Ko e Kamataaga he Tohi Moromona

Ko Iosefa Samita, mai ia ia ha ko e fakaalofa mo e malolo he Atua ko e Tohi mai i tuai ne kua iloa ai Ko e Tohi Moromona, ne kua ta mai mo e fakaliliu ai ke he vagahau Peritania, mo e fakamau fakatonu e tau mena ia. Ne fakamooli e ia ko e po 21 ia Sepetema, 1823 ne liogi fakamakamaka a ia ke he Iki ha ko e fakakiteaga mai he lagi ne kua moua ai e ia kua mua ia he mahuiga. Pehe nai haana a talahauaga:

“Ha ne fa e liogi au mo e ole ai au ke he Atua, ne kitia ai e au e maama kua hoko mai ke he haaku a poko, kua tolomaki fakahaga e maama ki mua kua mua atu e maama ke he mogo tupou ia, ko e magaaho ia ni ne kitia ai e au e taha tagata ke he tapa mohega haaku, kua tu mai i luga, kua nakai fakapiki hifo e tau hui haana ke he kelekele.

“Kua tui a ia ke he tapulu loa kua mua ue atu e hina. Kua nakai fai mena he lalolagi nai ke fakatai aki e hina he haana a tau taute, kua nakai manatu au kua fai mena he lalolagi katoa nai kua maeke he tagata ke fakahina ke tuga e hina mo e kikila mai he haana a tapulu. Koe tau lima haana kua toka noa, ki luga fakatote he tau taulu lima, pihia foki ke he haana a tau hui, kua toka noa foki ki luga fakatote he haana a tau taulu hui. Ko e haana a ulu ke hoko hifo ke he kakia kua toka noa foki. Kua kitia maaliali e au ko e taha ni e tapulu haana, kua toka noa mo e kua maeke ai ia au ke kitia e fatafata haana.

“Nakai ko e tapulu hokoia ni haana kua hina mai, ka ko e tino katoa he tagata kua mua atu he kikila kua nakai fai mena ke fakatai atu ki ai, ko e haana a fofoga kua tuga ia mo e maama he kapa mai he hila. Kua mua atu e maama he poko, ka e nakai maama lahi ke tuga e mena kua ha ha i ai e tagata. Ko e magaaho fakamua, ne kitia ai e au a ia ne matakutaku lahi au; ka e nakai leva ti fano kehe e matakutaku ia au.

“Ne ui e ia au ke he haaku a higoa, mo e pehe mai a ia ki a au ko ia koe uta fekau kua fakafano mai i mua he Atua ki a au ti ko e higoa haana ko Moronai; kua fai gahua e Atua ke taute e au; to talahaua mitaki mo e kelea e higoa haaku ke he tau motu oti, tau tagata, mo e tau vagahau kehekehe, po kua pihia ni ke talahaua mitaki mo e kelea ke vagahau ai he tau tagata oti.

“Ne pehe mai a ia kua ha ha i ai e taha tohi kua toka ai kua tohia ai ke he tau lapa maka auro, kua ha ha i ai ke he tau lapa maka auro nai e talahauaga ke he tau tagata ne nonofo ke he motu nai he vaha fakamua mo e tupuaga ha lautolu. Kua pehe mai foki a ia, kua ha ha i ai foki e katoatoaaga he Evagelia ke he tau lapa maka ia; ne foaki age he Fakamoui ke he tau tagata ia.

“Kua ha ha i ai foki ua e maka ne tuku ai, ti ko e tau maka ia kua pipi ai ke he taha ufi fatafata; kua fakahigoa ai ko e Urima mo e Tumima — kua toka ai mo e tau lapa maka; ti ko e fakaaogaaga he tau maka ia mai he tau tagata “kua kitia” he vaha ia, kua tauteute ai he Atua e puhala ma lautolu ke fakaliliu aki e tohi nai.

