1 Kag natabo ini nga may nagtuhaw nga pagbinahin-bahin sa katawhan, sa bagay nga nagbinahin-bahin sila diri kag didto kag naglakat sa ila mga dalanon nga ginbayaan si Nefi nga isahanon samtang nagatindog sia sa tunga nila.

2 Kag natabo ini nga si Nefi naglakat sa iya dalanon padulong sa iya kaugalingon nga balay, nga nagabinag-binag sang mga butang nga ginpakita sang Ginuo sa iya.

3 Kag natabo ini nga samtang yara sia sa amo nga pagbinag-binag—nga tuman nga nagkasubo tungod sang kalainan sang katawhan sang mga Nefinhon, sang ila sekreto nga mga buhat sang kadudulman, kag sang ila mga pagpamatay, kag sang ila mga pagpangagaw, kag tanan nga sari sang mga kalainan—kag natabo ini nga samtang yara sia sa amo nga pagbinag-binag sa iya tagipusuon, tan-awa, isa ka tingug ang iya nabatian nga nagasiling:

4 Bulahan ikaw, Nefi, tungod sang mga butang nga imo ginhimo; kay nakita ko kon paano mo ginpahayag nga wala sing kakapoy ang pulong, nga akon ginhatag sa imo, sa sining katawhan. Kag wala ka nahadlok sa ila, kag wala naghangad sang imo kaugalingon nga kabuhi, kundi naghangad sang akon kabubut-on, kag gintuman ang akon mga kasugoan.

5 Kag karon, tungod ginhimo mo ini nga wala sing kon ano man nga kakapoy, tan-awa, pakamaayohon ko ikaw sa wala’y katapusan; kag himuon ko ikaw nga gamhanan sa pulong kag sa buhat, sa pagtuo kag sa mga buluhaton; huo, bisan nga ang tanan nga butang pagahimuon sa imo suno sa imo pulong, kay indi ka magpangayo sinang batok sa akon kabubut-on.

6 Tan-awa, ikaw si Nefi, kag Ako ang Dios. Tan-awa, ginapahayag ko ini sa imo sa atubang sang akon mga anghel, nga makaangkon ka sing gahum sa sining katawhan, kag magasilot sang duta paagi sa tiggulutom, kag paagi sa peste, kag kalaglagan, suno sa kalainan sining katawhan.

7 Tan-awa, ginahatagan ko ikaw sing gahum, nga kon ano man ang imo hugpongon sa duta pagahugpongon sa langit; kag kon ano man ang imo hubaron sa duta pagahubaron sa langit; kag sa sini makaangkon ka sing gahum sa sining katawhan.

8 Kag gani, kon magsiling ka sa sining templo nga mapihak ini sa duha, matabo ini.

9 Kag kon magsiling ka sa sining bukid, Maghugpaas kag mangin matapan, matabo ini.

10 Kag tan-awa, kon magsiling ka nga silotan sang Dios ining katawhan, matabo ini.

11 Kag karon tan-awa, ginasugo ko ikaw, nga maglakat ka kag ipahayag sa sining katawhan, nga amo ini ang siling sang Ginuong Dios, nga amo ang Makagagahum: Luwas lang kon maghinulsol kamo pagasilotan kamo, bisan tubtob sa kalaglagan.

12 Kag tan-awa, karon natabo ini nga sang nahambal sang Ginuo ining mga pulong kay Nefi, nagdulog sia kag wala nagkadto sa iya kaugalingon nga balay, kundi nagbalik sa mga kadam-an nga nagalinapta sa palibot sa ibabaw sang kadutaan, kag nagsugod sa pagpahayag sa ila sang pulong sang Ginuo nga ginhambal sa iya, parte sa ila kalaglagan kon indi sila maghinulsol.

13 Karon tan-awa, sa pihak sinang dako nga milagro nga ginhimo ni Nefi sa pagsugid sa ila parte sa kamatayon sang puno nga hukom, ginpatig-a nila ang ila mga tagipusuon kag wala namati sa mga pulong sang Ginuo.

14 Gani si Nefi nagpahayag sa ila sang pulong sang Ginuo nga nagasiling: Luwas lang kon maghinulsol kamo, amo ini ang siling sang Ginuo, pagasilotan kamo bisan tubtob sa kalaglagan.

15 Kag natabo ini nga sang napahayag sa ila ni Nefi ang pulong, tan-awa, ginpatig-a pa nila gihapon ang ila mga tagipusuon kag indi mamati sa iya mga pulong; gani nagpasipala sila batok sa iya, kag nagtinguha sa pagpadapat sang ila mga kamot sa iya agud nga mahunong nila sia sa bilanggoan.

16 Apang tan-awa, ang gahum sang Dios yara sa iya, kag indi nila sia madakop agud ihunong sia sa bilanggoan kay ginkuha sia sang Espiritu kag gindala palayo sa ila.

17 Kag natabo ini, nga gani naglakat sia nga yara sa Espiritu, halin sa isa ka kadam-an pakadto sa isa, nga nagapahayag sang pulong sang Dios, bisan tubtob nga napahayag niya ini sa ila tanan, ukon napalapnag ini sa tanan nga katawhan.

18 Kag natabo ini nga indi sila mamati sa iya mga pulong; kag may nagsugod nga mga pagbinaisay, sa bagay nga nagbinahin-bahin sila batok sa ila mga kaugalingon kag nagsugod nga magpinatyanay paagi sa espada.

19 Kag gani natapos ang ika-sitenta’y uno nga tuig sang pagginahum sang mga hukom sa katawhan ni Nefi.