1 Kag natabo ini nga sa sining amo man nga tuig, tan-awa, gintugyan ni Nefi ang hukom-lingkuranan sa isa ka lalaki nga ang ngalan amo si Cezoram.

2 Kay tungod ang ila mga layi kag ang ila mga gobyerno ginpahamtang paagi sa tingug sang katawhan, kag sila nga nagpili sang malain mas madamo sangsa ila nga nagpili sang maayo, gani nagakaluto na sila padulong sa kalaglagan, kay ang mga layi nangin tiko.

3 Huo, kag indi lamang ini; isa sila ka batinggilan nga katawhan, sa bagay nga indi sila madumalahan sang layi kag sang hustisya luwas lang nga ini mangin sa ila kalaglagan.

4 Kag natabo ini nga ginluyahan si Nefi tungod sang ila kalainan; kag ginbayaan niya ang hukom-lingkuranan, kag nagpangako sang iya kaugalingon sa pagwali sang pulong sang Dios sa tanan nga nabilin niya nga mga inadlaw, kag ang iya utod nga si Lehi man, sa tanan nga nabilin niya nga mga inadlaw;

5 Kay nadumduman nila ang mga pulong nga ginhambal sang ila amay nga si Helaman sa ila. Kag amo ini ang mga pulong nga iya ginhambal:

6 Tan-awa, mga anak ko, ginapangabay ko nga dumdumon ninyo ang pagtuman sang mga kasugoan sang Dios; kag luyag ko nga ipahayag ninyo sa katawhan ining mga pulong. Tan-awa, ginhatag ko sa inyo ang mga ngalan sang aton una nga mga ginikanan nga naghalin sa duta sang Jerusalem; kag ini akon ginhimo agud nga kon madumduman ninyo ang inyo mga ngalan madumduman ninyo sila; kag kon madumduman ninyo sila madumduman ninyo ang ila mga binuhatan; kag kon madumduman ninyo ang ila mga binuhatan mahibal-an ninyo nga ini nasiling, kag nasulat man, nga ang mga ini maayo.

7 Gani, mga anak ko, luyag ko nga himuon ninyo inang maayo agud nga masiling parte sa inyo, kag masulat man, bisan pareho sang nasiling kag nasulat parte sa ila.

8 Kag karon mga anak ko, tan-awa may dugang pa ako nga pangabayon sa inyo, nga ang amo nga pangabay amo, nga indi ninyo paghimuon ining mga butang agud nga maghinambog kamo, kundi nga himuon ninyo ining mga butang agud magtipon para sa inyo mga kaugalingon sang manggad sa langit, huo, nga wala’y katapusan, kag wala nagalubad; huo, agud nga maangkon ninyo inang malahalon nga dulot sang kabuhi nga wala’y katapusan, nga may kabangdanan kita sa paghunahuna nga ginhatag sa aton mga amay.

9 O dumduma, dumduma, mga anak ko, ang mga pulong nga ginhambal ni haring Benjamin sa iya katawhan; huo, dumduma nga wala na sing iban pa nga dalan ukon paagi nga sa diin ang tawo maluwas, lamang paagi sa nagabayad-sala nga dugo ni Jesucristo, nga magakari; huo, dumduma nga magakari sia agud tuboson ang kalibutan.

10 Kag dumduma man ang mga pulong nga ginhambal ni Amulek kay Zisrom, sa siyudad sang Amonihas; kay nagsiling sia sa iya nga ang Ginuo pat-od gid nga magakari agud tuboson ang iya katawhan, apang indi sia magkari agud tuboson sila sa ila mga sala, kundi agud tuboson sila halin sa ila mga sala.

11 Kag may gahum sia nga ginhatag sa iya halin sa Amay sa pagtubos sa ila halin sa ila mga sala tungod sang paghinulsol; gani ginpadala niya ang iya mga anghel agud ipahayag ang balita sang mga kondisyon sang paghinulsol, nga nagadala sang katawhan padulong sa gahum sang Manunubos, padulong sa kaluwasan sang ila mga kalag.

