1 Ita, idi nakita ni Alma a pinagulimek dagiti balikas ni Amulek ni Zeezrom, agsipud ta nakitana a natiliwan ni Amulek ti panagulbod ken panangallilawna tapno dadaelen isuna, ket idi nakitana a nangrugi nga agtigerger gapu iti pannakariknana iti basolna, linukatanna ti ngiwatna ket rinugianna ti nakisao kenkuana, ken tapno pasingkedanna dagiti balikas ni Amulek, ken tapno pasingkedanna dagiti balikas ni Amulek, ken tapno ipalawagna dagiti paglablabesan ti bambanag, wenno tapno ipakaammona dagiti nasantuan a kasuratan iti labes ti naaramid ni Amulek.

2 Ita nangngeg dagiti tattao iti aglikmut dagiti imbaga ni Alma ken ni Zeezrom; agsipud ta dakkel ti ummong, ket kastoy ti panagsaona:

3 Ita, Zeezrom, makitam a natiliwankan iti kinaulbod ken kinasikapmo, agsipud ta saanka laeng a nagulbod iti tao ngem nagulbodka pay iti Dios; gapu ta kiaten, ammona amin a pampanunotmo, ket makitam a naipakaammo kadakami dagiti pampanunotmo babaen ti Espirituna;

4 Ket makitam nga ammomi a naallilaw unay ti planom, a kas iti panangallilaw ti sairo, ta panggep ti panangulbod ken panangallilawmo kadagitoy tao a mangsugsog kadakuada a bumusor kadakami, a manglais ken mangpatalaw kadakami—

5 Ita daytoy ti plano ti kabusormo, ket ipakatna kenka ti bilegna. Ita kayatko a nasken a lagipem nga ania man nga ibagak kenka ibagak iti amin.

6 Ket kitaen kunak kadakayo amin a palab-og daytoy ti kabusor, nga impakatna tapno mangtiliw kadagitoy a tattao, tapno iturayannakayo, tapno mapalikmutannakayo kadagiti kawarna, tapno makawarannakayo iti agnanayon a pannakadadael, babaen iti bileg ti panangadipenna.

7 Ita idi naisao ni Alma dagitoy a balikas, nangrugi a nagtigerger ni Zeezrom iti kasta unay, agsipud ta ad-adda a napapati iti bileg ti Dios; ken napapati pay nga addaan iti pannakaammo da Alma ken Amulek maipapan kenkuana, agsipud ta napapati nga ammoda dagiti kapanunotan ken panggep ti pusona; agsipud ta naited kadakuada ti bileg tapno maammuanda dagitoy a banag a mayannurot ti espiritu ti panangipadto.

8 Ket nangrugi ni Zeezrom nga agsaludsod kadakuada a sireregta, tapno ad-adu pay ti maammuanna maipapan iti pagarian ti Dios. Ket kinunana ken ni Alma: Ania ti kayat a sawen daytoy a sinao ni Amulek maipapan iti panagungar ti natay, a bumangon ti amin manipud iti patay, agpada ti nalinteg ken saan a nalinteg, ken maisaklang iti sango ti Dios tapno maukomda mayannurot kadagiti aramidda?

9 Ket ita rinugian ni Alma nga ipalawag kenkuana dagitoy a banag, a kunana: Naited daytoy iti adu tapno maammuanda dagiti misterio ti Dios; nupay kasta naisaadda babaen ti nainget a bilin a saanda nga iburay malaksid no mayannurot iti paset ti balikasna nga ipaayna kadagiti annak ti tattao, a mayannurot iti aramid ken kinaregta nga itedda kenkuana.

10 Ket ngarud, siasino man a mangpatangken iti pusona, umawatto iti basbassit a paset ti balikas; ket siasino man a saan a mangpatangken iti pusona, maitedto kenkuana ti dakdakkel a paset ti balikas, agingga a maited kenkuana a maammuan dagiti misterio ti Dios agingga a maammuanna amin a pakabuklanda.

11 Ket dagiti mangpatangkento kadagiti pusoda, maitedto kadakuada ti basbassit a paset ti balikas agingga nga awan ti ammoda maipapan kadagiti misteriona; ket kalpasanna matiliwdanto nga adipen ti sairo, ket maiturongda iti pannakadadael babaen ti pagayatanna. Ita daytoy ti kayat a sawen dagiti kawar ti impierno.

12 Ket nalawag a naisaon ni Amulek ti maipapan iti patay, ken iti panagbangon manipud itoy a matay a kasasaad nga agturong iti saan a matay a kasasaad, ken iti pannakaisaklang iti pangukoman ti Dios, tapno maukom mayannurot kadagiti aramidtayo.

