1 Ug karon nahitabo sa ikakap-atan ug tulo nga tuig sa pagmando sa mga maghuhukom, walay panagbingkil taliwala sa katawhan ni Nephi gawas niadtong ginagmay nga garbo nga diha sa simbahan nga nakapahimo og ginagmay nga panagsumpaki taliwala sa katawhan, diin nga mga kalihokan nahusay dapit sa kataposan sa ikakap-atan ug tulo nga tuig.

2 Ug walay panagbingkil taliwala sa katawhan sa ikakap-atan ug upat nga tuig; ni dihay daghan nga panagbingkil sa ikakap-atan ug lima nga tuig.

3 Ug nahitabo nga sa ikakap-atan ug unom nga tuig, oo, dihay daghan nga panagbingkil ug daghan nga panagsumpaki; diin dihay hilabihan ka daghan kinsa mibiya gikan sa yuta sa Zarahemla, ug miadto sa amihanang bahin sa yuta aron sa pagpanunod sa yuta.

4 Ug mipanaw sila og hilabihan kalayo, nga sa ingon miabot sila sa dagko nga katubigan ug daghan nga suba.

5 Oo, ug gani mikatap sila sa tanang bahin sa yuta, ngadto sa bisan asa nga bahin nga sukad wala mahimo nga awaaw ug walay mga kahoy, tungod sa ka daghan sa lumulupyo kinsa kaniadto nakapanunod sa yuta.

6 Ug karon walay bahin sa yuta nga binyaan, gawas lang sa mga kahoy; apan tungod sa kadako sa kalaglagan sa katawhan kinsa kaniadto mipuyo sa yuta gitawag kini og biniyaan.

7 Ug kay diyotay lamang ang kahoy sa ibabaw sa yuta, bisan pa niana ang nangadto nga katawhan nahimong hilabihan ka hanas sa pagpangsemento; busa nagtukod sila og mga balay nga semento, nga ilang gipuy-an.

8 Ug nahitabo nga midaghan ug mikatap sila, ug miadto gikan sa yuta sa habagatang bahin ngadto sa yuta sa amihanang bahin, ug mikatap hangtod nga misugod sila sa paglukop ibabaw sa tibuok yuta, gikan sa habagatang dagat ngadto sa amihanang dagat, gikan sa kasadpang dagat ngadto sa silangang dagat.

9 Ug ang katawhan kinsa anaa sa yuta sa amihanang bahin nagpuyo sa mga tolda, ug sa mga balay nga semento, ug gipasagdan nila nga mogitib ang bisan unsang kahoy sa ibabaw sa yuta nga kini motubo, nga sa kadugayan sila adunay mga kahoy aron itukod sa ilang mga balay, oo, sa ilang mga siyudad, ug mga templo, ug sa ilang mga sinagoga, ug sa ilang mga santuwaryo, ug sa tanan nga matang sa ilang mga gambalay.

10 Ug nahitabo tungod kay ang mga kahoy hilabihan ka nihit sa yuta sa amihanang bahin, nagpadala sila og daghan pinaagi sa barko.

11 Ug sa ingon niana ilang nahimo nga ang katawhan sa yuta sa amihanang bahin makatukod og daghang siyudad, gamit ang kahoy ug semento.

12 Ug nahitabo nga dihay daghan sa katawhan ni Ammon, kinsa natawo nga mga Lamanita, miadto usab niini nga yuta.

13 Ug karon dihay gitipigan nga daghang talaan bahin sa mga kahimoan niini nga katawhan, pinaagi sa daghan niini nga katawhan, diin kini mga detalyado ug daghan kaayo, kabahin kanila.

