1 Ngan yana, ako in nagyayakan liwat hiunong hadton dire natuod kan Cristo.

2 Pagsumat, kamo ba in natuod ha adlaw han iya pagbisita — pagsumat, kun san-o an Ginoo maabot, ngan liwat, bisan adton bantugan nga urhi nga adlaw kun san-o an kalibutan in urosa nga mapuputos hin sugad hin usa nga bug-os nga papel, ngan an mga elemento in matutunaw han sobra hin kapaso, ngan liwat, hadto nga bantugan nga urhi nga adlaw kun san-o kamo in dadad-on agud tumukdaw ha atubangan han Kordero han Diyos — pagkahuman iyo ba sisidngon nga waray Diyos?

3 Pagkahuman iyo ba iglilirong hi Cristo, o iyo ba makikita an Kordero han Diyos? Kasiring ba niyo nga kamo in makakaukoy kaupod niya ha ilarum han paghibaro niyo han iyo mga sala? Kasiring ba niyo nga magigin malipayon kamo nga maukoy kaupod adton mga baraan nga Katawhan, kun an iyo mga kalag in nag-aantos hin kaaram han iyo mga sala nga iyo gin-abusaran adton iya mga balaod?

4 Ungod, ako nagsusumat ha iyo, nga kamo in magigin kairo nga maukoy upod an usa nga baraan ngan makatadungan nga Diyos, ha ilarom han kaaram han iyo kamaghugaw ha atubangan niya, kontra nga kamo in maukoy upod han mga iginsumpa nga mga kalag ha impyerno.

5 Kay kamutuoran, kun kamo in pagdad-on agud makita adton iyo kawarayan sul-ot ha atubangan han Diyos, ngan sugad man adton kahimayaan han Diyos, ngan an kabaraan ni Jesucristo, ito in madagkot hin siga han kalayo nga dire mapaparong ha iyo.

6 O pagkahuman kamo nga waray pagtuo, balik kamo ngadto han Ginoo; makimaluoy hin kusog ngadto ha Amay ha ngaran ni Jesus, nga bangin kamo in mahiagian nga waray dumit, uray, makaruruyag, ngan mabusag, nga nalimpyohan pinaagi han dugo han Kordero, hadto nga bantugan ngan urhi nga adlaw.

7 Ngan liwat nagyayakan ako ha iyo ngadto ha iyo nga nagdidiwara hadton mga pagpadayag han Diyos, nga nasiring nga waray na adto, nga waray na mga pagpadayag, bisan mga panagna, o mga regalo, o bisan mga pagtambal, o pagyayakan ha mga pulong, ngan mga paghubad han mga pinulungan;

8 Ungod ginsisiring ko ha iyo, hiya nga nagsisikway hine nga mga nahuna-huna in dire maaram han ebanghelyo ni Cristo; oo, ngan waray niya kabasa an baraan nga mga kasuratan; o bangin, waray niya mahisaboti.

9 Kay waray ba naton mabasa nga an Diyos in amo la gihapon kakulop, yana, ngan ha kadayonan, ngan hiya in waray pag-iiba bisan ngani ha lambong han pagbabag-o?

10 Ngan yana, kun iyo nahuna-huna ha iyo mga kalugaringon an usa nga diyos nga nag-iiba, ngan kun hin-o an may lambong han pagbabag-o, kun sugad nahuna-huna ba niyo ngadto ha iyo mga kalugaringon an usa nga diyos nga dire usa nga Diyos han mga milagro.

11 Kundi pamati, igpapakita ko ha iyo adton usa nga Diyos han mga milagro, bisan an Diyos ni Abraham, ngan an Diyos ni Isaac, ngan an Diyos ni Jakob; ngan adto nga amo liwat an Diyos nga naghimo han kalangitan ngan kalibutan, ngan adton ngatanan nga butang nga aada hito.

12 Kamatuoran, iya ginhimo hi Adan, ngan tikang kan Adan umabot adton pakasala han katawhan. Ngan tungod han pakasala han katawhan umabot hi Jesucristo, bisan an Amay ngan han Anak; ngan tungod kan Jesucristo umabot adton pagtubos han katawhan.

