1 Kag karon natabo ini, sa ika-sitenta’y dos nga tuig sang pagginahum sang mga hukom nga ang mga pagbinaisay nagdugang, sa bagay nga may mga giyera sa bug-os nga kadutaan sa tanan nga katawhan ni Nefi.

2 Kag ining sekreto nga guban sang mga tulisan ang nagpadayon sining buluhaton sang kalaglagan kag kalainan. Kag ini nga giyera nagdugay sa bilog sina nga tuig; kag sa ika-sitenta’y tres nga tuig nagpadayon man ini.

3 Kag natabo ini nga sa sini nga tuig si Nefi nagpakitluoy sa Ginuo nga nagasiling:

4 O Ginuo, indi pag-itugot nga ining katawhan magkalamatay paagi sa espada; kundi O Ginuo, sa baylo itugot nga may tiggulutom sa kadutaan, agud pukawon sila sa pagdumdum sang Ginuo nga ila Dios, kag basi pa lang maghinulsol sila kag magdangop sa imo.

5 Kag gani nahimo ini suno sa mga pulong ni Nefi. Kag may nangin dako nga tiggulutom sa kadutaan, sa tanan nga katawhan ni Nefi. Kag gani sa ika-sitenta’y kwatro nga tuig ang tiggulutom nagpadayon, kag ang buluhaton sang kalaglagan nag-untat paagi sa espada apang nangin grabe paagi sa tiggulutom.

6 Kag ining buluhaton sang kalaglagan nagpadayon man sa ika-sitenta’y singko nga tuig. Kay ang duta ginsakit nga nangin mamala ini, kag indi magpatubas sang uyas sa panahon sang tig-uluyas; kag ang bug-os nga duta ginsakit, bisan sa mga Lamanhon kag amo man sa mga Nefinhon, gani ginsakit sila sa bagay nga nagkalamatay ang linibo sa ila sa mga bahin sang duta nga mas malain ang katawhan.

7 Kag natabo ini nga nahangpan sang katawhan nga halos mapatay na sila sa tiggulutom, kag nagsugod sila sa pagdumdum sa Ginuo nga ila Dios; kag nagsugod sila sa pagdumdum sang mga pulong ni Nefi.

8 Kag ang katawhan nagsugod sa pagpakitluoy sa ila puno nga mga hukom kag sa ila mga lider, agud magsiling sila kay Nefi: Tan-awa, nakahibalo kami nga isa ikaw ka tawo sang Dios, gani magpakitluoy sa Ginuo nga aton Dios nga ipaiway niya halin sa aton ining tiggulutom, kay basi ang tanan nga pulong nga imo ginpanghambal parte sa aton kalaglagan matuman.

9 Kag natabo ini nga ang mga hukom nagsiling kay Nefi suno sa mga pulong nga ginpangabay. Kag natabo ini nga sang nakita ni Nefi nga ang katawhan naghinulsol kag nagpaubos sang ila mga kaugalingon sa panapton nga sako, nagpakitluoy sia liwat sa Ginuo nga nagasiling:

10 O Ginuo, tan-awa ining katawhan nagahinulsol; kag ginlaglag nila ang guban ni Gadianton halin sa ila sa bagay nga nagkaladula na sila, kag ginlubong nila ang ila sekreto nga mga plano sa duta.

11 Karon, O Ginuo, tungod sining ila pagpaubos mahimo bala nga ipaiway mo ang imo kaakig, kag itugot nga maghaganhagan ang imo kaakig sa kalaglagan sadtong malain nga mga tawo nga imo na ginpanglaglag.

12 O Ginuo, mahimo bala nga ipaiway mo ang imo kaakig, huo, ang imo mabangis nga kaakig, kag ipahanabo nga ining tiggulutom mag-untat sa sini nga kadutaan.

13 O Ginuo, mahimo bala nga pamatian mo ako, kag ipahanabo nga ini mahimo suno sa akon mga pulong, kag magpadala diri sing ulan sa ibabaw sang duta, agud nga magdala sia sang iya bunga, kag sang iya uyas sa panahon sang tig-uluyas.

