Fakamaamaaga Fakaku ke he
Tohi Moromona

Kua tolu e veveheaga he tau Lapa Maka kua fakakite ai he kamataaga he Tohi Moromona, pehe nai:

1. Ko e tau Lapa Maka a Nifai, tuga kua tohia ai i loto he tohi, ko e ua he katoa. (a) Ko e tau Lapa Maka Lalahi; (e) Ko e tau Lapa Maka Ikiiki. Ko e tau lapa maka fakamua ne fakamau ai e tau mena ne hohoko ai ke he tau momoui he tau tagata ia, ka ko e tau lapa maka ke ua aki kua fakamau ai e tau fakamauaga tapu.

2. Ko e tau Lapa Maka a Moromona, kua tohi fakaku ai e falu a talahauaga mai he tau Lapa Maka a Nifai, ne taute e Moromona, ne tohia ai loga e haana a tau talahauaga mo e tau fakamauaga ke he tau mena ne hoko ai ti lafi atu ki ai ha Moronai ko ia ko e tama a Moromona.

3. Ko e tau Lapa Maka a Ieteru, ne fakamau ai e tau talahauaga ke he tau tagata Iareto ko e tala ne tohia fakaku ai e Moronai, ne lafi e ia ki ai haana a tau talahauaga mo e tohi fakalataha ai e fakamauaga ia mo e tau talahauaga mo e fakahigoa ai Ko e Tohi a Ieteru.

   Lafi atu ki ai falu a lapa naka kua kitia nau ai foki ki loto he Tohi Moromona ne fakahigoa ai:

4. Ko e tau Lapa Maka veo a Lapana, ne ta mai ai he magafaoa a Lihai mai i Ierusalema, he tohia ai e tau ohi faka — Heperu mo e tau tupuaga he tau magafaoa, ne moua ai laga loga kua fakakuku mai ai he tau fakamauaga he tau Nifai.

Kua ha ha i ai ke he Tohi Moromona hogofulu ma lima e veveheaga kua fakahigoa ai ko e tau tohi — ko e taha ni ne kehe ai, kua fakahigoa aki ni a ia ne tohia. Ko e tau tohi ono fakamua kua fakahigoa ai pehe, 1 Nifai, 2 Nifai, Iakopo, Enosa, Iaroma, mo Omani, ko e tau fakaliliuaga mai he tau Lapa Maka Ikiiki a Nifai. Ko e vahaloto he tohi a Omani mo Mosaia ne moua ai e Tau Kupu a Moromona, ko e tutakiaga a ia he tau fakamauaga a Nifai, ne tohia ai he tau Lapa Maka Ikiiki mo e tau mena ne tohia fakaku ai e Moromona ke he tau Lapa Maka Lalahi he mole atu e magahala ia. Ko e Tau Kupu a Moromona ne fakamaama fakaku ai e tau mena he magaaho fakamua to hoko ai e fakamauaga ia kua fakamaama ai foki e tau mena ne fakamau ai.

Ko e lahi he tohi mai ia Mosaia ki a Moromona, veveheaga 7 katoa, ko e fakaliliuaga he tau mena ne tohia fakaku ai e Moromona mai he tau Lapa Maka a Nifai. Ko e maaga fakahiku he TohiMoromona mai he kamataaga he tohi a Moromona Veveheaga 8 ke he fakaotiaga ne tohia ai he tama a Moromona ko Moronai, ne fakamua he fakaoti e ia e fakamauaga ke he mai he haana a matua, ka oti ia ti fakaku ai e ia e tau fakamauaga ke he tau tagata Iareto, ko e tohi a Jeteru. Ne lafi atu ki ai fakamui e ia e maaga ne iloa ai e tautolu ko e Tohi a Moronai.

Ko e magahala ia ne tohia ai he Tohi Moromona ko e kamata mai he 600 e tau tau to hoko e vaha a Keriso a to 421 e tau tau he mole atu a ia. Ko e tau ia po ke mole atu e tau ia ne fakamau fakamailoga ai e Moronai ko ia ne tohia fakahiku aki, e tau fakamauaga oti ia mo e fufu ai ke he Iki, ke ta mai ai he tau aho fakamui, tuga ne talahau tuai mai he leo he Atua ke he haana a tau perofeta i tuai. Ke he fakamui nai ke he tau tau 1827, ko Moronai ia ni, ne liu tu mai a ia mo e liuaki mai e tau lapa maka ia ki a Iosefa Samita.