1 Ket napasamak a kalpasan a naaramid ni Mosiah ti imbilin ti amana, ken naipakaammona iti amin a daga, a naguummong dagiti umili iti amin a daga, tapno mapanda iti templo a dumngeg kadagiti isaonto ni ari Benjamin kadakuada.

2 Ket dakkel ti bilangda, aduda unay isu a saanda a binilang ida; agsipud ta immaduda ken dimmakkelda iti kasta unay iti daga.

3 Ket nangalada met kadagiti inauna nga urbon dagiti arbanda, tapno mangipaayda iti sakripisio ken dagiti napuoran a daton a mayannurot iti paglintegan ni Moises;

4 Ken tapno agyamanda iti Apo a Diosda, a nangiruar kadakuada manipud iti daga ti Jerusalem, ken nangisalakan kadakuada kadagiti kabusorda, ken nangdutok iti nalinteg a tattao nga agbalin a mannursuroda, ken kasta met iti nalinteg a tao nga agbalin nga arida, a nangipasdek iti kappia iti daga ti Zarahemla, ken nangisuro kadakuada a mangtungpal iti bilbilin ti Dios, tapno agrag-oda ken mapnuanda iti ayat para iti Dios ken iti amin a tattao.

5 Ket napasamak nga idi nakadanonda iti templo, pinatakderda dagiti toldada iti aglawlaw, iti tunggal tao maibatay ti pamiliana, a buklen ti asawana, ken dagiti lallaki nga annakna, ken dagiti babbai nga annakna, ken dagiti lallaki nga annakda, ken dagiti babbai nga annakda, manipud iti inauna agingga iti inaudi, napaglalasin ti tunggal pamilia manipud iti sabali.

6 Ket pinatakderda dagiti toldada iti aglawlaw ti templo, impasango ti tunggal tao ti ruangan ti toldada iti templo, tapno iti kasta agyanda lattan kadagiti toldada ket dumngeg iti ibaga ni ari Benjamin kadakuada;

7 Saan a maisuro amin ida ni ari Benjamin iti uneg dagiti pader ti templo agsipud ta dakkel unay ti ummong, isu a nangipatakder iti torre, tapno iti kasta mangngeg dagiti taona dagiti balikas nga isaonanto kadakuada.

8 Ket napasamak a nangrugi a nagsao kadagiti taona manipud iti torre; ket saan a mangngeg ti amin ti balikasna gapu iti kinadakkel ti ummong; gapuna a pinanggepna a maisuratto dagiti balikas nga insaona ket maidanon kadagiti saan a madanon iti timekna, tapno maawatda met dagiti balikasna.

9 Ket dagitoy dagiti balikas nga insaona ken pinaisuratna, a kinunana: Kakabsatko, dakayo amin a naguummong, dakayo a makangngeg kadagiti sawek kadakayo iti daytoy nga aldaw; gapu ta saankayo a binilin nga umay iti daytoy a lugar tapno pagang-angawan dagiti balikas nga isaokto, ngem imdengandak koma, ket luktanyo dagiti lapayagyo tapno makangngegkayo, ken dagiti pusoyo tapno maawatanyo, ken dagiti kapanunotanyo tapno maluktan ti imatangyo dagiti palimed ti Dios.

10 Saankayo a binilin nga umay ditoy tapno agbutengkayo kaniak, wenno tapno panunotenyo a naidaddadumaak iti tao a matay.

11 Ngem kaslaak met la kadakayo, a mapaspasaran iti amin a kita ti sagubanit ti bagi ken panunot; ngem napilinak dagitoy a tattao, ken nakonsagraran babaen ti amak, ken napalubosan babaen ti ima ti Apo a rumbeng a siak ti agturay ken ari dagitoy a tattao; ket siak ti nasaluadan ken nasalakniban babaen ti saan maartapan a bilegna, nga agserbi kadakayo iti amin a kabaelan, panunot ken pigsa nga impaay ti Apo kaniak.

12 Kunak kadakayo a kas iti pannakapalubosko a mangbusbos kadagiti aldawko nga agserbi kadakayo, uray agingga iti agdama a panawen, ket saanak a dimmawat iti balitok wenno pirak wenno ania man a kita ti kinabaknangyo.

13 Wenno impalubosko a maipupokkayo kadagiti pagbaludan, wenno pagbalinenyo nga adipen ti maysa a padayo, wenno pumatay, wenno mangranggas, agtakaw, wenno makikamalala; wenno pinalubosankayo nga agaramid iti uray ania a kita ti kinadakes, ket insurok kadakayo a nasken tungpalenyo dagiti bilin ti Apo, ti amin a banag nga imbilinna kadakayo—

14 Ket uray siak, iti bagik, nagbannogak kadagiti bukodko nga ima tapno agserbi kadakayo, tapno saankayo a madagsenan iti panagbuis, ken tapno awan ti umay a nasaem nga ibaklayyo—ket amin dagitoy a bambanag nga insaok kadakayo, dakayo ti saksi iti daytoy nga aldaw.

