1 Pamati ako, hi Moroni, in ginhuhuman adton sinurat han akon amay, nga hi Mormon. Kamatuoran, mayada ako pipira nga mga nahuna-huna nga igsusurat, mga nahuna-huna nga iginsugo han akon amay.

2 Ngan yana in nahitabo nga paglabay han dako ngan makalilisang nga aragway ha Cumorah, kamatuoran, an mga Nephite nga pumalagiw ha katunaan nga aada ha timog in ginbibiling han mga Lamanite, ngada nga hira in ngatanan mapuo.

3 Ngan adton akon amay in ira liwat ginpatay, ngan ako la nga usa in nahisalin agud igsurat adton masubo nga estorya han pagkapuo han akon mga tawo. Kundi sigurado, hira in waray na, ngan akon gintuman adton kasugoanan han akon amay. Ngan bisan kun ako in papatayon liwat nira, dire ako maaram.

4 Sanglit ako in magsusurat ngan tatagoon ko adton mga sinurat ha ilarom han tuna; ngan bisan kun diin ako mapakadto in dire na importante.

5 Kamatuoran, an akon amay an naghimo hine nga sinurat, ngan an panuyo hito. Ngan kamatuoran, igsusurat ko liwat ine kun mayada pa lugar ha mga lamina, kundi waray na; ngan iba nga susuratan nga mga tumbaga in waray ako, kay naguusahan la ako. An akon amay in namatay ha pag-awayan, ngan an ngatanan nga akon kauropdan, ngan waray ako mga kasangkayan nga kakadtuan; ngan kun ano kaiha nga an Ginoo in tutugotan nga mabuhi ako dire ako maaram.

6 Kamatuoran, 400 na katuig adton nakalabay tikang han pag-abot han aton Ginoo ngan Manluluwas.

7 Ngan makaparaid, an mga Lamanite in ginbubukod an akon mga tawo, an mga Nephite, tikang han usa nga siyudad ngadto han usa nga siyudad ngan tikang han usa nga lugar ngadto han usa nga lugar, magin tubtub nga hira in mawaray na; ngan damo an nagkamatay ha ira; oo, dako ngan urusahon adton pagkabungkag han akon mga tawo, an mga Nephite.

8 Ngan kamatuoran, an kamot han Ginoo, an nagbuhat hine. Ngan makabirido liwat, an mga Lamanite in nakig-away liwat ha kada tagsa-tagsa ha ira; ngan bug-os han bawbaw han katunaan in padayon han paglibot ha pagpatay ngan pagpaawas han dugo; nga waray usa man nga maaram han katapusan han kagubot.

9 Ngan yana, kamatuoran, waray na ako igsisiring hiunong ha ira, tungod kay waray na iba labot la han mga Lamanite ngan mga tikasan an nabubuhi ha bawbaw han tuna.

10 Ngan waray na nahibabaro han ungod nga Diyos labot la han mga disipolo ni Jesus, nga nagpabilin ha tuna ngada han an karaotan han mga tawo in duro ka dako ngan an Ginoo in dire matugot nga magpabilin hira upod han mga tawo; ngan kun hira man aada ha bawbaw han tuna waray tawo nga maaram.

11 Kundi kamatuoran, an akon amay ngan ako in nakakita ha ira, ngan hira in nagserbi ngada ha amon.

12 Ngan hin-o man nga makakakarawat hine nga sinurat, nga ine huhukman tungod kay may kakulangan hine, hiya in mahihibaro hin labaw nga darayawon nga mga nahuna-huna kontra hine. Pamati, Ako hi Moroni; ngan kun mahimo, igpapasabot ko an ngatanan nga nahuna-huna ha iyo.

13 Nag-aalang, ako hin paghuman han akon pagyakan hiunong hine nga mga tawo. Ako in anak ni Mormon, ngan an akon amay in tulin ni Nephi.

14 Ngan ako la gihapon in nagtatago hine nga sinurat ngadto han Ginoo; adto nga mga lamina in waray kapulsanan, tungod han kasugoanan han Ginoo. Kay ungod nga hiya in nagyakan nga waray hin-o man nga makakakuha hine agud pagpulsan; kundi adto nga mga sinurat in dako an kapulsanan; nga hin-o man nga magdadara hine ha kalamragan hiya in pagbebendisyonan han Ginoo.

15 Tungod kay waray hin-o man nga magkakaada hin gahum nga madara adto ha kalamrag labot nga adto in iginhatag ha iya han Diyos; mahitungod kay karuyag han Diyos nga adto in paghimoon nga an iya mata in tim-os ngada la han iya kahimayaan, o han kaupayan han mga nanhiuna nga maiha na nga nahibulag nga mga tawo nga ginkauyonan han Ginoo.