12 Kag karon, mga anak ko, dumduma, dumduma nga sa bato nga aton Manunubos, nga si Cristo, ang Anak sang Dios, nga kinahanglan ninyo ipasad ang inyo pundasyon; agud kon ang yawa magpadala sang iya mabaskog nga hangin, huo, sang iya mga baslay sa buhawi, huo, kon ang tanan niya nga ulan nga yelo kag ang iya mabaskog nga unos magtupa sa inyo, mangin wala ini sing gahum sa inyo sa pagguyod sa inyo paidalom sa kadadalman sang kalisud kag nagapadayon nga kasubo, tungod sang bato nga sa diin kamo napasad, nga amo ang pat-od nga pundasyon, isa ka pundasyon nga kon ang mga tawo magpasad diri indi sila mahulog.

13 Kag natabo ini nga amo ini ang mga pulong nga ginpanudlo ni Helaman sa iya mga anak; huo, gintudloan niya sila sang madamo nga butang nga wala nasulat, kag madamo man nga butang nga nasulat.

14 Kag gindumdum nila ang iya mga pulong; kag gani naglibot sila, nga nagatuman sang mga kasugoan sang Dios, agud itudlo ang pulong sang Dios sa tanan nga katawhan ni Nefi sugod sa siyudad nga Bugana;

15 Kag halin didto padulong sa siyudad sang Gid; kag halin sa siyudad sang Gid padulong sa siyudad sang Mulek;

16 Kag bisan sa lain-lain nga siyudad tubtob nga nakakadto sila sa tanan nga katawhan ni Nefi nga yara sa duta pa-sur; kag halin didto padulong sa duta sang Zarahemla, sa mga Lamanhon.

17 Kag natabo ini nga nagwali sila nga may dako nga gahum, sa bagay nga napahipos nila ang madamo sang mga nagsilipak nga mga Nefinhon, sa bagay nga nagpalapit sila kag nagtuad sang ila mga sala kag nabunyagan sa paghinulsol, kag sa gilayon nagbalik sa mga Nefinhon agud tinguhaan nga matadlong sa ila ang mga malain nga ila nahimo.

18 Kag natabo ini nga sanday Nefi kag Lehi nagwali sa mga Lamanhon nga may dako nga gahum kag awtoridad, kay may gahum sila kag awtoridad nga ginhatag sa ila agud nga makahambal sila, kag ginhatag man sa ila ang kon ano ang dapat nila ihambal—

19 Gani naghambal sila sa dako nga katingala sang mga Lamanhon, sa pagpapati sa ila, sa bagay nga may walo ka libo sang mga Lamanhon nga yara sa duta sang Zarahemla kag sa palibot nga nabunyagan sa paghinulsol, kag nasanagan sang kalainan sang mga tradisyon sang ila mga amay.

20 Kag natabo ini nga sanday Nefi kag Lehi nagpadayon halin didto padulong sa duta sang Nefi.

21 Kag natabo ini nga gindakop sila sang kasoldadohan sang mga Lamanhon kag ginhunong sa bilanggoan; huo, bisan sa sinang amo man nga bilanggoan nga sa diin sanday Amon kag ang iya mga kauturan ginhunong sang mga alagad ni Limhi.

22 Kag pagkatapos nga nahunong sila sa bilanggoan sa madamo nga inadlaw nga wala sing pagkaon, tan-awa, ginkadtoan sila sa bilanggoan agud kuhaon sila agud mapatay nila sila.

23 Kag natabo ini nga sanday Nefi kag Lehi nalikupan sang daw kalayo, sa bagay nga wala sila nangisog nga padapatan sila sang ila mga kamot sa kahadlok nga basi masunog sila. Apang, sanday Nefi kag Lehi wala nasunog; kag daw nagatindog sila sa tunga sang kalayo kag wala nasunog.

