1 Sarong surat kan sakuyang ama na si Mormon, sinurat sa sakuya, si Moroni; asin idto isinurat sa sakuya pagkatapos tulos na ako inapod sa paglingkod. Asin sa paagi na ini siya nagsurat sa sakuya, na an sabi:

2 Sakuyang padangat na aki, Moroni, ako nag-oogma nin labi-labi na an saimong Kagurangnan na Jesu-Cristo rinurumdom ika, asin ta inapod ika sa saiyang paglingkod, asin sa saiyang banal na gibo.

3 Danay ko ikang rinurumdom sa sakuyang manga pagpamibi, padagos na nagpapamibi sa Dios na Ama sa pangaran kan saiyang Banal na Aki, na si Jesus, na siya, sa paagi kan saiyang daing-katapusan na karahayan asin ugay, antabayan ka sa manga aagihan sa pagtagal sa pagtubod sa saiyang pangaran sagkod sa katapusan.

4 Asin sa ngonian, sakuyang aki, magtataram ako sa saimo manunungod kaidtong ikinamumundo ko nin labi-labi; huli ta ikinamumundo ko an magkaigwa nin pagpasuruhay sa saindo.

5 Huli, kun sakuyang naaraman an totoo, igwa nin pagpasuruhay sa saindo manunungod sa pagbunyag kan saradit nindong manga aki.

6 Asin ngonian, sakuyang aki, sakuyang minamawot na magi kang maigot sa paggibo, tanganing ining dakulang pagkasala mahali sa saindo; ta huli sa katuyohan na ini sakuyang isinurat an surat na ini.

7 Huli pagkatapos tulos na sakuyang maaraman an manga bagay na ini sa saimo ako naghapot sa Kagurangnan manunungod sa bagay na iyan. Asin an tataramon kan Kagurangnan uminabot sa sakuya sa paagi kan kapangyarihan kan Espiritu Santo, na an sabi:

8 Magdangog sa manga tataramon ni Cristo, an saimong Paratubos, an saimong Kagurangnan asin an saimong Dios. Magdangog, nagpadigdi ako sa mundo bako na apodon an manga matatanos kundi an manga parakasala na magsorolsol; an manga daing hilang dai nangangaipo nin parabulong, kundi sinda na naghihirilang kaya, an saradit na manga aki daing hilang, huli ta dai pa sinda makakagibo nin pagkasala; kaya an sumpa ki Adan hinali sa sainda sa paagi ko, tanganing ini dai na nin kapangyarihan sa sainda; asin an katugonan nin pagturi natapos na sa sakuya.

9 Asin sa siring na paagi ipinabatid kan Espiritu Santo an tataramon kan Dios sa sakuya; kaya, sakuyang padangat na aki, sakuyang aram na ini magabat na pagtuya-tuya sa atubangan kan Dios, na kamo magbunyag nin saradit na manga aki.

10 Totoo sakuyang sinasabi sa saimo na ining bagay na ini an saimong itutukdo—an pagsolsol asin an pagbunyag duman sa gabos na igwa na nin paninimbagan asin makakagibo na nin pagkasala; iyo, tukdoan an manga magurang na sinda magsorolsol asin magpaburunyag, asin magpakurumbaba kan saindang manga sadiri siring sa saindang saradit na manga aki, asin ta sinda gabos makakaligtas kaibahan an saindang saradit na manga aki.

11 Asin an saindang saradit na manga aki dai nangangaipo nin pagsolsol, ni pagbunyag. Totoo, an pagbunyag para sa pagsolsol pasiring sa pag-utob kan manga katugonan para sa kapatawaran nin manga kasalan.

12 Alagad an saradit na manga aki buhay ki Cristo, magpoon pa kan kapinonan kan mundo; ta kun bako, an Dios bako pantay na Dios, asin man sarong paburubagong Dios, asin nagpapalaen nin manga tawo; huli ta kadakol na saradit na manga aki an nagadan na daing pagbunyag!

13 Kaya, kun an saradit na manga aki dai makakaligtas kun dai nin pagbunyag, an manga ini napaduman na kuta sa daing katapusan na impiyerno.

14 Totoo sakuyang sinasabi sa saindo, na siya na maghuna na an saradit na manga aki nagkakaipo nin pagbunyag nasa apdo nin kapaitan asin nasa gapos nin kasalan; huli ta dai siya nin pagtubod, paglaom, ni dalisay na pagkamoot; huli kaini kun siya magadan mantang nag-iisip kaini, siya kaipuhan na bumaba sa impiyerno.

15 Huli ta makuri an kasumbikalan na maghuna na an Dios ilinigtas an sarong aki huli sa pagbunyag, asin an saro mapapara huli ta bako siyang bunyag.

