1 Pagyamanan iti naganmo, O Apo a Dios ti Israel, nga agaywan iti katulagan ken mangipakita iti kaasina kadagiti katulongam a magna a sililinteg iti imatangmo, a sipupuso—

2 Sika a nangbilin kadagiti katulongam a mangbangon iti balay iti naganmo iti daytoy a lugar [Kirtland].

3 Ket ita imatangam, O Apo, nga inaramid dagiti katulongam a maibatay iti bilinmo.

4 Ket ita dawatenmi kenka, Nasantuan nga Ama, iti nagan ni Jesucristo, ti Anak nga ipatpategmo, a babaen laeng ti naganna ti pakayannongan ti pannakaisalakan kadagiti annak ti tattao, dawatenmi, O Apo, nga awatem daytoy a balay, nga aramid dagiti imami, a katulongam, nga imbilinmo kadakami a bangonenmi.

5 Ta ammom nga inaramidmi daytoy nga aramid iti baet ti adu a panagtutuok; ket impaaymi ti adda kadakami iti laksid ti kinakurapaymi iti pannakabangon ti balay babaen ti naganmo, tapno maaddaan ti Anak ti Tao iti lugar a pangipakitaanna iti bagina kadagiti taona.

6 Ket kas nasaom iti paltiingmo, a naited kadakami, nga inawagannakami a gayyemmo, a kinunam—Angayenyo ti sagrado a panagtitiponyo, a kas imbilinko kadakayo;

7 Ket no awan ti pammati ti amin, sapulenyo a sireregta ket isuroyo iti tunggal maysa dagiti nainsiriban a balikas; wen, sapulenyo kadagiti kasayaatan a libro dagiti nainsiriban a balikas, sapulenyo ti pannakaammo babaen ti panagadal ken babaen pay ti pammati;

8 Urnosenyo ti bagbagiyo; isaganayo ti tunggal kasapulan a banag, ken mangbangonkayo iti balay, nga isu ti balay a pagkararagan, balay a pagayunuan, balay ti pammati, balay a pagadalan, balay ti gloria, balay ti urnos, balay ti Dios;

9 Tapno ti iseserrekyo agbatay iti nagan ti Apo, tapno ti iruruaryo agbatay iti nagan ti Apo, tapno ti panagdaydayawyo agbatay iti nagan ti Apo, a nakatag-ay dagiti ima iti Kangatuan—

10 Ket ita, Nasantuan nga Ama, dawatenmi kenka a tarabayennakami, dagiti taom, babaen ti paraburmo, iti panangangaymi iti sagrado a panagtitiponmi, tapno maaramid a pakaidayawam ken iti nailangitan a panangawatmo;

11 Ken iti wagas a pakaipakitaanmi a maikarikami, iti imatangmo, tapno mapatalgedan ti pannakatungpal dagiti kari nga intedmo kadakami, a tattaom, kadagiti paltiing nga intedmo kadakami;

12 Tapno maikagay ti dayagmo kadagiti taom, ken iti daytoy balaymo, nga idatonmi ita kenka, tapno mapasanto ken maikkan-pateg nga agbalin a nasantuan, ken agtultuloy ti nasantuan a kaaddam iti daytoy a balay;

13 Ken tapno makarikna iti bileg ti amin a tao a sumrekto iti salinong ti balay ti Apo, ken makarikna iti ganetget a mangawat a pinasantom daytoy, ken balaymo daytoy, ti lugar ti kinasantom.

