1 Ao e koro bukina bwa Amwarakaite ao Amuronaite ao Reimwanaite ake a mena n te aba are Amuron, ao n te aba naba are Eram, ao ake a mena naba n te aba are Ierutarem, ao ni kakimototoa, aba ni kabane ake a otabwaninia, ake a tuai n rairaki ao a tuai ni katoka i aoia te ara are Aentaai-Nibwaai-Riaai, a kaunaki irouia Amwaraikaite ao Amuronaite bwa a na un nakoia tariia.

2 Ao uniia e rikirake ni korakora ni kaaitaraia, n te aro are a moanna ni kaitaraa aia uea, ngaia are aki tangiria bwa aia uea; ngaia, are a tabeki aia bwai ni buaka ni kaaitaraia aomata ake Aentaai-Nibwaai-Riaai.

3 Ao ngkanne te uea e katoka ueana iaon natina, ao e aranna bwa Aentaai-Nibwaai-Riaai.

4 Ao te uea e mate n te ririki naba anne are Reimwanaite a moanna iai ni katauraoia bwa a na buakaniia ana aomata te Atua.

5 Ao ngkanne Amon ao tarina ao aomata ni kabane ake raona ngke a noora aia katauraoi Reimwanaite bwa a na tiringia tariia, a roko nakon te aba are I-Mirian, ao ikekei are Amon e kaitibo ma tarina ni kabane; ao mai ikekei are a nakon te aba are Itimaera bwa a na maroro ma Ramonaai ao tarina are Aentaai-Nibwaai-Riaai, bwa teraa are a na karaoia ibukin kamaiuaia mai irouia Reimwanaite.

6 Ao ngkanne bon akea temanna mai i buakoia aomata ake a rairaki nakon te Uea ae kukurei n tabeki bwai ni buaka ni kaaitaraia tariia; tiaki, a bon rawa naba ni katauraoi ibukin te buaka; eng, ao aia uea naba e tuangiia bwa a na aki.

7 Ao ngkanne aikai taeka ake e taekin nakoia aomata ni kaineti ma te bwai are e riki: I karabwa Atuau, au botanaomata ae tangiraki irou, bwa Atuara ae korakora n ana raoiroi ao e a tia ni kanakomaia tarira aikai, aika Nibwaite, nakoira, bwa a na kabwarabwara nakoira, ma ni kakoaua nakoira buakakan aia katei ara bakatibu ake a buakaka.

8 Ao nooria, I karabwa te Atua ae korakora bwa e a tia n anganiira mwakoron Tamneina bwa e na kamarauraua nanora, bwa ti a tia ni karekea te reitaki ma tarira aikai, aika Nibwaite.

9 Ao nooria, I karabwa naba Atuau, bwa n reken te reitaki aio ti a tia ni kakoauai burera, ma tiritiri ake a mwaiti ake ti a tia ni karaoi.

10 Ao I karabwa naba Atuau, eng, Atuau ae korakora, bwa e a tia n anganiira bwa ti na kona n rairinanora ma ni bwaai aikai, ao e a tia naba ni kabwarai burera man ara bure aika a mwaiti ma tiritiri ake ti a tia ni karaoi, man namakinan raoiroin natina.

11 Ao ngkanne nooria, tariu, ngkai e a bon tia are ti kona ni karaoia (ngkai bon ngaira ae ti bua mai i buakoia aomata ni kabane) n rairinanora man ara bure nako ma tiritiri aika a mwaiti ake ti a tia ni karaoi, ma ni kona ni karekea te anga are te Atua e na anai mai inanora, bwa bon anne ara kabanea ni kona n rairinanora raoi i matan te Atua bwa e na kanakoa memeara—

12 Ao ngkanne, tariu aika kam bane n tangiraki, ngkai te Atua e a tia n ana memeara, ao a raneanea ara kabaang, ao ti na aki manga oki ni kamemeaa ara kabaang n raraaia tarira.

13 Nooria, I taku nakoimi, Tiaki, ti na kaawakin ara kabaang bwa a na aki memea n raraaia tarira; bwa ngkana arona bwa ti a manga kamemeaa riki ara kabaang ao a aki manga kona n tebokaki ni karaneaneaki rinanon raraan Natin te Atua ae korakora, are e na kawawaeaki ibukin te mwakuri ni kamaiu ibukin ara bure.

14 Ao e a tia n nanoangaira te Atua ae korakora, ma ni kaoti bwaai aikai nakoira bwa ti aonga n aki mate; eng, ao e kaoti nakoira bwaai aikai i mwaain rikiia, ibukina bwa e tangirira ao e tangiriia naba natira; ngaia are i nanon ana nanoanga ao e kawarira irouia ana anera, bwa e aonga n ae te babaire ni kamaiu e na kaotaki nakoira ao nakoia naba rooro aika a na roko.

15 O, ai korakorara ana nanoanga Atuara. Ao ngkanne nooria, kioina ngkai ti a bon tia ni kabanea korakorara ni karaoa are ti kona ni kanakoa memeara mai iroura, ao a raneanea ara kabaang, ti na karabai bwa aonga ni kawakinaki raneaneaia, bwa ara kakoaua nakon Atuara n te kabanea ni bong, ke n te bong are ti na uotaki nako matana bwa ti na motikaki taekara, bwa tiaki kamemeai ara kabaang n raraaia tarira man te tai are e kanakoa ana taeka nakoira are ti a tia ni kaitiakaki iai.

