1 Long dei ia, wan jeneral kaonsel blong twantefo hae pris oli kam tugeta long haos blong Josef Smit Junia, tru long revelesen, mo oli gohed blong oganaesem hae kaonsel blong jos ia blong Kraes, we i mas gat twelef hae pris, mo wan o tri presiden folem nid blong problem we i stap.

2 Hae kaonsel ia, oli jusum tru long revelesen from stamba tingting blong stretem ol impoten problem we i kam antap insaed long jos, we jos o kaonsel blong bisop i no save stretem blong mekem se evriwan i glad long hem.

3 Voes blong kaonsel i akseptem se Josef Smit Junia, Sidni Rigdon mo Frederik G. Wiliams oli stap olsem ol presiden; mo Josef Smit Senia, Jon Smit, Josef Ko, Jon Johnson, Martin Haris, Jon S. Kata, Jared Kata, Oliva Kaodri, Samuel H. Smit, Orson Haed, Silvesta Smit, mo Luk Jonson, we oli ol hae pris, oli jusum olgeta blong oli stap olsem kaonsel blong jos we i stap oltaem, tru long ful voes blong kaonsel.

4 Ol kaonsela ia we nem blong olgeta i stap antap ia, kaonsel i bin askem olgeta afta sapos bae oli akseptem apoenmen blong olgeta, mo sapos bae oli wok long ofis ia folem loa blong heven, mo evriwan oli bin ansa mo oli bin akseptem ol apoenmen blong olgeta, mo bae oli wok long ofis blong olgeta folem gladhat blong God, we God i bin givim long olgeta.

5 Namba blong ol man we oli stap long kaonsel ia, we oli bin vot long nem mo long bihaf blong jos blong jusum ol kaonsela we nem blong olgeta i stap antap ia, i bin fotitri, mo oli go olsem: naen hae pris, seventin elda, fo pris, mo tetin memba.

6 Oli vot se: hae kaonsel i no gat paoa blong mekem samting sapos i no gat seven long ol kaonsela we nem blong olgeta i stap antap, o sapos i no gat ol man we oli tekem ples blong olgeta oli stap.

7 Olgeta seven ia, oli gat paoa blong jusum ol narafala hae pris, we oli ting se oli klin inaf mo oli naf blong mekem ol wok taem ol narafala kaonsela oli no stap.

8 Oli vot se: taem i gat wan ples i emti from wan i ded, o oli tekemaot hem long ofis from hem i brekem loa, o from hem i aot long baondri blong jos ia, hemia i blong eniwan long ol kaonsela we nem blong olgeta i stap antap ia, bae presiden o ol presiden bae i givim nem blong wan we bae i tekem ples ia, mo jeneral kaonsel blong ol hae pris bae i akseptem, taem oli mit wanples from stamba tingting ia, blong oli mekem ol samting ia long nem blong jos.

9 Presiden blong jos, we i presiden blong kaonsel tu, oli jusum hem tru long revelesen, mo voes blong jos i akseptem hem long wok ia.

10 Mo hem i folem respek long ofis blong hem we bae hem i prisaed ova long kaonsel blong jos; mo hem i spesel janis blong hem blong kasem help blong tu narafala presiden, we oli jusum tufala folem sem fasin we oli bin jusum hem.

11 Mo long taem we wan o tufala tugeta we oli jusum tufala blong helpem hem oli no stap, hem i gat paoa blong prisaed ova long kaonsel mo i no gat nid blong gat wan man blong help; mo long taem we hem bakegen, hem i no stap, ol narafala presiden oli gat paoa blong prisaed long ples blong hem, tugeta o wan long tufala.

12 Taem wan hae kaonsel blong jos ia blong Kraes i oganaes long stret fasin, folem rod we mi talem fastaem, bae hem i diuti blong olgeta twelef kaonsela blong oli pulum namba, mo long wei ia, talemaot huia long olgeta twelef bae i toktok faswan, mo stat wetem nambawan i go folem namba i go kasem twelef.

13 Long taem we kaonsel ia i kam wanples blong tekem desisen long eni problem, olgeta twelef kaonsela oli mas talem se hem i wan hadwan o no; sapos hem i no wan hadwan, tu kaonsela nomo bae tufala i toktok raon long hem, folem rod we oli bin raetem antap finis.

14 Be sapos tingting i stap se hem i wan hadwan, bambae oli jusum fo; mo sapos hem i moa had, sikis; be long wanwan problem, bae oli no save jusum moa long sikis blong oli toktok raon long hem.

15 Man we oli stap talem se i mekem rong, long evri taem, i gat raet blong gat wan haf blong kaonsel i stap, hemia blong mekem se bae i no gat rabis toktok o i no gat nogud jajmen i tekem ples.

16 Mo ol kaonsela we oli jusum olgeta blong toktok long fored blong kaonsel oli mas tokbaot problem, afta we oli lukluk long ol pruf we i stap, olsem we i tru i stap, long fored blong kaonsel; mo evri man i mas toktok folem wanem we i stret mo folem jastis.

