Ing Patutu Da Ring Atlung Saksi

Kapabaluan karing anggang bansa, lahi, amanu, at karing tau, kaninu man datang ing obrang iti: A ikami, king kapamilatan ning grasya ning Dios Ibpa, at ing kekatamung Guinung Jesucristo ikit mila ding lamina a maglaman karing kasulatan a reti, nung sanu ing kasulatan da ring tau nang Nephi, at anti murin ding Lamanite, a karelang kapatad, at anti murin ding tau nang Jared, a menibatan king tore a mesabi na. At balu mi mu naman a misalin la king kalam at upaya ning Dios, uling ing keang bosis ya ing sinabi kekami; anya balu ming ating kasiguraduan a ing obrang iti tutu ya. At patutuanan mi mu naman a ikit mila ding makaukit karing lamina; at ila mipakit la kekami king upaya ning Dios, at e king tau. At kekaming sasabiang maki katinuan, a ing angel ning Dios tinipa ya ibat banua, at darala nala at kebit king arap da ring kekaming mata, a apagmasdan at ikit mila ding lamina, at ding makaukit karin; at balu mi a ita king grasya ning Dios Ibpa, at ning kekatamung Guinung Jesucristo, a kekaming ikit at patutuanan mi a ding bage a reti tutu la. At iti makapagmulala karing kekaming mata. Makanyan man, ing siwala ning Guinu inutus na kami a magpatutu kaniti; aniya para makatupad karing kautusan ning Dios, patutuanan mila ding bage a reti. At balu mi nung maging matapat kami kang Cristo, alako mi king kekeng imalan ing daya da ring sablang tau, at mayakit kaming alang kasalanan king piukuman nang Cristo, at akayabe miyang manuknangan kapilan man king banua. At ing dangal king Ibpa, at king Anak, at king Espiritu Santo, a metung a panga Dios. Amen.