣະກິດຕິຄຸນນີ້ຖືກສັ່ງສອນໃນບັນດາຜູ້ທີ່ເຫລືອຢູ່ຂອງຜູ້ຄົນພວກນີ້. ຕາມຈິງແລ້ວເຮົາກ່າວກັບເຈົ້າວ່າ ໃນມື້ນັ້ນວຽກງານຂອງພຣະບິດາຈະ ເລີ່ມຕົ້ນໃນບັນດາຜູ້ຄົນທັງໝົດຂອງເຮົາທີ່ແຕກກະຈັດກະຈາຍກັນໄປ, ແທ້ຈິງແລ້ວ, ແມ່ນແຕ່ເຜົ່າທີ່ ຫາຍໄປ, ຊຶ່ງພຣະບິດາໄດ້ນຳພວກເຂົາອອກໄປຈາກເຢຣູຊາເລັມ.
27 ແທ້ຈິງແລ້ວ, ວຽກງານຈະເລີ່ມຕົ້ນດ້ວຍພຣະບິດາໃນບັນດາຜູ້ຄົນທັງໝົດຂອງເຮົາທີ່ ແຕກກະຈັດກະຈາຍກັນໄປ, ເພື່ອຕຽມທາງໄວ້ ຊຶ່ງໂດຍທາງນັ້ນ ພວກເຂົາຈະມາຫາເຮົາ, ເພື່ອພວກເຂົາຈະໄດ້ເອີ້ນຫາພຣະບິດາໃນນາມຂອງເຮົາ.
28 ແທ້ຈິງແລ້ວ, ແລະ ແລ້ວວຽກງານຈະເລີ່ມຕົ້ນດ້ວຍພຣະບິດາໃນບັນດາປະຊາຊາດທັງປວງ ໃນການຕຽມທາງໄວ້ ຊຶ່ງທາງນັ້ນ ພຣະອົງຈະ ເຕົ້າໂຮມຜູ້ຄົນຂອງພຣະອົງກັບບ້ານ ສູ່ແຜ່ນດິນຊຶ່ງເປັນມູນມໍລະດົກຂອງພວກເຂົາ.
29 ແລະ ພວກເຂົາຈະອອກຈາກປະຊາຊາດທັງໝົດ; ແລະ ພວກເຂົາຈະບໍ່ອອກໄປດ້ວຍ ຄວາມຮີບຮ້ອນ, ຫລື ຫລົບໜີໄປ, ເພາະເຮົາຈະນຳໜ້າພວກເຂົາໄປ, ພຣະບິດາໄດ້ກ່າວ, ແລະ ເຮົາຈະຮັກສາທາງຫລັງຂອງພວກເຂົາ.