1 Ngan yana ine nahitabo nga ha 363 katuig an mga kasundaluhan han mga Nephite in nakipag-away han mga Lamanite, ha gawas han katunaan han Pagkaguba.

2 Ngan ine nahitabo nga an kasundaluhan han mga Nephite in gintabog pabalik tikang han katunaan han Pagkaguba. Ngan samtang hira in guol pa, usa nga bag-o nga mga sundalo han mga Lamanite in nag-abot ha ira; ngan nagkaada hin mahugot nga pagaway, salit nasakop han mga Lamanite an siyudad han Pagkaguba, ngan ginpatay adton kadam-an nga mga Nephite, ngan damo an gindara nga bariga.

3 Ngan adton mga nanhibilin in pumalagiw ngan umupod han mga nanngongukoy ha siyudad han Teancum. Ngan yana an siyudad han Teancum in aada ha pag-ultan ha ligid han dagat; ngan adto in harani ha siyudad han Pagkaguba.

4 Ngan adto tungod han mga sundalo han mga Nephite an nagsulong ha mga Lamanite salit hira in nagtikang hin pagkalupig; kay kun dire tungod hadto, dire magkakamayada hin gahum an mga Lamanite ngadto ha ira.

5 Kundi, kamatuoran, an mga paghukom han Diyos in maabot ha magraot; ngan ito in pinaagi han magraot nga adton mga magraot in ginsisirotan; kay adton magraot in nag-aaghat han mga kasingkasing han anak han katawhan hin pagpaawas han dugo.

6 Ngan ine nahitabo nga an mga Lamanite in nagbuhat hin mga pag-andam ha pagkontra ha siyudad han Teancum.

7 Ngan ine nahitabo nga ika 364 ka tuig an mga Lamanite in sinmulong kontra ha siyudad han Teancum, agud ira liwat maangkon an siyudad han Teancum.

8 Ngan ine nahitabo nga hira in nasupil ngan natabog pabalik han mga Nephite. Ngan han nakita han mga Nephite nga ira napa-atras an mga Lamanite hira in nagpamahitas-on han ira mga kalugaringon nga kakusog; ngan hira in sinmulong han ira kalugaringon nga mga kusog, ngan naangkon na liwat nira adton siyudad han Pagkaguba.

9 Ngan yana an ngatanan hine nga hitabo in nahinabo, ngan yukot-yukot adton nagkamatay ha magpaluyo nga bahin, ha duha han mga Nephite ngan mga Lamanite.

10 Ngan ine nahitabo nga han paglabay han ika 366 katuig an lumabay, sinmulong liwat an mga Lamanite han mga Nephite agud makipag-away; ngan an mga Nephite an waray pa magbasul han ira mga magraot nga ira nabuhat, kundi in nagpirit ngan nagpadayon hadton ira karaotan.

11 Ngan dire akus igsaysay pinaagi ha mga pulong, o para maisurat han katawhan an hingpit nga pangilal-an han kamakaharadlok nga kiritaon han dugo ngan panmatay ha butnga han mga tawo, ha hugpo han mga Nephite ngan mga Lamanite; ngan an kada abilidad in tumig-a, salit hira in nahingaruyag hin padayon nga pagpaawas hin dugo.

12 Ngan waray pa magkaada hin sugad kadako nga karaotan han hugpo han ngatanan nga mga anak ni Lehi, o bisan han hugpo han ngatanan nga sulod balay ni Israel, subay han mga tugon han Ginoo, ngan sugad han aada ha hugpo hine nga mga tawo.

13 Ngan ine nahitabo nga naangkon han mga Lamanite an siyudad han Pagkaguba, ngan ine mahitungod nga an ira kadamo in somobra han kadamo han mga Nephite.

14 Ngan hira liwat in sinmulong kontra han siyudad ha Teancum, ngan gintabog paggawas adton nanngungukoy didto, ngan damo an gindara nga bariga pareho nga mga kababayen-an ngan kabataan, ngan ginpanhalad hira ngadto han ira mga diyosdiyosan.

15 Ngan ine nahitabo nga han ika 367 katuig, an mga Nephite in nasisina tungod nga an mga Lamanite in ginhalad an ira mga kababayen-an ngan an ira mga kabataan, salit hira in sinmulong kontra han mga Lamanite nga duro gud in kasina, salit ira ngahaw ginperdi an mga Lamanite, ngan gintabog hira pagpagawas han katunaan.

16 Ngan an mga Lamanite in waray na sumulong hin otro han mga Nephite tubtub han ika 375 katuig.

17 Ngan hine nga tuig hira in sumulong na liwat ha mga Nephite ha bug-os nira nga mga kusog; nga waray hira kaihap tungod hin kadamo nira.

18 Ngan tikang hine nga panahon adton mga Nephite waray pagkaada hin gahum kontra ha mga Lamanite, ngan nasugad nagtikang nga hira in ginpadpad sugad hadton tun-og ha atubangan hadton adlaw.

19 Ngan ine nahitabo nga an mga Lamanite an sumulong kontra han siyudad han Pagkaguba; ngan nagkamayada hin duro kahugot nga pag-away ha katunaan han Pagkaguba, nga diin ginperdi adton mga Nephite.

20 Ngan pumalagiw hira ha atubangan nira, ngan hira in nasingadto ha siyudad han Boaz; ngan didto hira in nakipag atubang kontra han mga Lamanite nga mayada duro nga kakusog, salit waray hira kalupig han mga Lamanite ngada nga gin otro an pagsulong ha ira han ikaduha nga higayon.

21 Ngan han hira in sumulong han ikaduha nga higayon, adton mga Nephite in gintabog ngan ginpamatay hin sobra nga kadamo nga pagpatay; adton ira mga kababayen-an ngan mga kabataan in liwat iginhalad ngadto han mga diyos-diyosan.

22 Ngan ine nahitabo nga adton mga Nephite in pumalagiw tikang ha ira, gindara adton ngatanan an nangungukoy didto, upod adton mga nakadto han mga bungto ngan mga baryo.

23 Ngan yana ako, Mormon, nakikita nga harani na malupig han mga Lamanite an katunaan, sanglit ako in nasingadto ha tayod han Shim, ngan ginkuha an ngatanan nga mga sinurat nga ginhimos ni Ammaron ngadto ha Ginoo.