1 Kedekedeo Mehn Leimen kan sohte pwurehng kohdo mahwin lao sounpar eisek dauliher. Oh kilang, I kadoadoahkih nei aramas kan, Mehn Nihpai kan, re en kaukaunop sapwarail akan oh neirail mehn mahwin kan ong ahnsou en mahwin.

2 Kedekedeo Kauno ahpw mahsanihong ie: Kalohkehng aramas pwukat—Kumwail koluhla, oh kohdo rehi, oh papidaisla, oh pwurehng kauada ei mwomwohdiso, oh kumwail pahn mourla.

3 Oh I ahpw kalohkehng aramas pwukat, ahpw sohla katepe; oh irail sohte medewe me Kauno me ketin doareirailla, oh ketikihong irail ahnsou mwahu en koluhla. Oh irail keptakaiala mohngiongarail kan ong Kauno arail Koht.

4 Kedekedeo mwurin sounpar eisek eh imwiseklahr, me patpenehier wiahda, sounpar silipwiki weneisek sang ni ahnsou me Krais ketido, nanmwarki en Mehn Leimen kan ahpw kadaredo kisin likou ehu ong ie, me kasalehiong ie me irail kaukaunop en kohdo mahwiniong kiht.

5 Kedekedeo I ahpw wiahiong nei aramas akan irail en kohpene nan sahpw en Tehnla, ni kahnihmw ehu me mih ni irepen sahpw, wasa me tehtik kohla nan sahpw en palieir.

6 Oh wasahu se kiheng nait sounpei kan, pwe sen kak kauhdi nein Mehn Leimen sounpei kan, pwe irail en dehr kalowehdi sapwat sahpw akan; eri se silehsang irail wasao ni aht kihong nait sounpei kan kaoros.

7 Kedekedeo nan pahr silipwiki weneisek ehuo Mehn Leimen kan kohdihdohng mahwiniong kiht nan kahnihmw en Tehnla; oh kedekedeo nan pahro se ahpw kemeirail, lao irail pwurehng pwuralahng nan pein sapwarail.

8 Oh nan pahr silipwiki weneisek riauo irail pwurehng pwuredihdo mahwiniong kiht. Oh se pwurehng kemeirail, oh kemehla tohto irail, oh arail mehlahkan lekidekdihla nan sehdo.

9 Oh met, pwehki pweida lap wet me nei aramas en Mehn Nihpai kan wiadahr, irail tepida pohnmwahsohki pein arail kehlail, oh tepida kahukihla nanleng me irail pahn dupuk mehlahn riarail kan me arail imwintihti kan kemehla.

10 Oh irail kahkihla nanleng, oh pil mwoalen Koht, me irail pahn kohdahla mahwiniong arail imwintihti kan, oh pahn karirirailsang pohn sahpwo.

11 Kedekedeo ngehi, Mormon, ahpw soikala ni mehlel wia arail kaun en sounpei oh kaun en sang ahnsou kohla, pwehki arail wiewia suwed kan oh tiahk suwed kan.

12 Kilang, I kahluwa irail, mehndahte arail wiewia suwed kan I kahluwa irail pak tohto nan mahwin, oh poakpoake irail, nin duwen limpoak en Koht me mih rehi, sang nan ei mohngiong unsek; oh loalleiet kin poaden kapakap ong Koht rahn koaros pwehki irail; ahpw, e sohte pwoson, pwehki keptakain mohngiongarail kan.

13 Oh pak siluh me I doarehsang irail nan pehn arail imwintihti kan, oh irail sohte koluhkihla diparail kan.

14 Oh ahnsou me irail kahukihla soahng kan me sohte mweimwei ong irail sang Kauno oh Sounkomour Sises Krais, me irail pahn kohlahng mahwiniong arail imwintihti kan, oh dupuk mehlahn riarail kan, kilang kepitien Kauno ahpw kohdohng ie, mahmahsanih:

15 Ngehi me pahn kin dupuk, oh I pahn kapwung; oh pwehki aramas pwukat sohte koluhla mwurin ei doareirailla, kilang, irail pahn karirasang pohn sampah.

16 Kedekedeo I soikala ni mehlel iang kohla mahwiniong ei imwintihti kan; oh I kapwaiada sapwellimen Kauno mahsen ong ie; oh I wia sounkadehde me kilangete oh pahn kasalehiong sampah soang kan me I kilangehr oh rongehr, nin duwen dahme Ngehno ketin kadehdehki soahng kan me pahn kohdo.

17 Eri I ntingwehng kumwail, Mehn Liki kan, oh pil kumwail, peneinei en Israel, ahnsou me doadoahko pahn tepida, kumwail pahn tepida kaunopada pwuralahng sapwamwail sahpw en sohsohu;

18 Ei, kilang, I ntingwehng koaros pohn sampah; ei, ong kumwail, keinek eisek riau en Israel, me pahn pakadeikda nin duwen amwail doadoahk kan sang ehkriemen me Sises malipe re en wia sapwellime tohnpadahk kan nan sahpw en Serusalem.

19 Oh I ntingwehng kumwail kisehn aramas pwukat, me pahn pil pakadeikda sang ehkriemenme Sises malipe nan sahpwet; oh irail pahn pahn pakadeik rehn ehkriemeno me Sises malipe nan sahpw en Serusalem.

20 Oh mepwukat Ngehno ketin kasalehiong ie; eri I ntingihdi ong kumwail koaros. Oh kahrepe wet me kahrehda ei ntingwei rehmwail, pwe kumwail en kak ese me kumwail koaros pahn kesihnen mwohn mwoalen kopwung en Krais, ei, ngehn koaros me wia kisehn peneinei en Adam; oh kumwail pahn kesihnenda oh pakadeingki amwail doadoahk kan, ma e mwahu de suwed;

21 Oh pil pwe kumwail en kak kamehlele rongamwahu en Sises Krais, me pahn mih rehmwail; oh pil pwe Mehn Suhs akan, sapwellimen Kauno aramas en inou kan, pahn mie ekei sounkadehde likin Sises me irail kilang oh rong, me irail kemehla, me iei udahn Kraiso oh udahn Kohto.

22 Oh I men kangoangehki kumwail koaros pohn sampah en koluhla oh kaunopadahng kesihnen mwohn mwoalen kopwung en Krais.