1 Na em i kamap we, lukim, Nifai i givim i kam antap jasmen-sia na makim wanpela man, nem bilong em Sisoram, long kisim ples bilong em insait long dispela krismas yet.

2 Long wanem, bikos maus bilong ol pipol ol i bin makim lo na gavman bilong ol, na ol lain ol i bin makim ol nogut lain i moa yet long ol lain ol i bin makim ol gutpela, lain olsem na ol i bin redi long kisim bagarap, bikos long ol lo i kamap nogut.

3 Ye, na i no dispela tasol, ol em wanpela lain pipol em ol i bin kamapim pasin bik het, olsem na lo na stretpela pasin i no moa bosim ol, tasol ol i bin asua long kisim bagarap.

4 Na em i kamap we Nifai i bin les bikos long pasin nogut bilong ol, na em i bin lusim jasmen-sia long autim toktok bilong God wantaim brata bilong em Lihai i go inap long ol i idai.

5 Long wanem, ol i bin tingim toktok long papa bilong ol, Hilaman i bin autim long ol. Na ol toktok em i bin autim i olsem:

6 Lukim, ol pikinini man bilong mi, mi laikim olsem yupela mas ting ting long bihainim ol lo bilong God, na mi laikim olsem yupela mas autim ol dispela toktok long ol pipol. Lukim, mi bin givim long yupela ol nem bilong nambawan tumbuna papa bilong yumi em i bin kamaut long graun bilong Jerusalem, na mi bin wokim dispela olsem taim yu tingim nem bilong yupela, yupela bai tingim ol, na taim yupela tingim ol yupela bai tingim wok ol i bin wokim, na taim yupela tingim wok ol i bin wokim, yupela bai save olsem wok ol i bin autim, na tu raitim, olsem ol i gutpela.

7 Olsem na, ol pikinini man bilong mi, mi laikim olsem yupela mas wokim dispela ol samting we i gutpela, olsem wankain bai ol i toktok na raitim long nem bilong yupela, olsem ol i bin toktok na raitim long nem bilong ol.

8 Na nau ol pikinini man bilong mi, lukim, mi gat liklik moa long laikim long yupela, na dispela i olsem, yupela bai i no inap apim nem bilong yupela taim yupela i wokim ol dispela samting, tasol olsem yupela bai wokim ol dispela samting long bungim antap ol dispela samting bilong yupela long heven, ye, we i oltaim oltaim, na we i no inap bagarap, ye, olsem yupela bai kisim dispela presen i dia tumas, laip oltaim oltaim, we mipela bilip tru olsem ol tumbuna papa bilong yumi i bin kisim.

9 O tingim, tingim, ol pikinini man bilong mi, long ol toktok bilong king Benjamin i bin autim long ol pipol bilong em, ye, tingim olsem nogat narapela we o rot we bai man ken kisim selvesen, tasol insait long atoning blut bilong Jisas Krais, em i bai kam, ye, tingim olsem em i kam long kisim bek graun.

10 Na tu tingim ol toktok Amulek i bin autim long Sisrom, long siti bilong Amonaia, long wanem, Amulek i bin tok long em olsem, tru tumas Bikpela bai kam long kisim bek ol pipol bilong em, tasol em bai i no inap kisim bek ol long sin bilong ol, tasol long rausim sin bilong ol.

11 Na Papa i bin givim pawa long em long baim bek ol long sin bilong ol bikos long tanim bel, olsem na em i bin salim ol ensel bilong em long autim nius long as bilong tanim bel, na dispela bai bringim ol pipol insait long pawa bilong Ridima long kisim selvesen long sol bilong ol.

12 Na nau, ol pikinini man bilong mi, tingim, tingim olsem yupela mas sanap long Ridima, ston bilong mipela em i Krais, Pikinini man bilong God, olsem taim tewel i salim kam strongpela win tru bilong em, ye, ol spia bilong em wantaim raun win, ye, taim olgeta win na strongpela ais-ren tru i kam long yupela, em bai nogat pawa long winim yupela long pulim yupela go daun insait long baret bilong pen na hevi i nogat arere, bikos long ston em yupela i sanapim, em i ston tru tru, wanpela ston we ol man bai i no inap pundaun, sapos ol i sanap long em.

13 Na em i kamap we Hilaman i bin lainim ol pikinini man bilong em wantaim ol dispela toktok, ye, em i bin lainim ol planti samting we em i no bin raitim, na planti samting we ol i bin raitim.

