1 Kag karon natabo ini nga sang nasiling ni Nefi ining mga pulong, tan-awa, may mga lalaki nga mga hukom, nga mga miyembro man sang sekreto nga guban ni Gadianton, kag naakig sila, kag nagpakalain sa iya nga nagasiling sa katawhan: Ngaa indi ninyo pagdakpon ini nga tawo kag dal-on sia diri agud nga mapamatbatan sia suno sa krimen nga iya ginhimo?

2 Ngaa ginatan-aw ninyo ini nga tawo, kag ginapamatian sia nga nagapasipala batok sa sining katawhan kag batok sa aton layi?

3 Kay tan-awa, si Nefi naghambal sa ila parte sa pagkatiko sang ila layi; huo, madamo nga butang ang ginhambal ni Nefi nga indi masulat; kag wala sia sing ginhambal nga batok sa mga kasugoan sang Dios.

4 Kag ang amo nga mga hukom naakig sa iya tungod prangka niya nga ginhambal sa ila ang parte sa ila sekreto nga mga buhat sang kadudulman; apang, wala sila nangisog sa pagpadapat sang ila kaugalingon nga mga kamot sa iya, kay nahadlok sila sa katawhan nga basi pakalainon nila sila.

5 Gani nagsinggit sila sa katawhan nga nagasiling: Ngaa ginatugotan ninyo ini nga tawo nga magpasipala batok sa aton? Kay tan-awa ginapakalain niya ining tanan nga katawhan, bisan tubtob sa kalaglagan; huo, kag ining aton dalagko nga mga siyudad pagakuhaon sa aton agud nga mangin wala na kita sing lugar sa mga ini.

6 Kag karon nakahibalo kita nga indi ini mahimo, kay tan-awa, gamhanan kita, kag ang aton mga siyudad dalagko, gani ang aton mga kaaway mangin wala sing gahum sa aton.

7 Kag natabo ini nga ginsugyot nila ang katawhan sa pagkaakig batok kay Nefi, kag nagtuga sang pagbinaisay sa tunga nila; kay may pila nga nagsinggit: Pabay-i ini nga tawo, kay isa sia ka maayo nga tawo, kag inang mga butang nga iya ginsiling pat-od gid nga matabo luwas lang nga maghinulsol kita;

8 Huo, tan-awa, ang tanan nga paghukom magatupa sa aton nga iya ginsaksihan sa aton; kay nakahibalo kita nga nagsaksi sia sing husto sa aton parte sa aton mga kalainan. Kag tan-awa madamo ang mga ini, kag nakahibalo sia sang tanan nga butang nga magatupa sa aton pareho nga nakahibalo sia sang aton mga kalainan;

9 Huo, kag tan-awa, kon indi sia isa ka propeta indi kuntani sia makapamatuod parte sinang mga butang.

10 Kag natabo ini nga ang mga tawo nga nagtinguha sa pagpatay kay Nefi napilitan tungod sang ila kahadlok, nga wala sila nagpadapat sang ila mga kamot sa iya; gani nagsugod sia liwat sa paghambal sa ila, kay nakita nga nakaangkon sia sing kahamuot sa mga mata sang pila, sa bagay nga ang nagkalabilin sa ila nagkahadlok.

11 Gani napilitan sia sa paghambal sing dugang sa ila nga nagasiling: Tan-awa, mga kauturan ko, wala bala kamo nakabasa nga ang Dios naghatag sing gahum sa isa ka tawo, bisan kay Moises, nga hampakon ang mga tubig sang Pula nga Dagat, kag napihak ang mga ini diri kag didto, sa bagay nga ang mga Israelnon, nga amo ang aton mga amay, nagtabok sa mala nga duta, kag ang mga tubig nagtabon sa mga kasoldadohan sang mga Egiptohanon kag ginlamon sila?

12 Kag karon tan-awa, kon ang Dios naghatag sa sini nga tawo sing amo sina nga gahum, gani ngaa magbinaisay kamo, kag magsiling nga wala sia naghatag sa akon sing gahum nga paagi sa sini mahibal-an ko ang parte sa mga paghukom nga magatupa sa inyo luwas lang nga maghinulsol kamo?

13 Apang, tan-awa, indi lamang nga ginapanghiwala ninyo ang akon mga pulong, kundi nga ginapanghiwala man ninyo ang tanan nga pulong nga ginpanghambal sang aton mga amay, kag amo man ang mga pulong nga ginhambal sini nga tawo, si Moises, nga nakaangkon sing amo kadako nga gahum nga ginhatag sa iya, huo, ang mga pulong nga iya ginhambal parte sa pagkari sang Mesias.

14 Huo, wala bala sia nagsaksi nga ang Anak sang Dios magakari? Kag pareho nga ginbayaw niya ang saway nga man-og sa kamingawan, sa amo man igabayaw sia nga magaabot.

