1 Au sa tukuna vakaidina vei iko na veika e baleti ira na wekamudou era sa vakararawataki, ka vakacacani, ka vakasavi tani mai na vanua sa nodra ivotavota vakawa—

2 Koi au na Turaga au sa lewa me yaco vei ira na veika rarawa, era sa vakararawataki kina, me isau ni nodra talaidredre;

3 Io au na lewai ira, ka ra na noqu ena siga au sa lako mai kina me’u kumuna na noqu iyau talei.

4 O koya, sa dodonu kina me ra cudruvi ka vakatovolei, io me vakataki Eparaama ka a vakaroti me vakacabora na luvena tagane e duabau ga.

5 Ko ira kecega era na sega ni vosota ni ra sa cudruvi, ka ra sa cakitaki au, era na sega ni vakatabui.

6 Raica, au sa kaya vei kemudou, sa tu ena kedra maliwa na duiyaloyalo, na veileti, kei na dauvuvu, kei na veiqati, kei na garogaro ca kei na yalo kocokoco; ena vuku ni veika oqori era sa vakadukadukalitaka kina na nodra ivotavota vakawa.

7 Era sa berabera ni rogoca na domona na Turaga na nodra Kalou; o koya, sa berabera kina ni rogoca na nodra masu na Turaga na nodra Kalou, io sa sega ni rogoca ena gauna ni nodra rarawa.

8 Ena gauna ni nodra tiko sautu era sa vakawaletaka na noqu ivakasala; ia, ena gauna era sa leqa kina, era sa qai vakasaqarai au me vukei na nodra gagadre.

9 Au sa kaya vakaidina vei kemudou, e dina era sa ivalavala ca, ia sa vuabale sara na lomaqu ena yalololoma vei ira. Au na sega ni muduki ira tani sara; io ena siga ni noqu cudru au na sega ni guilecava na loloma cecere.

10 Ia au sa yalayala, ka sa tukuni yani na noqu lewa ena dua na ivakaro e liu kau a solia vei iko, niu na vakatauca na iseleiwau ni noqu cudru ena vukudra na noqu tamata; io me vaka niu sa bubului kina, ena yaco vakaidina.

11 Sa voleka ni sovaraki yani na noqu cudru e sega ni vakaiyalayala ki na veimatanitu kecega; ia au na vakayacora vakakina ni sa vuabale na bilo ni nodra caka ca.

12 Ia ena siga ko ya era na qai vakabulai ko ira kecega sa kunei ena vale cecere ni vakatawa se ena dua tale na kena ivosavosataki, ko ira kecega na noqu tamata, na Isireli.

13 Ka ra na vakasoqoni tale mai ko ira sa veiseyaki tu.

14 Era na vakacegui ko ira kecega sa tagi.

15 Ia era na vakaisalataki ko ira kecega sa solia na nodra bula ena vuku ni yacaqu.

16 O koya, me vakacegu kina na lomamudou ena vukui Saioni; raica sa tu ena qeteqete ni ligaqu na nodra bula na tamata kecega; dou tiko lo, mo dou kila Ni’u sa Kalou.

17 Ena sega ni vakayavalati rawa mai na nona tikina ko Saioni, e dina ga ni ra sa veiseyaki tu na lewena.

18 Ko ira na kena vo, ko ira sa savasava na lomadra, era na lesu tale ki na vanua sa nodra ivotavota vakawa, ko ira kei ira na luvedra, ena sere ni reki e tawavakaiyalayala me ra tara cake na veivanua lala mai Saioni—

19 Ia sa yaco na ka kecega oqo me vakayacori kina na nodra yalayala na parofita.

20 Ka raica sa sega tale na vanua sa digitaki ko koya ga ka’u sa lesia; ena sega talega ni dua tale na vanua ena lesi, na kena ga au sa lesia, me baleta na cakacaka ni nodra vakasoqoni vata na noqu yalododonu—

21 Me yacova ni sa yaco mai na gauna sa sega ni kunei tale kina e dua na vanua me baleti ira; ena qai tu tale eso na vanua meu na lesia vei ira, ka ra na vakatokai me iteki, me baleta na vakalevutaki se na vaqaqacotaki kei Saioni.

22 Raica, au sa lewa me ra vakasoqoni vata ka tiko ena vanua tabu ko ira kecega sa masuta na yacaqu, ka qaravi au me vaka na noqu kosipeli tawavakaiyalayala;

23 Ia me ra vakarautaki ira ki na veika ena vakatakilai mai, ni sa cereki tani mai na tikina tabu ena noqu valetabu na ilati sa ubi vuravura; io era na qai raici au taucoko na tamata kecega.

