1 Sini nga adlaw ang pangkabilogan nga konseho sang beynte-kwatro ka mataas nga pari nagtipon sa balay ni Joseph Smith Jr. paagi sa rebelasyon, kag nagpadayon sa pag-organisar sang mataas nga konseho sang simbahan ni Cristo nga dapat magalakip sang dose ka mataas nga pari, kag isa ukon tatlo ka pangulo suno sa kinahanglanon.

2 Ang mataas nga konseho ginpili paagi sa rebelasyon sa katuyoan sang pag-areglar sing importante nga mga kabudlayan nga mahimo magluntad sa simbahan, nga indi sarang maareglar sang simbahan ukon sang konseho sang obispo, sa ikakontento sang mga partido.

3 Sanday Joseph Smith Jr., Sidney Rigdon kag Frederick G. Williams ginkilala nga mga pangulo paagi sa tingug sang konseho; kag sanday Joseph Smith Sr., John Smith, Joseph Coe, John Johnson, Martin Harris, John S. Carter, Jared Carter, Oliver Cowdery, Samuel H. Smith, Orson Hyde, Sylvester Smith, kag Luke Johnson nga mga mataas nga pari ginpili nga mangin permanente nga konseho para sa simbahan paagi sa nag-ugyon nga tingug sang konseho.

4 Ang mga miyembro sang konseho nga nasambit sa ibabaw dayon ginpamangkot: “Ginabaton bala ninyo ang pagtawag sa inyo, kag magahikot bala kamo sa sinang palangakoan suno sa layi sang langit?” Kag nagsabat sila tanan nga ginabaton nila ang pagtawag sa ila, kag tumanon ang ila mga palangakoan suno sa grasya sang Dios nga ginhatag sa ila.

5 Ang kadamuon nga nalakip sa konseho nga nagboto sa ngalan kag para sa simbahan sa pagpili sang mga miyembro sang konseho nga nasambit sa ibabaw kwarenta’y-tres nga amo ang masunod: siyam ka mataas nga pari, disesiyete ka elder, apat ka pari, kag trese ka miyembro.

6 Ginbotohan: nga ang mataas nga konseho wala sang ikasarang kag awtoridad sa paghikot nga wala ang pito sang mga miyembro sang konseho nga nasambit sa ibabaw ukon ang ila nagakaigo nga mga manugbulos.

7 Ining pito may gahum sa pagpili sing iban pa nga mga mataas nga pari nga makabig nila nga nagakaangay kag may ikasarang sa paghikot bulos sa wala nakatambong nga mga miyembro sang konseho.

8 Ginbotohan: nga kon may bakante nga magluntad bangod sang kamatayon, pagpahalin sa palangakoan bangod sa paglapas, ukon pagsaylo nga indi sakop sang pagdumalahan sining simbahan sing bisan sin-o sa mga miyembro sang konseho nga nasambit sa ibabaw, pagabuslan ini paagi sa nominasyon sang pangulo ukon mga pangulo, kag pagaaprobahan ini sang tingug sang pangkabilogan nga konseho sang mga mataas nga pari nga gintipon para sa sinang katuyoan sa paghikot sa ngalan sang simbahan.

9 Ang pangulo sang simbahan nga amo man ang pangulo sang konseho ginpili paagi sa rebelasyon, kag ginasuporta sa iya pagdumala paagi sa tingug sang mga miyembro sang simbahan.

10 Kag dapat sia magpangulo sa konseho sang simbahan suno sa dignidad sang iya palangakoan; kag pribilihiyo niya nga mabuligan sang duha pa ka pangulo nga ginpili sa amo man nga paagi sa pagpili sa iya.

11 Kag kon wala ang isa ukon duha sinang ginpili nga magbulig sa iya, may gahum sia nga magpangulo sa konseho nga wala sang kabulig; kag kon sia mismo ang wala, ang nabilin nga mga pangulo may gahum nga magpangulo bulos sa iya nga duha sila ukon bisan sin-o sa ila.

12 Kon ang isa ka mataas nga konseho sang simbahan ni Cristo naorganisar sa husto nga paagi suno sa sulundan nga nasambit sa ibabaw, mangin tulumanon sang dose ka miyembro sang konseho nga magpagabutgabot sang numero, kag sa sini nga paagi mahibaloan kon sin-o sa dose ang una nga magahambal sumugod sa numero uno kag dayon pasunod tubtob sa numero dose.

13 Kon magtipon ining konseho agud mag-akto sa bisan ano nga kaso, ang dose ka miyembro sang konseho dapat magbinag-binag kon mabudlay ini ukon indi; kon indi, duha lamang sa mga miyembro sang konseho ang magahambal parte diri suno sa proseso nga nasulat sa ibabaw.

14 Apang kon ginakabig ini nga mabudlay, apat ang dapat pilion; kag kon mas mabudlay, anum; apang indi gid magsobra sa anum ang pagapilion nga maghambal.

15 Ang akusado sa tanan nga sitwasyon may kinamatarong nga sigurohon sang katunga sang konseho nga malikawan ang pagpang-insulto ukon kawala’y hustisya.

16 Kag ang mga miyembro sang konseho nga ginpili sa paghambal dapat magpresentar sang kaso pagkatapos nga mausisa ang ebidensya sa iya sini lubos nga kamatuoran sa atubang sang konseho; kag ang tagsa ka tawo dapat maghambal suno sa katarongan kag hustisya.