24 Kag sang nakita nila nga nalikupan sila sang haligi nga kalayo, kag wala ini nagsunog sa ila, nagpakaisog ang ila mga tagipusuon.

25 Kay nakita nila nga ang mga Lamanhon wala nangisog nga magpadapat sang ila mga kamot sa ila; kag wala man sila nangisog nga magpalapit sa ila, kundi nagtindog nga daw nag-apa sila sa katingala.

26 Kag natabo ini nga sanday Nefi kag Lehi nag-atubang kag nagsugod sa paghambal sa ila nga nagasiling: Indi magkahadlok, kay tan-awa, ang Dios ang nagpakita sa inyo sining kadalayawon nga butang, nga sa diin ginpakita sa inyo nga indi kamo makapadapat sang inyo mga kamot sa amon agud patyon kami.

27 Kag tan-awa, sang nasiling nila ining mga pulong, ang duta nag-uyog sing tuman, kag ang mga dingding sang bilanggoan nag-uyog nga daw naghana ang mga ini nga marumpag sa duta; apang tan-awa, wala ini narumpag. Kag tan-awa, sila nga yara sa sulod sang bilanggoan mga Lamanhon kag mga Nefinhon nga nagsilipak.

28 Kag natabo ini nga gintabunan sila sing isa ka panganod sang kadudulman, kag ang sobra kagrabe nga kahadlok ang nagpangibabaw sa ila.

29 Kag natabo ini nga may nabatian nga isa ka tingug nga daw yara ini sa ibabaw sang panganod sang kadudulman nga nagasiling: Maghinulsol kamo, maghinulsol kamo, kag indi na pagtinguhai nga pamatyon ang akon mga alagad nga akon ginpadala sa inyo agud magpahayag sang maayong balita.

30 Kag natabo ini sang nabatian nila ini nga tingug, kag namarasmasan nga indi ini tingug sang daguob, kag indi man ini tingug sang tuman kagamo nga kagahod, kundi tan-awa, isa ini ka mahinay nga tingug sang perpekto nga kalulo, nga daw pareho ini sing isa ka hutik, kag nagdulut ini bisan sa kalag mismo—

31 Kag sa pihak sang kalulo sang tingug, tan-awa ang duta nag-uyog sing tuman, kag ang mga dingding sang bilanggoan nagkurog liwat nga daw nagahana ini nga marumpag sa duta; kag tan-awa ang panganod sang kadudulman, nga nagtabon sa ila, wala nadula—

32 Kag tan-awa ang tingug nabatian liwat nga nagasiling: Maghinulsol kamo, maghinulsol kamo, kay ang ginharian sang langit malapit na; kag indi na pagtinguhai nga pamatyon ang akon mga alagad. Kag natabo ini nga ang duta nag-uyog liwat, kag ang mga dingding nagkurog.

33 Kag sa ika-tatlo nga tion nabatian liwat ang tingug, kag naghambal sa ila sang dalayawon nga mga pulong nga indi mamitlang sang tawo; kag ang mga dingding nagkurog liwat, kag ang duta nag-uyog nga daw nagahana ini nga magkalapihak.

34 Kag natabo ini nga ang mga Lamanhon indi makapalagyo tungod sang panganod sang kadudulman nga nagtabon sa ila; huo, kag indi sila makagiho tungod sang kahadlok nga nagpangibabaw sa ila.

35 Karon may isa sa ila nga isa ka Nefinhon sa pagkabun-ag nga sadto nangin miyembro sang simbahan sang Dios apang nagsipak sa ila.

36 Kag natabo ini nga nagliso sia, kag tan-awa, nakita niya sa tunga sang panganod sang kadudulman ang mga nawong nanday Nefi kag Lehi; kag tan-awa, nagabanaag sing tuman ang mga ini, bisan pareho sang mga nawong sang mga anghel. Kag nakita niya nga nagtangla sila sa langit; kag daw nagapakighambal ukon nagaalsa sang ila mga tingug sa isa ka persona nga ila nakita.

