1 Ngonian ako, si Moroni, isinusurat kun ano an sakuyang pinaghuhuna na marahay; asin ta ako nagsusurat sa sakuyang manga katugangan, na manga Lamanite; asin sakuyang minamawot na saindang maaraman na labi sa apat na gatos asin duwang pulo na taon na an nakaagi poon kan an tanda kan pag-abot ni Cristo itinao.

2 Asin sakuyang siniserahan an manga kasuratan na ini, pagkatapos na ako makapagtaram nin diit na manga tataramon sa paagi nin pagsadol sa saindo.

3 Totoo, kamo sakuyang sinasadol na kun saindong mabasa an manga bagay na ini, kun ini kadunungan sa Dios na kaipuhan na saindong basahon an manga ini, tanganing saindong marumdoman kun paano kamaherakon an Kagurangnan sa manga aki nin tawo, magpoon pa sa paglalanga ki Adan sagkod sa panahon na saindong maako an manga bagay na ini, asin paghorop-horopon ini sa saindong manga puso.

4 Asin ta kun akoon na nindo an manga bagay na ini, kamo sakuyang sinasadol na kamo maghumapot sa Dios, an Daing-Kasagkuran na Ama, sa pangaran ni Cristo, kun an manga bagay na ini bako totoo; asin kamo maghuhumapot na igwang dalisay na puso, na igwang tunay na katuyohan, na igwa nin pagtubod ki Cristo, saiyang ipapahayag an katotoohan kaiyan sa saindo, sa paagi kan kapangyarihan kan Espiritu Santo.

5 Asin sa paagi kan kapangyarihan kan Espiritu Santo saindong maaaraman an katotoohan kan gabos na manga bagay.

6 Asin an ano man na bagay na marahay iyan masuripot asin totoo; kaya daing bagay na marahay na iniindahan si Cristo, alagad mimidbidon na siya iyo siya.

7 Asin saindong mamimidbid na siya iyo siya, sa paagi kan kapangyarihan kan Espiritu Santo; kaya kamo sakuyang sinasadol na dai nindo pag-indahan an kapangyarihan kan Dios; huli ta siya naggigibo sa paagi nin kapangyarihan, sunod sa pagtubod kan manga aki nin tawo, siring sa ngonian asin sa aga, asin sagkod pa man.

8 Asin sa giraray, kamo sakuyang sinasadol, sakuyang manga katugangan, na kamo dai mag-inda kan balaog kan Dios, huli ta kadakol idto; asin ta an manga idto hali sa sarong Dios. Asin ta igwang manlaen-laen na paagi na an manga balaog na idto itinatao; alagad siya iyo idtong parehong Dios na naggigibo kan gabos sa gabos; asin an manga ini itinatao sa paagi kan manga pagpahayag kan Espiritu kan Dios sa manga tawo, tanganing mapakinabangan ninda.

9 Huli totoo, sa saro itinatao kan Espiritu kan Dios, tanganing saiyang maitukdo an tataramon nin kadunungan;

10 Asin sa saro, tanganing saiyang maitukdo an tataramon nin pagkaaram sa paagi kan parehong Espiritu;

11 Asin sa saro, labi-labi kadakulang pagtubod; asin sa saro, an manga balaog nin pagbulong sa paagi kan parehong Espiritu;

12 Asin sa giraray, sa saro, tanganing siya makagibo nin makukusog na milagro;

13 Asin sa giraray, sa saro, tanganing siya makapagpropesia manunungod sa gabos na manga bagay;

14 Asin sa giraray, sa saro, tanganing makahiling nin manga anghel asin manga naglilingkod na manga espiritu;

15 Asin sa giraray, sa saro, gabos na manga dila;

16 Asin sa giraray, sa saro, an pagsalin nin manga tataramon asin palaen-laen na manga dila;

17 Asin an gabos na manga balaog na ini maabot sa paagi kan Espiritu ni Cristo; asin ta an manga ini maabot sa lambang tawo saro saro, susog sa saiyang pagboot.

18 Asin kamo sakuyang sinasadol, sakuyang padangat na manga katugangan, tanganing saindong marumdoman na an lambang marahay na balaog hali ki Cristo.

19 Asin kamo sakuyang sinasadol sakuyang padangat na manga katugangan, tanganing saindong marumdoman na siya iyo kaidto, ngonian, asin sagkod pa man, asin tanganing an gabos na manga balaog na ini na sakuyang pinagtataram, na manga espiritual, dai nanggad hahalion, sagkod na an mundo nagtitindog, apuera sana sa daing pagtubod kan manga aki nin tawo.

20 Huli kaini, kaipuhan nin pagtubod; asin ta kun kaipuhan nin pagtubod kaipuhan man nin paglaom; asin ta kun kaipuhan nin paglaom kaipuhan man nin dalisay na pagkamoot.