15 Nupay kasta, kakabsatko, saanko nga inaramid dagitoy a bambanag tapno itangsitko, wenno ibagak dagitoy a bambanag tapno pabasolenkayo; ngem ibagak dagitoy a bambanag tapno maammuanyo a masungbatak iti nalawag a pakinakem iti sanguanan ti Dios iti daytoy nga aldaw.

16 Kitaenyo, ibagak kadakayo nga agsipud ta imbagak kadakayo a binusbosko ti aldawko nga agserserbi kadakayo, saanko tarigagayan nga agpasindayag, gapu ta nagserserbiak laeng iti Dios.

17 Ket kitaenyo, ibagak dagitoy a bambanag kadakayo tapno mabalinyo a masursuro ti pagsiriban; tapno mabalinyo a masursuro a no agserbikayo iti padayo a tao agserserbikayo laeng iti Dios.

18 Kitaen, inawagandak nga ariyo; ket no siak, nga awaganyo nga ariyo, agbannogak tapno agserbi kadakayo, saan, aya, a rumbeng nga agbannogkayo nga agserbi iti tunggal maysa?

19 Ket kitaenyo met, a no siak, nga aw-awaganyo nga ariyo, a nangbusbos kadagiti aldawna a nagserbi kadakayo, ken iti kasta nagserserbi iti Dios, a magunggonaan iti aniaman a panagyaman manipud kadakayo, wen nasken nga agyamankayo iti nailangitan nga Ariyo!

20 Kunak kadakayo, kakabsatko, a no kasapulan nga itedyo amin a panagyaman ken panagdayaw a kabaelan ti sibubukel a kararuayo, iti dayta Dios a nangparsua kadakayo, ken nangsaludan ken nangsalaknib kadakayo, ken nakaigapuanan ti panagrag-oyo, ken nangipaay iti nakappia a panagbiagyo iti tunggal maysa—

21 Kunak kadakayo a no agserbikayo kenkuana a nangparsua kadakayo manipud idi punganay, ken mangsalsalaknib kadakayo iti inaldaw, babaen ti panangipabulodna iti angesyo, tapno agbiag, aggunay ken agaramid mayannurot iti pagayatanyo, ken uray pay a mangtultulong kadakayo iti tunggal kanito—Kunak, no agserbikayo kenkuana iti amin a kabaelan ti karuruayo uray pay nga agbalinkayo latta a saan a mapagnamnamaan a katulongan.

22 Ket kitaen, ti laeng kalikagumanna kadakayo isu iti panangtungpalyo kadagiti bilinna; ket inkarina kadakayo a no tungpalenyo dagiti bilinna agrang-aykayo iti daga; ket saan pulos nga agbalbaliw iti naisaona; ngarud, bendisionan ken parang-ayennakayo no tungpalenyo dagiti bilinna.

23 Ket ita, kangrunaanna, pinarsuanakayo, ken impaayna kadakayo dagiti biagyo, iti kasta siuutangkayo kenkuana gapu iti dayta.

24 Ken maikadua, kalikagumanna nga aramidenyo ti imbilinna kadakayo; gapu ta no aramidenyo, bendisionannakayo a dagus; ket ngarud nabayadannakayo. Ket siuutangkayo pay laeng kenkuana, ken siuutang ita, ken siuutang latta, iti agnanayon; ngarud, ania koma ti maipagpannakkelyo?

25 Ket ita saludsodek, makaibagakayo kadi iti uray ania man iti bagiyo? Sungbatankayo, Saan. Saanyo pay makuna a maipadakayo iti tapok ti daga; nupay naparsuakayo iti tapok ti daga; ngem kitaenyo, agpaay kenkuana a namarsua kadakayo.

26 Ket siak, uray siak, nga aw-awaganyo nga ariyo, saanak a naim-imbag ngem dakayo; agsipud ta naggapuak met iti tapok. Ket makitayo a lumakayakon, ket dandanin yawatko daytoy nainlasagan a bagi iti naggapuanna nga ina a daga.

27 Gapuna, kas iti imbagak kadakayo a nagserbiak kadakayo, a magmagna nga addaan iti nadalus a konsensia iti sanguanan ti Dios, nupay kasta pinaummongkokayo iti daytoy a kanito, tapno maibilang nga awan iti pakababalawan, ket iti kasta saan nga iti darayo ti mangmulit kaniak inton agtakderak nga ukomen ti Dios kadagiti banag nga imbilinna kaniak maipapan kadakayo.

28 Kunak kadakayo imbilinko nga aguummongkayo tapno maikkatko ti darayo iti kawesko, iti daytoy kanito a dandaniakon mapan iti tanemko, tapno mapanak koma a sikakappia, ket maitipon ti saan a matay nga espirituk kadagiti koro idiay ngato a mangikankanta iti panagdaydayaw iti nalinteg a Dios.

29 Ken kanayonanna, kunak kadakayo, nga imbilinko nga aguummongkayo, tapno ipakdaarko kadakayo a saanton a mabalin a siak ti mannursuroyo, wenno ti ariyo.