37 Kag natabo ini nga ining lalaki nagsinggit sa kadam-an agud magliso sila kag magtulok. Kag tan-awa, may gahum nga ginhatag sa ila nga nagliso sila kag nagtulok; kag nakita nila ang mga nawong nanday Nefi kag Lehi.

38 Kag nagsiling sila sa lalaki: Tan-awa, ano ang buot silingon sining tanan nga butang, kag kay sin-o nagapakighambal ining mga tawo?

39 Karon ang ngalan sang lalaki amo si Aminadab. Kag si Aminadab nagsiling sa ila: Nagapakighambal sila sa mga anghel sang Dios.

40 Kag natabo ini nga ang mga Lamanhon nagsiling sa iya: Ano ang himuon namon agud ining panganod sang kadudulman madula kag indi na magtabon sa amon?

41 Kag si Aminadab nagsiling sa ila: Kinahanglan gid nga maghinulsol kamo, kag magpakitluoy sa tingug, bisan tubtob nga makaangkon kamo sing pagtuo kay Cristo, nga gintudlo sa inyo nanday Alma, kag Amulek, kag Zisrom; kag kon himuon ninyo ini, ang panganod sang kadudulman madula kag indi na magtabon sa inyo.

42 Kag natabo ini nga tanan sila nagsugod sa pagpakitluoy sa tingug niya nga amo ang nag-uyog sang duta; huo, nagpakitluoy sila bisan tubtob nga nadula ang panganod sang kadudulman.

43 Kag natabo ini nga sang nagtan-aw sila sa palibot, kag nakita nga ang panganod sang kadudulman nadula na kag wala na nagatabon sa ila, tan-awa, nakita nila nga nalikupan sila, huo ang tagsa ka tawo, sang haligi nga kalayo.

44 Kag sanday Nefi kag Lehi yara sa tunga nila; huo, nalikupan sila; huo, daw yara sila sa tunga sang nagadabadaba nga kalayo, apang wala ini naghalit sa ila, kag wala man ini nagdukot sa mga dingding sang bilanggoan; kag napuno sila sinang kalipay nga di-mamitlang kag puno sang himaya.

45 Kag tan-awa, ang Balaan nga Espiritu sang Dios nagpanaog halin sa langit, kag nagsulod sa ila mga tagipusuon, kag napuno sila sang daw kalayo, kag makahambal sila sang dalayawon nga mga pulong.

46 Kag natabo ini nga may nabatian sila nga tingug, huo, isa ka makalilipay nga tingug, nga daw hutik ini nga nagasiling:

47 Paghidaet, paghidaet mangin sa inyo, tungod sang inyo pagtuo sa akon Labing Hinigugma nga Anak nga halin pa sa pagtuga sang kalibutan.

48 Kag karon, sang nabatian nila ini, nagtangla sila agud tan-awon kon diin naghalin ang tingug; kag tan-awa, nakita nila ang kalangitan nga nabuksan; kag ang mga anghel nagpanaog halin sa langit kag nag-alagad sa ila.

49 Kag may mga tatlo ka gatos ka tawo ang nakakita kag nakabati sining mga butang; kag ginsugo sila nga maglakat kag indi matingala, kag indi man sila dapat magduhaduha.

50 Kag natabo ini nga naglakat sila, kag nag-alagad sa katawhan, nga nagapahayag sa tanan nga rehiyon sa palibot sang tanan nga butang nga ila nabatian kag nakit-an, sa bagay nga ang kalabanan sang mga Lamanhon napapati nila, tungod sang kadako sang mga ebidensya nga ila nabaton.

51 Kag ang tanan nga napapati nagbuya sang ila mga armas sa giyera, kag amo man sang ila pagdumot kag sang tradisyon sang ila mga amay.

52 Kag natabo ini nga gin-ampo nila sa mga Nefinhon ang mga kadutaan nga ila ginapanag-iyahan.