13 Kalpasanna no napatangkenen dagiti pusotayo, wen, no pinatangkentayo ti puspusotayo a maibusor iti balikas, isu a saannanto a masarakan kadatayo, ngarud nakaam-amakto ti kasasaadtayo, agsipud ta kalpasanna makedngantayto.

14 Agsipud ta dagiti balikastayo ti mangkeddeng kadatayo, wen, kedngandatayo dagiti amin nga aramidtayo; saantayto a maibilang nga awan mulitna; ket kedngandatayo met ti kapanunotantayo; ket iti daytoy nakaam-amak a kasasaad saantayto a maitured a tumangad iti Diostayo; ket naragragsaktayo pay koman no mabilintayo dagiti bato ken dagiti bantay a manggabur kadatayo tapno mailemmengtayo iti imatangna.

15 Ngem saan a mabalin daytoy; nasken mga umaytayo ken tumakder iti sanguananna iti gloriana, ken iti bilegna, ken iti pigsana, tan-okna, ken pagturayanna, ket bigbigentayo iti agnanayon a bain nga amin a panangukomna ket nalinteg; a nalinteg iti amin nga aramidna, ken naasi iti annak ti tattao, ken addaan iti amin a bileg a mangisalakan ti tunggal tao a mamati iti naganna ken mangpataud iti bunga a kasapulan ti panagbabawi.

16 Ket ita kitaen, kunak kadakayo a kalpasanna umayton ti patay, uray ti maikadua nga ipapatay, nga isu ti naespirituan nga ipapatay, kalpasanna isunton ti kanito a siasino man a matay kadagiti basbasolna, kas iti naindagaan a ipapatay, matayto met a naespirituan; wen, matayto kadagiti banag maipapan iti kinalinteg.

17 Kalpasanna isunton ti kanito a dagiti tuokda kaslanto iti dan-aw ti apuy ken asupre, a ti gil-ayabna agpangato nga awan inggana; ket kalpasanna isunton ti kanito a maikawardanto iti agnanayon a pannakadadael, mayannurot iti bileg ken panangadipen ni Satanas, isu a nangituray kadakuada mayannurot iti pagayatanna.

18 Kalpasanna, kunak kadakayo, agtalinaeddanto a kas man awan ti naaramid a pannubbot; agsipud ta saan a mabalin a masubbotda mayannurot iti linteg ti Dios; ket saanda a mabalin ti matay, gapu ta awanen ti panagrupsa.

19 Ita napasamak nga idi nalpas ti panagsao ni Alma kadagitoy a balikas, nangrugi nga ad-addan a nasdaaw dagiti tattao;

20 Ngem adda maysa nga Antionah, a kangatuan a panguloda, ti immasideg ket kinunana kenkuana: Ania daytoy kinunam, a nasken a bumangon ti tao manipud iti patay ket mabaliwan manipud iti matay iti saan a matay a kasasaad, tapno saan pulos a matay ti kararua?

21 Ania ti kayat a sawen ti nasantuan a kasuratan, nga agkuna nga inkabil ti Dios ti kerubin ken ti umap-apuy nga espada iti akindaya a paset ti minuyongan ti Eden, ta amangan a sumrek dagiti immuna a nagannaktayo ket manganda iti bunga ti kayo ti biag, ket agbiagda nga agnanayon? Ket ngarud maawatantayo nga awan ti mabalin a gundawayda nga agbiag iti agnanayon.

22 Ita kinuna ni Alma kenkuana: Daytoy ti banag nga ipalawagko koma. Ita naawatantayo a natnag ni Adan babaen ti pannanganna iti maiparit a bunga, mayannurot iti balikas ti Dios; ket ngarud mabigbigtayo, a babaen iti pannakatnagna, nagbalin amin a sangkatauan a managbasol ken natnag a tao.

23 Ket ita kitaen, kunak kadakayo a no la koma a nakapangan ni Adan iti bunga ti kayo ti biag iti dayta a kanito, awan koma ti patay, ket awan koma ti kaipapanan ti balikas, pagbalinenna nga ulbod ti Dios, agsipud ta kinunana: No manganka sigurado a matayka.

24 Ket maawatantayo nga umay ti ipapatay iti sangkatauan, wen ti ipapatay nga insao ni Amulek, ti naindagaan nga ipapatay; nupay kasta adda panawen a naipaay iti tao nga agbabawi; ngarud nagbalin daytoy a biag a pakapadasan a kasasaad; panawen a panagsagana a sumango iti Dios; panawen a panagsagana para iti awan patinggana a kasasaad a naisaomin, nga isu ti kalpasan ti panagungar dagiti natay.

