1 Salamat sa imo ngalan, O Ginuong Dios sang Israel, nga nagatuman sang kasugtanan kag nagapakita sang kaluoy sa imo mga alagad nga nagalakat sing matarong sa imo atubang sa bug-os nila nga tagipusuon—

2 Ikaw nga nagsugo sa imo mga alagad nga magtukod sang balay sa imo ngalan sa sining lugar [Kirtland].

3 Kag karon makita mo, O Ginuo, nga ang imo mga alagad naghimo suno sa imo kasugoan.

4 Kag karon nagapangabay kami sa imo, Balaan nga Amay, sa ngalan ni Jesucristo, ang Anak nga imo nahamut-an, nga sa iya gid lamang ngalan mapatigayon ang kaluwasan sa mga anak sang katawhan, nagapangabay kami sa imo, O Ginuo nga batonon mo ining balay nga ginsugo mo nga amon ipatukod, ang hinimoan sang mga kamot namon nga imo mga alagad.

5 Kay nahibaloan mo nga nahimo namon ining buluhaton sa dako nga pag-antos; kag sa amon kaimolon naghatag kami sang kon ano nga may ara kami agud magtukod sang balay sa imo ngalan, agud nga ang Anak sang Tawo may lugar agud magpakita sa iya katawhan.

6 Kag pareho sa imo ginsiling sa isa ka rebelasyon nga ginhatag sa amon, nga ginatawag mo kami nga imo mga abyan, nga nagasiling—Magpatawag sang inyo sagrado nga pagtipon suno sa akon ginsugo sa inyo;

7 Kag bangod indi ang tanan may pagtuo, magtinguha sing matutum kag tudloi ang isa kag isa sang mga pulong sang kaalam; huo, magpangita kamo halin sa pinakamaayo nga mga libro sang mga pulong sang kaalam, magtinguha sa pag-angkon sang ihibalo, bisan pa paagi sa pagtuon kag paagi man sa pagtuo;

8 I-organisar ang inyo mga kaugalingon; ihanda ang tagsa ka kinahanglanon nga butang, kag ipahamtang ang isa ka balay nga balay sang pangamuyo, balay sang pagpuasa, balay sang pagtuo, balay sang pagtuon, balay sang himaya, balay sang kahusay, balay sang Dios;

9 Agud nga ang inyo mga pagsulod mangin sa ngalan sang Ginuo, agud nga ang inyo mga paggwa mangin sa ngalan sang Ginuo, agud nga ang tanan ninyo nga panamyaw mangin sa ngalan sang Ginuo nga nakabayaw ang mga kamot sa Labing Mataas—

10 Kag karon, Balaan nga Amay, nagapangabay kami sa imo nga buligan kami nga imo katawhan paagi sa imo grasya sa amon pagpatawag sining sagrado nga pagtilipon agud nga matuman ini para sa imo pasidungog kag para sa imo diosnon nga pagbaton;

11 Kag sa paagi nga makabig kami nga nagakaangay sa imo panulok sa pag-angkon sang katumanan sang mga promisa nga ginhimo mo sa amon nga imo katawhan, sa mga rebelasyon nga ginhatag sa amon;

12 Agud nga ang imo himaya magpuyo sa imo katawhan, kag sa sining imo balay nga ginadedikar namon subong sa imo, agud nga mapakabalaan kag makonsagrar ini nga mangin sagrado, kag agud nga ang imo balaan nga presensya mangin yara pirme sa sining balay;

13 Kag agud nga ang tanan nga tawo nga magsulod sa balay sang Ginuo makabatyag sang imo gahum, kag indi makapanghiwala nga ginkonsagrar mo ini, kag balay mo ini nga isa ka lugar sang imo pagkabalaan.

