1 Na em i kamap we planti memba bilong sios i bin bruknabaut long sios, na tu tok pait i bin kamap namel long ol pipol inap long kapsaitim planti blut insait long faipela ten foa krismas.

2 Na ol lain ol i bin kirapim pait na les long havim tok, sampela ol i bin kilim ol na sampela ol i bin ronim i go aut long graun, na ol i bin go long king long ol lain bilong Leman.

3 Na em i kamap we ol i bin traim long tanim bel long ol lain bilong Leman long pait wantaim ol lain bilong Nifai, tasol lukim, ol lain bilong Leman ol i bin poret nogut tru olsem na, ol i no harim toktok long ol lain ol i bin bruk i go.

4 Tasol em i kamap we long faipela ten sikis krismas long rul bilong ol jas, sampela moa long ol lain bilong Nifai ol i bin bruk i go long ol lain bilong Leman, na ol i bin winim wantaim ol lain ol i bin go bipo long tanim bel bilong ol long belhat wantaim ol lain bilong Nifai, na ol i bin redi long pait olgeta long dispela krismas.

5 Na ol i kamdaun long pait wantaim ol lain bilong Nifai insait long faipela ten seven krismas, na ol i statim wok bilong idai, ye, inap long ol i bin win long kisim graun bilong Jarahemla, ye, na olgeta graun i go inap long graun klostu long graun bilong Planti.

6 Na ol i bin ronim ol lain bilong Nifai wantaim ol ami bilong Moronaia i go inap long graun bilong Planti.

7 Na ol i bin banisim ol yet long ol lain bilong Leman long dispela hap, long solwara long hap long wes, i go inap long sowara long hap long is, na em i wanpela de long ol lain bilong Nifai long wokabaut, long stretpela hap ol i bin putim strongpela banis we ami bilong ol bin sanap long pait long kantri bilong ol long hap long not.

8 Olsem na, ol lain bilong Nifai ol i bruk i go wantaim halivim i kam long planti ami tru long ol lain bilong Leman, ol i bin kisim olgeta graun long ol lain bilong Nifai long hap long saut. Na olgeta long dispela i bin kamap insait long faipela ten eit, na faipela ten nain krismas long rul bilong ol jas.

9 Na em i kamap we, long sikispela ten krismas long rul bilong ol jas, Moronaia wantaim ami bilong em ol i bin win long kisim bek planti graun, ye, ol i bin kisim bek planti ol siti ol lain bilong Leman ol i bin kisim.

10 Na em i kamap we long sikispela ten wan krismas, ol i bin winim bek inap long wanpela hap long olgeta graun bilong ol.

11 Nau dispela traipela lus tru bilong ol lain bilong Nifai, wantaim traipela idai tru namel long ol bai ol i no inap kamap sapos ol i no wokim pasin nogut na pasin les nogut tru, ye, na ol lain ol i tok ol i memba long sios bilong God ol i bin wokim wankain tu.

12 Na em bikos ol i bin apim nem bilong ol, bikos ol i bin gat planti moni na ol samting, ye, bikos ol i givim pen long ol man i nogat moni, olsem ol i no givim kaikai long taim ol i hangre, pasim ol wantaim klos long taim ol i as nating, na paitim ol lain brata bilong ol long maus taim ol i bihainim Pasin daunim bel, ol i tok pilai long dispela samting em i holi, ol i tok nogat long spirit bilong profesi na revelesen, ol i kilim man, ol i strong long stil, ol i giaman, ol i stil, ol i wokim pasin pamuk, ol i kirapim planti tok pait, na ronawe i go long graun bilong Nifai, namel long ol lain bilong Leman—

13 Na bikos long dispela traipela pasin nogut tru, na apim ol yet long strong bilong ol, God i bin lusim ol long strong bilong ol yet, olsem na ol i no kamap strong, tasol ol i bin paitim na kisim pen, na ronim long pes long ol lain bilong Leman, i go inap long ol i klostu lusim olgeta graun bilong ol.

