1 Ao e koro bukina bwa i mwin uoua te ngaina ao te tairiki ao a nang ana rabwatana ni kawenea n te nne ni mate, are e karaoaki ibukin taunakiia aia mate.

2 Ao ngkanne te uea n aine e bon tia n ongo taekan Amon, ngaia are e kananako bwa e tangiria bwa e na roko nakoina.

3 Ao e koro bukina bwa Amon e karaoa are e tuangaki, ao e kawara te uea n aine, ma n tangiria bwa e na ataa te bwai ae tangiria bwa e na karaoia.

4 Ao e taku nakoina: Ana toro kainabau a bon tia ni kaotia nakoiu bwa ngkoe ana burabeti te Atua ae tabu, ao bon iai mwaakam ni karaoi mwakuri aika a mwaiti n arana.

5 Ngaia, are ngkanne arona aio, I tangiria bwa ko na nako n noora kainabau, bwa e a tia ni wene iaon ana kainiwene i nanon te maan ae uoua te ngaina ao uoua te tairiki; ao tabemwaang a taku bwa e aki mate, ma tabemwaang a taku bwa e mate ao e a boiraa, ao e riai bwa e na nneaki n te nne ni mate; mai irou, nakoiu e aki boiraa.

6 Ao ngkanne, bon aio are e tangiria Amon, bwa e ataia bwa te uea are Ramonaai e mena i aan mwaakan te Atua; e ataia bwa te rabuna ni kakewekewe e a teweaki nako ngkai man ana iango, ao te oota are e kaota ana iango, are ootan mimitongin te Atua, are bon kamimin ootan raoiroina—eng, te oota aio e a kaota nako kimwareirein tamneina, nangin te roo e a tia ni kakioaki nako, ao ootan te maiu are aki totoki e ura i nanon tamneina, eng, e ataia bwa aio are e a taonanako rabwatana, ao e uotaki nako i nanon te Atua.

7 Mangaia are, te bwai are e tangiria te uea n aine mai irouna bon te bwai are e tangiria naba. Ngaia are, e nako n noora te uea n aron are e tangiria te uea n aine mai irouna; ao e noora te uea, ao e ataia bwa e aki mate.

8 Ao e taku nakon te uea n aine: E aki mate, ma e matu i nanon te Atua, ao n teingabong e na manga teirake; ngaia are tai taunna.

9 Ao Amon e taku nakoina: Ko kakoaua aio? ao e taku nakoina: Akea au tia kakoaua ma ti am taeka, ao aia taeka ara toro; ma e ngae n anne I kakoaua bwa e na koro bukina n aron are ko taekinna.

10 Ao Amon e taku nakoina: Ko na kakabwaiaki ibukin korakoran am onimaki: I taku nakoim, neiko, bon akea aekan te onimaki anne i buakoia ni kabane Nibwaite.

11 Ao e koro bukina bwa e taratara ana kainiwene kainabana, man te tai teuana nakon te tai teuana ni karokoa naba te ingabong are e kataua Amon bwa e na teirake iai.

12 Ao e koro bukina bwa e teirake, n aron ana taeka Amon; ao ngke e teirake, e arora baina nakon te aine, ao e taku: E na kakabwaiaiaki aran te Atua, ao ko na kakabwaiaki.

13 Bwa n aron ae ko maiu, nooria, I a tia n noora au Tia Kaboai; ao e na roko, ao e na bungiaki iroun te aine, ao e na kabooia ni kabane aomata ake a kakoaua arana. Ao ngkanne, ngke e a tia n taekin taeka aikai, e onrake nanona, ao e a manga iinako n te kimwareirei, ao te uea n aine e iinako naba, bwa e taonaki nako n te Tamnei.

14 Ao ngkanne Amon ngke e noora Tamnein te Uea bwa e bwaro n aron ana tataro iaoia Reimwanaite, tarina, ake a karika te tangin wenei i marenaia Nibwaite, ke i buakoia ana aomata te Atua ibukin buakakaia ma kateia, e bwaka iaon bubuanwaena, ao e waaki ni bunra nako nanona n te tataro ma ni karabwarabwa nakon te Atua ibukin te bwai are e a tia ni karaoia ibukiia tarina; ao e bon taonaki nako n te kimwareirei; ao ikai are ngaia teniman a bwaka nako aontano.

15 Ao ngkanne, ana toro te uea a nooria bwa a bwaka, ao a bon tang naba nakon te Atua, bwa e a roko naba irouia maakan te Uea, bwa bon ngaia ake a tei i matan te uea ni kakoaua nakoina ibukin mwaakan Amon.

16 Ao e koro bukina bwa a wetea aran te Uea, ni korakoraia, n te aro are a bane ni bwaka nako aontano, ma ti temanna ae e aki bwaka te aine ae te Reimwanaite, ae arana Abiti, bwa e kaman rairaki nakon te Uea i nanon ririki aika a mwaiti, man te kaotioti ae kamimi ae karekea tamana.

17 Ngaia, are ngkai e a bon tia n rairaki nakon te Uea, ma e aki kaokaotia ma i mwaaina, ngaia are ngke e a nooria bwa ana toro ni kabane Ramonaai a bane ni bwaka nako aontano, ao aia mataniwi te aine naba, are te uea n aine, ao Amon e wene n tangaina iaon tano, e bon ataia bwa mwaakan te Atua; ao e iangoia bwa te bwai are e riki arei, ngkana e kaotaki nakoia aomata bwa teraa ae riki i buakoia, bwa ngkana a noora te bwai arei ao a na bon kakoaua mwaakan te Atua ngaia are e biri man te bata teuana nakon te bata, ni kaotia nakoia aomata.