24 Raica era na vakamai na nodra veika caca wale, na tamata, kei na manumanu ni vanua, na manumanu vuka ni macawa, se na ika ni wasawasa, io na ka kecega sa tu e delai vuravura;

25 Ia ena waicala talega na veivu ni ka ena katakata warumisa; raica sa yaco me vou na ka kecega, me na tiko kina e vuravura na noqu vuku kei na noqu lagilagi.

26 Ia ena gauna ko ya ena mudu kina mai mataqu na nodra veimecaki na tamata, kei na nodra veimecaki na manumanu kecega, io, ena mudu na veimecaki ni veika bula kecega.

27 Ia ena gauna ko ya, na ka kecega sa kerea na tamata yadua, ena soli vua.

28 Ia ena gauna ko ya sa na sega kina na kaukauwa nei Setani me temaka e dua na tamata.

29 Io sa na sega na rarawa ni sa sega na mate.

30 Ena gauna ko ya ena sega ni mate e dua na gone dramidrami me yacova ni sa qase; ia na dede ni nona bula ena vaka e dua na vunikau;

31 Ia ni sa mate ena sega ni moce, me vaka ni bulu ena kuvu ni soso, ia ena vakamataliataki vakasauri me vaka na sauriva ni mata, raica ena qai kau cake, ena lagilagi na nona ivakavakacegu.

32 Io, au sa kaya vakaidina vei kemudou, ena siga ko ya ni sa lako mai na Turaga, ena mai vakatakila na ka kecega—

33 Na veika sa yaco oti, kei na veika vuni sa sega na tamata e kila, io na veika sa baleta na vuravura, ka a buli kina, na inaki ni kena buli kei na kena icavacava—

34 Io na veika talei sara, na veika sa tu e cake, kei na veika sa tu e ra, na veika sa tu e boto ni qele, kei na delai vuravura, kei lomalagi.

35 Kei ira kecega sa vakacacani ena vuku ni yacaqu, ka vosota ena vakabauta, e dina ni ra sa kacivi me ra solia na nodra bula ena vukuqu ia era na vakaivotavota ena lagilagi kece oqo.

36 O koya mo dou kakua kina ni rere, ni dou mate sara mada ga; ni sa sega ni taucoko na nomudou reki ena vuravura oqo, ia vei au sa taucoko sara na nomudou reki.

37 O koya, mo dou kakua soti ni lomaleqa ena vuku ni yagomudou, se na bula ni yagomudou; ia mo dou leqa ga ena vuku ni yalomudou, kei na bula ni yalomudou.

38 Ka segata tikoga e veigauna na iserau ni Turaga, mo dou vakabula kina na yalomudou ena yalovosota ka rawata na bula tawamudu.

39 Ni sa kacivi na tamata ki na noqu kosipeli tawavakaiyalayala, ka veiyalayalati ena dua na veiyalayalati tawavakaiyalayala, era sa na okati kina me ra masima kei vuravura ka me ra vakatuituinataki ira na tamata;

40 Era sa lesi me ra vakatuituinataki ira na tamata; ia, kevaka sa seavu mai na masima kei vuravura na kena tuituina, sa qai sega ni yaga ena dua na ka, ia me biu ga ki tautuba me ra butuka sobu ko ira na tamata.

41 Raica, oqo na yalomatua me baleti ira na lewei Saioni, e vuqa vei ira, e sega ni o ira kece; sa kunei ni ra dau talaidredre, o koya sa dodonu kina me ra cudruvi—

42 Ia ko koya sa vakalevulevui koya, ena vakalolovirataki, ia ko koya sa vakalolovirataki koya ena vakalevulevui.

43 Ia oqo, au na tukuna vei kemudou e dua na vosa vakatautauvata, mo dou kila kina na lomaqu me baleta na vakabulai kei Saioni.

44 A sa dua na turaga sa taukena e dua na tiki ni qele; sa tiki ni qele digitaki sara; a sa kaya vei ira na nona tamata: Dou lako ki na noqu were ni vaini, io ki na tiki ni vanua bulabula sara, ka tea kina e tinikarua na vu ni olive;

45 Ka biuta eso na ivakatawa wavoliti ira, ka tara e dua na vale cecere, me rawa ni tu mai kina e dua ka raica na vanua vakavolivolita, me ivakatawa mai na vale cecere, me kakua ni vakacacani na noqu vu ni olive ni ra sa lako mai na meca me vakacacana se tauca na noqu were ni vaini.