16 Ngan bebendisyonan hiya nga magdadara hadto nga pulong ha kalamragan; kay mahigagawas adto tikang ha kasisidman ngadto ha kalamragan, subay han mga saad han Diyos; oo, ngan adto in igagawas tikang ha tuna, ngan adto in masiga tikang ha kasisidman, ngan maabot ngadto han kaaraman han tawo; ngan adto in mahitatabo pinaagi han gahum han Diyos.

17 Ngan kun mayada man mga kasaypanan adto in kasaypanan han mga tawo. Kundi kitaa, waray kami nahibabaroan nga sayop; bisan kun sugad an Diyos in maaram han ngatanan nga butang; sanglit, hiya nga nagtatamay, pabay-e hiya nga mayhibaro nga bangin hiya in mahingada ha kataragman han kalayo ha empyerno.

18 Ngan hiya nga nagsisiring: Ipakita mo ha akon, o ikaw in mamama-ul-ul — pabay-e nga hiya in maghirot kay bangin an iya iginsusugo in igindidire han Ginoo.

19 Kay kamatuoran, adton naghuhukom hin apurado in paghuhukman liwat hin apurado; ngan subay hadton iya mga binuhatan amo adton iya magigin suhol; sanglit, adton mga nagpapaul-ul in pao-ul-ulan liwat, han Ginoo.

20 Pamati kun ano man adton iginyayakan ha mga baraan nga kasuratanan — an katawhan in dire magpaul-ul, ngan hiya in dire maghukom; kay adton paghukom in para la ha akon, siring han Ginoo, ngan adton pagbulos in akon liwat, ngan ako an magbabayad.

21 Ngan hiya nga naginhawa hin kasina kontra hadton buhat han Ginoo, kontra hadton ginkauyonan nga mga tawo han Ginoo tikang ha sulod balay han Israel, nga nasiring: Amon gugubaon adton buhat han Ginoo, ngan dire hinunumduman han Ginoo an iya ginhimo nga kauyonan han sulod balay han Israel — hiya liwat in may kataragman nga pudlon agud iglabog ngadto ha kalayo;

22 Kay adton waray katapusan nga panuyo han Ginoo in magpapadayon, ngada nga an ngatanan han iya mga iginsaad in matuman.

23 Pamilnga niyo an mga panagna ni Isaias. Makabirido, dire ko adto igsusurat. Oo, ngan ungod nasiring ako ha iyo, nga adton mga baraan nga nanhiuna ha akon, nga nagtatag-iya hine nga katunaan, in makikimaluoy, oo, magin tikang ha tapo-tapo hira in makikimaluoy ha Ginoo; ngan samtang an Ginoo in nabubuhi hinunumduman niya an kauyonan nga ginhimo niya ha ira.

24 Ngan iya nahibabaroan adton ira mga pag-ampo, nga adto in para han ira mga kabugtoan. Ngan maaran hiya han ira pagtuo, kay pinaagi ha iya ngaran mababantad nira adton mga bukid, ngan ha iya ngaran mahihimo nira nga mabay-og an tuna; ngan pinaagi han gahum han iya pulong mahihimo nira nga adton mga prisohan nga matumba ngada ha tuna; oo, bisan adton nagsisiga nga hudnohan in dire makakapasakit ha ira, bisan adton magbangis nga hayop ngan maglara nga halas, tungod han gahum han iya pulong.

25 Ngan kamatuoran, adton ira mga pag-ampo in ha kaupayan liwat niya nga gintutugotan ha Ginoo nga magdara tipaunhan hine nga mga pulong.

26 Ngan waray bisan man usa nga masiring nga dire hira maabot, kay hira in sigurado gud kay adton Ginoo in nagsisiring hito; kay tikang ha tuna hira in magawas, pinaagi han kamot han Ginoo, ngan waray makakagpugong hadto; ngan adto in maabot ha panahon nga igsisiring nga an mga milagro in waray na; ngan ito in maabot magin sugad ha usa nga magyayakan tikang han mga patay.

27 Ngan ito maabot ha panahon nga an dugo han mga baraan in makikimaluoy ha Ginoo, tungod han sekreto nga mga pagsarosarabot ngan mga buruhaton ha kasisidman.

28 Oo, ngan ine in maabot ha panahon kun san-o an gahum han Diyos in iglilirong, ngan an mga simbahan in mahuhugawan ngan magigin mapahitas-on ha ira mga abilidad, oo, ngan bisan an panahon nga an mga magmamangulo han mga simbahan ngan an mga magturutdo in maalsa han kamapahinitas-on ha ira mga abilidad; bisan an pagpaawaawa ha ira nga kaapi han ira mga simbahan.