14 Apan tan-awa, gatosan ka bahin sa mga kahimoan niini nga katawhan, oo, sa asoy sa mga Lamanita ug mga Nephita, ug sa ilang mga gubat, ug mga panagbingkil, ug mga panagsumpaki, ug ilang pagsangyaw, ug ilang mga panagna, ug ilang panakayan ug ilang paghimo og mga sakayan ug ilang pagtukod og mga templo, ug mga sinagoga ug ilang mga santuwaryo, ug ilang pagkamatarong, ug ilang pagkadaotan, ug ilang mga pagpatay, ug ilang mga pagpanulis, ug ilang pagpanglungkab, ug tanan nga matang sa mga pagkasalawayon ug malaw-ay nga mga buhat, dili malakip niini nga libro.

15 Apan tan-awa, dihay daghan nga libro ug daghan nga talaan sa matag matang, ug kini gitipigan ilabi na sa mga Nephita.

16 Ug kini gihatag gikan sa usa ka kaliwatan ngadto sa lain pinaagi sa mga Nephita, gani hangtod nga nahulog sila ngadto sa kalapasan ug gipangpatay, gilungkaban, ug gigukod, ug giabog, ug gipatay, ug gitibulaag ibabaw sa yuta, ug gisagol uban sa mga Lamanita hangtod nga sila wala na matawag nga mga Nephita, nahimo nga daotan ug mangtas, ug bangis, oo gani nahimo na nga mga Lamanita.

17 Ug karon ako mobalik pag-usab sa akong asoy; busa, unsa ang akong gipamulong nahitabo human nga dihay dagkong mga panagbingkil, ug mga kasamok, ug mga gubat, ug mga panagsumpaki, taliwala sa katawhan ni Nephi.

18 Ang ikakap-atan ug unom nga tuig sa pagmando sa mga maghuhukom natapos;

19 Ug nahitabo nga diha gihapon ang dagkong panagbingkil sa yuta, oo, bisan sa ikakap-atan ug pito nga tuig, ug usab sa ikakap-atan ug walo nga tuig.

20 Bisan pa niana si Helaman mipuli sa hukmanan uban sa kaangayan ug katarong; oo, naninguha siya sa pagsunod sa mga balaod, ug sa mga paghukom, ug sa mga sugo sa Dios; ug gibuhat niya sa kanunay ang unsay matarong sa panan-aw sa Dios; ug naglakaw siya sunod sa mga paagi sa iyang amahan, nga sa ingon siya miuswag sa yuta.

21 Ug nahitabo nga siya adunay duha ka anak nga lalaki. Gihatagan niya ang kamagulangan sa ngalan nga Nephi, ug ang kamanghoran, sa ngalan nga Lehi. Ug nagsugod sila sa pagtubo ngadto sa Ginoo.

22 Ug nahitabo nga ang mga gubat ug mga panagbingkil misugod sa paghunong, sa hinay-hinay, taliwala sa katawhan sa mga Nephita, sa kataposang bahin sa ikakap-atan ug walo nga tuig sa pagmando sa mga maghuhukom sa katawhan ni Nephi.

23 Ug nahitabo sa ikakap-atan ug siyam nga tuig sa pagmando sa mga maghuhukom, dihay nagpadayon nga kalinaw nga mitunhay sa yuta, ang tanan gawas sa tinago nga mga kalihokan nga gitukod sa tulisan nga si Gadianton sa mga dapit nga daghan ang nagpuyo, diin niana nga panahon wala mahibaloi niadtong mga nangulo sa gobyerno; busa sila wala malaglag gikan sa yuta.

24 Ug nahitabo nga niining sama nga tuig dihay hilabihan ka dakong kauswagan sa simbahan, nga sa ingon dihay kaliboan kinsa mipasakop sa simbahan ug nabunyagan ngadto sa paghinulsol.

25 Ug hilabihan ka dako ang kauswagan sa simbahan, ug hilabihan ka daghan sa mga panalangin nga gibu-bo diha sa katawhan, nga bisan ang labaw nga mga pari ug ang mga magtutudlo natingala gayod kaayo.

26 Ug nahitabo nga ang buhat sa Ginoo miuswag ngadto sa pagbunyag ug sa paghiusa sa simbahan sa Dios, daghan nga kalag, oo, gani mga napulo ka kaliboan.

