1 Kag natabo ini nga sang natapos ang ika-sisenta’y dos nga tuig sang pagginahum sang mga hukom, ining tanan nga butang natabo kag ang mga Lamanhon nangin, ang kalabanan sa ila, matarong nga katawhan, sa bagay nga ang ila pagkamatarong naglabaw pa sa sinang iya sang mga Nefinhon, tungod sang ila kapag-on kag sang ila kalig-on sa pagtuo.

2 Kay tan-awa, may madamo nga Nefinhon nga nangin matig-a kag di-mahinulsulon kag tuman kalain, sa bagay nga ginsikway nila ang pulong sang Dios kag ang tanan nga pagpangwali kag pagpropesiya nga ginhatag sa ila.

3 Apang, ang katawhan sang simbahan nakaangkon sang dako nga kalipay tungod sang pagkahaylo sang mga Lamanhon, huo, tungod sang simbahan sang Dios nga ginpahamtang sa ila. Kag nagpakig-upod sila sa isa kag isa, kag nagkasadya sa isa kag isa, kag nakaangkon sang dako nga kalipay.

4 Kag natabo ini nga madamo sang mga Lamanhon ang nagdulhog sa duta sang Zarahemla, kag nagpahayag sa katawhan sang mga Nefinhon sang paagi sang ila pagkahaylo, kag naglaygay sa ila nga magtuo kag maghinulsol.

5 Huo, madamo ang nagwali nga may tuman kadako nga gahum kag awtoridad, tubtob sa pagpapanaog sang madamo sa ila sa kadadalman sang pagpaubos, agud mangin mapainubuson nga mga sumulunod sang Dios kag sang Kordero.

6 Kag natabo ini nga madamo sang mga Lamanhon ang nagkadto padulong sa duta pa-norte; kag amo man sanday Nefi kag Lehi nagkadto sa duta pa-norte agud magwali sa katawhan. Kag gani natapos ang ika-sisenta’y tres nga tuig.

7 Kag tan-awa, may paghidaet sa bug-os nga kadutaan, sa bagay nga ang mga Nefinhon nagakadto sa bisan diin nga bahin sang kadutaan nga luyag nila, bisan ini man sa mga Nefinhon ukon sa mga Lamanhon.

8 Kag natabo ini nga ang mga Lamanhon nagakadto man sa bisan diin nga ila luyag, bisan ini man sa mga Lamanhon ukon sa mga Nefinhon; kag gani nakaangkon sila sang hilway nga pagpakigbagay sa isa kag isa, sa pagpamakal kag sa pagpamaligya, kag sa pag-angkon sang manggad, suno sa ila luyag.

9 Kag natabo ini nga nangin tuman sila kamanggaranon, pareho mga Lamanhon kag mga Nefinhon; kag nakaangkon sila sang tuman nga kabugana sang bulawan, kag sang pilak, kag sang tanan nga sari sang malahalon nga mga metal, pareho sa duta sa sur kag sa duta sa norte.

10 Karon ang duta sa sur gintawag nga Lehi, kag ang duta sa norte gintawag nga Mulek, sunod sa anak nga lalaki ni Sedequias; kay gindala sang Ginuo si Mulek sa duta sa norte, kag si Lehi sa duta sa sur.

11 Kag tan-awa, may tanan nga sari sang bulawan sa sining duha ka kadutaan, kag sang pilak, kag sang malahalon nga milinahon sang tagsa ka sahi; kag may pulido man nga mga manughimo, nga nagapanghimo sang tanan nga sahi sang milinahon kag nagapapino sini; kag tungod sini nangin manggaranon sila.

12 Nagpananom sila sang uyas sa kabuganaan, pareho sa norte kag sa sur; kag nagtin-ad sila sing tuman, pareho sa norte kag sa sur. Kag nagdamo sila kag nagbakod sing tuman sa kadutaan. Kag nagsagod sila sang madamo nga panong kag mga baka, huo, sang madamo nga pinatambok.

13 Tan-awa, ang ila mga babayi nagpangabudlay kag naghabol, kag nagpanghimo sang tanan nga sari sang tela, sang lino nga manipis kag tela sang tagsa ka sahi, agud tabunan ang ila pagkahublas. Kag gani ang ika-sisenta’y kwatro nga tuig naglabay nga matawhay.

14 Kag sa ika-sisenta’y singko nga tuig nakaangkon man sila sing dako nga kalipay kag paghidaet, huo, madamo nga pagpangwali kag madamo nga propesiya parte sinang magaabot. Kag gani naglabay ang ika-sisenta’y singko nga tuig.

