1 Kedekedeo nan pahrohte mahwin tepida wiawi nanpwungen Mehn Nihpai oh Mehn Leimen kan. Oh mehndahte ei pwulopwul, ahpw paliwar laud; eri aramas en Nihpai kan piliehda I en wia arail kaun, de kaun en neirail sounpei kan.

2 Eri kedekedeo ni ei sounpar eisek weneu I ahpw kahluwa sounpei en Mehn Nihpai kan, kohlahng Mehn Leimen kan; eri sounpar silipwiki rieisek weneu ahpw imwiseklahr.

3 Kedekedeo nan pahr silipwiki rieisek isuh Mehn Leimen kan ahpw kohdo mahwiniong kiht sang ni arail kehlail mehlel, kahrehda irail kamasakada nei sounpei kan; eri irail sohte men pei, oh irail tepida pweieklahng nan sahpw en paliepeng kan.

4 Kedekedeo se ahpw kohla nan kahnihmw en Angkola, oh se mihla nan kahnihmwo, oh kaunopada pwe sen doarehsang kiht Mehn Leimen kan. Kedekedeo se ahpw kakehlakahla kahnihmwo sang aht kehl; ahpw mehndahte aht kakehlakahla Mehn Leimen kan kohdohte oh pwakihsang kiht nan kahnihmwo.

5 Oh irail pil pwakihsang kiht nan sahpw en Depit.

6 Oh se karihs kohla nan sahpw en Sosua, me mih ni irepen palikapi en oaroahro.

7 Kedekedeo se ahpw wia aht kak koaros en kihpene nait aramas ahnsou mwadang, pwe sen kak ehupene wiahda ehu pwihn.

8 Ahpw kilang, sahpwo direkihla pwihn lipirap oh Mehn Leimen kan; oh mehndahte kamwomwala lap me pahn wiawihong nei aramas akan, irail sohte koluhkihla arail wiewia suwed kan; eri kamaramas oh mehla kohpeseng nan sahpwo pwon, ong mehn Nihpai kan oh pil Mehn Leimen kan; oh aramas koaros uhwong kosonned wasa koaros pohn sahpwo.

9 Oh met, mie nanmwarki en Mehn Leimen kan men me adaniki Aron; oh e kohdohng mahwinkihong kiht nah sounpei pahnen pahkid. Oh kilang, I pelianki nei meh pahnen riekid. Oh kedekedeo I kemehki ih nei sounpei kan kahrehda e tangasang mwohi. Oh kilang, soahng pwukat koaros wiawi, oh sounpar silipwiki silihsek imwiseklahr.

10 Kedekedeo Mehn Nihpai kan tepida koluhkihla diparail kan, oh tepida kaulim duwehte dahme Samuel kohpadao; pwe kilang sohte aramas men kak koledi dahme pein ah, pwe sounkulih, oh sounpirap kan, oh sounkamaramas kan, oh soununani, oh sounkosetipw kan me mih nan sahpwo.

11 Eri met tepida mie mwahiei oh sengiseng nan sahpwo pwon pwehki soahng pwukat, ahpw mehlel rehn aramas en Nihpai kan.

12 Kedekedeo ahnsou me ngehi, Mormon, kilangadahr arail wie sengiseng oh arail mwahiei oh arail pahtou mwohn Kauno, nan ei mohngiong tepida peren, pwehki ei ese sapwellimen Kauno kupwur kalahngan kan oh kanengamah, eri I medewe me e pahn ketin kupwureirailla pwe irail en kak pwurehng wiahla arama mwahu.

13 Ahpw kilang ei peren sohte katepe, pwe irail sohte pahtouki arail koluhla, pwehki kupwurkalahngan en Koht; ahpw irail pahtouki arail lekidekla, pwehki Kauno sohte kin mweidehng irail en peren nan dihp.

14 Oh irail sohte kohkihdo rehn Sises pwehki mohngiongarail karakarahk oh ngehn peik, ahpw irail keriah Koht, oh men mehla. Ahpw irail kin nantihong doarehki arail mour neirail kedlahs.