13 Ngan tungod han pagtubos han katawhan, nga umabot pinaagi kan Jesucristo, hira in nahibalik ha atubangan han Ginoo; oo, ngan dinhe nga kun hain an ngatanan nga tawo in gintubos, tungod nga an kamatayon ni Cristo an nakagpatuman han pagkabanhaw, ngan nakapagpatuman han pagtubos tikang han waray katapusan nga pagkaturog, ngan adto nga pagkaturog an ngatanan nga tawo in pagpupukawon pinaagi han gahum han Diyos kun an trumpeta in magtunog; ngan hira in mabangon, gudti o dagko man, ngan an ngatanan in matukdaw ha atubangan han iya hukmanan, nga gintubos ngan ginbuhian tikang han waray katapusan nga gapos han kamatayon, ngan adto nga kamatayon in usa nga temporaryo nga kamatayon.

14 Ngan kahuman maabot an Usa nga paghukom han usa nga Baraan ha ira; ngan maabot an panahon nga hiya nga mahugaw in mahugaw la gihapon; ngan hiya nga matadong in magigin matadong la gihapon; hiya nga malipayon in magigin malipayon la gihapon; ngan hiya nga masulob-on magigin masulob-on la gihapon.

15 Ngan yana, O kamo ngatanan nga naghuhuna-huna han iyo mga kalugaringon hin usa nga diyos nga dire nakakahimo hin usa nga milagro, papakianhan ko kamo, ine ba ngatanan nga hitabo in lumabay na, nga akon iginyakan? An katapusan in umabot na ba? Ungod nasiring ako ha iyo, Dire; an Diyos in dire nahunong ha pagigin Diyos han mga milagro.

16 Pagsumat, dire ba an mga hitabo nga ginhimo han Diyos in urusahon ha aton mga mata? Oo, ngan hin-o an makakasabot han urusahon nga mga buruhaton han Diyos?

17 Hin-o an makakasiring nga ito in dire milagro nga pinaagi han iya mando an langit ngan han tuna in nahimo; ngan pinaagi han gahum han iya mando an katawhan in nahimo tikang han tapo-tapo ha tuna; ngan pinaagi han gahum han iya mando an mga milagro in nahimo?

18 Ngan hin-o an makakasiring nga hi Jesucristo in waray magbuhat hin damo nga mga gamhanan nga mga milagro? Ngan damo nga mga gamhanan nga milagro in ginhimo pinaagi han mga kamot han mga apostoles.

19 Ngan kun may mga milagro nga ginhimo nira, kay ano nga humunong an Diyos nga magin usa nga Diyos han mga milagro ngan magpabilin la gihapon nga usa nga dire nagbabag-o nga Diyos? Ngan ungod, nasiring ako ha iyo nga dire hiya nagbabag-o; kun sugad hiya in maukoy pagigin Diyos; kundi hiya in dire naukoy ha pagigin Diyos, ngan hiya amo an Diyos han mga milagro.

20 Ngan an hinungdan kun kay ano nga umokoy hiya paghimo hin mga milagro ha hugpo han anak han katawhan in mahitungod han pagtikainos ngadto ha kawaray pagtuo, ngan nabulag han matuod nga dalan, ngan hira in dire maaram hadto nga Diyos nga ira angay pagtaporan.

21 Ungod, nasiring ako ha iyo kun hin-o man an matuo kan Cristo, nga waray pagruha-duha, ano man adton ira aaroon ha Amay ha ngaran ni Cristo in ighahatag ha iya; ngan ine nga mga saad in para han ngatanan, bisan tubtub han katapusan han kalibutan.

22 Kamatuoran, nasiring hi Jesucristo, an Anak han Diyos, ngadto ha iya mga disipolo nga magpapabilin, oo, ngan liwat ha ngatanan niya nga disipolos, han pamatian han kadam-an: Lakat kamo ha bug-os nga kalibutan, ngan igwali an ebanghelyo ha ngatanan nga tawo;

23 Ngan hiya nga natuod ngan nabunyagan in matatalwas, kundi hiya nga dire natuod in pagsusumpaon;

24 Ngan ine an mga tigaman in masunod hadton natuod — ha akon ngaran in hira magpapaiwas an mga demonyo; hira in magyayakan ha bag-o nga mga pinulungan; magkakapot hira hin mga halas; ngan kun hira uminom hin makamaratay nga waray kinabuhi nga butang in dire hira pagsasakitan; ngan kun hira in magpatong hadton ira mga kamot ha magsakit ngan hira in mahihiulian;

25 Ngan hin-o man nga natuod han akon ngaran, nga waray pagruha-duha, akon pagpapamatuoran ha iya an akon mga saad, bisan tubtub ha katapusan han kalibutan.