“Kua liu vagahau mai foki a ia ki a au he magaaho to moua ai e au e tau lapa maka ne talahau mai e ia — ha kua nakai la hoko mai e magaaho ke moua ai e au e tau mena nai ke aua neke fakakite atu e au e tau lapa maka nai ke he taha tagata, ti pihia foki ke he ufi fatafata fakalataha mo e Urima mo e Tumima, ka ko lautolu ni kua poaki ke fakakite ki ai, kaeke kua holifono e au e maveheaga nai to fakaoti e ia au. Ha ne fakatutala mai a ia ki a au hagaao ke he tau lapa maka, ti kua hafagi mai ki a au e fakakiteaga ke he manamanatuaga haaku kua maeke ai ia au ke kitia e mena kua toka ai e tau lapa maka, ne fakakite fakamooli mai ki a au ke maeke ai ia au ke iloa e au e mena ia ka aahi atu au ki ai.

“Kua mole atu e fakatutalaaga nai ha maua, ne kitia e au e maama he poko haaku kua maama takai he tapa he tagata ne vagahau mai ki a au, ne maama pihia a to liu pouli foki e poko, ka e taha ni e mena kua viko takai e maama ia ia, ti kitia agataha e au e mena kua tuga e paipa lahi kua fakatupou hake ke he lagi, ti hake ai agataha a ia ki luga a to galo noa a ia, ti liu e poko pouli ke tuga e mogo fakamua to kitia ai e au e maama nai mai he lagi.

“Ne takoto au mo e manamanatu ke he fakakiteaga ne kitia e au, kua ofo lahi au ke he tau mena ne vagahau mai he uta fekau homo atu ia, ke ke vaha loto he haaku a manamanatuaga, ne ofo au ke kitia kua liu e poko haaku ke maama foki ti tu mai agataha e uta fekau ia mai he lagi ke he tapa mohega haaku.

“Ti liu kamata foki a ia ke tala mai e tau mena agaia kua tala mai e ia he haana a aahi mai fakamua, mo e nakai fai kehe ha mena taha; kua mole atu e tau mena nai, ne fakailoa mai e ia ki a au e tau fakafiliaga lalahi ka hoko mai ke he lalolagi, to hoko mai e moumouaga; ko e hoge, ko e pelu, ko e tau gagao; to hoko mai ai e tau fakafiliaga momoko nai ke he atu hau nai. Kua oti e vagahau Inai e tau mena nai, ti liu haele hake a ia ke he lagi tuga he magaaho fakamua.

“Ko e magaaho nai kua hokulo e tau manamanatuaga haaku ke he tau mena oti nai ne vagahau mai e ia ki a au, kua nakai maeke ia au ke mohe, ne takoto mo e manamanatu lahi au ke he loto haaku ke he tau mena nai ne kitia mo e logona e au. Ka kua ofo lahi au ke liu kitia foki e au e uta fekau ia kua liu mai a ia ke he tapa mohega haaku, mo e liu fatiaki po ke fakamanatu mai e tau mena oti ne kua vagahau mai e ia fakamua ki a au, kua lafi mo e hataki mai ki a au mo e tala mai to lali a Satani ke kamatamata mai ki a au (Hagaao ke he magafaoa ha mautolu ha kua nonofogati) ke moua e tau lapa maka auro ke fakafua ke moua aki taha tupe. Ka kua hataki mai a ia ki a au kua pehe mai ke aua neke fai manatu kehe au hagaao atu ke he tau lapa maka. Ka kia fakalilifu ni ke he Atua, mo e nakai uhutia he taha ke he haaku a laliaga ke ati hake ki luga e kautu haana; kaeke kua ai pihia to nakai moua e au e tau lapa maka.

“Kua mole e aahi mai haana ke laga tolu aki ti liu hake foki a ia ke he lagi ke tuga he magaaho fakamua mo e toka ai au ke manamanatu ke he tau mena nai kua kehe lahi ne kitia e au; ne mole atu fakatote e uta fekau ke he lagi he magaaho ke laga tolu aki, ti ko agataha e tau moa, ti ko e magaaho ia ne iloa e au kua tata ke aho, ti ne fakatutala a maua ke he po katoa ia.