30 Agsipud ta uray pay iti daytoy a kanito, kasta unay ti panagtigerger ti nainlasagan a bagik bayat ti panangpadasko a makisao kadakayo; ngem saranayannak ti Apo a Dios, ket pinalubosannak nga agsao kadakayo, ket binilinnak nga ipakdaarko kadakayo ita nga aldaw, a ti lalalki nga anakko a ni Mosiah ti ari ken mangituray kadakayo.

31 Ket ita, kakabsatko, kayatko nga aramidenyo kas iti naaramidyon. Kas iti panagtungpalyo kadagiti bilinko, ken kasta met dagiti bilin ti amak, ket nagrang-aykayo, ken nailikliknakayo a matnag kadagiti ima dagiti kabusoryo, kastanto met a no tungpalenyo dagiti bilin ti anakko, wenno dagiti bilin ti Dios a maitedto kadakayo babaen kenkuana, agrang-aykayonto iti daga, ket awanto ti bileg dagiti kabusoryo a mangparmek kadakayo.

32 Ngem, Wen dakayo a taok, agannadkayo amangan no rumsuanto ti panagsusupanget kadakayo, ket pilienyo a tungpalen ti dakes nga espiritu, a naisao ti amak a ni Mosiah.

33 Ta kitaenyo, ay-ay iti naiyebkas kenkuana a mangpili nga agtungpal iti dayta nga espiritu; gapu ta no pilienna ti agtungpal kenkuana, ket agtalinaed ken matay a sibabasol, isu met laeng ti agsagaba iti pannakailunod ti kararuana; ta inawatna ti gunggonana nga agnanayon a pannusa, ta sinalungasingna ti linteg ti Dios a maikaniwas iti bukodna a pannakaammo.

34 Kunak kadakayo, nga awan ti siasino man kadakayo, malaksid dagiti babassit nga annakyo, ti saan pay a nasuruan maipapan kadagitoy a bambanag, ngem kadakayo a saan a makaammo nga agnanayon a siuutangkayo iti nailangitan nga Amayo, nga itedyo kenkuana ti amin a kukuam ken kukua; ken kasta met a nasuruanen ti maipapan kadagiti kasuratan a naglaon iti padpadto a naisao babaen dagiti nasantuan a propeta, agingga idi panawen a pinanawan ti amatayo, a ni Lehi, iti Jerusalem;

35 Ken kasta met, amin a naisao dagiti ammatayo agingga ita. Ket kitaenyo met, insaoda dagiti imbilin ti Apo kadakuada, ngarud, nalinteg ken napudno dagitoy.

36 Ket ita, kunak kadakayo, kakabsatko, a kalpasan a naammuan ken nasursuruankayo iti amin dagitoy a bambanag, ket no agsalungasingkayo ken agaramid iti maikaniwas iti dayta a naisaon, dakayo ti mangyad-adayo iti bagbagiyo iti espiritu ti Apo, tapno awanto ti lugarna kadakayo a mangiwanwan kadagiti dana iti kinasirib tapno mabendisionankayo, agrang-ay, ken masalakniban—

37 Kunak kadakayo, a ti tao a mangaramid iti kastoy, isu met laeng ti nabatad a panagsuppiat a maibusor iti Dios; ngarud pinilina a tungpalen ti dakes nga espiritu, ket agbalin a kabusor ti amin a kinalinteg; gapuna, awan ti lugar ti Apo kenkuana, gapu ta saan nga agindeg iti saan a nasantuan a templo.

38 Ngarud no saan nga agbabawi dayta a tao, ket agtalinaed ken matay a kabusor ti Dios, ti dawaten ti nailangitan a linteg ti mangriing ti saan a matay a kararuana iti napigsa a pannakarikna iti bukodna a basol, a mangpakessen kenkuana iti imatang ti Apo, ken mangpunno iti barukongna iti manidsidir a basol, ken sakit, ken saem, a mayarig iti saan a masebseban nga apuy, ket agpangpangato ti gil-ayabna nga awan patinggana.

39 Ket ita kunak kadakayo, nga awan ti karbengan ti asi iti dayta a tao; ngarud, ti kaudian a dusana isu ti panagituredna iti awan patinggana a panagtutuok.

40 Wen, kadakayo amin a nataengan, ken kasta met kadakayo nga agkabannuag, ken dakayo a babassit nga ubbing a makaawat kadagiti balikasko, agsipud ta imbagak a silalawag kadakayo tapno maawatanyo, ikararagko a mariingkayo iti pananglaglagip iti nakaal-alingget a kasasaad dagiti natnag iti panaglabsing.

41 Ken kasta met, a tarigagayak nga ibilangyo dagiti naparaburan ken naragsak a kasasaad dagiti agtungtungpal kadagiti bilin ti Dios. Ta kitaenyo, a naparaburanda iti amin a banag, ti agpada a nainlasagan ken naespirituan; ket no agtalinaedda a napudno agingga iti kamaudianan maawatdanto idiay langit, tapno makipagtaengdanto iti Dios iti kasasaad nga awan ti gibusna a kinaragsak. Wen laglagipenyo, laglagipenyo a pudno dagitoy a bambanag; agsipud ta ti Apo a Dios ti nangisao.