1 Ao ngkai, e koro bukina bwa ngke e a tia Abinataai n taekin taeka aikai ao e arora baina ao e kangai: E na roko te tai are kam na noora iai ana kamaiu te Uea; are a na kona iai aaba, reeti, neewe, ao botanaomata nako n nooria n oin mataia ao a na kakoaua nakon te Atua bwa a motiraoi ana motikitaeka.

2 Ao n te tai anne a na teweaki nako akana buakaka, ao e na reke bukin tangiroaia, ma tangiia, ma bwaebwaetiia, ma ngengeen wiia; ao e riki aio ibukina ngkai aki ongo ni bwanaan te Uea; mangaia are e aki kamaiuia te Uea.

3 Bwa a iaiangoi bwain te rabwata ao a ririaboro, ao e mena mwaakan te riaboro i aoia; eng, are te naeta are kamwaneia ara moan karo, are ngaia bukin bwakaia; are ngaia bukin rikin te botanaomata ae bwanin n riki n aiaron nanon te rabwata, iango aika a kammaira, ao n ririaboro, n ataa kaokoron te buakaka man te raoiroi, ao n riki bwa ana toro te riaboro.

4 Mangaia ae e bua ni kabane te botanaomata; ao taraia, ao a bon teimatoa ni bua ngke e aki kabooia ana botanaomata te Atua man buanakoia ke bwakaia.

5 Ma uringnga bwa ane e kamatoa n oin nanona n rabwata, ao e iri kawain te bure ma kaitaraan te Atua, ao e na teimatoa arona ni bwaka ao e korakora mwaakan te riaboro iaona. Mangaia ae ti te arona naba ngke akea te kaboaki nakoina, ngkai ngaia ana kairiribai te Atua; ao te riaboro naba ana kairiribai te Atua.

6 Ao ngkai ngke arona bwa e tuai n roko Kristo iaon te aonaba, taekinan bwaai aika a na riki n aiaron are aongkoa a bon tia n riki, ao e na bon akea te kaboaki.

7 Ao ngke arona bwa e tuai n uti Kristo mai buakoia maate, ke n tuai n urui ana kabaebae te mate bwa e aonga n ae akea ana tokanikai te ruanimate, ao a na bon akea kammarakin te mate, ao a na bon akea te mangauti.

8 Ma iai te mangauti, mangaia ae akea ana tokanikai te ruanimate, ao e anaaki kammarakin te mate iroun Kristo.

9 Bon ngaia ootan ao maiun te aonaba; eng, ae te oota ae aki totoki, ae aki kona ni karaoaki; eng, ao te maiu naba ae aki totoki, bwa a na manga akea te mate.

10 Ao te rabwata aio e na riki n aki maamate, ao ae e bareka e na riki n aki bareka, ao a na kairaki ni kateaki imatan ana kai ni motikitaeka te Atua, bwa a na motikaki taekaia n aron aia mwakuri bwa a na ataaki mai iai bwa a raoiroi ke a buakaka—

11 Ngkana a tamaroa, ao a na mangauti nakon te maiu ao te kukurei are aki totoki; ao ngkana a buakaka, ao a na mangauti nakon te karawawataki ae aki totoki, ngkai a kairaki nakon te riaboro, are e a tia n tautoronia, i nanon te rawawata—

12 Ao ngkai a tia n iri nanon ma ana baire bwain te rabwata; ao n tuai man wetea te Uea ngke e arori baina n nanoanga nakoia; ngke a aroraki baai n nanoanga nakoia, ao a aki kan kabonganai; ao ngkai a tia ni kauringaki taekan aia buakaka ao a bon aki kitan; ao a tuangaki bwa a na rairinanoia ma a aki kan rairinanoia.

13 Ao ngkai, tiaki bwa ko na aki ruru ao n rairananom man am bure, ao n uringnga bwa bon ti i nanon Kristo ao rinanon ae ko kona ni kamaiuaki iai?

14 Mangaia ae ngkana kam reiakina ana tua Mote, kam na reiakin naba kanikinaean bwaai aika a na roko—

15 Reireinia ae e na reke te kaboaki rinanon Kristo ae te Uea, are bon ngaia te Tama ae Akea Tokina. Amen.