15 Kag ang tanan nga magtulok sa sinang man-og mabuhi, sa amo man ang tanan nga magtulok sa Anak sang Dios nga may pagtuo, nga may mahinulsulon nga espiritu, mahimo nga magkabuhi, bisan padulong sa sinang kabuhi nga wala’y katapusan.

16 Kag karon tan-awa, si Moises indi lamang nga nagsaksi parte sining mga butang, kundi ang tanan man nga balaan nga mga propeta, halin sa iya mga adlaw bisan kutob sa mga adlaw ni Abraham.

17 Huo, kag tan-awa, nakita ni Abraham ang iya pagkari, kag napuno sing kalipay kag nagkasadya.

18 Huo, kag tan-awa ginasiling ko sa inyo, nga si Abraham indi lamang nga nakahibalo sining mga butang, kundi nga may madamo antes sa mga adlaw ni Abraham nga gintawag suno sa paagi sang Dios; huo, bisan suno sa paagi sang iya Anak; kag ini agud nga mapakita sa katawhan, linibo ka tuig antes sang iya pagkari, nga matuod gid nga ang pagtubos magaabot sa ila.

19 Kag karon luyag ko nga inyo mahibal-an, nga bisan halin sa mga adlaw ni Abraham may madamo nga propeta nga nagsaksi sining mga butang; huo, tan-awa, ang propeta nga si Zenos maisog nga nagsaksi; nga tungod sini ginpatay sia.

20 Kag tan-awa, si Zenoc man, kag amo man si Ezias, kag amo man si Isaias, kag si Jeremias, (si Jeremias nga amo man inang propeta nga nagsaksi parte sa kalaglagan sang Jerusalem) kag karon nahibal-an naton nga ang Jerusalem nalaglag suno sa mga pulong ni Jeremias. O gani ngaa indi magkari ang Anak sang Dios, suno sa iya propesiya?

21 Kag karon maduhaduha pa bala kamo nga ang Jerusalem nalaglag na? Magasiling bala kamo nga ang mga anak nga lalaki ni Sedequias wala ginpamatay, ang tanan luwas kay Mulek? Huo, kag wala bala ninyo makita nga ang kaliwatan ni Sedequias kaupod naton, kag ginpanabog sila pagwa sa duta sang Jerusalem? Apang tan-awa, indi lamang ini—

22 Ang aton amay nga si Lehi gintabog pagwa sa Jerusalem tungod nagsaksi sia parte sining mga butang. Si Nefi nagsaksi man parte sining mga butang, kag ang halos tanan man sang aton mga amay, bisan tubtob sa sini nga tion; huo, nagsaksi sila parte sa pagkari ni Cristo, kag nagpaabot, kag nagkasadya sa iya adlaw nga magaabot.

23 Kag tan-awa, sia ang Dios, kag upod sia sa ila, kag ginpakita niya ang iya kaugalingon sa ila, nga sila gintubos niya; kag ginhatagan nila sia sing himaya tungod sinang magaabot.

24 Kag karon, tungod nga nahibal-an ninyo ining mga butang kag indi makapanghiwala sang mga ini luwas lang nga magbutig kamo, gani sa sini nakasala kamo, kay ginsikway ninyo ining tanan nga butang, sa pihak sang sa pagkadamo nga ebidensya nga inyo nabaton; huo, bisan nga nabaton ninyo ang tanan nga butang, mga butang sa langit, kag tanan nga butang nga yara sa duta, bilang saksi nga matuod ang mga ini.

25 Apang tan-awa, ginsikway ninyo ang kamatuoran, kag nagrebelde batok sa inyo balaan nga Dios; kag bisan sa sini nga tion, imbes nga magtipon para sa inyo mga kaugalingon sing mga manggad sa langit, nga sa diin wala sing madunot, kag sa diin wala sing makakadto nga di-matinlo, nagatipon kamo para sa inyo mga kaugalingon sing kaakig bilang pagpanghanda sa adlaw sang paghukom.

26 Huo, bisan sa sini nga tion nagakaluto na kamo, tungod sang inyo mga pagpamatay kag sang inyo pagpanghilawas kag kalainan, para sa wala’y katubtuban nga kalaglagan; huo, kag luwas lang nga maghinulsol kamo magatupa ini sa inyo sa indi madugay.

27 Huo, tan-awa yari na ini karon bisan sa inyo mga puwertahan; huo, magsulod kamo sa hukom-lingkuranan, kag magpangusisa; kag tan-awa, ang inyo hukom ginpatay, kag nagahigda sia sa iya kaugalingon nga dugo; kag ginpatay sia sang iya utod, nga nagahangad nga magpungko sa hukom-lingkuranan.

28 Kag tan-awa, miyembro sila sang inyo sekreto nga guban nga ang ginhalinan amo si Gadianton kag ang isa nga malain nga nagahangad sa paglaglag sang mga kalag sang mga tawo.