29 Oo, ngan ine in maabot an panahon nga diin mahibabatian an mga sunog, ngan mga unos, ngan mga alisngaw hin aso ha langyaw nga mga katunaan;

30 Ngan makakabati liwat hin mga kagubot, notisya hin mga kagubot ngan mga linog ha magkaderodilain nga mga lugar.

31 Oo, ngan ito in maabot ha panahon nga magkakamayada hin grabe nga mga hugaw ha bawbaw han tuna; magkakamayada hin mga pagpatay, ngan mga panikas, ngan mga pagbinuwa, ngan mga panlimbong, ngan mga panlilibog, ngan ngatanan nga klase hin mangil-ad nga mga buruhaton; nga diin damo adton magsisiring, Buhata ine, o buhata adto, ngan igbabale waray la ito, kay aabuyonan adto han Ginoo an sugad ha urhi nga adlaw. Kundi kairo nira, kay hira in aada han sobra nga kapaitan ngan aada ha gapos han karaotan.

32 Oo, ngan ine in maabot ha panahon nga magkakamayada hin mga simbahan nga igtutukod ngan masiring: Daop kamo ha akon, ngan tungod han iyo mga kuwarta papasayloon kamo han iyo mga sala.

33 O kamo nga magraot ngan maglaris ngan mga magtig-a nga mga tawo, kay ano nga nagtindog kamo hin mga simbahan ha iyo kalugaringon agud makaganansya? Kay ano nga iyo ginbaliko an baraan nga mensahe han Diyos, nga magdadara hin waray katapusan nga kasubo han iyo mga kalag? Pamati, tan-awa niyo an mga pagpadayag han Diyos; kay kamatuoran, may takna nga maabot an tiarabot nga adlaw nga ine ngatanan nga pulong in matutuman.

34 Kamatuoran, an Ginoo in nagpakita ha akon hin dagko ngan mga urusahon nga mga butang mahitungod han sigurado nga maabot, hadto nga tiarabot nga adlaw kun ine nga mga pulong in maabot ngada ha iyo.

35 Pamati, ako nagyayakan ha iyo nga baga hin aanhi kamo, bisan kun kamo in waray dinhe. Kundi kaurasahon, iginpakita kamo ha akon ni Jesucristo, ngan nahibabaroan ko an iyo ginbuhat.

36 Ngan nahibabaroan ko nga kamo in naglalakat ha pagkamapahitas-on han iyo mga abilidad; ngan waray labot han pipira la ha iyo nga dire gin-aalsa an iyo kalugaringon ha pagkamapahitas-on ha ira mga abilidad, ngadto han pagsul-ot hin duro kaangayan nga panapton, ngadto ha pagpaawa-awa, ngan mga paglalantugi, ngan mga malisya, nga mga pagtimaraot, ngan ngatanan nga klase hin karaotan; ngan an iyo mga simbahan, sugad man, bisan kada usa, in nagin mahugaw tungod han kamapahinatas-on han iyo mga abilidad.

37 Kay makabirido, hinihigugma niyo adton kuwarta, ngan an iyo mga katigayonan, an iyo mga angayan nga panapton, ngan an mga rayan-dayan han iyo simbahan, hin labaw kontra han iyo paghigugma han mga kablas ngan nanginginahanglan, han magsinakitnon ngan mga nagkukuri.

38 O kamo nga mga maghugaw, kamo nga mga epokrito, kamo nga mga magturutdo, nga nagbabaligya hadton iyo kalugaringon nga diin nakakahugaw, kay ano nga iyo ginhugawan adton baraan nga simbahan han Diyos? Kay ano nga kamo in naawod nga dad-on an ngaran ni Cristo? Kay ano nga dire niyo ginhuhuna-huna nga labaw ka mahinungdanon adton waray katapusan nga kalipayan kontra hadton kasakit nga waray katapusan — tungod han pagdayaw han kalibutan?

39 Kay ano nga iyo ginrarayandayanan an iyo mga kalugaringon hin waray mga pulos, nga butang kundi ginpabay-an an mga nagugutom, ngan an mga nanginginahanglan, ngan an waray panapton, ngan an mga maysakit ngan an nagkukuri nga lumabay ha iyo, ngan dire hira gin-aasi?

40 Oo, ngan kay ano nga iyo gintukod an iyo mga sekreto ngan mangil-ad nga buruhaton agud magbintaha, ngan mahimo nga adton mga balo in magmabido ha atubangan han Ginoo, ngan liwat adton mga ilo ngan magmabido ha atubangan han Ginoo, ngan sugad man an dugo han ira mga amay ngan mga asawa nga lalaki nga makikimaluoy ha Ginoo tikang ha tuna, ha pagbulos ha iyo mga ulo?

41 Kadimalas, an espada han pagbulos in nakabitay han ulohan niyo; ngan an takna maabot nga iya igbubuhos adton dugo han mga baraan ha iyo, kay dire niya tutugutan pa an ira mga panginyupo ha kamaihaan.