17 Inang mga miyembro sang konseho nga makagabot sang mga numero nga 2, 4, 6, 8, 10, kag 12, amo ang mga tawo nga dapat magtindog para sa akusado, kag punggan ang pagpang-insulto kag kawala’y hustisya.

18 Sa tanan nga kaso ang nagaakusar kag ang akusado may pribilihiyo sa paghambal para sa ila kaugalingon sa atubang sang konseho pagkatapos nga mapamatian ang mga ebidensya kag ang mga miyembro sang konseho nga ginpili nga maghambal sa kaso makatapos na sang ila mga komento.

19 Pagkatapos nga mapamatian ang mga ebidensya kag nakahambal na ang mga miyembro sang konseho, nagaakusar kag akusado, ang pangulo dapat maghatag sang desisyon suno sa iya paghangop sa kaso, kag pangabayon ang dose ka miyembro sang konseho nga aprobahan ang amo man paagi sa ila pagboto.

20 Apang kon ang nabilin nga mga miyembro sang konseho nga wala nakahambal ukon ang bisan sin-o man sa ila, pagkatapos nga mapamatian sing patas ang mga ebidensya kag mga pahayag, makatukib nga may sala sa desisyon sang pangulo, mahimo nila ipahibalo ini, kag dapat mapamatian liwat ang kaso.

21 Kag pagkatapos sang maid-id nga pagpamati liwat sa kaso, kon may bisan ano nga dugang nga impormasyon nga mapakita parte sa kaso, dapat bag-ohon ang desisyon sing nagakaigo.

22 Apang kon wala sing dugang nga impormasyon nga mahatag, dapat mangibabaw ang una nga desisyon, kag ang mayoriya sang konseho may gahum nga desisyonan ang amo man.

23 Sa tion nga may kabudlayan parte sa doktrina ukon prinsipyo, kon wala sing bastante nga nasulat agud mangin maathag ang kaso sa mga hunahuna sang konseho, ang pangulo mahimo magpamangkot kag magbaton sang hunahuna sang Ginuo paagi sa rebelasyon.

24 Ang mga mataas nga pari, kon yara sa iban nga lugar, may gahum sa pagtipon kag pag-organisar sang konseho suno sa paagi nga nasiling sa ibabaw agud mag-areglar sang mga kabudlayan kon ang mga partido ukon bisan isa sa ila ang magpangabay sini.

25 Kag ang nasambit nga konseho sang mga mataas nga pari may gahum nga magpili sing isa sa ila mga kaupod nga magpangulo sa amo nga konseho sa sini anay nga tion.

26 Mangin tulumanon sang nasambit nga konseho nga ipadala sa gilayon ang kopya sang ila mga kahimoan, upod ang kompleto nga pahayag sang testimonya parte sa ila desisyon, sa mataas nga konseho sa sentro nga talatapan sang Unang Pangulohan sang Simbahan.

27 Kon ang mga partido ukon bisan isa sa ila indi kontento sa desisyon sang nasambit nga konseho, mahimo sila mag-apelar sa mataas nga konseho sa sentro nga talatapan sang Unang Pangulohan sang Simbahan, kag mag-ayo sa liwat nga pagpamati sang kaso, nga inang kaso pagapamatian dira suno sa sulundan nga nasulat sa ibabaw nga pareho lang nga wala sang amo nga desisyon nga nahimo.

28 Ini nga konseho sang mga mataas nga pari nga yara sa iban nga lugar dapat lamang pagatiponon sa pinakamabudlay nga mga kaso parte sa mga butang sang simbahan; kag wala sing simple ukon ordinaryo nga kaso ang dapat mangin igo nga rason sa pagtipon sang amo nga konseho.

29 Ang mga mataas nga pari nga nagabiyahe ukon nagapuyo sa iban nga lugar may gahum sa paghambal kon bala kinahanglanon ang pagtipon sang amo nga konseho ukon indi.

30 May kinalain sa mataas nga konseho ukon nagabiyahe nga mga mataas nga pari sa iban nga lugar, kag sa nagabiyahe nga mataas nga konseho nga nalakipan sang dose ka apostoles, parte sa ila mga desisyon.

31 Ang desisyon sang nauna mahimo iapelar; apang ang desisyon sang naulihi indi na.

32 Ang naulihi mahimo lamang kwestiyonon sang pangkabilogan nga mga awtoridad sang simbahan kon may paglapas.

33 Ginkasugtan: nga ang pangulo ukon mga pangulo sa sentro nga talatapan sang Unang Pangulohan sang Simbahan may gahum sa pagdesisyon kon ang bisan ano nga kaso nga ginaapelar may kinamatarong sa liwat nga pagpamati pagkatapos nga mausisa ang pag-apelar kag ang mga ebidensya kag mga pahayag nga upod sini.

34 Ang dose ka miyembro sang konseho dayon nagpadayon sa paggabutgabot sang mga numero ukon pagboto agud mahibaloan kon sin-o ang una nga dapat maghambal, kag ang resulta amo ang masunod nga sanday: 1, Oliver Cowdery; 2, Joseph Coe; 3, Samuel H. Smith; 4, Luke Johnson; 5, John S. Carter; 6, Sylvester Smith; 7, John Johnson; 8, Orson Hyde; 9, Jared Carter; 10, Joseph Smith, Sen.; 11, John Smith; 12, Martin Harris.Pagkatapos sang pangamuyo natapos na ang komperensya.