21 Asin ta sagkod na kamo igwang dalisay na pagkamoot dai kamo sa ano man na paagi makakaligtas para sa kahadean kan Dios; ni kamo makaligtas para sa kahadean kan Dios kun kamo dai nin pagtubod; ni kamo makakaligtas kun kamo dai nin paglaom.

22 Asin ta kun kamo dai nin paglaom kamo nasa kahurasaan; asin an kahurasaan minaabot huli sa karaotan.

23 Asin ta si Cristo totoong nagsabi sa satuyang manga kamagurangan: Kun kamo igwa nin pagtubod kamo makakagibo nin manga bagay na tama para sa sakuya.

24 Asin ngonian ako nagtataram sa gabos na manga kasagkuran kan kinaban—na kun an aldaw umabot na an kapangyarihan asin balaog kan Dios mahali na sa saindong katiripunan, idto huli sa kadaihan nin pagtubod.

25 Asin ta herak man kan manga aki nin tawo kun siring an mangyayari; huli ta dai nin maggigibo nin marahay sa saindong katiripunan, dai ni saro man. Huli ta kun igwa man nin saro sa saindong katiripunan na maggigibo nin marahay, siya maggigibo sa paagi kan kapangyarihan asin balaog kan Dios.

26 Asin herak man sa sainda na maggigibo kan manga bagay na ini asin magadan, huli ta sinda magagadan sa saindang manga kasalan, asin ta dai sinda makakaligtas sa kahadean kan Dios; asin ako nagtataram susog sa manga tataramon ni Cristo; asin ta ako dai nagpuputik.

27 Asin ta kamo sakuyang sinasadol na rumdomon an manga bagay na ini; huli ta an panahon maliksi na maabot na saindong maaraman na ako dai nagpuputik, huli ta ako saindong mahihiling sa hukoman kan Dios; asin an Kagurangnan na Dios masabi sa saindo: Bakong sakuyang ipinahayag an sakuyang manga tataramon sa saindo, na manga isinurat kan tawong ini, siring sa saro na nagkukurahaw hali sa gadan, iyo, siring sa sarong nagtataram hali sa kabokabo?

28 Sakuyang ipinahayag an manga bagay na ini para sa pag-utob kan manga propesia. Asin totoo, an manga ini magluluwas sa nguso kan daing katapusan na Dios; asin an saiyang manga tataramon magtatanog sa sarong kapagarakian sagkod sa masurunod na kapagarakian.

29 Asin ipapahiling saindo kan Dios, na an sakuyang isinurat totoo.

30 Asin giraray sakuyang sinasadol kamo na dumulok ki Cristo, asin pangapotan an lambang marahay na balaog, asin dai pagdutdoton an mararaot na balaog, ni an maati na bagay.

31 Asin magmata, asin magbangon hali sa kabokabo, O Jerusalem; iyo, asin isulot an saindong magagayon na manga gubing, O manga aking babae kan Zion; asin pakusugon an saindong manga tukod asin pahiwason an saindong manga pagdulonan sagkod pa man, tanganing tibaad dai na kamo magkarilibong, tanganing an manga tipan kan Daing-Kasagkuran na Ama na ginibo sa saindo, O harong kan Israel, mautob na.

32 Iyo, dumulok ki Cristo, asin maging daing katuyawan sa saiya, asin indahan an saindong sadiri kan gabos na pagkabakong-diosnon; asin ta kun saindong indahan an saindong sadiri kan gabos na pagkabakong-diosnon asin mamootan an Dios sa gabos nindong bagsik, isip asin kusog, dangan an saiyang ugay magkakanigo sa saindo, tanganing sa paagi kan saiyang ugay magi kamong daing katuyawan ki Cristo; asin ta kun sa paagi kan ugay kan Dios kamo maging daing katuyawan ki Cristo, dai nanggad kamo sa ano man na paagi makakainda sa kapangyarihan kan Dios.

33 Asin sa giraray, kun kamo sa paagi kan ugay kan Dios naging manga daing-katuyawan ki Cristo, asin dai mag-inda sa saiyang kapangyarihan, saka na kamo magiging banal ki Cristo sa paagi kan ugay kan Dios, sa paagi kan pagpabulos kan dugo ni Cristo, na nasa tipan kan Ama sa pagpatawad kan saindong manga kasalan, tanganing magi kamong banal, daing digta.

34 Asin ngonian ako namamaaram sa saindo gabos, paaram. Ako madali nang magpapahingalo sa paraiso kan Dios, sagkod na an sakuyang espiritu asin hawak sa giraray magsaro, asin dinadara akong nagtitriumpo sa duros, tanganing sabaton kamo sa atubangan kan marahay-rahay na hukoman kan dakulang Jehova, an Daing-Kasagkuran na Hukom kan buhay asin kan gadan. Amen.