“Ne nakai leva ti matike au mai he mohega haaku, mo e fina atu ke he haaku a tau gahua tuga kua fa mahani ki ai; ne lali au ke gahua ke tuga ne fa mahani ke he falu a magaaho ka e taha e mena kua logona e au kua lolelole e tino haaku, mo e nakai fahia ke taute ha mena. Ko e matua taane haaku ne gahua fakalataha mo au kua kitia e ia kua fai mena kua kehe ki a au ti tala mai a ia ke fano au ki kaina. Kua kamata au ke liu atu ke he fale mo e amanaki ke fina atu he hala luga he pa ke he fonua kua nonofo mau ai a mautolu, ne logona e au kua nakai fahia au, ne veli hifo au ke he kelekele mo e tau pogia mo e nakai maeke ke iloa ha mena taha.

“Ko e mena fakamua ne vikia e au ko e leo ne vagahau mai ki a au, mo e ui mai e higoa haaku. Ne ono hake au ki luga ti kitia ai e au e tagata uta fekau agaia kua tu mai i luga ia au, kua viko takai a ia ke he maama kua tuga he magaaho fakamua. Ti liu a ia fakamanatu mai foki ki a au e tau mena oti ne vagahau mai e ia ki a au ke he pouli he po, ti poaki mai a ia ki a au ke fina atu au mo e tukuogo atu ke he matua taane e fakakiteaga mo e tau poakiaga ne moua e au.

“Ne omaoma agataha au; ne liu atu au ke he matua taane haaku kua gahua agaia ke he fonua, mo e tukuogo atu ki a ia e tala katoa. Kua tali mai a ia, kua mai he Atua e tau mena nai, mo e pehe mai a ia ke fina atu au mo e taute ai e tau mena oti nai kua poaki mai ai he uta fekau. Ne toka agataha e au e fonua mo e fina atu au ke he matatepu kua fakakite mai he uta fekau kua toka ai e tau lapa maka; ha kua fakamaama mai he fakakiteaga ki a au e matatepu nai, ti ko e magaaho ne hoko atu ai au ki ai ne kitia mo e iloa e au e mena kua ha ha i ai e tau lapa maka.

“Tata atu ke he maaga ko Manitesa i Onatalio i Niu Ioka, ne ha ha i ai e taha matiketike lahi, tokoluga ke he falu a matiketike he matatepu ia. Ne nakai mamao lahi mai he tapunu ke he faahi lalo he mouga kua ha ha i ai e taha maka lahi, ne ha ha i ai e tau lapa maka kua toka ai i loto he puha kua taute aki e tau maka. Kua matolu mo e veliveli e uho he maka nai, ke he loto uho tonu he faahi ki luga he maka, ka ko e tau kalakala kua aleale ia, ke maeke ai ke kitia vave e loto uho he maka i luga he kelekele, ka ko e tau kalakala, he maka na kua tanumia ai ke he kelekele.

“Ne uta kehe e au e tau kelekele, ti moua agataha e au e taha akau, kua hohoka hifo e au ki lalo he taha matapotu he maka, ne laga ai mo e lagaaki hake ki luga e maka. Ne kitia ai e au e tau lapa maka i loto, ko e Urima mo e Tumima, mo e ufi fatafata, tuga ni ne talahau ai he tagata uta fekau. Ko e puha ne ha ha i ai e tau mena nai kua tuga ia mo e tau maka kua fakatokatoka fakalataha, tuga e mena kua vali aki e timemi. I lalo he puha na kua ha ha i ai ua e maka kua fakatoka fakalavalava, ti ha ha i ai i luga he tau maka nai kua fakatoka ai e tau lapa maka mo e falu a mena foki.

