Pakauna

Ti Libro ni Mormon ti napagtitipon a nasantuan a kasuratan a mayasping iti Biblia. Isu ti maysa a pakasaritaan ti pannakilangen ti Dios kadagiti umili iti America idi ugma ket linaonna ti pakabuklan ti agnanayon nga ebanghelio.

Insurat ti adu a nagkauna a propeta ti libro babaen ti espiritu ti pammadto ken panangipaltiing. Naisurat iti balitok a pinanid dagiti balikasda nga inadaw ken inyababa ti maysa a propeta ken mannurat nga agnagan iti Mormon. Itden daytoy a kasuratan ti salaysay iti dua a naindaklan a sibilisasion. Naggapu ti maysa iti Jerusalem idi 600 B.C. ket idi agangay nabingay iti dua a pagilian, a pagaammo kas dagiti Nephita ken Lamanita. Dimteng ti maysa a nasapsapa idi kinirokiro ti Apo ti pagsasao idiay Torre ti Babel. Daytoy a grupo ti maawagan a kas dagiti Jaredita. Kalpasan ti rinibu a tawen, nadadaelda amin malaksid dagiti Lamanita, ket isuda ti kapuonan dagiti Indian nga Amerikano.

Ti panagministro ni Apo Jesucristo kadagiti Nephita kalpasan ti panagungarna ti kangrunaan a pasamak a naisurat iti Libro ni Mormon. Iparangarangna ti doktrina ti ebanghelio, ipalawagna ti plano ti pannakaisalakan, ken ibagana ti nasken nga aramiden dagiti tattao tapno magun-odda ti talna iti daytoy a biag ken agnanayon a pannakaisalakan iti sumaruno a biag.

Idi nalpas ni Mormon dagiti sinuratna, inyawatna ti salaysay iti anakna a ni Moroni, a nanginayon iti sumagmamano a bukodna a balikas ket inlemmengna dagiti pinanid iti turod ti Cumorah. Idi Septiembre 21, 1823, nagparang ni sigud a Moroni, ti naigloria, nagungar a tao, ken ni Propeta Joseph Smith ket insurona ti maipapan iti nagkauna a kasuratan ken ti naikari a pannakaipatarusna iti pagsasao nga Ingles.

Iti naikeddeng a panawen nayawat dagiti pinanid ken ni Joseph Smith, a nangipatarus kadagitoy babaen ti sagut ken pannakabalin ti Dios. Naipablaak itan ti kasuratan iti adu a pagsasao a kas baro ken mainayon a saksi a ni Jesucristo ti Anak ti sibibiag a Dios ket mabalin a maisalakan amin nga umay kenkuana ken agtulnog kadagiti bilin ken ordinansa ti ebangheliona.

Maipapan iti daytoy a kasuratan ni Propeta Joseph Smith kinunana: “Imbagak kadagiti kakabsat a ti Libro ni Mormon ti kapudnuan iti ania man a libro iti daga ken panuli a bato ti relihiontayo, ken umas-asideg ti tao iti Dios babaen ti panangsurotna kadagiti pammilin daytoy, ngem iti ania man a sabali a libro.”

Malaksid ken ni Joseph Smith, nangipaay ti Apo iti sabali pay a sangapulo ket maysa a mangkita kadagiti balitok a pinanid ket agbalinda a kangrunaan a saksi iti kinapudno ken kinasagrado ti Libro ni Mormon. Nairaman ditoy dagiti naisurat a pammaneknekda a kas “Ti Pammaneknek dagiti Tallo a Saksi” ken “Ti Pammaneknek dagiti Walo a Saksi.”

Awisenmi ti amin a tao iti uray sadino man a basaenda ti Libro ni Mormon, utobenda iti puspusoda dagiti mensahe a linaonna, ket kalpasanna kiddawenda iti Dios, ti Agnanayon nga Ama, iti nagan ni Cristo no pudno ti libro. Dagidiay agtarigagay a mangsursurot iti daytoy a wagas ken agdawat a napnuan pammati ti makagun-od iti pammaneknek ti kinapudnona ken kinasagradona babaen ti pannakabalin ti Espiritu Santo. (Kitaen ti Moroni 10:3–5.)

Maammuanto met dagidiay makagun-od iti daytoy nadibinuan a pammaneknek manipud iti Espiritu Santo babaen ti isu met laeng a pannakabalin a ni Jesucristo ti Mangisalakan iti lubong, a ni Joseph Smith ti mammaltiing ken propetana kadagitoy maudi nga al-aldaw, ket Ti Simbaan ni Jesucristo dagiti Santo iti Ud-udina nga Aldaw ti Pagarian ti Apo a naipatakder manen iti daga, a panangisagana iti Maikadua a Yaay ti Mesias.