1 Lukim, nau em i kamap we taim Nifai i autim ol dispela toktok, sampela man ol i stap namel long ol i ron i go long jasmen-sia, ye, olsem faipela man ol i bin go, na ol i bin tok namel long ol yet, taim ol i go olsem:

2 Lukim, nau yumi bai save tru sapos dispela man i wanpela profet, na God i bin tokim em long profesai long kain gutpela ol samting tru long mipela. Lukim, mipela i no bilip olsem God i bin tokim em, ye, mipela i no bilip olsem em i wanpela profet, tasol, sapos dispela samting em i bin tokaut long het jas i tru, olsem em idai, mipela bai bilip olsem long ol narapela toktok em i bin autim i tru.

3 Na em i kamap we ol i bin ron wantaim olgeta strong bilong ol, na kam long jasmen-sia, na lukim, het jas i pundaun long graun, na silip idai long blut bilong em.

4 Na nau lukim, ol i bin kirap nogut tru taim ol i lukim dispela, inap long ol i bin pundaun long graun, bikos ol i no bilip long ol toktok Nifai i bin tokaut long het jas.

5 Tasol nau, ol i bilip taim ol i lukim, na poret i bin kamap long ol nogut olgeta jasmen Nifai i bin toktok bai kamap long ol pipol, olsem na ol i guria, na pundaun long graun.

6 Nau long taim stret ol i kilim jas—em brata bilong em i bin hait na pasim em yet wantaim wanpela kain kolos na sutim em i dai, na em i ronawe, na ol wokman ol i ron i go na tokim ol pipol, na singaut namel long ol pipol olsem ol i kilim idai jas.

7 Na lukim ol pipol ol i bin bung wantaim long ples bilong jasmen-sia—na lukim, ol i kirap nogut long lukim dispela faipela man ol i bin pundaun long graun.

8 Na nau lukim, dispela pipol ol i no bin save wanpela samting long planti lain ol i bin bung wantaim long gaden bilong Nifai, olsem na ol i bin tok tok namel long ol yet olsem: Ol dispela man tasol ol i bin kilim jas, na God i bin paitim ol olsem ol bai i no inap ronawe long mipela.

9 Na em i kamap we ol pipol i bin kisim ol, na pasim ol na tromoim ol i go insait long kalabus. Na ol i bin salim tok save i go long olgeta hap long graun olsem ol i bin kilim idai jas, na olsem, ol man ol i bin kilim em ol i bin kisim ol na tromoi ol i go insait long kalabus.

10 Na em i kamap we, ol pipol ol i bin bung wantaim long tumora long krai na long tambu long kaikai, long taim long planim dispela nambawan het jas ol i bin kilim em idai.

11 Olsem na ol jas ol i bin i stap long gaden bilong Nifai, na harim ol toktok bilong em, ol i bin bung wantaim tu long taim long planim jas.

12 Na em i kamap we ol i bin askim namel long ol pipol, olsem: Ol faipela man ol i bin salim ol long painim het jas sapos em idai o em i stap we? Na ol pipol i bekim ol na tok: Mipela i no save long dispela faipela man em yupela tok yupela i bin salim, tasol, mipela i bin kalabusim faipela man em ol man bilong kilim man.

13 Na em i kamap we ol jas ol i bin laikim olsem ol bai bringim ol i kam, na ol i bin kisim ol i kam, na lukim em faipela man ol i bin salim, ol i kam, na lukim ol jas i bin askim ol long save long wanem samting i bin kamap, na ol i bin tokim ol long olgeta samting i bin kamap, olsem:

14 Mipela i bin ron na kam long ples bilong jasmen-sia, na taim mipela lukim olgeta samting olsem Nifai i bin tokaut, mipela i kirap nogut na mipela i bin pundaun long graun, na bihain long mipela i kamap orait gen long kirap nogut, lukim, ol pipol i bin kalabusim mipela.

15 Nau, mipela i no save husat i bin kilim dispela man, na mipela i save long dispela tasol, mipela i bin ron na kam olsem yupela i bin laikim, na lukim em idai i stap, olsem Nifai i bin tok.

16 Na nau em i kamap we ol jas i bin tok klia long ol samting long ol pipol, na singaut wantaim belhat long Nifai, olsem: Lukim, mipela save olsem dispela Nifai mas wan bel wantaim wanpela man long kilim jas, na em i bin tokaut long mipela long bihain, olsem em bai winim bel bilong mipela long kam insait long lotu bilong em, olsem em bai apim em yet long kamap wanpela bikpela man, God i bin makim, na wanpela profet.

17 Na nau lukim, mipela bai painim dispela man, na em bai konpesim rong bilong em na soim long mipela husat man tru em i kilim dispela jas.

18 Na em i kamap we ol faipela man ol i bin kamap fri long de long planim jas. Tasol, ol faipela man ol i bin tok tok strong long ol toktok bilong ol jas ol i bin belhat long Nifai, na wanwan man long ol faipela man ol i bin tok pait wantaim ol jas na ol i bin daunim ol.