15 Kag natabo ini nga sa ika-sisenta’y sais nga tuig sang pagginahum sang mga hukom, tan-awa, si Cezoram ginpatay sing isa ka wala makilal-i nga kamot samtang nagapungko sia sa hukom-lingkuranan. Kag natabo ini nga sa amo man nga tuig, nga ang iya anak nga lalaki, nga ginpili sang katawhan nga bulos sa iya, ginpatay man. Kag gani natapos ang ika-sisenta’y sais nga tuig.

16 Kag sa pagsugod sang ika-sisenta’y siyete nga tuig ang katawhan nagsugod nga mangin tuman kalain liwat.

17 Kay tan-awa, ginpakamaayo sila sang Ginuo sing malawig sa mga manggad sang kalibutan sa bagay nga wala sila nasugyot sa kaakig, sa mga giyera, kag sa pagpaagay sang dugo; gani nagsugod sila sa pagpahamtang sang ila mga tagipusuon sa ila mga manggad; huo, nagsugod sila nga maghangad sa pag-angkon sing manggad agud nga maalsa sila ang isa labaw sa isa; gani nagsugod sila sa paghimo sang sekreto nga mga pagpamatay, kag sa pagpangawat kag sa pagpangagaw, agud makaangkon sila sing manggad.

18 Kag karon tan-awa, inang mga manugpatay kag mga manugpangagaw isa ka guban nga gintukod nanday Kiskumen kag Gadianton. Kag karon natabo ini nga may madamo, bisan sa mga Nefinhon, nga kaupod sa guban ni Gadianton. Apang tan-awa, mas madamo pa sila sang sa mas malain nga bahin sang mga Lamanhon. Kag ginatawag sila nga mga tulisan kag mga manugpatay-tawo nga iya ni Gadianton.

19 Kag ini sila ang nagpatay sa puno nga hukom nga si Cezoram, kag sa iya anak nga lalaki, samtang yara sa hukom-lingkuranan; kag tan-awa, wala sila natukiban.

20 Kag karon natabo ini nga sang nahibal-an sang mga Lamanhon nga may mga tulisan sa tunga nila nangin tuman sila kamasinulub-on; kag ginhimo nila ang tagsa ka pahito nga yara sa ila gahum agud laglagon sila halin sa ibabaw sang duta.

21 Apang tan-awa, ginsugyot ni Satanas ang mga tagipusuon sang kalabanan sang mga Nefinhon, sa bagay nga nakig-isa sila sa mga guban sang mga tulisan, kag nagsulod sa ila mga kasugtanan kag sa ila mga panumpa, nga ila pangapinan kag amligan ang isa kag isa sa bisan ano nga mabudlay nga mga sirkumstansya nga mabutang sila, agud indi sila mag-antos tungod sang ila mga pagpamatay, kag sang ila mga pagpangagaw, kag sang ila mga pagpangawat.

22 Kag natabo ini nga may yara sila sang ila mga senyales, huo, sang ila sekreto nga mga senyales, kag sang ila sekreto nga mga pulong; kag ini agud makilal-an nila ang isa ka utod nga nagsulod sa kasugtanan, agud nga bisan ano nga kalainan ang pagahimuon sang iya utod indi sia pagsakiton sang iya utod, kag sang mga miyembro sang iya guban, nga nakahimo sini nga kasugtanan.

23 Kag gani mahimo sila nga magpamatay, kag magpangagaw, kag magpangawat, kag maghimo sang mga pagkamakihilawason kag tanan nga sari sang kalainan nga batok sa mga layi sang ila pungsod kag amo man sa mga layi sang ila Dios.

24 Kag kon sin-o man sa mga miyembro sang ila guban ang magpanugid sa kalibutan sang ila kalainan kag sang ila mga kangil-aran, pagabistahon, indi suno sa mga layi sang ila pungsod, kundi suno sa mga layi sang ila kalainan, nga ginhatag nanday Gadianton kag Kiskumen.

25 Karon tan-awa, amo ining mga sekreto nga mga sinumpaan kag mga kasugtanan nga ginsugo ni Alma sa iya anak nga indi pag-ipahayag sa kalibutan, kay basi nga mangin paagi ang mga ini sa pagdala sang katawhan padulong sa kalaglagan.

26 Karon tan-awa, inang sekreto nga mga sinumpaan kag mga kasugtanan wala matun-i ni Gadianton halin sa mga kasulatan nga gintugyan kay Helaman; kundi tan-awa, ginbutang ang mga ini sa tagipusuon ni Gadianton sinang amo man nga persona nga nagganyat sang aton una nga mga ginikanan sa pagkaon sang ginadilian nga bunga—

27 Huo, sinang amo man nga persona nga nagkunsabo upod kay Cain, nga kon patyon niya ang iya utod nga si Abel indi ini pag-ipahibalo sa kalibutan. Kag nagkunsabo sia upod kay Cain kag sa iya mga sumulunod sumugod sa sina nga tion.