14 Ket ipalubosmo koma, Nasantuan nga Ama, a maisuro amin dagiti agdaydayawto iti daytoy a balay kadagiti nainsiriban a balikas manipud kadagiti kasayaatan a libro, ken tapno sapulenda ti pannakaammo babaen ti panagadal, ken kasta met a babaen ti pammati, a kas iti kinunam;

15 Ken tapno dumakkelda kenka, ken awatenda ti pakabuklan ti Espiritu Santo, ken maurnos a maibatay kadagiti paglintegam, ken maisagana a manggun-od iti tunggal banag a kasapulan;

16 Ken tapno agbalin daytoy a balay a balay a pagkararagan, balay a pagayunuan, balay ti pammati, balay ti gloria ken ti Dios, nga isu ti balaymo;

17 Tapno amin nga iseserrek dagiti taom, iti daytoy a balay, agbatay iti nagan ti Apo;

18 Tapno amin nga iruruarda iti daytoy a balay agbatay iti nagan ti Apo;

19 Ken tapno amin a panagdaydayawda agbatay iti nagan ti Apo, dagiti nasantuan nga ima, naitag-ayda iti Kangatuan;

20 Ken tapno awan ti narugit a banag a maipalubos a sumrek iti balaymo a mangrugit iti daytoy;

21 Ket no agbasol dagiti taom, asino man kadakuada, dida koma agtantan nga agbabawi ket agsublida kenka, ket sapulenda ti parabur iti imatangmo, ket maisubli kadakuada dagiti bendision nga inyordenmi a maibukbok kadagiti agrukbabto kenka iti balaymo.

22 Ket dawatenmi kenka, Nasantuan nga Ama, a rummuar dagiti katulongam iti daytoy a balay a maikkan iti igam babaen ti bilegmo, ken adda koma kadakuada ti naganmo, ken mabalkotda koma iti dayagmo, ket saluadan ida dagiti anghelmo;

23 Ket manipud iti daytoy a lugar ipaneknekda ti aglaplapusanan a naindaklan ken nagloriaan a damag, iti kinapudno, iti amin a suli ti daga, tapno maammuanda nga aramidmo daytoy, ken impataymo ti imam, tapno matungpal ti imbagam babaen dagiti ngiwat dagiti propeta, maipanggep kadagiti maudi nga aldaw.

24 Dawatenmi kenka, Nasantuan nga Ama, a patibkerem dagiti tao nga agdaydayawto, ken naindayawan nga agiggem iti nagan ken agtakder iti daytoy balaymo, kadagiti amin a kaputotan ken iti agnanayon;

25 Tapno awan ti agbalin nga armas a naaramid a maibusor kadakuada; tapno isu a mangkali iti abut a para kadakuada isunto met laeng a mismo ti maipisok;

26 Nga awan ti kinnunsabo ti kinadangkes a maaddaanto iti bileg a bumangon ken mangparmek kadagiti taom a mainagananto kenka iti daytoy a balay;

27 Ket asinonto man a tattao ti agparang a mangbusor kadagitoy a tao, maaronanto ti pungtotmo kadakuada;

28 Ket no dangrandanto dagitoy a tao dangramto ida; salaknibamto dagiti taom a kas iti inaramidmo iti aldaw ti dangadang, tapno mailiklikdanto kadagiti ima dagiti amin a kabusorda.

29 Dawatenmi kenka, Nasantuan nga Ama, a tikawen, ken pagsiddaawen, ken ibabain ken ulawem, amin dagiti nagidanon iti ulbod a damdamag iti nasaknap, iti sangalubongan, a maibusor iti wenno kadagiti katulongam, no saandanto nga agbabawi, inton maipakdaar kadakuada ti agnanayon nga ebanghelio;

30 Ken tapno awanto ti pagmamaayan dagiti amin nga aramidda, ket yanudto ida ti uraro, ken ti panangukom nga ipaaymo kadakuada iti pungtotmo, tapno agsardengto ti panagul-ulbod ken pamadpadakes kadagiti taom.

31 Ta ammom, O Apo, nga awan ti basol dagiti katulongam iti imatangmo iti panangipaneknekda iti naganmo, a nagsagabaanda kadagitoy a banag.

32 Ngarud ipakpakaasimi kenka ti sapasap ken naan-anay a pannakawayawaya manipud iti daytoy a sangol;

33 Alsaem, O Apo; alsaem manipud kadagiti tengnged dagiti katulongam, babaen ti bilegmo, tapno makabangonkami iti ikub daytoy a kaputotan ket maaramidmi dagiti aramidmo.

