Panimula

Ing Libru nang Mormon metung yang libru ning banal a kasulatan a kalupa na ning Biblia. Iti metung yang kasulatan da ring pamakiutus ning Dios karing minunang taung menuknangan karing America at maglaman king kabilugan na ning alang anggang ebanghelio.

Ing libru sinulat de ring dakal a minunang propeta king espiritu ning pamanula at pamipatilip. Ding karelang amanu, a misulat karing gintung lamina, mesabi la at kinuyad ning metung a tagasulatkasaysayan a propetang makilagiung Mormon. Ing kasulatan bibiye yang istorya ning aduang dakilang sibilisasyun. Ing metung menibat ya king Jerusalem anyang 600 B.C. at kaibat mepitna karing aduang bansa, mekilalang ding Nephite at ding Lamanite. Ing metung pa dinatang yang mas maranun anyang ing Guinu giluan nala ding amanu king Tore nang Babel. Ing grupung ini mekilala ya bilang ding Jaredite. Kaibat ning libu-libung banua, ing eganagana mesira bukud karing Lamanite, at ila ding pekaninunu da ring Amerikanung Indian.

Ing pekadakilang milyari a misulat king Libru nang Mormon ya ing personal a pamanibala nang Jesucristo karing Nephite kaibat ning keang pamanyubling mie. Iti ing magisplika karing doktrina ning ebanghelio, magbalangkas king planu ning kaligtasan, at sasabi karing tau nung nanu ing dapat dang gawan bang manikuang kapayapan king bie a ini at alang anggang kaligtasan king bie daratang.

Anyang ayari nalang Mormon ding keang sinulat, biniye nala ding istorya king keang anak i Moroni, a dinagdag karing keang sariling amanu at misinup ding lamina king bunduk-bundukan ning Cumorah. Anyang Septiyembre 21, 1823, ing Moroni mu namang ini, kanita metung neng mipaligayan, sinubling mebie king pangatau, pepakit ya kang Propetang Joseph Smith at tiruanan ne tungkul king makatuang kasulatan at ing makatakdang pamagsalin king amanung Inglis.

King takdang panaun ding lamina mibiye la kang Joseph Smith, a migsalin kareti king kapamilatan ning kalam at upaya ning Dios. Ing kasulatan ngeni melimbag ya karing dakal a amanu bilang metung a bayu at karagdagang saksi a i Jesucristo ya ing Anak ning mabie Dios at ding anggang lumapit kea at mamintu karing batas at ordinansa ning ebanghelio malyari lang miligtas.

Tungkul king kasulatan a iti ing Propetang Joseph Smith sinabi na: “Sinabi ku karing kapatad a ing Libru nang Mormon ya ing pekaustu king sanumang libru king yatu, at ing pekapundasyung batu ning kekatamung relihiyon, at ing tau milalapit ya king Dios king kapamilatan ning pamamintu karing tuntunan na kesa king kapamilatan ning sanumang aliwang libru.”

Bilang karagdagan kang Joseph Smith, ing Guinu memili ya pang labing metung bang akit dala king sarili da ring laminang gintu at bang maging maulagang saksi na ning katutuan at kabanalan ning Libru nang Mormon. Ding karelang sinulat a patutu miabe la keni bilang “Ing Patutu da ring Atlung Saksi” at “Ing Patutu da ring Walung Saksi.”

Agkatan mila ding anggang tau karing anggang lugal a basan de ing Libru nang Mormon, bang misip-isip masalese king mensaheng makalaman kaniti, at aduan king Dios, ing Alang Anggang Ibpa, king lagiu nang Cristo nung ing libru tutu ya. Detang misundu king obrang ini at maniawad maki kasalpantayanan manikua lang patutu na ning katutuan na at kabanalan king upaya ning Espiritu Santo. (Lawan Moroni 10:3–5.)

Detang tanggap kening banal a patutu ibat king Banal a Espiritu abalu da mu naman king kapamilatan ning pareung upaya a i Jesueristo ya ing Tagapagligtas na ning yatu, a i Joseph Smith ya ing keang tagapasiag at propeta kareting tauling aldo, at Ing Pisamban nang Jesucristo da ring Santo king Tauling Aldo ya ing kayarian ning Guinu a misan pang mitatag king yatu bilang pamagsadia king kadua nang pamaniatang ning Mesias.