Ko e Fakamooliaga he Tau Tagata Fakamooli ne Tokotolu

Kia iloa ai he tau motu oti, he tau magafaoa oti, he tau vagahau oti, mo e tau tagata oti kua hoko atu e gahua nai ki ai: Ko mautolu nai, ha ko e fakaalofa noa he Atua ko e Matua, mo e Iki ha tautolu ko Iesu Keriso, ne kitia e mautolu e tau lapa maka nai, kua ha ha i ai e talahauaga nai — ko e talahauaga haia ke he tau tagata Nifai, mo e tau tagata Lamana foki, ko e tau matakainaga ha lautolu haia, mo e tau tagata foki ha Iareto ne o mai he kolo ke tuga kua talahau mai. Kua iloa foki e mautolu ne fakaliliu e tau lapa maka nai ha ko e mana mo e fakaalofa noa he Atua, ha kua tala mai pihia he leo haana ki a mautolu; ko e mena ia kua iloa maaliali ai e mautolu ko e gahua mooli e gahua nai. Kua fakamooli atu foki a mautolu ki a mutolu kua kitia e mautolu e tau mata tohi ne tohia ai ki luga he tau lapa maka auro; ne fakakite mai e tau mena nai ki a mautolu ha ko e mana he Atua, ka e nakai ko e malolo he tagata. Kua tala atu e mautolu e tau mena nai mo e nakai fai kupu fakauaua ke he tau loto ha mautolu, ne haele hifo e agelu mai he lagi mo e ta mai mo e tuku mai ki mua he tau mata ha mautolu mo e kitia ai e mautolu e tau lapa maka mo e tau mena kua tohia ai; ne iloa e mautolu ha ko e fakaalofa noa he Atua ko e Matua, mo e Iki ha tautolu ko Iesu Keriso, ne kitia ai e mautolu, mo e maeke ai ia mautolu ke fakamooli atu ki a mutolu e tau mena nai. ti lahi mahaki e fulufuluola he tau mena nai ke he tau loto ha mautolu. Pete ni ia, ne poaki mai e leo he Iki kua lata ki a mautolu ke mailoga e tau mena nai, ko e mena ia kua omaoma ai a mautolu ke he tau poakiaga he Atua kua fakamooli atu a mautolu ke he tau mena nai.

Ti iloa e mautolu kaeke kua tua tumau a mautolu ki a Keriso, to uta kehe e ia e toto he tau tagata oti mai he tau tapulu ha mautolu, ti kua mea a mautolu ki mua he nofoa fakafili a Keriso, mo e nonofo tukulagi a mautolu mo ia ke he lagi. Ti ko e tau fakalilifuaga mo e fakahekeaga kua tuku atu ke he Matua, mo e Tama, mo e Agaaga Tapu, kua taha e Atua. Amene.