“Ne lali au ke aaki hake e tau lapa maka, ka kua taofi mai he uta fekau, ti liu fakailoa mai ki a au kua nakai la hoko mai e magaaho ke uta kehe mai e tau lapa maka, to nakai hoko mai e magaaho ia a to mole e fa e tau tau. Ne liu tala mai a ia ki a au ke liu atu au ke he matatepu ia ke he tau taha mai he magahala ia, to feleveia ai a ia mo au ke he matatepu ia, to taute e au pihia a to hoko mai e magahala ke moua ai e au e tau lapa maka.

“Ke tuga kua poaki mai e ia ki a au, ne fina atu au ke he mena ia he fakaotiaga he tau tau taki taha, mai he tau magahala takitaha ia kua moua agaia ni e au e tau fakatonuaga mo e pulotu mai ia ia ke he tau mena oti kua fakatutala a maua ki ai, ke lata mo e tau mena ka taute ke Iki, mo e puhala mo e fakatuaga mo e takitakiaga he haana a kautu ke he tau aho fakamui nai.

“Kua mole e falu a magaaho, kua hoko mai e magaaho ke moua ai e tau lapa maka, ko e Urima mo Tumima mo e ufi fatafata. Ko e aho ua fulu ma ua ia Septetema, tau taha e afe valu e teau mo e ua fulu ma fitu, ke tuga fa mahani ai ke he matatepu ia ne toka ai e tau lapa maka, he fakaotiaga he taha tau foki, ko e uta fekau agaia ne foaki mai e tau lapa maka ki a au mo e hataki mai ke leveki e au e tau lapa maka nai kaeke ke fakahanoa mo e nakai leveki fakamitaki po ke mahani fakateaga a au, to fakaoti au mo e mena nai; kaeke kua fakamalolo au ke leveki e tau lapa maka, a to liu mai a ia, e uta fekau ke liuaki e tau lapa maka, to leveki mai ki ai.

“Kua iloa tuai e au e kakano ne moua ai e au e tau hatakiaga hagaao ia ke he levekiaga he tau lapa maka mo e kakano foki ne vagahau mai pihia ai ki a au e uta fekau, ko e magaaho ka oti e tau mena kua lata ia au ke taute, to liu mai a ia ke moua e tau lapa maka. Nakai leva ti tuogo ai ke he tau tagata kua ha ha ia au e tau lapa maka, ne lali fakamalolo e tau tagata ke uta kehe e tau mena ia mai ia au. Kua fakaaoga e lautolu e tau lagatau kehekehe, kua foou mo e tuai, mo e lali ai a lautolu ke uta kehe e tau mena ia. Kua holo ki mua e tau eke fakakelea mo e ita ha lautolu mai he mogo fakamua, ti kua tokologa ia lautolu kua lali ke uta kehe e tau mena nai mai ia au kaeke kua maeke ia lautolu. Ka ko e pulotu he Atua, kua nakai haofia ai ke he levekiaga he haaku a tau lima a to maeke ai ia au ke fakaoti e haaku a tau gahua ke he haaku a tau lima. A to hoko ai ke he aho kua fakamau ai mo e uta fekau, ti liu mai ai a ia mo e liuaki ai e tau lapa maka, ne liuaki atu e au ki a ia ti kua ha ha i ai e tau mena nai ke he haana a levekiaga a to hoko mai ke he aho nai, ko e aho ua ia Me tau taha e afe valu e teau mo e tolu gofulu ma valu.”

“Ko e katoatoaaga he fakamauaga, kia kikite ke he Tohi Penina Tau Lahi, laupepa 50–54, mo e tau Fakamauaga he Lotu a Iesu Keriso ma e Tau Tagata Tapu he tau Aho Fakamui Nai, Tohi 1, Veveheaga 1 ke he 6 katoatoa.

Ko e tau fakamauaga mai i tuai, ne kua ta mai ai ke he kelekele, tuga e leo he tau tagata kua vagahau mai he efuefu, mo e fakaliliu ai ke he leo he vaha nai ha ko e fakaalofa mo e malolo he Atua tuga kua fakamooli mai foki he Atua, ne lolomi fakamua ai ke he lalolagi he tau tau 1830 The Book of Mormon.