14 Kag tugoti, Balaan nga Amay, nga ang tanan nga magsimba sa sining balay matudloan sang mga pulong sang kaalam halin sa pinakamaayo nga mga libro, kag kabay nga magtinguha sila sa pag-angkon sang ihibalo bisan pa paagi sa pagtuon, kag paagi man sa pagtuo pareho sang imo ginsiling;

15 Kag kabay nga magtubo sila sa imo, kag magbaton sang kabug-osan sang Balaan nga Espiritu, kag mapahamtang suno sa imo mga layi, kag mangin handa sa pag-angkon sang tagsa ka kinahanglanon nga butang;

16 Kag kabay nga ining balay mangin balay sang pangamuyo, balay sang pagpuasa, balay sang pagtuo, balay sang himaya kag sang Dios, bisan pa imo balay;

17 Agud nga ang mga pagsulod sang imo katawhan sa sining balay mangin sa ngalan sang Ginuo;

18 Agud nga ang ila mga paggwa sa sining balay mangin sa ngalan sang Ginuo;

19 Kag agud nga ang tanan nila nga panamyaw mangin sa ngalan sang Ginuo nga may matinlo nga mga kamot, nga nakabayaw sa Labing Mataas;

20 Kag agud nga wala sing mahigko nga butang nga mapasugtan nga makasulod sa imo balay agud higkoan ini;

21 Kag kon makasala ang imo katawhan, ang bisan sin-o sa ila, kabay nga maghinulsol sila sing gilayon kag magbalik sa imo, kag makaangkon sang kahamuot sa imo panulok, kag mapanumbalik sa mga bugay nga imo gin-ordin nga igabubo sa sinang magasimba sa imo sa imo balay.

22 Kag nagapangabay kami sa imo, Balaan nga Amay, nga ang imo mga alagad maghalin sa sining balay nga naarmasan sang imo gahum, kag ang imo ngalan mangin yara sa ila, kag ang imo himaya magapalibot sa ila, kag ang imo mga anghel magabantay sa ila;

23 Kag halin sa sining lugar kabay nga dal-on nila sing matuod-tuod ang tuman ka dalagko kag mahimayaon nga mga balita tubtob sa mga punta sang kalibutan agud mahibaloan sang tanan nga imo ini buluhaton, kag gin-untay mo ang imo kamot agud tumanon inang imo ginhambal paagi sa mga baba sang mga propeta parte sa ulihing mga adlaw.

24 Nagapangabay kami sa imo, Balaan nga Amay, nga ipahamtang ang mga tawo nga magasimba, kag may maayo nga ngalan kag reputasyon sa sining imo balay sa tanan nga henerasyon kag sa wala’y katapusan;

25 Nga wala tani sang armas nga ginhimo batok sa ila ang magmadinalag-on; nga sia nga nagakutkot sang buho para sa ila amo mismo ang mahulog sa amo man;

26 Nga wala tani sang pagkunsabo sang kalainan nga maggahum kag magdaug sa imo katawhan nga sa ila mangin yara ang imo ngalan sa sining balay;

27 Kag kon may katawhan nga maghingabot sa sining katawhan, nga tani ang imo kaakig magdabadaba batok sa ila;

28 Kag kon halitan nila ining katawhan halitan mo sila; pangapinan mo ang imo katawhan pareho sang imo ginhimo sa panahon sang giyera agud maluwas sila sa mga kamot sang tanan nila nga kaaway.

29 Nagapangabay kami sa imo, Balaan nga Amay, nga paslawon, kag kibuton, kag pakahuy-an kag palibugon ang tanan nga nagpalapta sing butig nga mga balita sa iban nga lugar, sa bilog nga kalibutan batok sa imo alagad ukon mga alagad, kon indi sila maghinulsol, sa tion nga ibantala ang wala’y katubtuban nga ebanghelyo sa ila mga dulunggan;

30 Kag tani ang tanan nila nga buhat mangin wala’y pulos, kag maanod sang ulan nga yelo, kag sang mga paghukom nga ipadala mo sa ila sa imo kaakig agud mauntat ang mga pagbinutig kag mga pagbutang-butang batok sa imo katawhan.

31 Kay nakahibalo ka, O Ginuo, nga ang imo mga alagad wala sang sala sa imo panulok sa pagpamatuod sang imo ngalan, nga bangod sini nag-antos sila sining mga butang.

32 Gani, nagapakitluoy kami sa imo atubang para sa lubos kag bug-os nga kahilwayan halin sa idalom sining gota;

33 Balia ini, O Ginuo; balia ini halin sa mga liog sang imo mga alagad paagi sa imo gahum agud makilala kami sa tunga sining henerasyon kag mahimo ang imo buluhaton.