46 A ra sa lako na tamata ni turaga ko ya ka kitaka me vaka sa vakarota vei ira na nodra turaga, ka tea na vu ni olive, ka viribaita vakavolivolita, ka biuta na ivakatawa, ka tekivu me ra tara na vale cecere.

47 Ia ni ra sa tura tiko na kena yavu, sa tekivu me ra veikayayaka vakai ira: A cava sa vinakata kina na noda turaga na vale cecere oqo?

48 A ra sa veivosakitaka vakadede ka veikayayaka vakai ira: A cava sa vinakata kina na noda turaga na vale cecere oqo, ena gauna ni sautu oqo?

49 E sega beka ni vinaka me vakacurumi na ilavo oqo vei ira na itaukei ni baqe. Io ni sa sega ni yaga na veika e mai vakayagataki kina oqo.

50 Ia ni sa yaco tiko na duidui ni nodra vakasama, sa yaco me ra vakawelewele mai ka sega ni muria na nona ivakaro na nodra turaga.

51 A sa lako mai ena bogi na meca, ka basuka na bai; era sa duri mai na nona tamata na turaga ka ra sa rere, ka dro; era sa vakarusa na nodra cakacaka ko ira na meca, ka musuka sobu na vu ni olive.

52 Ia raica, sa kacivi ira na nona tamata ko koya na turaga, na itaukei ni were ni vaini, ka kaya vei ira, A cava! A cava na vuna sa yaco kina na ka ca levu oqo?

53 A sega beka ni dodonu mo dou vakayacora me vaka au sa vakarota vei kemudou, ka—me oti ga na nomudou tea na were ni vaini, ka tara vakavolivolita na kena bai, ka biuta na ivakatawa ena kena bai—dou tara talega na vale cecere, ka biuta e dua na ivakatawa ena vale cecere, ka me vakatawa na noqu were ni vaini, ka kakua ni moce, de na qai lako mai vei kemudou na meca?

54 Ia raica, na ivakatawa ena vale cecere a dodonu me raica rawa na meca ni sa yawa sara; ke a rawa ni dou vakarau vinaka ka tarovi ira na meca me ra kakua ni basuka mai na kena bai, ka taqomaka na noqu were ni vaini mai na ligana na dauveivakarusai.

55 A sa kaya na itaukei ni were ni vaini vua e dua na nona tamata: Mo vakasoqoni ira vata na vo ni noqu tamata, mo kauti ira kece na tamata digitaki mai na noqu vale, ko ira na noqu tamata ivalu, na cauravou kei ira talega na uabula vei ira na noqu tamata, sai ira oqo na digitaki ni noqu vale, me ra qai vo ga ko ira ka’u sa lesia me ra vakatawa tiko;

56 Ia mo ni lako sara ki na tikiniqele ni noqu were ni vaini, ka vakalesuya mai na noqu were ni vaini; ni noqu; au a volia ena ilavo.

57 O koya, mo dou lako vakadodonu sara ki na noqu tikiniqele; dou basuraka sobu na nodra bai na noqu meca; dou talaraka sobu na nodra vale cecere, ka vakasavi ira tani na nodra ivakatawa.

58 Ia kevaka era sa soqoni vata tale me ra valuti kemudou, mo dou qai sauma lesu vei ira na noqu meca na ka era a kitaka vei au, ia ena dua na gauna lekaleka ga oqo au na kauti ira yani na noqu tamata ka taukena na vanua.

59 A sa kaya na tamata vua na nona turaga: Ena yaco ni naica na veika oqo?

60 A sa kaya ko koya vua na nona tamata: Ena gauna ka’u sa lewa; ia mo lako kusarawa ka kitaka na ka kecega au sa vakarota vei iko;

61 Ka ni sai koya oqo na noqu ivau kei na noqu veivakalougatataki vei iko—a tamata yalodina ka dauveiqaravi yalomatua ena noqu vale, e dua na iliuliu ena noqu matanitu.

62 A sa lako kusarawa na nona tamata ka kitaka na veika kecega sa vakarota vua na nona turaga; a sa bogi vuqa mada sa qai vakayacori oti na veika kece oqori.