16 Ao ngkanne, tariu, ngkana tarira a ukora tiringakira, nooria ti na karabai ara kabaang, eng, ti na bon taunii ni kananoi i aantano, bwa aonga ni kawakinaki raneaneaia, bwa te kakoaua bwa tiaki kabonganai, n te kabanea ni bong; ao ngkana tarira a tiringira, nooria, ti na nakon Atuara ao ti na kamaiuaki.

17 Ao ngkanne e koro bukina bwa ngke te uea e a toki ana taeka aikai, ao aomata ni kabane a ikotaki, a anai aia kabaang ao aia bwai ni buaka ni kabane ake a kakabonganai ni kawawaea iai te raraa, ao a bon taunii ni kananoi i aantano.

18 Ao aio are a karaoia, bwa n aia taratara te kakoaua nakon te Atua, ao nakoia naba aomata, bwa a na aki manga oki ni kabongana aia bwai ni buaka ibukin kawawaean raraan te aomata; ao aio are a karaoia, ni kamatoa ma ni karaoa te berita ae tabu ma te Atua, a na anga maiuia nakon ae a na katinakoa raraaia tariia; ao a na anga nakon tariia nakon ae a na anaia mai irouna; a na bon beku korakora ni baia nakon ae a na kabanea aia bong n taningaroti.

19 Ao ikai are ti a nooria bwa, ngke Reimwanaite aikai a karekea kakoauana man ataa te koaua, a bon matoatoa, ma ni kukurei ni mate nakon ae a na karaoa ae bure; ao ikai are ti nooria bwa a taunii aia bwai ni buaka ibukin te rau, ke a taunii aia bwai ni buaka, ibukin te rau.

20 Ao e koro bukina bwa tariia, ake Reimwanaite, a katauraoi nakon te buaka, man roko nakon te aba are Nibwaai ibukin tiringan te uea, man onean mwiina, ao ibukin naba tiringakia kaain Aentaai-Nibwaai-Riaai man te aba.

21 Ao ngkanne aomata a nooria bwa a roko ni kaaitaraia ao a otinako ni kaitibo mangaia, ao a wene n tangaina imwaia i aontano, ma ni wetea aran te Uea; ao ngaia are a tiku n aekaia aio ngke a bwakaraki irouia Reimwanaite, man tiringaki n te kabaang.

22 Ao ibukina bwa aki bo ma te kaitara, a tiringia teuana te ngaa ao niman mai i buakoia; ao ti ataia bwa a bon kakabwaiaki bwa a tia n nako ni maeka ma Atuaia.

23 Ao ngkanne Reimwanaite ngke a nooria bwa tariia aki biri nako man te kabaang, ke n rairaki nakon te atai ke te maing, ma a wene ao a mate, man neboa te Atua i nanon tiringakia n te kabaang—

24 Ao ngkanne Reimwanaite ngke a noora aio, ao a toki man tiringakia; ao a bon mwaiti ake a rawawata nanoia ibukiia tariia ake a tia ni bwaka i aan te kabaang, bwa a rairinanoia man bwaai ake a tia ni karaoi.

25 Ao e koro bukina bwa a karenakoi aia bwai ni buaka, ao a rawa ni manga anai riki, bwa a maraki n taian tiritiri ake a tia ni karaoi; ao a ruo nako naano n aekaia tariia, n onimakina aia nanoanga ake a ti a n tabeki baia n tiringia.

26 Ao e koro bukina bwa ana aomata te Atua a raonaki n te bong arei irouia aika a mwaiti riki nakoia ake a tiringaki; ao naake a tiringaki bon aomata aika a raoiroi, mangaia ae bukina ae ti na aki nanououa bwa a kamaiuaki.

27 Ao bon akea ae e buakaka are e tiringaki i buakoia; ma e raka iaon teuana te ngaa are e a karekea ataakin te koaua; ngaia are ti a nooria bwa te Uea e mwakuri n aanga aika a mwaiti ibukin kamaiuaia ana aomata.

28 Ao ngkanne mwaitia Reimwanaite ake a tiringia tariia bon Amwarakaite ao Amuronaite, are angiia a bon ira ana waaki Neooa.

29 Ao ngkanne, mai i buakoia ake a raonia ana aomata te Uea, bon akea aika Amwarakaite ke Amuronaite, ke ake a ira ana waaki Neooa, ma bon aia kariki rikaaki raoi Reimwan ma Remuera.

30 Ao ikai are ti a kona n nooria, bwa i mwin ae a ti a te botanaomata teuana ni kaotaki iroun Tamnein te Atua, man tia ni karekea ataakin bwaai aika a kaineti ma te raoiroi, ao a manga tia ni bwaka n te bure ma riaoan te tua, a riki bwa aomata aika a matoatoa riki, ao ngkanne e a buakaka riki aroia nakon are ngke a tuai n atai bwaai aikai.