26 Ngan yana, kitaa, hin-o an makakag-ilob kontra han mga buruhaton han Ginoo? Hin-o an magdidiwara han iya mga pulong? Hin-o an matukdaw kontra han labaw nga gahum han Ginoo? Hin-o an magtatamay han mga buruhaton han Ginoo? Hin-o an magtatamay han mga anak ni Cristo? Pamati, kamo nga magtamay han mga buruhaton han Ginoo, kamo in mahipapausa ngan mamamatay.

27 O sanglit ayaw pagtamay, ngan ayaw paghipausa, kundi manmati han mga tugon han Ginoo, ngan mangaro han Amay ha ngaran ni Jesus hadton mga butang nga iyo ginkikinahanglan. Ayaw pagruha-duha, kundi magin matinuohon, ngan pagtikang sugad han una, ngan daop ha Ginoo ha iyo bug-os nga kasingkasing, ngan magbuhat para han iyo kalugaringon nga katalwasan nga may pagkahadlok ngan panngorog ha iya atubangan.

28 Magin maaram ha mga henerasyon han iyo pagproyba; kuha-i an iyo mga kalugaringon han ngatanan nga karaotan; ayaw pangaro, agud ubuson la ha iyo mga karuyagon, kundi pangaro nga may kadig-on ngan dire nababantad, nga dire kamo madara ha pagsulay, kundi nga kamo in magserbi ha tinuod ngan buhi nga Diyos.

29 Piho-a nga kamo in waray kabunyagi hin dire kaangayan; piho-a nga kamo in dire nakarawat han sakramento ni Cristo nga dire kaaangayan; ngan piho-a nga iyo ginbubuhat adton ngatanan nga buruhaton ha kaangayan, buhata ito ha ngaran ni Jesucristo, an Anak han buhi nga Diyos; ngan kun iyo ine buhaton, ngan mag-antos ngada ha katapusan, kamo in dire pagagawson.

30 Ungod, nagyayakan ako ha iyo nga baga ako nagyayakan tikang ha mga patay; kay maaram ako nga mahingangada ha iyo an akon mga pulong.

31 Ayaw niyo ako paghukmi tungod han akon dire ka hingpit, bisan an akon amay, tungod han iya dire ka hingpit, bisan adton mga nagsurat nga nanhiuna pa ha iya; kundi magpasalamat ha Diyos nga iya iginhatag ha iyo an dire pagkahingpit namon, ngan mahibaro kamo hin pagigin makinaadmanon labaw ha amon.

32 Ngan yana, kamatuoran, iginsurat namon ine nga sinurat subay han amon nahibaroan, dida ha mga litra nga gintatawag nga binag-o nga Egipto, nga iginpasunod ha amon ngan amon ine gin bag-o, subay han paagi han amon pinulungan.

33 Ngan kun an amon mga lamina in nagin igo hin kadako iginsurat unta namon ine ha Hebreo; kundi an Hebreo in amon liwat igin bag-o; ngan kun kami in nakagsurat ha Hebreo kitaa, kamo in dire magkakaada hin kakulangan han amon sinurat.

34 Kundi maaram an Ginoo han mga nahuna-huna nga amon nahisurat, ngan sugad man waray iba nga tawo an nahibabaro han amon yinaknan; ngan kay waray iba nga mga tawo nga nahibaro han amon yinaknan, sanglit hiya in nag-andam hin mga paagi hin paghubad hadto.

35 Ngan ine nga mga nahunahuna in nahisurat agud an amon mga panapton in malimpyohan han dugo han amon mga kabugtoan, nga amo in nawarayan hin pagtuo.

36 Ngan kamatuoran, ine nga mga nahuna-huna nga amon kinaruyag hiunong han amon mga kabugtoan, ngan liwat, bisan an ira pagbalik ha kaaram kan Cristo, in subay han mga pag-ampo han ngatanan nga baraan nga nag-uukoy ha katunaan;

37 Ngan unta ighatag han Ginoo nga hi Jesucristo nga batonon an ira mga pag-ampo subay han ira pagtuo; ngan unta an Diyos nga Amay in mahinumdum hadton mga kauyonan nga iya ginhimo ngadto han sulod balay ni Israel; ngan unta iya pagbendisyonan hira ha kadayonan, pinaagi han pagtuo han ngaran ni Jesucristo. Amen.