Ing Patutu Nang Propetang Joseph Smith

Ding sarili nang amanu ning Propetang Joseph Smith tungkul king pamanyatang at pangasalin na ning Libru nang Mormon ila ring:

“Anyang bengi ning mesabing aduang pulu’t metung ning Septiyembre [1823] … mengadi ku at mekisabi king Mayupayang Dios. …

“Anyang atiu ku king ukdung mamaus king Dios, menakit kung sala a lalto king kakung kuwartu, megumpisang meragul anggang anyang ing kuwartu mesala yang igit pa king kaugtuan a aldo, at e migluwat ating taung pepalto lele ning kakung tudturan, makatikdo ya king angin, uling ding keang bitis ela makatagkil king lande.

“Makamalan yang batang malwalas a alang kasingputi. Metung yang kaputian igit pa king nanu pa mang bage a atiu king yatu a ikit kuna; at eku maniwala a nanu ya pamang bage makayatu malyari yang lunto a masyadung maputi at makinang. Ding keang gamat lubas la, at makatas lang bagya king pulsu; at ding keang bitis lubas la naman, at ding keang butit, makatas lang bagya karing keang bukungbukong. Ing keang buntuk at batal ela naman makamalan. Ikit ku ala neng aliwa pang malan nung emu ing keang bata, at makabuklat ya, anya akakit ke ing salu na.

“Aliwa mu ing keang bata ing maputi, dapot ing keang mabilug a pangatau masyadu yang masala a emu alarawan, at ing keang lupa balamu kildap ya. Ing kuwartu masyadu yang masala, dapot ing makapadurut kaya e masyadung masala. Anyang minuna keng linawe, mitakutan ku; dapot e migluat milako iti.

“Inaus naku king lagiu ku, at sinabi na kanaku metung yang tubud ibat king arapan ning Dios a pepadala na kanaku, at ing lagiu na Moroni; a ing Dios atin yang obrang pagawa kanaku; at ing kakung lagiu maging mayap at marok ya karing sablang bansa, lahi, at amanu, at maging mayap at marok ya a pisabian ding eganaganang tau.

“Sinabi na ating librung makasinup, a makasulat karing gintung lamina, babiye yang istorya karing dating manuknangan king labuad a iti, at ing lugal a nukarin la menibatan. Sinabi na naman ing kaganapan na ning alang anggang Ebanghelio atiu ya kilub na niti, a biniye na ning Tagapagligtas karing makatuang menuknangan;

“At atin mu namang aduang batu king taling pilak, — at deting batu makakabit la king baluti, a mayayaus Urim at Thummim — a makasinup lang kayabe da ring lamina; at ing pibandian at gamit da ring batung a reti ilang meging Makakit anyang minunang panaun at ing Dios sidia nala para king kapagnasan ning pamagsalin king libru.

“Pasibayu, sinabi na kaku, potang akua ko ding lamina a keang sinabi — uling ing panaun para mayakua la epa metupad — at eko dapat ipakit kaninu mang tau; anggiyang ding baluti a kayabe da ring Urim at Thummim; kabud kareta mung miyutusan kung ipakit ko karela; nung gawan ku masira ku. Kabang makipagsalita ya kanaku tungkul karing lamina, ing malikmata mibuklat ya king kakung kaisipan a akakit ke ing lugal nung nukarin la makasinup ding lamina, at ita tutung malino at tiyak a balu ke ing lugal pasibayu potang pasyalan ke iti.

“Kaibat na ning pamakipagsalitang iti, ikit ke ing sala king kuwartu megumpisa yang magtipun mabilis padurut king taung makipagsalita kanaku, at misundu ya angga king ing kuwartu medalumdum ne naman, bukud king makapadurut kea; anyang, bigla keng ikit, anti ing sadia, ing dalan mibuklat ya papunta babo banua, at minukyat ya angga king mewala yang lubusan, at ing kuwartu melakuan ya anti ing sadia bayu ing makabanuang salang iti pepakit ya.