14 Na ol i bin tingim toktok bilong em, olsem na ol i bin go het long bihainim ol lo bilong God, long lainim toktok bilong God namel long olgeta pipol bilong Nifai, na ol i statim long siti bilong Planti;

15 Na long dispela hap i go long siti bilong Gid; na long siti bilong Gid i go long siti bilong Mulek;

16 Na tru tumas, ol i bin go long wanpela siti i go long narapela, i go inap long ol i bin kamap pinis namel long olgeta pipol bilong Nifai i stap long graun long hap long saut, na long dispela hap i go long graun bilong Jarahemla, namel long ol lain bilong Leman.

17 Na em i kamap we ol i bin autim toktok wantaim strongpela pawa, inap long ol i bin daunim planti lain bilong Nifai ol i bin bruk i go awe, olsem na ol i bin kam na konpesim sin bilong ol na baptais long tanim bel, na ol i bin go bek hariap tru long ol lain bilong Nifai long traim long stretim rong ol i bin wokim.

18 Na em i kamap we Nifai wantaim Lihai ol i bin autim toktok long ol lain bilong Leman wantaim kain strongpela pawa tru na atoroti, bikos pawa na atoroti em i bin givim long ol olsem ol bai toktok, na tu ol i bin save wanem toktok ol i mas mekim—

19 Olsem na ol i bin toktok na ol lain bilong Leman ol i bin kirap nogut tru long bilip long ol, olsem na eit tausen ol lain bilong Leman ol i stap long graun bilong Jarahemla na raunabaut i bin baptais long tanim bel, na strongim ol long lusim pasin nogut long ol kastam long tumbuna papa bilong ol.

20 Na em i kamap we Nifai na Lihai i bin go het long graun bilong Nifai long dispela hap.

21 Na em i kamap we ami long ol lain bilong Leman ol i bin kisim ol na kalabusim ol, ye, tru tumas, dispela haus kalabus yet we ol wokman bilong Limhai ol i bin kalabusim Amon wantaim ol brata bilong em.

22 Na bihain long ol i kalabusim ol long planti de wantaim hangre, lukim, ol lain bilong Leman ol i bin kisim ol olsem ol bai kilim ol.

23 Na em i kamap we samting kain olsem paia i bin raunim Nifai wantaim Lihai, tru tumas inap long ol i no putim han bilong ol long ol tupela, bikos ol i bin poret nogut paia bai kukim ol. Tasol, Nifai na Lihai paia i no bin kukim, ol na ol tupela i stap olsem ol i sanap namel tru long paia tasol paia i no bin kukim ol.

24 Na taim ol tupela i lukim paia olsem pos raunim ol na i no kukim, tupela bin kisim strong.

25 Long wanem, ol tupela i lukim olsem ol lain bilong Leman i no putim han long ol tupela o kam klostu long ol tupela, tasol ol i bin sanap olsem ol i kirap nogut tru na ol i nogat toktok.

26 Na em i kamap we Nifai wantaim Lihai i bin go het na i stat long toktok wantaim ol olsem: Noken poret, bikos lukim, em God em i soim yupela long dispela gutpela samting tru, we yupela noken putim han long mi tupela long kilim mipela.

27 Na lukim, bihain long ol tupela autim dispela toktok, graun i guria nogut tru, na ol banis bilong haus kalabus i guria olsem ol i klostu pundaun long graun, tasol lukim ol i no bin pundaun. Na lukim, ol lain ol i stap insait long kalabus i ol lain bilong Leman na ol lain bilong Nifai em ol i bin bruk i go nabaut.

28 Na em i kamap we seid bilong klaut tudak i bin karamapim ol, na wanpela poret nogut tru na pasin isi i bin kamap long ol.

29 Na em i kamap we wanpela nek i bin kam olsem long antap long klaut tudak, na tok olsem: Yupela tanim bel, yupela tanim bel, na noken traim long bagarapim ol wokman bilong mi, em mi salim ol i go long yupela long autim gutpela nius.

30 Na em i kamap we taim ol i harim dispela nek, na luksave olsem em i no nek bilong klaut pairap, o nek bilong wanpela traipela nois tru, tasol lukim, em i wanpela liklik na bel isi nek, tru, olsem wanpela tok isi, na tru tumas em i bin sutim na go stret insait long ol sol—

31 Na nek i liklik tru, tasol lukim, graun i guria nogut tru, na ol banis bilong haus kalabus i guria gen, olsem ol i bin klostu pundaun long graun, na lukim tudak klaut we i bin karamapim ol i no lusim ol—

32 Na lukim nek i kam gen, olsem: Yupela tanim bel, yupela tanim bel, bikos kingdom long heven i kam klostu, na noken traim long bagarapim ol wokman bilong mi. Na em i kamap we graun i guria gen, na ol banis i bin guria.