15 Kedekedeo ei pahtou pwurehng pwurodohng ie, oh I kilang me rahn en kalahngan daulih irailehr, nan paliwar oh palingehn; pwe I kilang kid en irail me kamakamala nan arail uhwong arail Koht, oh koasokosokpene duwehte koiasi pohn sahpwo. Oh met kaimwsekalahr pahr silipwiki pahisek pahieu.

16 Kedekedeo nan pahr silipwiki pahisek pahieuo, Mehn Nihpai kan tepida tangasang mwohn Mehn Leimen kan; oh irail pwepweki lao irail kohla nan sahpw en Seison, mwohn arail pahn kak kauhdi irail sang tang.

17 Oh met, kahnihmw en Seison karanihte sahpw me Amaron ekihla poadoapoad kan ong Kauno, pwe en dehr ohla. Oh kilang I kohla nin duwen dahme Amaron ndaiong ie, oh ale pileit en Nihpai, oh ahpw ntingihada poadoapoad nin duwen dahme Amaron nda.

18 Oh pohn pileit en Nihpai I ntingihdi ni unsek duwen wiewia suwed kan oh tiahk suwed kan koaros; ahpw phn pileit pwukat I sohte ntingihda ni unsek duwen arail wiewia suwed kan oh tiahk suwed kan, pwe kilang, wiewia suwed kan oh tiahk suwed kan kalapw wiwiawi mwohn mesei kat sangete ahnsou me I kakehr ese momour en aramas.

19 Oh meid suwed ong ie pwehki arail wiewia suwed kan; pwe mohngiongi direkihla pahtou pwehki arail wiewia suwed kan, erein ei mour; ahpw, I ese me I pahn pwekpwekdahla ni imwin rahno.

20 Kedekedeo nan pahret aramas en Nihpai kan pwurehng pwepweki oh tangatang. Kedekedeo se ahpw tangatangala lao se kohla nan sahpw en paliepeng wasa me adaniki Sem.

21 Kedekedeo se ahpw silehdi kahnihmw en Sem, oh se ahpw kihpene nait aramas kan me sek kak, ele pwe sen kak doarehsang irail kamwomwala.

22 Kedekedeo nan pahr silipwiki pahisek pahieuo irail pwurehng tepida kohdohng kiht.

23 Kedekedeo I ahpw koasoieng nei aramas akan, oh kangoangehkin irail sang ni ei ngong mehlel, me irail pahn anahne kesihnen eimah mwohn Mehn Leimen kan oh pei pwehki arail pwoud kan, oh neirail seri kan, oh imwarail kan, oh arail wasahn keiru kan.

24 Oh ei koasoi kan ekis kihong irail kehlail, kahrehda irail sohte tang mwohn Mehn Leimen kan, ahpw irail kesihnen eimah oh pelian irail.

25 Kedekedeo se ahpw peliankinirail sounpei meh silinen ah neirail sounpei meh limenen. Kedekedeo se ahpw kesihnen kehlail mwohrail kahrehda irail tangasang mwoht.

26 Kedekedeo ahnsou me irail tang nait sounpei kan ahpw pwakih irail, oh pwurehng tuhwong irail, oh keme irail; ahpw kehl en Kauno sohte ieiang kiht; ei, se pein wiwia aht, kahrehda Ngehn en Kauno sohte ieiang kiht; eri se luwetala duwehte riat akan.

27 Oh mohngiongi pahtoula pwehki kahpwal lap en nei aramas akan, pwehki arail wiewia suwed kan oh arail tiahk suwed kan. Ahpw kilang, se kohwehng Mehn Leimen kan oh pwihn en Kadiendon lipirap ko, lao se pwurehng kalowehdi sapwat sahpw en sohso kan.

28 Oh pahr silipwiki pahisek duwao ahpw imwiseklahr. Oh nan pahr silipwiki limeiseko se ahpw wiahda inou ong Mehn Leimen kan oh pwihn en Kadiendon lipirap ko, me elehiong aht katohrepeseng sapwat sahpw en sohsou.

29 Oh Mehn Leimen kan ahpw kihong kiht sahpw en paliepeng, iei, wasa me tehtik kahluwahla nan sahpw en palieir. Oh se kihong Mehn Leimen kan sahpw me mih palieir koaros.