14 O Ginuo, ginpamatian mo ang akon mga pulong sang nagsiling ako, Ipahanabo ang tiggulutom, agud ang pagpanglaglag sang espada mag-untat; kag nakahibalo ako nga ikaw, bisan sa sini nga tion, magapamati sa akon mga pulong, kay nagsiling ikaw nga: Kon ining katawhan maghinulsol luwason ko sila.

15 Huo, O Ginuo, kag imo nakita nga naghinulsol sila tungod sang tiggulutom kag sang peste kag kalaglagan nga nag-abot sa ila.

16 Kag karon, O Ginuo, mahimo bala nga ipaiway mo ang imo kaakig, kag tilawan liwat kon magaalagad sila sa imo? Kag kon amo, O Ginuo, mahimo mo sila nga pakamaayohon suno sa imo mga pulong nga imo ginsiling.

17 Kag natabo ini nga sa ika-sitenta’y sais nga tuig ginpaiway sang Ginuo ang iya kaakig sa katawhan, kag ginpahanabo nga ang ulan magtupa sa duta, sa bagay nga nagdala ini sang iya bunga sa panahon sang iya tigbulunga. Kag natabo ini nga nagdala ini sang iya uyas sa panahon sang iya tig-uluyas.

18 Kag tan-awa, ang katawhan nagkinasadya kag naghimaya sa Dios, kag ang bug-os nga ibabaw sang kadutaan napuno sang pagkinasadya; kag wala na sila nagtinguha sa pagpatay kay Nefi, kundi nga ginkabig nila sia nga isa ka gamhanan nga propeta, kag isa ka tawo sang Dios, nga may dako nga gahum kag awtoridad nga ginhatag sa iya halin sa Dios.

19 Kag tan-awa, si Lehi, ang iya utod, indi mawigit sa iya bisan isa ka tipik suno sa mga butang nga parte sa pagkamatarong.

20 Kag gani natabo ini nga ang katawhan ni Nefi nagsugod sa pag-uswag liwat sa kadutaan, kag nagsugod sa pagtukod sang ila nalaglag nga mga lugar, kag nagsugod sa pagdamo kag paglapta, bisan tubtob nga napuno nila ang bug-os nga ibabaw sang kadutaan, pareho pa-norte kag pa-sur, halin sa weste nga dagat padulong sa este nga dagat.

21 Kag natabo ini nga ang ika-sitenta’y sais nga tuig nagtapos sa paghidaet. Kag ang ika-sitenta’y siyete nga tuig nagsugod sa paghidaet; kag ang simbahan naglapnag sa ibabaw sang bug-os nga kadutaan; kag ang kalabanan sang katawhan, nga mga Nefinhon kag mga Lamanhon, mga miyembro sang simbahan; kag nakaangkon sila sing dako nga paghidaet sa kadutaan; kag gani natapos ang ika-sitenta’y siyete nga tuig.

22 Kag may paghidaet man sila sa ika-sitenta’y otso nga tuig, luwas lang sa pila ka mga pagbinaisay parte sa mga bahin sang doktrina nga ginpahamtang sang mga propeta.

23 Kag sa ika-sitenta’y nuebe nga tuig may nagsugod nga madamo nga pag-ilinaway. Apang natabo ini nga sanday Nefi kag Lehi, kag madamo sang ila mga kauturan nga nakahibalo parte sa matuod nga mga bahin sang doktrina, kay nakaangkon sang madamo nga mga rebelasyon adlaw-adlaw, gani nagwali sila sa katawhan, sa bagay nga gin-untatan nila ang ila pag-ilinaway sa sinang amo man nga tuig.

24 Kag natabo ini nga sa ika-otsenta nga tuig sang pagginahum sang mga hukom sa katawhan ni Nefi, may pila ka mga nagsilipak sa katawhan ni Nefi, nga sang pila ka tuig antes nag-isa sa mga Lamanhon, kag nagdala sa ila mga kaugalingon sang ngalan sang mga Lamanhon, kag may pila man ka matuod-tuod nga mga kaliwat sang mga Lamanhon, nga ginsugyot nila sa pagkaakig, ukon sadtong mga nagsilipak, gani ginsugdan nila ang isa ka giyera batok sa ila mga kauturan.