17 Olgeta kaonsela we oli pulum ol iven namba, olsem, 2, 4, 6, 8, 10, mo 12, oli ol man we oli mas stanap long saed blong man we oli talem se hem i mekem rong, blong mekem se bae i no gat rabis toktok o i no gat nogud jajmen i tekem ples.

18 Long evri problem, man we i talem se man i mekem rong, mo man ia we oli talem se hem i mekem rong, tufala i gat spesel janis blong toktok long bihaf blong tufala long fored blong kaonsel, afta we oli harem ol pruf mo ol kaonsela we oli jusum olgeta blong toktok long saed blong problem, oli finisim toktok blong olgeta.

19 Afta we oli harem ol pruf, ol kaonsela, man we i talem se nara man i mekem rong, mo man we oli talem se hem i mekem rong oli toktok finis, presiden bae i mas givim wan desisen folem wanem we hem i andastanem long problem ia, mo bae i singaotem olgeta twelef kaonsela blong akseptem desisen ia tru long wan vot.

20 Be sapos ol narafala kaonsela we oli stap, we oli no toktok, o eniwan long olgeta, afta we oli harem ol pruf mo toktok mo no tekem saed blong wan man, oli faenem se i gat wan mistek long desisen blong presiden, oli save talemaot, mo bae oli harem problem ia bakegen.

21 Mo sapos, afta we oli harem gud problem ia bakegen, i gat moa laet long problem ia, bae oli mas jenisim desisen ia folem.

22 Be sapos i no gat sam niu laet long problem, fas desisen ia bae i mas stap, mo bigfala namba blong kaonsel i gat paoa blong mekem desisen olsem.

23 Long taem we problem i had long saed blong doktrin o prinsipol, sapos i no gat inaf samting we oli raetem blong mekem problem ia i klia long maen blong kaonsel, presiden i save askem mo kasem tingting blong Lod tru long revelesen.

24 Ol hae pris, taem oli stap long nara ples, oli gat paoa blong singaotem mo oganaesem wan kaonsel folem rod we mi talem finis, blong stretem ol problem, taem tugeta saed o wan saed i askem.

25 Mo kaonsel ia blong ol hae pris bae oli gat paoa blong jusum wan long grup blong olgetawan blong prisaed ova long wan kaonsel olsem blong sot taem ia.

26 Mo bae hem i diuti blong kaonsel ia blong tekem i go, stret afta nomo, wan kopi blong rekod blong wok blong olgeta, wetem wan ful rekod blong ol testemoni mo pruf blong olgeta we i go wetem desisen blong olgeta, i go long hae kaonsel blong jea blong Fas Presidensi blong Jos.

27 Sapos tugeta saed, o wan saed nomo, i no glad wetem desisen blong kaonsel ia, oli save mekem apil i go long hae kaonsel blong jea blong Fas Presidensi blong Jos, mo bae oli harem problem blong olgeta bakegen, mo bae oli mas lidim folem rod we oli raetem finis, olsem se i no gat wan desisen we i bin tekem ples finis.

28 Kaonsel ia blong ol hae pris we i tekem ples long nara ples, i mas sidaon nomo blong lukluk long ol problem we oli moa had long saed blong ol wok blong jos; mo i no gat wan smol o nomol problem we i inaf blong oli singaotem wan kaonsel olsem.

29 Ol hae pris we oli travel o oli stap long ol nara ples, oli gat paoa blong talem se i gat nid blong singaotem wan kaonsel o nogat.

30 I gat wan samting i defren bitwin hae kaonsel o ol hae pris we oli travel long nara ples, mo travel hae kaonsel we i gat olgeta twelef aposol long hem, hemia long saed blong ol desisen blong olgeta.

31 Long desisen blong faswan, oli save mekem apil long hem; be long desisen blong sekenwan, i no save gat apil long hem.

32 Ol jeneral atoriti blong jos oli save putum kwestin long desisen blong sekenwan, nomo sapos hem i long saed blong fasin blong brekem loa.

33 Oli agri se: presiden o ol presiden blong jea blong Fas Presidensi blong Jos oli mas gat paoa blong talemaot sapos wan problem olsem, we oli mekem apil long hem, bae i stret blong oli harem bakegen, afta we oli lukluk gud long apil mo ol pruf mo ol toktok we oli kam wetem.

34 Nao, olgeta twelef kaonsela oli bin gohed blong pulum namba blong olgeta, blong faenemaot huia bae i toktok faswan, mo hemia i risal we i go olsem: 1, Oliva Kaodri; 2, Josef Ko; 3, Samuel H. Smit; 4, Luk Jonson; 5, Jon S. Kata; 6, Silvesta Smit; 7, Jon Jonson; 8, Orson Haed; 9, Jared Kata; 10, Josef Smit Senia; 11, Jon Smit; 12, Martin Haris.Afta long prea, miting ia i bin stop kasem nara taem.