“Makakera kung magbule-bule king e pangkaraniwang tagpu, at magtakang ustu a nung nanu ing mesabi kanaku niting pambihirang tubud; anyang king libutad ning pamibule-bule ku, bigla kung atuklasan ing kuwartu ku megumpisa ne namang sumala, at king penandit mu, anti ing sadia, atiu ne naman ing pareung makabanuang tubud king lele ning kakung tudturan.

“Megumpisa ne naman, at pasibayu sinabi no ding pareung bage a keang agawa anyang mumuna nang pamagbisita, alang ditak mang pamiyaliwa; a agawa na na, pepabalu no kanaku ding maragul a atul a daratang king yatu, a mika maragul a pangalasak king danup, ispada, at salot; at ding mabayat a pamanatul datang la king yatu king panaun a iti. Anyang asabi no deti, pasibayu ne namang minukyat anti ing gewa na anyang minuna.

“King oras a iti, masyadu lang malalam ding bakas a megawa king kakung kaisipan, a ing tundu milako karing mata ku, at makakera kung magugulu king pamagtaka karing pareu kung ikit at dimdam. Dapot nanu ing kakung sorpresa anyang ikit keng pasibayu ing pareung tubud king siping ning kakung tudturan, at dimdam kung sasabian o ulitan na palagi kanaku ding pareung bage anyang minuna; at midagdag yang babala kanaku, sasabian na kaku i Satanas subukan nakung tuksuan (katuki ning kalulu nang kabilian tata ku), para kuwanan la ding lamina king kapagnasang maging makuwalta. Iti binawal na kaku, sasabian na ala nakung aliwa pang kapagnasan potang kuwanan ko ding lamina nune para purian ya ing Dios, at eku dapat matinag karing aliwang nasa kesa king pamitalakad king keang kayarian; nung ali eku la akua.

“Kaibat ning katlung pamagbisitang iti, minukyat ne namang pasibayu banua kalupa na anyang minuna, at melakuan naku na naman para magbule-bule king e pangkaraniwan ning kakung aranasan; anyang malapit king kaibat ning makabanuang tubud minukyat ya manibatan kaku king katlung besis, ing tandang tinulauk ya, at ikit ku malapit neng sunlag ing aldo, para ding kekaming pamipagsalita sekupan na ing kabilugan ning bengi.

“At sinaguli kaibat kung tinalakad king kakung pagkeran, at, anti ing sadia, minta ku king maulagang obra ning aldo; dapot, king pamaniyubuk kung magobra anti neng aliwang panaun, ikit ku megisan ing sikanan ku para lubus kung e agiu. I tata ku, a kayabe kung magobra, atuklasan na ing mapilang bage a mali kanaku, at sinabi na kakung muli ku bale. Megumpisa ku king kapagnasang munta king bale; dapot, king pamaniyubuk ku king pamaglipat king bakud lual king marangle a nung nukarin kami, ing kanakung sikanan pepaburen naku, at mibagsak kung alang agiu king gabun, at king ditak a oras bagya kung milako animu.

“Ing mumunang bage a atandanan ku metung yang bosis a magsalita kanaku, at ausan naku king lagiu. Tinalanga ku babo, at ikit ke ing pareung tubud makatalakad ya babo ning kakung buntuk, makapadurut yang sala kalupa na anyang minuna. Kanita sinabi nala ngan pasibayu kaku ding keang sinabi king milabas a bengi, at inutus na kung munta kang tata ku at sabian kea ing malikmata at ding kautusan a kanakung tinggap.

“Memintu ku; mibalik ku kang tata ku king marangle, at sinabi ko ding eganaganang bage kaya. Pekibat na kaku a iti king Dios, at sinabi na kaku ing isulung ku at gawan ku ing pagawa ning tubud. Likuan ke ing marangle, at minta ku king lugal nung nukarin ing tubud sinabi na kanaku ding lamina makasinup la; at uli na ning kalinawan ning malikmata atiu na kaku tungkul kareti, balu ke ing lugal king oras a dinatang ku karin.