25 Kag nagpamatay sila kag nagpangagaw; kag pagkatapos nagaisol sila pabalik sa mga kabukiran, kag padulong sa kamingawan kag sekreto nga mga lugar, nga ginatago ang ila mga kaugalingon agud indi sila matukiban, nga nagabaton adlaw-adlaw sang dugang sa ila kadamuon, tungod may mga nagasilipak nga nagakadto sa ila.

26 Kag gani sang ulihi, huo, bisan sa sulod sang indi madamo nga tinuig, nangin isa sila ka tuman kadako nga guban sang mga tulisan; kag nagpangusisa sila sang tanan nga sekreto nga mga plano ni Gadianton; kag gani nangin mga tulisan sila ni Gadianton.

27 Karon tan-awa, ining mga tulisan naghimo sang dako nga kahalitan, huo, bisan dako nga kalaglagan sa katawhan ni Nefi, kag amo man sa katawhan sang mga Lamanhon.

28 Kag natabo ini nga nangin kinahanglanon gid nga mapauntat ining buluhaton sang kalaglagan; gani nagpadala sila sing kasoldadohan sang makusog nga mga lalaki padulong sa kamingawan kag sa mga kabukiran agud pangitaon ining guban sang mga tulisan, kag pamatyon sila.

29 Apang tan-awa, natabo ini nga sa amo man nga tuig napanabog sila pabalik bisan padulong sa ila kaugalingon nga mga kadutaan. Kag gani natapos ang ika-otsenta nga tuig sang pagginahum sang mga hukom sa katawhan ni Nefi.

30 Kag natabo ini, sa pagsugod sang ika-otsenta’y uno nga tuig nagsulong sila liwat batok sa sining guban sang mga tulisan, kag ginpamatay ang madamo; kag sila man ginbisita sang dako nga kalaglagan.

31 Kag napilitan sila liwat sa pagbalik halin sa kamingawan kag halin sa mga kabukiran padulong sa ila kaugalingon nga mga kadutaan tungod sang tuman nga kadamuon sang mga tulisan nga namugad sa mga kabukiran kag sa mga kamingawan.

32 Kag natabo ini nga gani natapos ini nga tuig. Kag ang mga tulisan nagpadayon gihapon sa pagdugang kag sa pagbakod, sa bagay nga ginbatoan nila ang bilog nga kasoldadohan sang mga Nefinhon, kag amo man sang mga Lamanhon; kag nagtuga sila sang dako nga kahadlok sa katawhan sa bug-os nga ibabaw sang kadutaan.

33 Huo, kay ginbisita nila ang madamo nga bahin sang kadutaan, kag naghimo sang dako nga kalaglagan sa ila; huo, nagpatay sang madamo, kag nagdala sang iban bilang bihag padulong sa kamingawan, huo, ilabi na gid ang ila mga babayi kag ang ila mga kabataan.

34 Karon ining dako nga kalainan, nga nag-abot sa katawhan tungod sang ila kalainan, nagpukaw sa ila liwat sa pagdumdum sang Ginuo nga ila Dios.

35 Kag gani natapos ang ika-otsenta’y uno nga tuig sang pagginahum sang mga hukom.

36 Kag sa ika-otsenta’y dos nga tuig nagsugod sila liwat sa pagkalipat sa Ginuo nga ila Dios. Kag sa ika-otsenta’y tres nga tuig nagsugod sila sa pagbakod sa kalainan. Kag sa ika-otsenta’y kwatro nga tuig wala sila nagbag-o sang ila mga paggawi.

37 Kag natabo ini, sa ika-otsenta’y singko nga tuig mas nagbakod nga nagbakod pa gid sila sa ila bugal, kag sa ila kalainan; kag gani nagakaluto na naman sila liwat para sa kalaglagan.

38 Kag gani natapos ang ika-otsenta’y singko nga tuig.