1 Ngan yana, kamatuoran, ako in magyayakan bisan mapationano ha mga nahisalin hine nga mga tawo nga nahibilin, nga kun baga igtugot han Diyos nga ihatag ha ira an akon mga tugon, agud ira mahibaroan an hiunong han mga butang han ira kaapoy-apoyan; oo, ngan ako in nagyayakan ha iyo, kamo nga mga nahisalin han sulod balay ni Israel; ngan ine an mga tugon nga akon igsisiring:

2 Hibaroi niyo nga kamo in tikang ha sulod balay ni Israel.

3 Hibaroi niyo nga angay kamo magbasul, o dire kamo matatalwas.

4 Hibaroi niyo nga angay niyo igtago adton iyo mga hinganiban ha pakig-away, nga dire na niyo igkalipay adton pag-awas han dugo, ngan ayaw niyo ine pagkuha-a, ngahaw, labot la kun igsugo han Diyos.

5 Hibaroi niyo nga angay kamo magkaada hin hibaro han iyo mga kaapoy-apoyan, ngan magbasul han ngatanan han iyo mga sala ngan mga karat-an, ngan tumuod kan Jesucristo, nga hiya an Anak han Diyos, ngan hiya in ginpatay han mga Judiyo, ngan pinaagi han gahum han Amay hiya in binmuhat ngahaw, kun diin iya naangkon an pagdaug kontra han lubnganan; ngan ha iya liwat an kaul-ul han kamatayon in natuman.

6 Ngan iya ginpahitabo adton pagkabanhaw han mga patay, nga diin an katawhan in angay bumuhat para tumukdaw ha atubangan han iya lingkuranan han paghukom.

7 Ngan iya ginpahitabo an pagtubos han kalibutan, ha diin hiya nga mabibilngan nga waray sala ha atubangan niya ha urhi nga adlaw han iya paghukom maihahatag ngadto ha iya nga makag-ukoy ha kinamumutangan han Diyos ha iya ginhadian, kumanta hin waray katapusan nga pagdayaw kaupod adton mga koro ha kahitas-an, ngadto ha Amay, ngan ngadto ha Anak, ngan ngadto han Espiritu Santo, nga uusa nga Diyos, ha malipayon nga kamutangan nga waray katapusan.

8 Salit pagbasul, ngan magpabunyag ha ngaran ni Jesus, ngan kumapot han ebanghelyo ni Cristo, nga amo an ig-aandam ha atubangan niyo, dire la ha hine nga sinurat kundi liwat dida ha sinurat nga maabot liwat ha mga Gentil tikang ha mga Judiyo, nga amo an mga sinurat nga matikang ha mga Gentil ngadto ha iyo.

9 Kay kamatuoran, ine in iginsurat ha panuyo nga kamo in tumuod hadto; ngan kun kamo in tumuod hadto matuod liwat kamo hine; ngan kun kamo in tumuod hine mahibabaroan niyo an hiunong han iyo mga kaapoy-apoyan, ngan sugad man an mga urusahon nga mga buruhaton nga ginbuhat pinaagi han gahum han Diyos ha hugpo nira.

10 Ngan mahibabaroan liwat niyo nga kamo in mga salin nga tulin ni Jakob; salit kamo in maiihap ha mga hugpo han mga tawo han una nga kauyonan; ngan kun baga kamo in tumuod kan Cristo, ngan magpapabunyag, una ha tubig, ngan kahuman ha kalayo ngan ha Espiritu Santo, nga ginsusunod an susbaranan han aton Manluluwas, subay ha iya mga iginsugo ha aton, ito in makakaupay para ha iyo ha urhi nga adlaw han paghukom. Amen.