1 Pagbuot ko nga ang akon alagad nga si Warren A. Cowdery dapat pilion kag ordinan bilang nagapangulong mataas nga pari sa akon simbahan, sa duta sang Kahilwayan kag sa mga rehiyon sa palibot;

2 Kag dapat magwali sang akon wala’y katubtuban nga ebanghelyo, kag magbayaw sang iya tingug kag magpaandam sa mga tawo indi lamang sa iya kaugalingon nga lugar kundi sa katupad nga mga probinsia;

3 Kag maghatag sang iya bilog nga tion sa sining mataas kag balaan nga tawag nga ginahatag ko subong sa iya, nga ginapangita sing matutum ang ginharian sang langit kag ang iya sini pagkamatarong, kag ang tanan nga butang nga kinahanglanon igadugang diri; kay ang nagapangabudlay nagakaangay sang iya suhol.

4 Kag sa liwat, sa pagkamatuod ginasiling ko sa inyo, ang pagkari sang Ginuo nagahilapit na, kag kibuton sini ang kalibutan nga pareho sang makawat sa kagab-ihon—

5 Gani, wagkosi ang inyo mga balikawang agud mangin mga anak kamo sang kasanag, kag inang adlaw indi magaabot sa inyo pareho sang makawat.

6 Kag sa liwat, sa pagkamatuod ginasiling ko sa inyo, nagkalipay ang langit sang ang akon alagad nga si Warren nagduko sa akon setro, kag gintalikdan ang mga pagpatalang sang mga tawo;

7 Gani, bulahan ang akon alagad nga si Warren kay kaluoyan ko sia; kag, sa pihak sang pagkabugalon sang iya tagipusuon, pagabayawon ko sia kon magpaubos sia sang iya kaugalingon sa akon atubang.

8 Kag hatagan ko sia sang grasya kag pasalig nga paagi sini magpabilin sia nga malig-on kag tampad; kag kon padayon sia nga mangin matutum nga saksi kag kasanag sa simbahan may nahanda ako nga korona para sa iya sa mga mansyon sang akon Amay. Kag gani amo sini. Amen.