1 Dit is my wil dat my dienskneg Warren A. Cowdery aangestel en geordineer word as ’n presiderende hoëpriester oor my kerk, in die land Freedom en die streke rondomheen;

2 En moet my ewigdurende evangelie predik, en sy stem verhef en die volk waarsku, nie slegs in sy eie plek nie, maar in die aangrensende distrikte;

3 En al sy tyd toewy aan hierdie hoë en heilige roeping, wat Ek nou aan hom gee, en ywerig die koninkryk van die hemel en al sy regverdigheid soek, en alle noodsaaklike dinge sal daaraan bygevoeg word; want die arbeider is sy loon werd.

4 En verder, voorwaar Ek sê vir julle, die koms van die Here kom nader, en dit oorval die wêreld soos ’n dief in die nag—

5 Daarom, omgord julle lendene, sodat julle die kinders van die lig mag wees, en daardie dag sal julle nie oorval soos ’n dief nie.

6 En verder sê Ek vir julle, daar was vreugde in die hemel toe my dienskneg Warren neergebuig het voor my septer, en hom afgesonder het van die bedrieërye van mense;

7 Daarom, geseënd is my dienskneg Warren, want Ek sal barmhartigheid hê oor hom; en, nieteenstaande die ydelheid van sy hart, sal Ek hom verhef in soverre hy homself voor My sal verootmoedig.

8 En Ek sal hom genade en versekering skenk waarmee hy mag staan; en indien hy volhard om ’n betroubare getuie te wees en ’n lig vir die kerk, het Ek ’n kroon vir hom voorberei in die wonings van my Vader. Dit is so. Amen.