19 Tasol, ol jas i bin givim oda na ol pipol ol i bin kisim Nifai, pasim em na karim em i kam long ai bilong ol pipol, na ol i stat long askim em long planti we olsem ol bai krosim em, inap long ol bai kotim em long idai—

20 Na ol i bin askim em olsem: Yu bin poromanim wanpela man, em i bin wokim dispela pasin kilim man? Nau tokim mipela, na tok stret long rong bilong yu, na ol i bin tok: Lukim dispela moni, na tu mipela bai i no inap kilim yu sapos yu tokim mipela, na tok stret long pasim tok yu bin mekim wantaim dispela man.

21 Tasol Nifai i bin tokim ol: O yupela hambak lain, yupela bel bilong yupela i doti, yupela ai pas lain, na yupela ol pipol bilong kamapim pasin bik het, yupela save hamas taim Bikpela God bilong yupela bai larim yupela olsem yupela bai wok yet long dispela pasin sin bilong yupela?

22 O yupela gat nid long i stat long krai na sore, bikos long bikpela bagarap tru i wetim yupela long dispela taim, sapos yupela i no tanim bel.

23 Lukim yupela tok olsem mi bin tok wan bel wantaim wanpela man olsem em bai kilim Sisoram, het jas bilong mipela. Tasol lukim, mi tokim yupela, olsem yupela i sutim tok i kam long mi bikos mi bin tokaut long yupela olsem yupela bai save long dispela samting, ye, tru tumas long tokaut long yu, olsem mi save long pasin nogut na pasin les nogut tru namel long yupela.

24 Na bikos mi bin tokaut long dispela, yupela tok olsem mi bin tok wan bel wantaim wanpela man olsem em bai wokim dispela samting, ye, bikos mi bin soim long yupela dispela mak, yupela i belhat long mi, na traim long bagarapim laip bilong mi.

25 Na nau lukim, mi bai soim long yupela narapela mak, na lukim sapos yupela bai traim long bagarapim mi long dispela samting.

26 Lukim mi tokim yupela: Go long haus bilong Siantum, em i brata bilong Sisoram, na askim em—

27 Em Nifai, em i giaman profet, em i profesai na tok nogut tru long dispela pipol na em i bin pasim tok wantaim yu, olsem na yu bin kilim Sisoram, brata bilong yu?

28 Na lukim, em bai tokim yupela, Nogat.

29 Na yupela bai askim em: Yu bin kilim brata bilong yu?

30 Na em bai sanap wantaim poret, na bai i no inap save long wanem em bai tok. Na lukim, em bai tok nogat long yupela, na bai soim pes olsem em i kirap nogut, na, em bai tokim yupela olsem em i no wokim.

31 Tasol lukim, yupela bai sekim em, gut na yupela bai painim blut long aninit long klos bilong em.

32 Na taim yupela i lukim dispela, yupela bai askim: Dispela blut i kam long we? Mipela i no save olsem dispela i blut long brata bilong yu?

33 Na em bai guria bihain long dispela, na skin bai luk narapela kain olsem idai i kamap long em.

34 Na bihain long dispela yupela bai tok: Bikos long dispela poret na narapela kain lukluk kamap long pes bilong yu, lukim, mipela i save olsem yu bin rong.

35 Na bihain long dispela, traipela poret tru bai kamap long em, na em bai konpes long yu, na em bai i no inap giaman moa olsem em i no man bilong kilim man.

36 Na bihain long dispela, em bai tokim yupela, olsem mi, Nifai, i no save wanpela samting long dispela samting, tasol pawa bilong God i bin givim long mi. Na bihain long dispela yupela bai save olsem mi em stretpela man, na olsem God i bin salim mi kam long yupela.

37 Na em i kamap we ol i bin go na wokim wankain olsem Nifai i bin tokim ol. Na lukim, ol toktok em i bin autim i tru, long wanem, em i bin tok nogat na konpes olsem em i bin toktok.

38 Na em i bin soim em yet olsem em i trutru man bilong kilim man na ol faipela man wantaim Nifai ol i bin kamap fri.

39 Na sampela lain bilong Nifai ol i bin bilip long ol toktok bilong Nifai, na tu sampela ol i bin bilip bikos long testimoni bilong ol faipela man, long wanem, ol i bin tanim bel taim ol i stap long kalabus.

40 Na nau sampela namel long ol pipol i bin tok olsem Nifai i wanpela profet.

41 Na sampela pipol ol i bin tok: Lukim, em i wanpela god, long wanem, em i no inap save long olgeta samting sapos em i no god. Long wanem, lukim, em i bin autim long mipela long ol tingting long bel bilong mipela, na tu em i bin autim long mipela long ol samting, na tru tumas em i bin soim long mipela long save long tru tru man bilong kilim het jas bilong mipela.