Ing
Libru Nang Mormon

Nung makanian, iti kinuyad yang kasulatan da ring tau nang Nephi, at makanian mu naman ding Lamanite — Sinulat karing Lamanite, a mitagan king bale nang Israel; at makanian mu naman karing Judio at Gentil — Sinulat bilang kautusan, at makanian mu naman king espiritu ning pamanula at ning pamipatilip — Sinulat at misara, at misinup angga king Guinu, bang ela masira — Bang lumual king kalam at upaya ning Dios angga king pamipalino king kabaldugan karin — Sera nang Moroni, at misinup angga king Guinu, bang lumual king takdang oras king kapamilatan da ring Gentil — Ing pamipalino king kabaldugan karin king kalam ning Dios.

Metung a kinuyad a kasulatang meyakua ibat king Libru nang Ether mu naman, a kasulatan da ring tau nang Jared, a mikalat king panaung ing Guinu giluan nala ding amanu da ring tau, aniang mitatalakad lang tore bang miras banua — Iti bang ipakit karing mitagan king bale nang Israel nung nanu lang dakilang bage a gewa ning Guinu para karing karelang ninunu; at bang abalu dala ding pangaku na ning Guinu, a ila ela misakuil kapilanman — At makanian mu naman para king kapaniwalan da ring Judio at Gentil a i Jesus ya ing Cristo, ing Alang Anggang Dios, a mipapakit king keang sarili karing anggang bansa — At ngeni, nung ating kamalian ila deta ding kamalian da ring tau; ania pin, eyu la tututulan ding bage tungkul king Dios, bang ikayu mayakit kayung alang musing king piukuman nang Cristo.