33 Na gen nek i kam nambatri taim, na autim ol gutpela toktok tru we nogat wanpela man ken tokaut, na ol banis i guria gen na graun i guria olsem em i laik klostu bruk long namel.

34 Na em i kamap we ol lain bilong Leman i no inap ronawe bikos long seid bilong klaut tudak we i bin karamapim ol, ye, na tu ol i bin stap yet bikos poret i bin kamap long ol.

35 Nau wanpela man namel long ol em i wan blut long ol lain bilong Nifai, em i bin memba long sios bilong God tasol bruk i go nabaut long ol.

36 Na em i kamap we em i bin tanim raun, na lukim, em i bin lukluk insait long klaut tudak na lukim pes bilong Nifai na Lihai, na lukim, pes bilong ol tupela i lait nogut tru, olsem long pes bilong ol ensel. Na em i bin lukim olsem ol i putim ai bilong ol go antap long heven, na ol i wok long toktok na bikmaus long sampela man em ol i save long em.

37 Na em i kamap we dispela man i bin singaut long ol pipol, olsem ol bai tanim na lukim. Na lukim, em i bin givim pawa long ol long tanim na lukluk, na ol i bin lukim pes bilong Nifai na Lihai.

38 Na ol i askim dispela man: Lukim, wanem as tru long olgeta long dispela samting, na ol tupela man ol i bin toktok long husat?

39 Nau nem bilong dispela man em Aminadab. Na Aminadab i tokim ol: Ol tupela i toktok long ol ensel bilong God.

40 Na em i kamap we ol lain bilong Leman i askim em: Mipela bai mekim olsem wanem, long dispela seid bilong klaut tudak bai lusim mipela?

41 Na Aminadab i bekim ol: Yupela mas tanim bel, na singaut long dispela nek, tru tumas i go inap long yupela mas bilip long Krais, em Alma, Amulek wantaim Sisrom ol i bin lainim long yupela, na klaut tudak bai lusim yupela, taim yupela i wokim dispela.

42 Na em i kamap we olgeta i stat long singaut long nek bilong man em i bin mekim gaun guria, ye, ol i singaut i go inap long klaut bilong tudak i lusim ol.

43 Na em i kamap we taim ol i lukluk raun, na lukim olsem klaut tudak i lusim ol, tasol, ol i lukim olsem paia olsem pos i raunim ol, ye, olgeta wanwan sol dispela paia olsem pos i bin raunim ol.

44 Na Nifai wantaim Lihai i stap namel long ol, ye, ol tupela paia i bin raunim ol nabaut, ye, ol tupela i stap olsem long namel tru long paia lait, tasol ol tupela paia i no bin kukim ol o ol banis bilong haus kalabus i no bin paia, na ol i bin pulap wantaim amamas na dispela i no inap toktok long em na i gat olgeta glori.

45 Na lukim, Holi Spirit bilong God i bin kam daun long heven, na go insait long bel bilong ol, na ol i bin pulap olsem wantaim paia, na ol i bin autim planti gutpela toktok tru.

46 Na em i kamap we wanpela nek i bin kam long ol, ye, wanpela switpela nek tru, olsem wanpela tok isi na tok:

47 Bel isi, bel isi bai i stap wantaim yupela, bikos long bilip bilong yupela, long Pikinini man bilong mi, em mi Lavim Tru, em bin i stap long taim graun bin sanap.

48 Na nau, taim ol i harim dispela ol i putim ai bilong ol i go antap olsem long lukluk long hap we nek i bin kam, na lukim, ol i bin lukim ol heven opim, na ol ensel i bin kam daun long heven na minista long ol.

49 Na klostu tri handret sol ol i bin lukim na harim ol dispela samting, na ol ensel i bin tokim ol olsem ol ken go aut tasol ol i noken kirap nogut o tubel.

50 Na em i kamap we ol i bin go aut, na minista long ol pipol, na autim olgeta samting ol i bin harim na lukim, long olgeta hap long graun raunabaut, inap long klostu olgeta pipol bilong Leman i bilip long ol, bikos long bikpela namba tru long witnes ol i bin kisim.

51 Na planti lain ol i bilip ol i bin lusim ol samting bilong pait bilong ol wantaim belhat bilong ol na kastam long tumbuna papa bilong ol.

52 Na em i kamap we ol i bin givim bek ol graun bilong ol lain bilong Nifai.