63 E dua tale, au sa kaya vakaidina vei kemudou, au na vakatakila vei kemudou na noqu lewa yalomatua me baleti ira na isoqosoqo lewe ni lotu kecega, kevaka era sa gadreva me ra tuberi ena sala dodonu ka kilikili me ra vakabulai kina—

64 Me ia tiko ga na cakacaka ni nodra vakasoqoni vata na noqu yalododonu, me’u vakatikori ira ena yacaqu ena veivanua tabu; ni sa yaco mai na gauna ni tatamusuki, ka sa dodonu me yaco vakaidina na noqu vosa.

65 O koya, sa dodonu kina me’u vakasoqoni ira vata na noqu tamata, me vaka na vosa vakatautauvata ni sila vinaka kei na sila ca, raica na sila vinaka sa biu ki na lololo me rawata na bula tawamudu, ka vakaisalataki ena lagilagi vakasilesitieli, ni’u na lako mai ena matanitu nei Tamaqu me’u sauma vei ira na tamata kecega me vaka na nodra ivalavala;

66 Ia na sila ca ena vauci vata ena ivau eso, sa vakadreti matua sara na kena ivau, ka visa ena bukawaqa tawaboko rawa.

67 O koya, au sa solia kina e dua na ivakaro vei ira na isoqosoqo lewe ni lotu kecega me ra ia ka soqoni vata tiko ga yani ki na veivanua au sa lesia oti.

68 Ia, me vaka au a sa tukuna vei kemudou ena dua na ivakaro taumada, me kakua ni vakusakusataki se ia ena dro na nomudou vakasoqoni vata; ia me vakarautaki vakavinaka na veika kecega me baleti kemudou.

69 Ia me rawa ni vakarautaki vakavinaka na veika kece me baleti kemudou, dou muria na ivakaro kecega au sa solia ena vuku ni veika oqo—

70 Ka kaya vakaoqo, se vakavuvulitaka, me voli na qele kece ena ilavo, na kena e rawa ni voli me baleta na ilavo, ena veiyasana vakavolivolita na vanua au sa digitaka me itikotiko kei Saioni, me baleta na kena tekivutaki na nodra vakasoqoni vata na noqu yalododonu;

71 Na qele kece e rawa ni voli ena yasayasa vaka-Jekesoni kei na veiyasayasa vakavolivolita, ia mo dou qai laiva ki ligaqu na kena vo.

72 Oqo, au sa kaya vakaidina vei kemudou, me ra kumuna vata na isoqosoqo lewe ni lotu kece sara na nodra ilavo kecega; me vakayacori na veika oqo ena kena gauna, ka kakua ni vakusakusataki ga; dou raica me vakarautaki vakavinaka na veika kecega me baleti kemudou.

73 Ka me ra digitaki na tamata dokai, io ko ira na tamata yalomatua, me ra talai yani me ra la’ki volia na qele kece oqori.

74 Kei ira na isoqosoqo lewe ni lotu ena veimatanitu mai na tokalau, ni ra sa tauyavutaki vakavinaka, kevaka era na muria na ivakasala oqo, sa rawa me ra voli qele ka soqoni vata yani kina; oqori na sala sa rawa kina me ra tauyavutaki Saioni.

75 Ena gauna mada ga oqo, na veika sa tu rawa, sa veirauti, io, sa sivia tale, na ka me vueti kina ko Saioni, ka tauyavutaka na kena veivanua lala, me kakua tale ni vakamaumautaki tu, kevaka era sa tu vakarau na isoqosoqo lewe ni lotu era sa vakatokai ira ena yacaqu, me ra rogoca na domoqu.

76 Kau sa kaya tale ga vei kemudou; au sa lewa me ra lako ko ira ka ra a vakasavi tani ka veiseyaki mai vei ira na nodra meca, ka kerea vagumatua mai ligadra o ira era sa digitaki me ra veiliutaki ena matanitu ena vukumudou, me saumi na veika a vakacacani vei ira mai vei ira na nodra meca.

77 Me vaka na nodra lawa kei na yavu ni vakavulewa na tamata, au sa vakavuna me tauyavutaki, ka sa dodonu me vakayagataki tiko me taqomaki kina na nodra dodonu na tamata kecega, me vaka na ivakavuvuli dodonu ka savasava;

78 Me ra muria na tamata yadua na ivunau kei na ivakavuvuli me baleta na gauna sa bera, me vaka na galala ni digidigi au sa solia vua, ni na saumi taro na tamata yadua ena nona ivalavala ca ena siga ni veilewai.