34 O Jehova, kaluoyi ining katawhan, kag bangod ang tanan nga tawo makasala, patawara ang mga sala sang imo katawhan, kag tani mapanas ang mga ini tubtob sa wala’y katapusan.

35 Palig-ona sa ila ang paghaplas sang imo mga alagad paagi sa gahum halin sa kahitaasan.

36 Ipahanabo sa ila ang pareho sa mga sadtong sa adlaw sang Pentecostes; ibubo sa imo katawhan ang dulot sang mga hambal sa lain-lain nga mga lengguahe, bisan pa mga dila nga daw kalayo nga natagtag, kag ang pagpatpat sang mga ini.

37 Kag pun-a ang imo balay sang imo himaya pareho sa nagabagusbos nga makusog nga hangin.

38 Ihatag sa imo mga alagad ang testimonya sang kasugtanan agud nga kon maggwa sila kag magbantala sang imo pulong mapat-inan nila ang layi, kag mahanda ang mga tagipusuon sang imo mga santos para sa tanan sinang mga paghukom nga, sa indi madugay, imo ipadala sa imo kaakig sa mga pumuluyo sang duta bangod sang ila mga sala agud nga indi maluyahan sang buot ang imo katawhan sa adlaw sang kabudlayan.

39 Kag sa bisan diin man nga siyudad nga magsulod ang imo mga alagad, kag batonon sang mga tawo sinang siyudad ang ila testimonya, itugot ang imo paghidaet kag imo kaluwasan nga mangin yara sa sinang siyudad; agud nga mapain nila halin sa sinang siyudad ang mga matarong, agud nga magkadto sila sa Sion ukon sa iya sini mga estaka nga pinili mo nga mga lugar-tiliponan, nga nagakanta sang mga ambahanon sang wala’y katubtuban nga kalipay;

40 Kag tubtob nga matuman ini, indi pag-ipatupa ang imo mga paghukom sa sinang siyudad.

41 Kag sa bisan diin man nga siyudad magsulod ang imo mga alagad, kag indi pagbatonon sang mga tawo sinang siyudad ang testimonya sang imo mga alagad, kag paandaman sila sang imo mga alagad nga luwason ang ila mga kaugalingon sa sining batinggilan nga henerasyon, ipahanabo sa sinang siyudad ang suno sa imo ginhambal paagi sa mga baba sang imo mga propeta.

42 Apang nagapangabay kami sa imo, O Jehova, luwasa ang imo mga alagad halin sa ila mga kamot, kag tinloi sila halin sa ila dugo.

43 O Ginuo, wala kami nagakalipay sa kalaglagan sang amon isigkatawo; malahalon ang ila mga kalag sa imo panulok;

44 Apang kinahanglan matuman ang imo pulong. Buligi ang imo mga alagad nga magsiling paagi sa imo grasya nga nagabulig sa ila: Matuman ang imo pagbuot, O Ginuo, kag indi ang amon.

45 Nakahibalo kami nga naghambal ka paagi sa mga baba sang imo mga propeta sing makakululba nga mga butang parte sa mga malain sa ulihing mga adlaw—nga ibubo mo ang imo mga paghukom nga wala sing pugong-pugong;

46 Gani, O Ginuo, luwasa ang imo katawhan halin sa kalamidad nga matabo sa mga malain; tugoti ang imo mga alagad nga pat-inan ang layi, kag bugkoson ang testimonya agud nga mangin handa sila para sa adlaw sang pagsunog.

47 Nagapangabay kami sa imo, Balaan nga Amay, nga dumdumon inang mga gintabog sang mga pumuluyo sang Jackson county, Missouri halin sa mga duta nga ila palanublion, kag balia, O Ginuo, ining gota sang pag-antos nga ginhatag sa ila.

48 Nakahibalo ka, O Ginuo, nga tuman sila nga ginpigos kag ginpaantos sang malain nga mga tawo; kag nagaawas ang amon mga tagipusuon sa kasubo bangod sang ila mabug-at gid nga mga kabudlayan.

