1 Kwaye ngoku ukumkani uMozaya wenza okokuba bonke abantu bahlanganisane kunye.

2 Ngoku babengebaninzi kangako abangabantwana bakaNifayi, okanye bengebaninzi kangako abo babeyinzala kaNifayi, njengokuba babenjalo abantu bakaZarahemla, owayeyinzala kaMyuleki, kwaye nabo babeze naye entlango.

3 Kwaye babengebaninzi kangako abangabantu bakaNifayi nabangabantu bakaZarahemla njengoko babenjalo abamaLeymenayithi; ewe, babengesiso nesiqingatha sobuninzi bawo.

4 Kwaye ngoku bonke abantu bakaNifayi babehlanganisene kunye, kananjalo nabo bonke abantu bakaZarahemla, kwaye babehlanganisene kunye bengamaqela amabini.

5 Kwaye kwenzekile okokuba uMozaya waye wafunda, kwaye wenza okokuba kufundwe, iimbali zikaZenif kubantu bakhe; ewe, wazifunda iimbali zabantu bakaZenif, ukususela kwilixa abathi balishiya ilizwe laseZarahemla bade babuya kwakhona.

6 Kanjalo wafunda ingxelo ka-Alma nabazalwana babo, nazo zonke iimbandezelo zabo, ukususela kwilixa ababelishiya ilizwe laseZarahemla kwade kwaba lilixa abathi babuyela kwakhona.

7 Kwaye ngoku, akuba uMozaya ephezile ukufunda iimbali, abantu bakhe ababesele elizweni baba nokumangaliseka nokukhwankqiseka.

8 Kuba bengakwazi emabakucinge; kuba xa babebona abo babehlangulwe baphuma ebukhobokeni baye bazaliswa luvuyo olugqithisileyo.

9 Kwaye kwakhona, xa babecinga ngabazalwana babo ababulawa ngamaLeymenayithi bazaliswa lusizi, kwaye bade baphalaza iinyembezi ezininzi zosizi.

10 Kwaye kwakhona, xa babecinga ngokulunga okukhawulezayo kukaThixo, namandla akhe ekuhlanguleni uAlma nabazalwana bakhe baphuma ezandleni zamaLeymenayithi nasebukhobokeni, baye bawaphakamisa amazwi abo kwaye banikela imibulelo kuThixo.

11 Kwaye kwakhona, xa babecinga ngamaLeymenayithi, awaye ngabazalwana babo, ngemo yabo yesono neyokudyobheka, bazaliswa yintlungu nentuthumbo ngentlalontle yemiphefumlo yabo.

12 Kwaye kwenzekile okokuba abo babengabantwana baka-Amyuloni nabazalwana bakhe, ababethabathe iintombi zamaLeymenayithi ukuba zibe ngabafazi, babengakholisekanga yindlela yokuziphatha kwabo ooyise, kwaye ababi safuna ukuzibiza ngamagama ooyise, ke ngoko bazithabathela igama likaNifayi, ukuze babe nokubizwa ngokuba ngabantwana bakaNifayi kwaye babalelwe phakathi kwabo babebizwa ngokuba ngamaNifayithi.

13 Kwaye ngoku bonke abantu baseZarahemla babebalwa namaNifayithi, kwaye oku kungenxa yokuba ubukumkani babunganikwa namnye ngaphandle kwabo babeyinzala kaNifayi.

14 Kwaye ngoku kwenzekile okokuba akuba uMozaya ephezile ukuthetha nokubafundela abantu, wanqwenela ukuba uAlma naye athethe nabantu.

15 Kwaye uAlma waye wathetha nabo, bakuba behlanganisene kunye bengamaqela amakhulu, kwaye wasuka kwelinye iqela waya kwelinye, eshumayela ebantwini inguquko nokholo eNkosini.

16 Kwaye waye wabayala abantu bakaLimhayi nabazalwana bakhe, bonke aba babekhululwe baphuma ebukhobokeni, ukuba bakhumbule okokuba yayiyiNkosi eyabakhululayo.

17 Kwaye kwenzekile okokuba emva kokuba uAlma ebafundisile abantu izinto ezininzi, kwaye ephezile ukuthetha nabo, ukumkani uLimhayi wanqwenela ukuba abe nokubhaptizwa; kwaye bonke abantu bakhe banqwenela ukuba bangabhaptizwa nabo.

18 Ke ngoko, uAlma waye wabheka phambili emanzini kwaye wababhaptiza; ewe, waye wababhaptiza ngohlobo awenza ngalo kubazalwana bakhe emanzini aseMormoni; ewe, kwaye ngokobuninzi babo awathi wababhaptiza baye baba ngabebandla likaThixo; kwaye oku kungenxa yenkolo yabo kumazwi ka-Alma.

19 Kwaye kwenzekile okokuba ukumkani uMozaya wamvumela uAlma ukuba abenako ukumisa amabandla kulo lonke ilizwe laseZarahemla; waza wamnika igunya lokuba abeke ababingeleli nootitshala phezu kwebandla ngalinye.

20 Ke ngoko oku kwenziwa ngenxa yokuba babebaninzi kakhulu abantu kangangokuba babengenako ukulawulwa ngutitshala omnye; bengenako ukuliva bonke ilizwi likaThixo kwindibano enye;

21 Ke ngoko baye bahlanganisana kunye ngamaqela ahlukeneyo, awayebizwa ngokuba ngamabandla; ibandla ngalinye linababingeleli balo nootitshala balo, kwaye umbingeleli ngamnye eshumayela ilizwi ngokwendlela elalithethwe ngayo kuye ngomlomo ka-Alma.

22 Kwaye njalo, nangona kwakukho amabandla amaninzi onke ayelibandla elinye, ewe, kwanalo ibandla likaThixo; kuba kwaye kungekho nto yayishunyayelwa kuwo onke amabandla ngaphandle kokuba ibe yinguquko nokholo kuThixo.

23 Kwaye ngoku kwaye kukho amabandla asixhenxe elizweni laseZarahemla. Kwaye kwenzekile okokuba nobanina ababenqwenela ukuthabathela kubo igama likaKrestu, okanye likaThixo, baye bazibandakanya namabandla kaThixo;

24 Kwaye babizwa ngokuba bangabantu bakaThixo. Kwaye neNkosi yaye yawuthulula uMoya wayo phezu kwabo, baze basikeleleka, kwaye baphumelela elizweni.