“Malapit king bario ning Manehester, probinsiya ning Ontario, New York, makatalakad ya ing bunduk-bundukan a katamtaman a dagul, at pekamatas ya karing sanuman karing kasiping na. King parteng albugan ning bunduk-bundukan a iti, e marayu ibat babo, lalam ning batu a katamtaman a dagul, makalulan la ding lamina, makasinup la king kaun a batu. Ing batung iti makapal ya at mabilug libutad ning gilid na babo, at maimpis ya king gilid na, anya ing libutad nang parte mayayakit ya babo ning gabun, dapot ing gilid na makapadurut makatakap yang gabun.

“Anyang alako ku na ing gabun, kinangua kung panyikuat a kebit ku king lalam nang gilid ning batu, at king ditak a sikanan tinas ke iti. Linawe ke kilub, at karin tune kong ikit ding lamina, ding Urim at Thummim at ing baluting bakal anti ing sinabi ning tubud. Ing kaun nung nukarin la makalulan miubug ya king pamangabit karing batu abe-abe king balamu klasing semento. King lalam ning kaun makalulan la ding aduang batu baligtaran king kaun, at karing batung a reti makalulan la ding lamina at ding aliwang bage a kayabe da.

“Sibukan kung ilual kula, dapot bewalan naku ning tubud at pepabaluan naku a ing panaun para ilual la epa dinatang, ni datang na, anggang apat a banua manibat kanitang panaun a ita; dapot sinabi na kaku a dapat munta ku king lugal a ita eksakto kaibat ning pabanua manibat kanita, at karin pakikitan naku, at dapat isundu kung gawan anggang datang ing panaun para akua la ding lamina.

“Agpang kaniti, anti ing miutus kaku, minta ku king katataulian ning balang banua, at king balang panaun ikit ke ing pareung tubud karin, at tinanggap kung utus at kabiasnan ibat kea king balang pamipagsalita mi, gagalang king nung nanu ing gawan ning Guinu, at nung, makananu at nanung paralan ing keang kayarian mipanibalan ya king tauling aldo.

“King kelambatan dinatang ing panaun para kuanan la ding lamina, ding Urim at Thummim, at ing baluting bakal. Anyang adua nang pulu’t adua ning Septiyembre, libu walung dalan at aduang pulu’t pitu, mekapunta ku anti ing sadia king katataulian ning balang banua king lugal nung nukarin la makasinup, ing pareung tubud biniye no kanaku a maki utus: a aku ing dapat mamakibatan kareti; nung paburen ku lang mawala alang kaingatan o king nanumang kapabayan, miparusan ku; dapot nung gamitan ku ing eganaganang pamagsikap ku para maingat la, angga ya, ing tubud, maus ya para kareti, dapat lang mipalualo.

“King malagwang panaun ikit kula ding sangkan nung bakit tinanggap kung maigpit a utus para manatili lang ligtas, at nung bakit ita ing sinabi ning tubud a potang agawa ku na ing kailangan karing kakung gamat, maus ya para kareti. Uling ala nang mas malagwa pa a mabalu ing atiu la kanaku, kesa king pekamalablab a pamagsikap megamit la para akua da la kaku. Balang paralan a malyaring maimbentu megamit la para king kapagnasan a ita. Ing pamanusig meging mas mapait at mabayat kesa king minuna, at ding keraklan maralas lang alistu para akua do kanaku nung malyari. Dapot king beluan ning Dios, menatili lang ligtas karing kakung gamat, angga king agawa ku karela nung nanu ing kailangan karing kakung gamat. Anyang, agpang karing kaayusan, ing tubud minaus ya para kareti, biniye ko kea; at atiu la king keang pamanibala angga king aldo iti, ngening kadua nang aldo ning Mayo, libu walung dalan at atlung pulu’t walu.”

Anya pin ing matuang kasulatan midala ya king yatu anti ing siwala da ring taung mete, at misalin king makabayung salita kapamilatan ning kalam at upaya ning Dios anti ing apatutuanan ning Banal a pamagsalita, mumuna yang melimbag king yatu keng Inglis king banuang 1830 bilang The Book of Mormon.