49 O Ginuo, tubtob san-o mo tugotan nga batason sining katawhan ining pag-antos, kag maglab-ot ang mga paghibi sang ila mga inosente sa imo mga dulunggan, kag magsaka ang testimonya sang ila dugo sa imo atubang, kag indi mo pag-ipakita ang imo testimonya agud sakdagon sila?

50 Kaluoyi, O Ginuo, ang malain nga guban nga nagtabog sang imo katawhan agud nga mag-untat sila sa pagpangawat, agud nga maghinulsol sila sang ila mga sala kon posible pa nga maghinulsol sila;

51 Apang kon indi sila, ipakita ang imo butkon, O Ginuo, kag tubosa inang ginhatag mo nga Sion para sa imo katawhan.

52 Kag kon indi gid, agud nga ang kawsa sang imo katawhan indi mapaslaw sa imo panulok kabay nga magdabadaba ang imo kaakig, kag magtupa ang imo kaugot sa ila agud nga maguba sila, pareho nga gamot kag sanga sa idalom sang langit;

53 Apang kon maghinulsol sila, maayo kag maluluy-on ka, kag magasikway sang imo kaakig kon magtulok ka sa nawong sang imo Pinili.

54 Kaluoyi, O Ginuo, ang tanan nga nasyon sang duta; kaluoyi ang mga tagdumala sang amon duta; kabay nga inang mga prinsipyo nga amo ang Konstitusyon sang amon duta nga ginpangapinan sing dungganon kag maisog sang amon mga amay mapahamtang tubtob sa wala’y katapusan.

55 Dumduma ang mga hari, mga prinsipe, mga dungganon, kag mga bantug sang duta, kag tanan nga tawo, kag mga simbahan, tanan nga imol, mga nagakinahanglan, kag mga nagaantos sang duta;

56 Agud nga mapahumok ang ila mga tagipusuon kon maggwa ang imo mga alagad sa imo balay, O Jehova, agud magpamatuod sang imo ngalan; agud nga ang ila mga tiko nga pagpati mabuslan sang kamatuoran, kag mangin makahamuot ang imo katawhan sa panulok sang tanan;

57 Agud nga ang tanan nga punta sang kalibutan makahibalo nga kami nga imo mga alagad nakabati sang imo tingug, kag ginpadala mo kami;

58 Agud nga halin sa sini tanan, ang imo mga alagad, nga mga anak ni Jacob, magpain sang mga matarong agud magtukod sang balaan nga siyudad sa imo ngalan suno sa ginsugo mo sa ila.

59 Nagapangabay kami sa imo nga hatagan mo ang Sion sang dugang pa nga mga estaka wala labot sini nga imo ginhatag agud nga ang pagtipon sang imo katawhan magpadayon sa dako nga gahum kag himaya, agud nga ang imo buluhaton mapalip-ot sa pagkamatarong.

60 Karon ining mga pulong, O Ginuo, ginahambal namon sa imo atubang parte sa mga rebelasyon kag mga kasugoan nga ginhatag mo sa amon nga ginakabig nga mga Gentil.

61 Apang nahibaloan mo nga may dako ka nga gugma para sa mga anak ni Jacob nga naglinapta sa mga bukid sa malawig nga panahon, sa magal-um kag madulom nga adlaw.

62 Gani, nagapangabay kami sa imo nga kaluoyan ang mga anak ni Jacob agud nga ang Jerusalem sumugod sini nga tion matubos na;

63 Kag ang gota sang pagkaulipon mabali na sa balay ni David;

64 Kag ang katawhan ni Juda makabalik na sa mga duta nga ginhatag mo kay Abraham nga ila amay.

65 Kag ipahanabo nga ang mga nagkalabilin sang katawhan ni Jacob nga ginsumpa kag ginsilotan bangod sang ila mga sala magliso halin sa ila daramhak kag mabangis nga kondisyon pakadto sa kabug-osan sang wala’y katubtuban nga ebanghelyo;

66 Agud buy-an nila ang ila mga armas sa pagpaagay sang dugo, kag untaton ang ila mga pagrebelde.

67 Kag kabay nga ang tanan nga naglinapta nga mga nagkalabilin sang katawhan ni Israel nga gintabog sa mga punta sang kalibutan magbaton sang ihibalo parte sa kamatuoran, magpati sa Mesias, kag matubos halin sa pagkapigos, kag magkalipay sa imo atubang.