27 Sa ingon niana atong makita nga ang Ginoo maluluy-on ngadto sa tanan kinsa, diha sa katim-os sa ilang mga kasingkasing, motawag sa iyang balaan nga ngalan.

28 Oo, sa ingon niana atong makita nga ang ganghaan sa langit bukas alang sa tanan, gani ngadto niadtong kinsa motuo sa ngalan ni Jesukristo, kinsa mao ang anak sa Dios.

29 Oo, atong makita nga si bisan kinsa nga magtinguha makadawat sa pulongsa Dios, nga buhi ug gamhanan, nga mobuak sa tanang kaigmat ug mga laang ug mga pagpanghaylo sa yawa, ug mogiya sa tawo ni Kristo diha sa higpit ug pig-ot nga agianan tabok nianang walay kataposan nga bung-aw sa pagkauyamot nga giandam aron molamoy sa mga daotan—

30 Ug ipahimutang ang ilang mga kalag, oo, ang ilang imortal nga mga kalag, dapit sa tuo nga kamot sa Dios sa gingharian sa langit, aron molingkod uban ni Abraham, ug ni Isaac, ug uban ni Jacob, ug uban sa atong tanang balaan nga mga amahan, nga dili na gayod mobiya.

31 Ug niini nga tuig dihay padayon nga pagmaya sa yuta sa Zarahemla, ug sa tanan nga rehiyon sa palibot, bisan sa tanan nga yuta nga gipanag-iya sa mga Nephita.

32 Ug nahitabo nga dihay kalinaw ug hilabihan ka dako nga kamaya sa nahibilin nga ikakap-atan ug siyam nga tuig; oo, ug usab dihay nagpadayon nga kalinaw ug dako nga kamaya sa ikakalim-an nga tuig sa pagmando sa mga maghuhukom.

33 Ug sa kalim-an ug usa nga tuig sa pagmando sa mga maghuhukom dihay kalinaw usab gawas lamang sa garbo nga misugod pagsulod sa simbahan—dili ngadto sa simbahan sa Dios, apan ngadto sa mga kasingkasing sa katawhan kinsa nangangkon nga mga sakop sa simbahan sa Dios—

34 Ug napuno sila sa garbo, gani ngadto sa pagpanggukod sa daghan sa ilang kaigsoonan. Karon hilabihan kini kadaotan, nga nakapahimo sa ubay-ubay nga mapainubsanong bahin sa katawhan nga mag-antos sa hilabihan nga mga pagpanggukod, ug magsagubang sa hilabihan nga kasakitan.

35 Bisan pa niana nagpuasa sila ug nag-ampo sa kanunay, ug nag-anam sa pagkalig-on sa ilang kamapaubsanon, ug nag-anam sa pagkamakanunayon sa pagtuo diha kang Kristo, hangtod nga napuno sa kalipay ug kahupayan ang ilang mga kalag, oo, gani sa paglimpyo ug pagbalaan sa ilang mga kasingkasing, diin nga pagbalaan miabot tungod sa ilang pagtugyan sa ilang mga kasingkasing ngadto sa Dios.

36 Ug nahitabo nga ang ikakalim-an ug duha nga tuig natapos usab sa kalinaw, gawas lamang sa hilabihan ka dako nga garbo nga misulod sa mga kasingkasing sa katawhan; ug tungod kini sa ilang hilabihan gayod nga kaadunahan ug sa ilang kauswagan sa yuta; ug nagtubo kini diha kanila matag adlaw.

37 Ug nahitabo sa ikakalim-an ug tulo nga tuig sa pagmando sa mga maghuhukom, si Helaman namatay, ug ang iyang kamagulangan nga anak nga lalaki nga si Nephi misugod sa pagmando puli kaniya. Ug nahitabo nga mipuli siya sa hukmanan uban sa kaangayan ug katarong; oo, nagtuman siya sa mga sugo sa Dios, ug naglakaw sa mga paagi sa iyang amahan.