34 O Jehova, kaasiam dagitoy a tao, ket kas iti basol ti amin a tao pakawanem ti basbasol dagitoy a tao, ket mapunasda koma iti agnanayon.

35 Mapasingkedan koma ti pannutok dagiti ministrom kadakuada babaen ti bileg nga aggapu iti ngato.

36 Matungpal koma kadakuada, a kas kadagidi adda iti aldaw ti Pentecostes; maibukbok koma ti sagut ti pagsasao kadagiti taom, dagiti sinan dila a kasla apuy, ken ti panagibuksil iti daytoy.

37 Ket mapunno koma ti balaymo, a kas iti napigsa nga angin, iti dayagmo.

38 Ipaaymo kadagiti katulongam ti pammaneknek ti katulagan, tapno no rummuarda a mangipakdaar iti balikasmo mapasingkedanda ti paglintegan, ken maisaganada ti puspuso dagiti santom para kadagiti amin a panangukom a dandanimon ipaulog, iti pungtotmo, kadagiti agindeg iti daga, gapu kadagiti basolda, tapno saan nga aglupoy dagiti taom iti aldaw a panagparikut.

39 Ket sadino man a siudad a serken dagiti katulongam, ket awaten dagiti tao dayta a siudad ti pammaneknekda, maipaay koma ti kappiam ken ti panangisalakanmo iti dayta a siudad; tapno maummong a mairuar dagiti nalinteg iti dayta a siudad, tapno umayda iti Zion, wenno kadagiti istakana, dagiti lugar nga intudingmo, babaen ti kankanta ti agnanayon a rag-o;

40 Ket agingga a matungpal daytoy, saan koma a mayetnag ti panangukommo iti dayta a siudad.

41 Ket ania man a siudad a serkento dagiti katulongam, ket saan nga awaten dagiti tao dayta a siudad ti pammaneknek dagiti katulongam, ket ballaagan ida dagiti katulongam nga isalakanda ti bagbagida iti daytoy saan a nasayaat a kaputotan, maipaay koma iti dayta a siudad ti maibatay iti nasaomon babaen dagiti ngiwat dagiti propetam.

42 Ngem wayawayaam, O Jehova, dawatenmi kenka, dagiti katulongam kadagiti imada, ket ugasam ida iti darada.

43 O Apo, dimi pagay-ayatan ti pannakadadael dagiti padami a tao; napateg kenka dagiti kararuada;

44 Ngem nasken a matungpal ti balikasmo. Tulongam dagiti katulongam nga agkuna, a tarabayda ti paraburmo: Matungpal ti pagayatam, O Apo, saan a ti pagayatanmi.

45 Ammomi a sinaom dagiti nakaam-amak a balikas babaen ti ngiwat dagiti propetam maipanggep kadagiti nadangkes, kadagiti maudi nga aldaw—nga ibukbokmonto ti panangukommo, a di marukod;

46 Ngarud, O Apo, isalakanmo dagiti taom manipud iti didigra dagiti nadangkes; ikkam ti gundaway dagiti katulongam a mangpasingked iti paglintegan, ken mangsaluad iti pammaneknek, tapno makapagsaganada iti aldaw a pannakapuor.

47 Dawatenmi kenka, Nasantuan nga Ama, a laglagipem dagidiay pinapanaw dagiti agindeg iti probinsia ti Jackson, Missouri, manipud kadagiti daga a tawidda, ket alsaem, O Apo, daytoy sangol ti rigat a naikaratay kadakuada.

48 Ammon, O Apo, a nalabes ti pannakailupitlupitda ken panangparparigat kadakuada dagiti nadangkes a tao; ket agsayasay ti leddaang iti puspusomi gapu kadagiti nakas-ang a panagtutuokda.

