Makuyad A Pamipalino Tungkul King
Libru Nang Mormon

Ing Libru nang Mormon metung yang banal a kasulatan da ring tau king minunang America, at makadukit karing pirasung metal. Apat a klasi ning laminang metal ing masasabi king librung ini:

1. Ding Lamina nang Nephi, a adua klasi: ding Ditak a Lamina at ding Dakal a Lamina. Ing mumuna mas megamit la bang isulat ing tungkul karing espiritual a bage at ing pamanibala at ding turu da ring propeta, samantalang ing tauli megamit ya keraklan bang isulat ing e banal a kasaysayan da ring taung makaukul (1 Nephi 9:2–4). Manibat king panaun nang Mosiah, makanian man, ding Dakal a Lamina maglaman la namang bage makiulagang espiritual.

2. Ding Lamina nang Mormon, a maglaman king kinuyad a kasulatan nang Mormon ibat king Dakal a Lamina nang Nephi, maki marakal a pamagpalino. Deting lamina maglaman la namang katuglung ning kasaysayan a gewa nang Mormon at ding karagdagan na ning keang anak i Moroni.

3. Ding Lamina nang Ether, a magpalad king kasaysayan da ring Jaredite. Ining kasulatan kinuyad neng Moroni, a misingit king sarili nang pamagpalino at piabe ding kasulatan king heneral a kasaysayan lalam ning pamagat a “Libru nang Ether”.

4. Ding Laminang Tansu a dela da ring tau nang Lehi ibat king Jerusalem anyang 600 B.C. Deni maglaman lang “limang libru nang Moises, … At makanian mu naman metung a kasulatan da ring Judio manibat king mumuna, … angga king pamagumpisa ning pamagari nang Zedequias, ing ari ning Judah; At makanian mu naman ding pamanula da ring banal a propeta” (1 Nephi 5:11–13). Dakal a kinopyang ibat karing laminang deni, a mamanggit kang Isaias at aliwang propeta king Biblia at ding propetang ala king Biblia, ding linto king Libru nang Mormon.

Ing Libru nang Mormon bibilugan de ring labinglimang manimunang parti o pangapitna, a makikilala, bukud king metung, bilang libru, ing balang metung meyaus ya king lagiu ning manimunang ginawa. Ing mumunang parti (ding mumunang anam a libru, a mayayari king Omni) ya ing pamagsalin ibat karing Ditak a Lamina nang Nephi. King pilatan da ring libru nang Omni at Mosiah, ya ing siningit a mayayaus Ding Amanu nang Mormon. Ing siningit a ini pitutuglung nala ding makadukit a kasulatan karing Ditak a Lamina kayabe ya ing kinuyad a kasulatan nang Mormon ibat karing Dakal a Lamina.

Ing pekamakabang parti, menibat kang Mosiah angga kang Mormon, kapitulu 7, kayabe ya naman, ya ing pamagsalin na ning kinuyad a kasulatan nang Mormon ibat karing Dakal a Lamina nang Nephi. Ing bandang tauli nang parti, manibat kang Mormon, kapitulu 8, angga king kapupusan ning libru, sinulat ne ning anak nang Mormon, i Moroni, a kaibat neng inari ing kasulatan ning bie nang tata na, ginawa yang kinuyad a kasulatan da ring Jaredite (bilang ing Libru nang Ether) at kaibat digdag ding parti a mekilala bilang ing Libru nang Moroni.

Anyang o bandang banuang 421 A.D., i Moroni, ing tauli karing tagasulat-kasaysayan a propeta, sera ne ing banal a kasulatan at sininup ne angga king Guinu, bang ilual karing tauling aldo, anti ing inula ning siwala ning Dios king kapamilatan da ring keang matuang propeta. Anyang 1823 A.D., ing Moroni mu namang ini kanita metung neng angel a sinubling mebie, delawan ne ing Propetang Joseph Smith at kaibat biniye nala ding sinulat a lamina kea.