25 Ita, no saan a gapu iti plano ti pannakasubbot, a naisaad manipud iti punganay ti lubong, awan koma ti panagungar ti natay; ngem adda naisaad a plano ti pannakasubbot, a mangipatungpal ti panagungar ti natay, a kas iti naisaon.

26 Ket ita kitaen, no mabalin la koma a nakapan ken nakapangan iti kayo ti biag ti immuna a nagannaktayo nagbalinda koma nga agnanayon a nakaay-ay-ay, nga awanan iti panagsagana a kasasaad; ket iti kasta ti plano ti pannakasubbot ket napaay koma, ken awan koma ti kaipapanan ti balikas ti Dios, nga awan mamaayna.

27 Ngem kitaen, saan a kasta; ngem naituding a nasken a matay ti tao; ket kalpasan ti ipapatay, nasken nga agpasakup iti panangukom, uray a kas met la iti nasaon a panangukom, nga isu ti panungpalan.

28 Ket kalpasan a naituding ti Dios a nasken a mapasamak dagitoy a bambanag iti tao, kitaen, sa nakitana a mainugot a nasken a maammuan ti tao ti maipapan kadagiti bambanag nga intudingna kadakuada.

29 Ngarud nangibaon kadagiti anghel a makisao kadakuada, a nakaigapuan ti pannakakita ti tattao ti kinadayagna.

30 Ket rinugianda manipud iti dayta a kanito ti umawag iti naganna; ngarud nakisao ti Dios kadagiti tattao, ket impakaammona kadakuada ti plano ti pannakasubbot, a naisaganan manipud iti pamuon ti lubong; ket impakaammona daytoy kadakuada a mayannurot ti pammati ken panagbabawi ken kadagiti nasantuan nga aramidda.

31 Gapuna, nangted iti bilbilin kadagiti tattao, isuda nga immuna a naglabsing kadagiti immuna a bilbilin a maipapan kadagiti bambanag a naindagaan, ken agbalin a kas kadagiti dios, a makaammo ti naimbag manipud iti dakes, a nangisaad kadagiti bagida iti kasasaad nga agtignay, wenno naisaad iti kasasaad nga agtignay mayannurot ti pagayatan ken pagragsakanda, agaramid man iti dakes wenno agaramid iti naimbag—

32 Ngarud nangted ti Dios kadakuada iti bilbilin, kalpasan ti panangipakaammona kadakuada iti plano ti pannakasubbot, a nasken a saanda agaramid iti dakes, ta ti dusa dayta isu ti maikadua nga ipapatay, a patay nga awan patinggana para kadagiti banag a maipapan iti kinalinteg; agsipud ta iti kasta awan bileg ti plano ti pannakasubbot, agsipud ta dagiti aramid ti kinalinteg ket saan a madadael, mayannurot iti kangatuan a kinaimbag ti Dios.

33 Ngem inawagan ti Dios dagiti tattao, iti nagan ti Anakna, (ta daytoy ti naisaad a plano ti pannakasubbot) a kunana: No agbabawikayo, ken saanyo a patangkenen dagiti pusoyo, sakonto kaasiankayo, babaen ti Bugbugtong nga Anakko;

34 Ngarud, siasino man nga agbabawi, ket saanna a patangkenen ti pusona, maaddaan iti karbengan iti asi babaen ti Bugbugtong nga Anakko, iti pannakaugas dagiti basbasolna; ket sumrekto dagitoy iti paginanaak.

35 Ket siasino man a mangpatangken iti pusona ket agaramid iti kinadakes, kitaen, ikarik iti pungtotko a saanto a makastrek iti paginanaak.

36 Ket ita, kakabsatko, kitaen kunak kadakayo, a no patangkenenyo dagiti pusoyo saankayonto a makastrek iti paginanaan ti Apo; ngarud, ti kinadakesyo ti mangkarit kenkuana a mangyetnag iti puntotna kadakayo a kas iti immuna a panangkarit, wen, mayannurot ti balikasna iti maudi a panangkarit a kas met iti immuna, iti agnanayon a pannakadadael dagiti kararuayo; ngarud mayannurot ti balikasna, agingga iti maudi nga ipapatay, a kas met iti immuna.

37 Ket ita, kakabsatko, gapu ta ammotayo dagitoy a banag, ken pudnoda, agbabawitayo, ken saantayo a patangkenen dagiti pusotayo, tapno saantayo a kariten ti Apo a Dios a mangyetnag iti pungtotna kadatayo iti daytoy maikadua a bilinna a naitedna kadatayo; ngem sumrektayo iti paginanaan ti Dios, a naisagana mayannurot ti balikasna.