49 O Apo, kasano ti kapaut ti panagsagaba dagitoy a tao iti daytoy a pannakaparparigat, ken ti sangsangit dagiti awanan pay nakem a bungada a makadanon kadagiti lapayagmo, ken ti darada nga umay a pammaneknek kenka, ken saan a mangiparparammag iti pammaneknekmo para kadakuada?

50 Kaasiam, O Apo, dagiti nadangkes a manangriribuk, a nangpapanaw kadagiti taom, tapno sumardengda nga agdadael, tapno agbabawida kadagiti basolda no adda masarakan a panagbabawi;

51 Ngem no saandanto nga agbabawi, iparangmo ti takiagmo, O Apo, ket subbotem ti intudingmo a Zion kadagiti taom.

52 Ket no saan a mabalin a kasta, tapno saan a mapaay ti panggep dagiti taom iti imatangmo maaronan koma ti pungtotmo, ket agtupak kadakuada ti guram, tapno madadaelda, dagiti ramut ken sanga nga agpadpada, manipud iti sirok ti langit;

53 Ngem no la ketdi agbabawidanto, agparabur ken mangngaasika, ket yadayom ti pungtotmo no kumitaka iti rupa ti Tinudingam.

54 Mangngaasika, O Apo, kadagiti amin a pagilian iti daga; mangngaasika kadagiti agturay iti dagami; mapatibker koma dagidiay a pagbatayan, a naindayawan ken natan-ok ti pannakaisakitna, nga isu, ti Pagalagadan iti dagatayo, babaen dagiti ammatayo, iti agnanayon.

55 Laglagipem dagiti ari, dagiti prinsipe, dagiti natakneng, ken dagiti naindaklan iti daga, ken amin a tattao, ken dagiti simbaan, amin dagiti nakurapay, dagiti agkasapulan, ken dagiti agsagsagaba iti daga;

56 Tapno lumukneng koma ti puspusoda no rummuar dagiti katulongam manipud iti balaymo, O Jehova, a mangiburay iti pammaneknek iti naganmo; tapno agparbeng ti dakes a panangipapanda iti kinapudno, ket magun-od dagiti taom ti pannakaawat iti imatang ti amin;

57 Tapno maammuan ti amin iti intero a daga a dakami, a katulongam, nangngegmi ti timekmo, ken imbaonnakami;

58 A manipud amin kadagitoy, dagiti katulongam, dagiti lallaki nga annak ni Jacob, maummongda dagiti nalinteg a mangbangon iti nasantuan a siudad a mainagan kenka, a kas iti imbilinmo kadakuada.

59 Dawatenmi kenka a mangtudingka iti Zion iti sabsabali pay nga istaka malaksid iti daytoy intudingmon, tapno ad-adda nga agsaknap ti bileg ken tan-ok ti panaguummong dagiti taom, tapno maidardaras ti aramidmo iti kinalinteg.

60 Ita dagitoy a balikas, O Apo, nasaomin kenka, maipanggep kadagiti paltiing ken bilin nga intedmo kadakami, a mailasin kadagiti Gentil.

61 Ngem ammom a naindaklan ti panagayatmo kadagiti annak ni Jacob, a nabayagen a nawarawara kadagiti bantay, iti naulep ken nasipnget nga aldaw.

62 Dawatenmi ngarud kenka a kaasiam dagiti annak ni Jacob, tapno ti Jerusalem, manipud iti daytoy nga oras, mangrugin a masubbot;

63 Ket mangrugin a maalsa ti sangol ti pannakaadipen manipud iti balay ni David;

64 Ket mangrugi nga agsubli dagiti annak ti Juda kadagiti daga nga intedmo ken ni Abraham, nga amada.

65 Ket ibilinmo a dagiti nabati ni Jacob, a nailunod ken nasaplit gapu iti basolda, mabaliwanda manipud iti kinaatap ken kinarungsot a kasasaad agingga iti pakabuklan ti agnanayon nga ebanghelio;

66 Tapno idissoda dagiti igamda a pagpadara, ket lipatenda ti kinasukirda.

67 Ket maammuan koma amin dagiti nawarawara a nabati ti Israel, a napapanaw iti amin a daga, ti kinapudno, mamatida iti Mesias, ket masubbotda manipud iti pannakailupitlupit, ket agrag-oda iti imatangmo.

