ယာရုမ်ကျမ်း

အခန်းကြီး ၁

နီဖိုင်းအမျိုးသားတို့သည် မောရှေ၏ပညတ်တရားကို စောင့်ထိန်းကြ၏၊ ခရစ်တော်ကြွလာတော်မူခြင်းကို မျှော်လင့်ကြ၏၊ ထိုပြည်၌ အောင်မြင်ကြ၏—များစွာသောပရောဖက်တို့သည် လူမျိုးတို့ကို မှန်ကန်သည့် တရားလမ်း၌ ရှိနေကြစေခြင်းငှာ အလုပ်လုပ်ကြ၏။ ဘီစီ ၃၉၉–၃၆၁ ခန့်။

၁ ယခုမူကား၊ ရှုလော့၊ ငါယာရုမ်သည် ငါတို့၏ဆွေစဉ်မျိုးဆက်မှတ်တမ်းကို သိမ်းဆည်းထားနိုင်စေခြင်းငှာ၊ ငါ့အဘဧနုတ်၏မိန့်မှာချက်အတိုင်း၊ စကားအနည်းငယ်ကို ရေး၏။

၂ ဤပုရပိုက်ပြားများသည်၊ သေးငယ်သောကြောင့်လည်းကောင်း၊ ဤအရာတို့ကို ငါတို့ညီအစ်ကိုလာမန်အမျိုးသားများ၏အကျိုးအတွက် ရည်မှန်း၍ ရေးထားသောကြောင့်လည်းကောင်း၊ သို့ဖြစ်၍၊ အနည်းငယ်ကိုသာ ငါရေးရန်လိုအပ်၏။ သို့ရာတွင်၊ ငါ၏ပရောဖက်ပြု၍ဟောခြင်းအမှုများအကြောင်းကို မရေး။ ငါ၏ ဗျာဒိတ်များအကြောင်းကိုလည်း မရေး။ ငါ၏ဘိုးဘေးတို့ ရေးလေသည်ထက် အဘယ်အရာကို ငါပို၍ရေးနိုင်ခဲ့မည်နည်း။ ကယ်တင်ခြင်းအစီအစဉ်ကို သူတို့ဖော်ပြခြင်းမရှိလေသလော။ ဟုတ်ပေ၏ဟု သင့်ကို ငါဆို၏။ ဤအရာသည်၊ ငါ့အတွက် လုံလောက်ပေပြီ။

၃ ရှုလော့၊ သူတို့စိတ်နှလုံး၏မာကျောခြင်းကြောင့်လည်းကောင်း၊ သူတို့၏နားပင်းခြင်းကြောင့်လည်းကောင်း၊ သူတို့၏အသိစိတ်ကွယ်ခြင်းကြောင့်လည်းကောင်း၊ သူတို့၏လည်ပင်းခိုင်မာခြင်းကြောင့်လည်းကောင်း၊ ဤလူမျိုးတို့၌ များစွာပြုရမည်မှာ မဖြစ်မနေ လိုအပ်၏။ သို့သော်လည်း၊ ဘုရားသခင်သည် သူတို့ကို အလွန်ကရုဏာကြီးတော်မူ၍ ထိုပြည်၏ မျက်နှာပြင်မှ ပယ်ရှားပစ်တော်မမူသေး။

၄ ဗျာဒိတ်များစွာရရှိသူများ ငါတို့၌ အမြောက်အမြားရှိကြ၏၊ အကြောင်းမူကား၊ သူတို့အားလုံး လည်ပင်းမခိုင်မာကြ၏။ လည်ပင်းမခိုင်မာဘဲ ယုံကြည်ခြင်းရှိသူ မှန်သမျှတို့သည် လူသားတို့အား သူတို့၏ယုံကြည်ခြင်းအတိုင်း၊ ထင်ရှားစွာပြတော်မူသည့် သန့်ရှင်းသောဝိညာဉ်တော်နှင့် ဆက်ဆံခြင်းရှိကြ၏။