16 Herak man sainda na magraraot kan manga paagi kan Kagurangnan sa siring na gawi, huli ta sinda mapapara kun dai sinda magsorolsol. Totoo, ako nagtataram na igwang kaisogan, na igwa nin kabagsikan na hali sa Dios; asin ta ako dai natatakot kun ano man an magigibo nin tawo; huli ta an bilog na pagkamoot nakakapahali nin takot.

17 Asin ta ako pano nin dalisay na pagkamoot, na iyo an daing-kasagkuran na pagkamoot; huli kaini, an gabos na manga aki parareho sa sakuya; huli kaini sakuyang namomootan an saradit na manga aki nin bilog na pagkamoot; asin sinda gabos parareho asin manga kahiras sa kaligtasan.

18 Huli ta sakuyang aram na an Dios daing pinapalaen, ni paburubagong pagkatawo; alagad dai siya nagbabago magpoon sa gabos na daing-kasagkuran sagkod sa gabos na daing-kasagkuran.

19 An saradit na manga aki dai makapagsosolsol; huli kaini, makuring kasumbikalan an indahan an dalisay na pagkaherak kan Dios sa sainda, huli ta sinda buhay sa saiya huli sa saiyang pagkaherak.

20 Asin siya na nagsasabi na an saradit na manga aki kaipuhan an pagbunyag pinag-iindahan an pagkaherak ni Cristo, asin hinahalian nin halaga an pagpakasakit niya asin an kapangyarihan nin pagtubos.

21 Herak man sa siring, huli ta sinda nasa pagalaman nin kagadanan, kan impiyerno, asin nin sarong daing katapusan na padusa. Sakuyang maisog na sinasabi ini: An Dios pinagbotan ako. Dangogon an manga idto asin sunodon, o an manga iyan matindog na laban sa saindo sa paghukom ni Cristo.

22 Huli ta totoo na an gabos na saradit na manga aki buhay ki Cristo, asin man sinda na dai kan katugonan. Huli ta an kapangyarihan kan pagtubos maabot sa sainda gabos na daing katugonan; huli kaini, siya na dai isinumpa, o siya na bako nasa irarom nin sumpa, dai makapagsosolsol; asin sa siring an pagbunyag daing kamugtakan—

23 Alagad ini pagtuya-tuya sa atubangan kan Dios, pag-inda sa manga pagkaherak ni Cristo, asin an kapangyarihan kan saiyang Banal na Espiritu, asin pagsarig sa manga gadan na gibo.

24 Totoo, sakuyang aki, ining manga bagay na ini dai dapat; huli ta an pagsolsol para duman na nasa irarom kan kahatolan asin sa irarom kan sumpa nin dai pagsunod na katugonan.

25 Asin an enot na manga bunga kan pagsolsol iyo an pagbunyag; asin an pagbunyag minaabot sa paagi nin pagtubod sa pag-utob kan manga katugonan; asin an pag-utob kan manga katugonan nagdadara nin kapatawaran nin manga kasalan.

26 Asin an kapatawaran nin manga kasalan nagdadara nin kahababaan nin boot, asin mapagpakumbaba na puso; asin huli sa kahababaan nin boot asin mapakumbaba na puso maabot an pagdalaw kan Espiritu Santo, na Pararanga na nagpapano nin paglaom asin bilog na pagkamoot, na pagkamoot na nagtatagal sa paagi nin maigot na pagpamibi, sagkod na an katapusan umabot, kun nuarin an gabos na manga santo mag-eerok na kaibahan an Dios.

27 Totoo, sakuyang aki, ako masurat giraray sa saimo kun dai pa ako tulos na magluwas na makilaban sa manga Lamanite. Totoo, an pagkaharo-halangkawon kan nasion na ini, o an manga tawo kan manga Nephite, nagpapatunay sa saindang pagkarumpag sagkod na sinda magsorolsol.

28 Ipamibi sinda, sakuyang aki, na an pagsolsol mag-abot man sa sainda. Alagad totoo, ako natatakot na tibaad an Espiritu nag-ontok na sa pagtabang sa sainda; asin sa kabtang na ini kan daga sinda man nagmamawot na rumpagon an gabos na kapangyarihan asin kabagsikan na hali sa Dios; asin ta sinda pinag-iindahan an Espiritu Santo.

29 Asin pagkatapos na isikwal an kadakula na pagkaaram, sakuyang aki, sinda madali nang mapara, sa pag-utob kan manga propesia na sinabi kan manga propeta, siring man an manga tataramon kan satuyang Paraligtas.

30 Paaram, sakuyang aki, sagkod makasurat ako sa saimo, o sagkod na maghilingan kita giraray. Amen.