68 O Apo, laglagipem ti katulongam, a ni Joseph Smith, Jun., ken amin a rigrigatna ken pannakaidadanesna—no kasano ti pannakitulagna ken ni Jehova, ken nagtamed kenka, O Mannakabalin a Dios ni Jacob—ken dagiti bilin nga intedmo kenkuana, ken sipupudno a nangaramid iti pagayatam.

69 Mangngaasika, O Apo, iti asawa ken dagiti annakna, tapno maitan-okda iti imatangmo, ken mataginayonda iti manaraken nga imam.

70 Mangngaasika kadagiti amin nga asideg a kabagianda, tapno maguped ti dakes a panangipapanda ken mayanud a kas iti layus; tapno mapasurotda ken masubbotda iti Israel, ken maammuanda a sika ti Dios.

71 Laglagipem, O Apo, dagiti presidente, nga isu dagiti amin a presidente ti simbaanmo, tapno itan-ok ti kanawan nga imam ida, a kaduada amin dagiti kaamaanda, ken dagiti asideg a kabagianda, tapno mapagtalinaed ti naganda ken agnanayon a malaglagip iti tunggal kaputotan.

72 Laglagipem amin dagiti simbaanmo, O Apo, a kaduada amin a kaamaanda, ken amin dagiti asideg a kabagianda, dagiti amin a masaksakit ken agsagsagaba, amin dagiti nakurapay ken naemma iti daga; tapno ti pagarian, a binangonmo a di nagaramat iti ima, agbalin a naindaklan a bantay ket punnuenna ti sangabukel a daga;

73 Tapno rummuar ti simbaanmo iti langalang ti kasipngetan, ket agrimat a nasayaat a kas iti bulan, nalawag a kas iti init, ken nakaam-amak a kas iti buyot nga adda wagaywayna;

74 Ket pagrukbaban a kas iti nobia iti dayta nga aldaw inton waknitam ti langit, ket ibilinmo ti panagkusukos dagiti bantay iti imatangmo, ket maitan-ok dagiti tanap, mapalanas dagiti narusanger a lugar; tapno mapunno ti daga iti dayagmo;

75 Tapno inton aguni ti trumpeta kadagiti natay, maikuyogkaminto iti ulep a mangsabat kenka, tapno maikuyogkaminto iti Apo;

76 Tapno agbalin a natarnaw dagiti pagan-anaymi, tapno makawesankami iti roba ti kinalinteg, a dagiti dakulap adda kadagiti imami, ken makoronaankami iti dayag, ken aganikami iti agnanayon a rag-o para iti amin a panagtutuokmi.

77 O Apo Dios a Nailangitan, denggennakami kadagiti ararawmi, ket sungbatannakami manipud iti langit, ti naespirituan a pagnaedam, a nagtugawam a trono, nga addaan dayag, dayaw, bileg, tan-ok, kinamaingel, turay, kinapudno, linteg, panangukom, kaasi, ken awan inggana a kinaan-anay, manipud iti agnanayon nga awan inggana.

78 O denggem, O denggem, O denggennakami, O Apo! Ket sungbatam dagitoy araraw, ket awatem ti pannakaidaton daytoy a balay kenka, ti aramid dagiti imami, a binangonmi iti naganmo;

79 Ken kasta met daytoy simbaan, a mainagan kenka. Ket tulongannakami babaen ti bileg ti Espiritum, tapno mayappengmi dagiti timekmi kadagiti naraniag, rumimrimat a parsua iti aglawlaw ti tronom, a mangipekpeksa iti panagdayaw, a mangikankanta iti Hosanna iti Dios ken ti Kordero!

80 Ket makawesan koma dagitoy, dagiti tinudingam, iti pannakaisalakan, ket ipukkaw iti napigsa dagiti santom ti rag-oda. Amen, ken Amen.