၅ ယခုမူကား၊ ရှုလော့၊ နှစ်ပေါင်းနှစ်ရာ ကုန်လွန်ပြီးလေ၍၊ နီဖိုင်းလူမျိုးတို့သည် ထိုပြည်၌ အားကြီးလာခဲ့ကြလေ၏။ သူတို့သည် မောရှေ၏ပညတ်တရားကို စောင့်ထိန်းရန်နှင့် ကိုယ်တော်ရှင်အတွက်၊ ဥပုသ်နေ့ကို သန့်ရှင်းစေခြင်းငှာ စောင့်ထိန်းရန် အားထုတ်ကြ၏။ ရှုတ်ချခြင်းမရှိကြ။ ဘုရားကို ကဲ့ရဲ့ ခြင်းလည်းမရှိကြ။ ထိုပြည်၏ဥပဒေတို့မှာလည်း အလွန်တင်းကျပ်လှ၏။

၆ သူတို့နှင့်အတူ၊ လာမန်အမျိုးသားတို့သည်လည်း ထိုပြည်၏မျက်နှာပြင်မှ များစွာပေါ်၌ ကွဲပြားပြန့်ကျဲကြ၏။ ထိုသူတို့သည် နီဖိုင်းအမျိုးသားများထက် အလွန်ပိုများကြ၏။ လူ့အသက်သတ်ခြင်းကို နှစ်သက်ကြပြီး၊ သားရဲတို့၏အသွေးကို သောက်လိုကြ၏။

၇ ဤသို့အားဖြင့်အချိန်တန်လာသောအခါ၊ ထိုသူတို့သည် ငါတို့နီဖိုင်းအမျိုးသားများကို ဆန့်ကျင်၍ အကြိမ်များစွာ စစ်တိုက်ကြ၏။ သို့ရာတွင်၊ ငါတို့၏ရှင်ဘုရင်များနှင့် အကြီးအကဲတို့သည် ကိုယ်တော်ရှင်ကို ယုံကြည်ရာ၌ အားကြီးသောသူများဖြစ်၍၊ လူမျိုးတို့အား ကိုယ်တော်ရှင်၏လမ်းစဉ်များကို သွန်သင်ပေးကြ၏။ သို့ဖြစ်၍၊ ငါတို့သည် လာမန်အမျိုးသားတို့ကို ဆီးတား၍ ငါတို့ပြည်၏အပြင်သို့ ပယ်ရှားလျက် ငါတို့၏မြို့များ သို့မဟုတ် ငါတို့၏အမွေခံရာအရပ်မှန်သမျှကို အင်အားခိုင်မာစပြုစေခဲ့ကြ၏။

၈ ငါတို့သည် လွန်စွာပွားများ၍၊ ထိုပြည်၏မျက်နှာပြင်ပေါ်၌ ပျံ့နှံ့လျက်၊ ရွှေ၊ ငွေ၊ အဖိုးထိုက်သောအရာများ၊ တင့်တယ်သောသစ်သားလက်ရာ၊ အဆောက်အအုံများ၊ စက်ယန္တရား၊ သံ၊ ကြေးနီ၊ ကြေးဝါ၊ သံမဏိတို့ဖြင့် အလွန်ကြွယ်ဝလာ၍၊ မြေကြီးကို ထွန်ယက်ရန် အမျိုးမျိုးသောကိရိယာမှန်သမျှကို ပြုလုပ်လျက်၊ စစ်တိုက်ရာလက်နက်များ—အထူးသဖြင့်၊ ချွန်ထက်သောမြား၊ မြားတောင့်၊ လှံယဉ်၊ လှံတိုနှင့် စစ်တိုက်ခြင်းအတွက် ပြင်ဆင်ခြင်းမှန်သမျှတို့ကို ပြုလုပ်ကြလေ၏။

၉ လာမန်အမျိုးသားများနှင့် တိုက်ရန်၊ ထိုကဲ့သို့၊ ပြင်ဆင်ထားသောကြောင့်၊ သူတို့သည် ငါတို့တစ်ဖက်၌ အောင်မြင်ခြင်းမရှိကြ။ သို့ရာတွင်၊ သင်တို့သည် ငါ၏ပညတ်တော်များကို စောင့်ထိန်းကြသမျှ၊ ထိုပြည်၌ အောင်မြင်ကြလိမ့်မည်ဟု ငါတို့၏ဘိုးဘေးတို့အား မိန့်တော်မူလေသော ကိုယ်တော်ရှင်၏ နှုတ်ကပတ်တော်ကား၊ ပြည့်စုံခဲ့၏။