28 Kag amo man ina ang persona nga nagbutang sa mga tagipusuon sang katawhan nga magtukod sing isa ka tore nga may igo nga kataason agud nga makalab-ot sila sa langit. Kag amo man ina ang persona nga nag-into sang katawhan nga nagkadto halin sa sina nga tore padulong sa sini nga duta; nga nagpalapnag sang mga buluhaton sang kadudulman kag mga kangil-aran sa bug-os nga ibabaw sang kadutaan, tubtob nga ginbutong niya ang katawhan paidalom sa lubos nga kalaglagan, kag sa wala’y katubtuban nga impiyerno.

29 Huo, amo man ina nga persona nga nagbutang sa tagipusuon ni Gadianton nga ipadayon gihapon ang buluhaton sang kadudulman, kag sang sekreto nga pagpamatay; kag ginpadayon niya ini halin pa sa pagsugod sang tawo bisan tubtob sa sini nga tion.

30 Kag tan-awa, amo ini sia ang ginhalinan sang tanan nga sala. Kag tan-awa, ginapadayon niya ang iya mga buluhaton sang kadudulman kag sekreto nga pagpamatay, kag ginapasa-pasa ang ila mga plano, kag ang ila mga sinumpaan, kag ang ila mga kasugtanan, kag ang ila mga plano sang makahaladlok nga kalainan, sa tanan nga henerasyon suno sa iya ikasarang nga mauyatan ang mga tagipusuon sang mga anak sang katawhan.

31 Kag karon tan-awa, may malig-on sia nga pag-uyat sa mga tagipusuon sang mga Nefinhon; huo, sa bagay nga nangin tuman sila kalain; huo, ang kalabanan sa ila nagsipak sa dalan sang pagkamatarong, kag gintasak sang ila mga tiil ang mga kasugoan sang Dios, kag naglakat sa ila kaugalingon nga mga dalanon, kag naghimo para sa ila mga kaugalingon sang mga dios-dios halin sa ila bulawan kag sa ila pilak.

32 Kag natabo ini nga ining tanan nga kalainan natabo sa ila sa sulod sang indi madamo nga tinuig, sa bagay nga ang kalabanan sini natabo sa ila sa ika-sisenta’y siyete nga tuig sang pagginahum sang mga hukom sa katawhan ni Nefi.

33 Kag nagdugang sila sa ila mga kalainan sa ika-sisenta’y otso man nga tuig, sa dako nga kasubo kag panalambiton sang mga matarong.

34 Kag gani makita naton nga ang mga Nefinhon nagsugod sa pag-usmod sa pagkawala’y pagtuo, kag nagdugang sa kalainan kag mga kangil-aran, samtang ang mga Lamanhon nagsugod sa pagdugang sing tuman sa ihibalo parte sa ila Dios; huo, nagsugod sila sa pagtuman sang iya mga pagsulundan kag mga kasugoan, kag sa paglakat sa kamatuoran kag katarong sa iya atubang.

35 Kag gani makita naton nga ang Espiritu sang Ginuo nagsugod sa pagpalayo sa mga Nefinhon tungod sang kalainan kag katig-a sang ila mga tagipusuon.

36 Kag gani makita naton nga ang Ginuo nagsugod sa pagbubo sang iya Espiritu sa mga Lamanhon tungod sang ila huyog kag kahanda sa pagpati sa iya mga pulong.

37 Kag natabo ini nga ginpangita sang mga Lamanhon ang guban sang mga tulisan ni Gadianton; kag nagwali sila sang pulong sang Dios sa mas malain nga bahin nila, sa bagay nga ining guban sang mga tulisan lubos nga nalaglag sa mga Lamanhon.

38 Kag natabo ini, sa pihak nga bahin, nga ang mga Nefinhon nagpadako sa ila kag nagsakdag sa ila, nga nagsugod sa mas malain nga bahin nila, tubtob nga naglapta sila sa bug-os nga kadutaan sang mga Nefinhon, kag nagganyat sang kalabanan sang mga matarong tubtob nga napapati sila sa ila mga buluhaton kag nag-ambit sang ila mga inagaw, kag napabuylog upod sa ila sa ila sekreto nga mga pagpamatay kag mga pagkunsabo.

39 Kag gani naangkon nila ang solo nga pagdumala sang gobyerno, sa bagay nga gintasak nila sang ila mga tiil kag ginhampak kag ginsakit kag gintalikdan nila ang mga imol kag mga malulo, kag ang mga mapainubuson nga mga sumulunod sang Dios.

40 Kag gani makita naton nga yara sila sa makahaladlok nga kahimtangan, kag nagakaluto na para sa wala’y katubtuban nga kalaglagan.

41 Kag natabo ini nga sa amo sini natapos ang ika-sisenta’y otso nga tuig sang pagginahum sang mga hukom sa katawhan ni Nefi.