68 O Ginuo, dumduma ang imo alagad nga si Joseph Smith Jr. kag ang tanan niya nga pag-antos kag paghingabot nga ginbatas—kon paano sia nagpakighisugot kay Jehova, kag nagsaad sa imo, O Dios nga Makagagahum ni Jacob—kag ang mga kasugoan nga ginhatag mo sa iya, kag sinsero sia nga nagtinguha sa paghimo sang imo pagbuot.

69 Kaluoyi, O Ginuo, ang iya asawa kag mga anak agud nga mapakataas sila sa imo atubang, kag maamligan sang imo maatipanon nga kamot.

70 Kaluoyi ang tanan nila nga himata agud nga ang ila mga tiko nga pagpati mauntat kag maanod pareho sa baha; agud nga mahaylo sila kag matubos upod sang Israel, kag magkilala nga ikaw ang Dios.

71 Dumduma, O Ginuo, ang mga pangulo, bisan pa ang tanan nga pangulo sang imo simbahan agud nga mapakataas sila sang imo tuo nga kamot upod ang tanan nila nga panimalay, kag ila mga himata, agud nga ang ila mga ngalan mapadayon kag dumdumon sa wala’y katubtuban sang tanan nga henerasyon.

72 Dumduma ang tanan mo nga simbahan, O Ginuo, upod ang tanan nila nga panimalay, kag tanan nila nga himata, upod ang tanan sang ila nagamasakit kag nagaantos, upod ang tanan nga imol kag malulo sang duta; agud nga ang ginharian nga ginpahamtang mo nga wala sang mga kamot mangin dako nga bukid kag maglikop sang bug-os nga duta;

73 Agud nga ang imo simbahan maggwa halin sa kamingawan sang kadulom, kag magsilak pareho kasanag sa bulan, pareho katin-aw sa adlaw, kag pareho ka makakululba sa kasoldadohan nga may mga bandera;

74 Kag maadornohan pareho sang nobya para sa sina nga adlaw nga buksan mo ang kalangitan, kag ipatuman nga mag-ilig ang kabukiran sa imo atubang, kag mag-alsa ang mga kapatagan, magtapan ang mga lugar nga kudol-kudol; agud nga ang imo himaya magpuno sang duta;

75 Agud nga kon magtunog ang trumpeta para sa mga minatay, masabnit kami sing paibabaw sa panganod agud sugataon ka, agud nga makaupod namon ang Ginuo tubtob sa wala’y katapusan;

76 Agud nga mangin matinlo ang amon mga biste, agud nga masul-oban kami sang mga panapton sang pagkamatarong nga may mga paklang sa amon mga kamot, kag may mga korona sang himaya sa amon mga ulo, kag mag-ani sang wala’y katapusan nga kalipay para sa tanan namon nga mga pag-antos.

77 O Ginuong Dios nga Makagagahum, pamatii kami sa sining amon mga pangabay, kag sabta kami halin sa langit nga imo balaan nga puluy-an sa diin nagapungko ka sa trono nga may himaya, dungog, gahum, pagkaharianon, kusog, pagkaginuo, kamatuoran, hustisya, paghukom, kaluoy, kag wala’y dulonan nga kabug-osan halin sa wala’y katubtuban tubtob sa wala’y katubtuban.

78 O pamatii, O pamatii, O pamatii kami, O Ginuo! Kag sabta ining mga pangabay, kag batona ang pagdedikar sining balay sa imo, ang pagpangabudlay sang amon mga kamot nga gintukod namon sa imo ngalan;

79 Kag amo man ining simbahan nga ibutang mo diri ang imo ngalan. Kag buligi kami paagi sa gahum sang imo Espiritu agud magsimpon ang amon mga tingug upod sinang sa iya sang masanag, nagasilak nga mga serafin sa palibot sang imo trono nga nagasinadya sa pagdayaw, nga nagakanta sang Hosana sa Dios kag sa Kordero!

80 Kag sul-obi sang kaluwasan ining imo mga pinili, kag pasinggita sing todo sa kalipay ang imo mga santos. Amen kag Amen.