၁၀ ဤသို့အားဖြင့်အချိန်တန်လာသောအခါ၊ ကိုယ်တော်ရှင်၏ပရောဖက်တို့က နီဖိုင်းလူမျိုးတို့ကို၊ ဘုရားသခင်၏နှုတ်ကပတ်တော်အတိုင်း၊ ခြိမ်းခြောက်ကြလေသည်ကား၊ သူတို့သည် ပညတ်တော်များကို မစောင့်ထိန်းဘဲ၊ လွန်ကျူးခြင်းထဲသို့ လဲကျလေလျှင်၊ ထိုပြည်၏မျက်နှာပြင်မှ ဖျက်ဆီးခံရလိမ့်မည်ဟု ဖြစ်သတည်း။

၁၁ သို့ဖြစ်၍၊ လူမျိုးတို့အား လုံ့လဝီရိယ ရှိကြစေခြင်းငှာ၊ ပရောဖက်များ၊ ယဇ်ပုရောဟိတ်များနှင့် ဆရာတို့သည် အလုံးစုံသော စိတ်ရှည်ခြင်းနှင့် တိုက်တွန်းလျက်၊ ရည်ဆောင်၍ ပေးထားတော်မူခဲ့လေသော မောရှေ၏ပညတ်တရားကို သွန်သင်ပေးလျက်၊ မေရှိယကို မျှော်လင့်၍၊ သူကြွလာတော်မူလေပြီးသကဲ့သို့ သူ့ကို ယုံကြည်ကြစေခြင်းငှာ ဖျောင်းဖျလျက်၊ လုံ့လဝီရိယထက်သန်စွာအလုပ်လုပ်ကြ၏။ ဤကဲ့သို့အားဖြင့်၊ သူတို့ကို သွန်သင်၏။

၁၂ ဤသို့အားဖြင့်အချိန်တန်လာသောအခါ၊ ထိုသို့ပြုခြင်းအားဖြင့် သူတို့ကို ပြည်၏မျက်နှာပြင်ပေါ်၌ ဖျက်ဆီးခံရခြင်းမှ တားဆီးကြ၏။ အကြောင်းမူကား၊ သူတို့၏စိတ်နှလုံးကို နှုတ်ကပတ်တော်နှင့် မွှေနှောက်၍၊ နောင်တရခြင်းသို့ အစဉ်မပြတ်နှိုးဆော်လျက်ရှိလေ၏။

၁၃ ဤသို့အားဖြင့်အချိန်တန်လာသောအခါ၊ နှစ်ပေါင်းနှစ်ရာသုံးဆယ့်ရှစ်နှစ် ကုန်လွန်ခဲ့လေပြီ—ကာလများစွာကြာအောင် စစ်တိုက်ခြင်းများ၊ ရန်တွေ့ခြင်းများ၊ ငြင်းခုံခြင်းများဖြင့်ရှိလေသတည်း။

၁၄ ငါယာရုမ်သည်လည်း နောက်ထပ်၍ မရေးတော့။ အကြောင်းမူကား၊ ပုရပိုက်ပြားများမှာ၊ သေးငယ်၏။ သို့ရာတွင်၊ ရှုလော့၊ ငါ၏ညီအစ်ကိုတို့၊ သင်တို့သည် နီဖိုင်း၏အခြားပုရပိုက်ပြားများကို ကိုးကားနိုင်၏။ အကြောင်းမူကား၊ ရှုလော့၊ ထိုပုရပိုက်ပြားတို့အပေါ်၌ ငါတို့စစ်တိုက်ခြင်းများ၏မှတ်တမ်းများကို ရှင်ဘုရင်တို့၏စာများအတိုင်း ရေးထွင်းထား၏၊ သို့မဟုတ်၊ ထိုမှတ်တမ်းများကို ရေးထားစေ၏။

၁၅ ငါသည်လည်း ထိုပုရပိုက်ပြားများကို ငါတို့ဘိုးဘေးတို့၏မှာထားချက်များအတိုင်း သိမ်းဆည်းထားနိုင်စေခြင်းငှာ၊ ငါ့သားဩမနိလက်သို့ ပေးအပ်၏။