79 O koya, sa sega sara kina ni dodonu me dua na tamata me bobula vua e dua tale.

80 Ia ena vuku ni ka oqo au sa tauyavutaka kina na Yavu ni Vakavulewa ni vanua oqo, ena ligadra na tamata vuku au sa vakatubura me ra qarava na inaki oqo, ka vueta na vanua ena dave ni dra.

81 Ia me’u vakatautauvatani ira na lewe i Saioni kei na cava? Au na vakatautauvatani ira kei na vosa vakatautauvata ni yada kei na turaganilewa tawadodonu, raica sa kilikili kei ira na tamata me ra masu tiko ga ka kakua ni ceguoca, a sa tukuni vakaoqo—

82 Sa dua na koro sa tiko kina e dua na turaganilewa, a sa sega ni rerevaka na Kalou, se dokai ira na tamata.

83 A sa dua na yada ena koro ko ya, a sa lako mai vua ka kaya: Mo ni cudruvaka na ka sa kitaka vei au na noqu meca.

84 A sa bese mada ko koya, ia e muri sa qai kaya e lomana: E dina niu sega ni rerevaka na Kalou, se dokai ira na tamata, ia ni sa mai vakasosataki au na yada oqo, au na cudruvaka mada na veika ca sa caka vua, io de na vakaocai au ni na sega ni mudu na nona lako tiko mai.

85 Au sa vakatautauvatani ira vakaoqori na lewei Saioni.

86 Io me ra la’ki cikecike tiko ga vua na turaganilewa.

87 Ia kevaka sa sega ni vakacegui ira ko koya, me ra lako sara ka cikecike vua na kovana;

88 Ia kevaka sa sega ni vakacegui ira na kovana, me ra lako sara ka cikecike vua na peresitedi;

89 Ia kevaka sa sega ni vakacegui ira na peresitedi, ena qai tucake na Turaga mai na nona ivunivuni, ka vakararawataka na matanitu ena nona cudru katakata;

90 Ia ena nona yalo katakata kei na cudru waqawaqa ena muduki ira tani kina na tamata ca, sega ni yalodina ka dauveiqaravi tawadodonu, ena gauna sa lewa ko Koya, a sa votai ira vata kei ira na dauveivakaisini kei ira na tawavakabauta;

91 Io ena butobuto e tautuba, era na dautagi kina, ka tagiyaso ka vakasequruqurubati.

92 O koya, mo dou masu kina, me tadolavi na daligadra me ra rogoca na nomudou tagi, io me’u lomani ira me kakua kina ni yaco vei ira na veika oqo.

93 Na veika au sa tukuna vei kemudou sa dodonu me yaco vakaidina, me sega kina ni dua na nodra iulubale na tamata;

94 Me ra rogoca kina na tamata vuku kei ira na iliuliu, na veika era a se sega vakadua ni bau vakasamataka;

95 Meu vakayacora kina na noqu ivalavala, na noqu ivalavala duatani, ka vakayacora na noqu cakacaka, na noqu cakacaka duatani, io me ra kila kina na tamata na veika sa dodonu kei na veika sa cala, sa kaya na nomudou Kalou.

96 Kei na dua tale, au sa kaya vei kemudou, ni sa sega ni dodonu ka sega ni kilikili vei au me volitaka na noqu lololo ko Sidini Kilipati na noqu tamata ki ligadra na noqu meca, oqo na lololo ka’u sa vakarautaka vei ira na noqu tamata.

97 Ia mo dou kakua ni laiva na veika sa noqu me ra vakadukadukalitaka na noqu meca, ena nodra veivakadonui ko ira era sa vakatokai ira ena yacaqu;

98 Ni sa ivalavala ca levu ka bibi sara vei au oqo, ka vakakina vei ira na noqu tamata, me vaka na veika au sa lewa tu ka na yaco kusarawa ki na veimatanitu.

99 O koya, au sa lewa kina me ra kaya, ka kaya tikoga na noqu tamata ni tiko na nodra dodonu ena ka au sa digitaka vei ira, e dina ga era na sega ni vakatarai me ra la’ki tiko kina.

100 Ia, au sega ni kaya ni ra na sega sara ni la’ki tiko kina; ia kevaka era sa cakacaka vagumatua ka vuataka na vua e kilikili ena noqu matanitu, era na tawana vakaidina.

101 Era na tara, ka sega na tamata tani ena taukena; era na tea na were ni vaini, ka kania na vuana. A sa vakakina. Emeni.