18 Ao a waaki n ikotiia i marenaia nakon mwengan te uea. Ao a roko aomata aika a mwaiti, ao a mimi n noora te uea, ao te uea n aine, ao aia toro ni wene n tangaina iaon tano, ao a wene ikekei n aiaron ae a mate; ao a noora naba Amon, ao nooria, bwa bon te Nibwaite.

19 Ao ngkanne aomata a ngurengure imarenaia; tabemwaang a taku bwa e korakora te buakaka ae roko iaoia, ke iaon te uea ma mwengana, ibukina bwa e kariaia bwa te Nibwaite arei e na tiku n te aba.

20 Ma tabemwaang a boaiia, ni kangai: Te uea e karokoa te buakaka iaon batana ibukina bwa e tiringia ana toro ake a kamaenakoi aia nanai ni man i ranin Teebuti.

21 Ao a bon boaaki naba irouia mwaane ake a tei i ranin Teebuti ni kamaenakoia nanai ni man ake ana bwai te uea, kioina ngke a bon un iroun Amon are e a tia n tiringia tariia tabemwaang i ranin Teebuti, n ana tai ni kamanoia ana nanai ni man te uea.

22 Ao ngkanne, temanna mai i buakoia, ake tarina e bon mate n ana kabaang Amon, ibukin korakoran unna iroun Amon, e kaotinakoa ana kabaang ao e kerake bwa e na orea Amon, n tiringnga; ma ngke e tabekarake ana kabaang bwa e na oroia, nooria, e bwaka ao e mate.

23 Ao ngkanne ti a nooria ikai bwa Amon e aki kona n tiringaki, bwa te Uea e a tia n taetae nakon Motiaea, tamana: N na kawakinna, ao e na riki nakoina n aron am onimaki—ngaia are Motiaea e onimakinna iroun te uea.

24 Ao e koro bukina bwa te uanao n aomata are a noora te mwaane arei bwa e bwaka ni mate, are e tabeka te kabaang bwa e na tiringa Amon, e roko te maaku iaoia ni kabane ao a rawa n arora baaia n ringnga ma naake a tia ni bwaka; ao a moanna ni mimi riki i marenaia bwa teraa bukin te mwaaka are e korakora arei, ke teraa nanon bwaai aikai ni kabane.

25 Ao e koro bukina bwa a mwaiti mai i buakoia ake a taku bwa Amon bon te Tamnei ae Korakora, ao tabemwaang a taku bwa e kanakomaiakaki iroun te Tamnei ae Korakora.

26 Ma tabemwaang a boaia ni kabane, n taku bwa bon te man kakang, are e kanakomaiakaki mai irouia Nibwaite bwa e na kammarakia.

27 Ao iai ake a taku bwa Amon e kanakomaiakaki iroun te Tamnei ae Korakora bwa e na kammarakia ibukin aia buakaka; te Tamnei ae Korakora bon ngaia are e aki toki n raonia Nibwaite, are e a tia ni kamaiuia mai i nanon baia; ao a taku bwa te Tamnei ae Korakora aio e a tia n tiringia tariia aika a mwaiti, Reimwanaite.

28 Ao ikai are e a rikirake ni korakora te kauntaeka i marenaia. Ao i nanon aia tai ni kauntaeka, e roko te toro te aine are karika rokoia aomata aika a mwaiti, ao ngke e noora te kauntaeka i marenaia aomata are a mwaiti e bon korakora nanokawakina, n te aro are e a tang.

29 Ao e koro bukina bwa e nakon te uea n aine ma n ana baina, bwa e na kateirakea ma i aontano; ao n te tai naba are e ringnga baina e teirake ma n tei iaon waena, ao e tang n te bwanaa ae korakora, ni kangai: O e na kakabwaiaki Iesu, are e a tia ni kamaiuai mai moone are e kakamaku! O e na kakabwaiaki te Atua, nanoanga te botanaomata aio!

30 Ao ngke e a tia n taekina aio, e ikoti baina, ma n onrake n te kimwareirei, ma n taekin taeka aika a mwaiti ake aki ataaki nanoia; ao ngke e a tia ni karaoa aio, e ana bain te uea, Ramonaai, ao nooria e teirake ma n tei iaon waena.

31 Ao ngke e nooria naba ngkekei bwa e mwaiti te kauntaeka i marenaia ana botanaomata, e waaki ma ni boaia, ma n reireinia taeka ake e a tia n ongo mai wiin Amon; ao ake a kakoauai aia taeka, a bon rairaki nakon te uea.

32 Ma a bon mwaiti mai i buakoia ake a rawa n ongo ana taeka; ngaia are a bon nako.

33 Ao e koro bukina bwa Amon e teirake ao e buokiia naba, ma ana toro naba Ramonaai; ao a bon taekinna nakoia aomata te bwai are e riki arei—are nanoia e a tia ni bitaki; ao akea riki nanoia ni kan karaoa te buakaka.

34 Ao nooria, a mwaiti ake a taetae nakoia aomata bwa a tia n nooria anera ao a tia ni maroro mangaia; ao ngaia are a tuangiia bwaai aika a kaineti ma te Atua, ao ana raoiroi.

35 Ao e koro bukina bwa a bon mwaiti ake a kakoauai aia taeka, ao mwaitia ake a kakoauaia a bon bwabetitoaki; ao a riki bwa aomata aika a raoiroi, ao a bon katea te ekaretia i buakoia.

36 Ao ngaia are e a waaki ana mwakuri te Uea i buakoia Reimwanaite; ngaia are te Uea e karuoa Tamneina iaoia; ao ti nooria bwa e arora baina nakoia aomata ni kabane ake a rairinanoia ma ni kakoaua arana.