14 Tasol lukim, Moronaia i bin autim planti samting long ol pipol bikos long pasin nogut bilong ol, na tu Nifai wantaim Lihai, em ol pikinini man bilong Hilaman, ol i bin autim planti samting long ol pipol, ye, na ol i bin profesai long planti samting long ol long pasin nogut bilong ol, na wanem bai kamap long ol sapos ol i no tanim bel long sin bilong ol.

15 Na em i kamap we ol i bin tanim bel, na sindaun bilong ol i stat long kamap gutpela taim ol i tanim bel.

16 Long wanem, taim Moronaia i lukim olsem ol i tanim bel, em i bin traim long lidim ol i go long wanpela ples i go long narapela, na long wanpela siti i go long narapela siti, i go inap long ol i bin kisim bek wanpela hap long ol samting wantaim olgeta graun bilong ol.

17 Na sikispela ten wan krismas long rul bilong ol jas i pinis olsem.

18 Na em i kamap we long sikispela ten tu krismas long rul bilong ol jas, Moronaia i bin painim hat long kisim moa graun long ol lain bilong Leman.

19 Olsem na ol lain bilong Nifai ol i bin lusim plen bilong ol long kisim bek hap graun bilong ol long han long ol lain bilong Leman, bikos ol lain bilong Leman i moa moa yet olsem, na em i bin hat long ol lain bilong Nifai long winim ol, na Moronaia i bin yusim olgeta ami bilong em, long lukautim dispela hap long graun ol i bin kisim bek.

20 Na em i kamap we, bikos long traipela namba tru long ol lain bilong Leman, ol lain bilong Nifai i bin poret nogut tru, nogut ol lain bilong Leman bai winim ol, kalapim ol i go daun na kurungutim, kilim ol na bagarapim ol.

21 Ye, ol i stat long tingim ol profesi bilong Alma na toktok bilong Mosaia, na ol i bin lukim olsem ol i wanpela pipol ol i bin kamapim bik het bilong ol, na olsem ol i bin kisim olsem samting nating long ol lo bilong God.

22 Na olsem ol i bin senisim na kurugutim wantaim ol lek bilong ol lo bilong Mosaia, o dispela samting Bikpela i bin tokim em long givim long ol pipol, na ol i lukim olsem ol lo bilong ol i bin kamap nogut, na tu ol i kamap pasin nogut lain, na ol i kamap pasin nogut lain wankain olsem ol lain bilong Leman.

23 Na bikos long pasin nogut bilong ol, sios i stat long paul isi isi i go olgeta, na ol i stat long bilip olsem spirit bilong profesi na spirit bilong revelesen i giaman, na jasmen bilong God i bin lukluk stret long ai bilong ol.

24 Na ol i lukim olsem ol i skin dai, wankain olsem ol lain brata bilong ol, ol lain bilong Leman, na olsem Spirit bilong Bikpela i no moa lukautim ol, ye, em i bin lusim ol bikos Spirit bilong Bikpela i no inap i stap long doti tempel—

25 Olsem na Bikpela i bin pinis long lukautim ol wantaim nambawan pawa tru bilong mirakel bilong em, long wanem, ol i bin pundaun long laip bilong ol man ol i no bilip, na pasin nogut tru, na ol i bin lukim olsem ol lain bilong Leman ol i moa moa yet long ol, na ol bai idai olgeta sapos ol i no holim pas long Bikpela God bilong ol.

26 Long wanem, lukim, ol i bin lukim olsem strong bilong ol lain bilong Leman i wankain olsem strong bilong ol, tru tumas, wanwan man gat wankain strong. Olsem na ol i bin pundaun long dispela traipela sin tru, ye, olsem na ol i bin kamap skin dai, bikos i no planti krismas i go pas na ol i bin sin hariap tru.