1 Thiab nim no, tau muaj tias tom qab uas Anpinadais tau hais tej lus no tas lawm nws tau xyab nws txhais tes thiab hais tias: Lub sij hawm yuav los thaum uas tag nrho sawv daws yuav pom tus Tswv txoj kev cawm seeg; thaum txhua haiv neeg, txhua xeem neeg, txhua yam lus, thiab neeg yuav pom ntawm qhov muag tim qhov muag thiab yuav lees txim rau Vajtswv tias nws tej kev txiav txim mas ncaj ncees.

2 Thiab thaum ntawd cov neeg phem yuav raug ntiab tawm, thiab lawv yuav raug ua kom quaj nrov nrov, thiab nyiav, thiab quaj, thiab tom lawv tej hniav qees; thiab li no los vim yog lawv tsis mloog tus Tswv lub suab; yog li ntawd tus Tswv tsis txhiv lawv.

3 Vim lawv yog neeg ntiaj teb thiab phem li dab, thiab tus dab muaj hwj chim kav lawv; muaj tseeb tiag, twb yog tus nab txwj nab laug uas tau dag ntxias peb thawj nkawg niam txiv, uas yog qhov uas ua rau nkawd poob; uas tau yog qhov uas ua rau tib neeg sawv daws rais los mus ua neeg ntiaj teb, ua raws li cev nqaij daim tawv nyiam, phem li dab, paub qhov phem tawm ntawm qhov zoo, cia lawv tus kheej ywj rau tus dab.

4 Yog li ntawd tib neeg sawv daws tau yuam kev; thiab saib seb, lawv yuav tau yuam kev tas mus li yog tias Vajtswv tsis tau txhiv nws cov neeg dim ntawm lawv txoj kev yuam kev thiab txoj kev poob.

5 Tiam sis nco ntsoov tias nws tus uas tseem pheej nyob hauv nws tus kheej lub neej ntiaj teb, thiab mus raws li txoj kev txhaum tej kev thiab ntxeev siab tawm tsam Vajtswv, tseem nyob hauv nws txoj kev poob thiab tus dab tseem muaj hwj chim tag nrho kav nws. Yog li ntawd, nws yog zoo li uas tsis tau ua muaj txoj kev txhiv dim li, ua ib tug yeeb ncuab rau Vajtswv; thiab tus dab los kuj yog ib tug yeeb ncuab rau Vajtswv thiab.

6 Thiab nim no yog tias Khetos tsis tau los rau hauv lub ntiaj teb, hais txog tej uas tseem yuav los li lawv twb tau los tas lawm, ces yeej yuav tsis muaj txoj kev txhiv dim hlo li.

7 Thiab yog tias Khetos tsis tau sawv hauv qhov tuag rov qab los, los sis tsis tau tu txoj kev tuag tej hlua es kom lub qhov ntxa tsis txhob muaj kev yeej, thiab kom txoj kev tuag tsis txhob muaj taug, ces yeej yuav muaj tsis taus txoj kev sawv hauv qhov tuag rov qab los hlo li.

8 Tiam sis muaj ib txoj kev sawv hauv qhov tuag rov qab los, yog li ntawd lub qhov ntxa tsis muaj kev yeej, thiab txoj kev lwj siab ntawm txoj kev tuag twb raug nqos lawm nyob hauv Khetos.

9 Nws yog qhov kaj thiab yog txoj sia ntawm lub ntiaj teb; muaj tseeb tiag, yog ib qho kaj uas tsis muaj kawg li, qhov uas tsaus tsis tau li; muaj tseeb tiag, thiab kuj yog ib txoj sia uas tsis muaj qhov kawg ib zaug li, xwv kom muaj tsis taus txoj kev tuag ntxiv lawm.

10 Txawm yog cev nqaij daim tawv uas txawj ploj tuag no los yuav ciaj mus ua cev nqaij daim tawv uas tsis txawj ploj tuag, thiab lub cev uas txawj lwj no yuav ciaj mus uas lub uas tsis txawj lwj, thiab yuav raug coj los mus sawv ntawm Vajtswv lub rooj txiav txim, los txiav txim ntawm nws raws li lawv tej dej num txawm lawv zoo los sis txawm lawv phem—

11 Yog tias lawv zoo, ces mus rau txoj kev sawv hauv qhov tuag rov qab los ntawm txoj sia uas tsis muaj qhov kawg thiab txoj kev zoo siab; thiab yog tias lawv phem, ces mus rau txoj kev sawv hauv qhov tuag rov qab los ntawm txoj kev raug txim uas tsis muaj qhov kawg, yog raug coj mus rau tus dab, tus tau kav lawv ywj siab, uas yog txoj kev raug txim—

12 Uas tau mus raws li lawv tus kheej siab ntiaj teb nyiam thiab xav; ib txwm tsis tau mus thov tus Tswv thaum uas tej caj npab ntawm txoj kev hlub tshua tseem ncav rau lawv; vim tej caj npab ntawm txoj kev hlub tshua tau ncav rau lawv, thiab lawv tsis kam txais; lawv tau raug ceeb toom txog lawv tej kev tsis ncaj ncees thiab tiam sis lawv tseem tsis kam ncaim ntawm tej ntawd mus; thiab lawv tau raug txib kom hloov siab lees txim thiab tiam sis lawv tseem tsis kam hloov siab lees txim.

13 Thiab nim no, puas tsim nyog nej tshee hnyo thiab hloov siab lees txim tawm ntawm nej tej kev txog txhaum, thiab nco ntsoov tias tsuas yog nyob hauv thiab dhau ntawm Khetos xwb nej thiaj li yuav dim tau?

14 Yog li ntawd, yog nej qhia Mauxes txoj kev cai, qhia thiab tias nws yog ib lub cim ntawm tej yam uas yuav muaj los—

15 Qhia lawv tias txoj kev txhiv dim los dhau ntawm tus Tswv Khetos, tus uas yog kiag Leej Txiv tus uas Nyob Mus Ib Txhis. Amees.