Seksyon 100
Rebelasyon nga ginhatag kanday Joseph Smith nga Propeta kag Sidney Rigdon sa Perrysburg, New York sang ika-12 sang Oktubre 1833. Ang duha ka kauturan nga may pila na ka adlaw nga malayo sa ila mga pamilya nakabatyag sang pagkabalaka parte sa ila.
1–4, Sanday Joseph kag Sidney dapat magwali sang ebanghelyo para sa kaluwasan sang mga kalag; 5–8, Igahatag sa ila sa mismo nga oras ang ila ihambal; 9–12, Si Sidney dapat mangin manughambal kag si Joseph dapat mangin manugpahayag sang rebelasyon kag mabaskog sa pagpamatuod; 13–17, Ang Ginuo magabangon sing matinlo nga katawhan, kag ang mga matinumanon maluwas.
1 Sa pagkamatuod, ini ang siling sang Ginuo sa inyo, mga abyan ko nga Sidney kag Joseph, ang inyo mga pamilya yara sa maayo nga kahimtangan; yara sila sa akon mga kamot, kag pagahimuon ko sa ila suno sa nagakaigo para sa akon; kay sa akon yara ang tanan nga gahum.
2 Gani, magsunod sa akon, kag magpamati sa laygay nga igahatag ko sa inyo.
3 Tan-awa, kag yari karon, madamo ako sang tawo sa sining lugar, sa mga rehiyon sa palibot; kag pagabuksan ang isa ka mabungahon nga puwertahan sa mga rehiyon sa palibot sa sining duta sa este.
4 Gani ako, nga Ginuo, nagtugot sa inyo nga magkadto sa sining lugar; kay ini ang nagakaigo para sa akon para sa kaluwasan sang mga kalag.
5 Gani, sa pagkamatuod ginasiling ko sa inyo, ibayaw ang inyo mga tingug sa sining katawhan; ihambal ang mga panghunahuna nga ipahayag ko sa inyo mga tagipusuon, kag indi kamo mahuy-an sa panulok sang mga tawo;
6 Kay igahatag sa inyo sa mismo nga oras, huo, sa mismo nga tion kon ano ang inyo ihambal.
7 Apang isa ka kasugoan ang ginahatag ko sa inyo nga ipahayag ninyo ang ano man nga butang nga ipahayag ninyo sa akon ngalan, sa kasinsero sang tagipusuon, sa espiritu sang kalulo, sa tanan nga butang.
8 Kag ginahatag ko sa inyo ining promisa nga kon himuon ninyo ini igapadala ang Balaan nga Espiritu sa pagpamatuod sang tanan nga butang nga inyo ihambal.
9 Kag nagakaigo para sa akon nga ikaw, Sidney, alagad ko, dapat mangin manughambal sa sining katawhan; huo, sa pagkamatuod, pagaordinan ko ikaw sa sining tawag nga mangin manughambal sang akon alagad nga si Joseph.
10 Kag hatagan ko sia sang gahum nga mangin mabaskog sa pagpamatuod.
11 Kag hatagan ko ikaw sang gahum nga mangin mabaskog sa pagpaathag sang tanan nga balaan nga kasulatan agud mangin manughambal ka para sa iya, kag mangin manugpahayag sia sang rebelasyon sa imo, agud mahibaloan mo ang kapat-uran sang tanan nga butang parte sa mga butang sang akon ginharian sa duta.
12 Karon, padayona ang inyo pagpanglakaton kag papangalipaya ang inyo mga tagipusuon; kay tan-awa, kag yari karon, kaupod ninyo ako bisan pa tubtob sa katapusan.
13 Kag karon ginahatagan ko kamo sang pulong parte sa Sion. Pagatuboson ang Sion bisan pa nga ginapinahan sia sa malip-ot lamang nga tion.
14 Ang inyo mga kauturan sa simbahan, ang akon mga alagad nga sanday Orson Hyde kag John Gould, yara sa akon mga kamot; kag kon tumanon nila ang akon mga kasugoan maluwas sila.
15 Gani, pasulhayon ang inyo mga tagipusuon; kay ang tanan nga butang magaresulta sa kaayohan sa ila nga nagalakat sing matarong, kag sa pagpakabalaan sang simbahan.
16 Kay magabangon ako sa akon kaugalingon sing matinlo nga katawhan nga magaalagad sa akon sa pagkamatarong;
17 Kag ang tanan nga nagatawag sa ngalan sang Ginuo, kag nagatuman sang iya mga kasugoan, maluwas. Kag gani amo sini. Amen.