1 Sa pagkamatuod ini ang siling sang Ginuo sa imo Thomas, alagad ko: Nabatian ko ang imo mga pangamuyo; kag ang imo maayo nga mga buhat nakalab-ot sa akon bilang handumanan sa akon atubang, para sa sinang imo mga kauturan nga ginpili nga magpamatuod sang akon ngalan kag magpalapnag sini sa tanan nga nasyon, kaliwat, lengguahe, kag katawhan, kag gin-ordinan paagi sa akon mga alagad.

2 Sa pagkamatuod ginasiling ko sa imo, may nangin pila ka mga butang sa imo tagipusuon kag sa imo nga ako, nga Ginuo, wala nahamuot.

3 Apang, bangod ginpaubos mo ang imo kaugalingon pakataason ka; gani, napatawad na ang tanan mo nga sala.

4 Palipaya ang imo tagipusuon sa akon panulok; kag pamatud-an mo ang akon ngalan indi lamang sa mga Gentil kundi amo man sa mga Judio; kag ipalapnag mo ang akon pulong tubtob sa mga punta sang kalibutan.

5 Gani, magwali ka sa tagsa ka aga; kag sa tagsa ka adlaw ibayaw ang imo tingug sang pagpaandam; kag pag-abot sang gab-i indi pagpatuloga ang mga pumuluyo sang duta bangod sang imo pulong.

6 Ipahibalo ang imo puluy-an sa Sion, kag indi pagsayloha ang imo balay; kay ako, nga Ginuo, may ipahimo nga dako nga buluhaton sa imo parte sa pagbantala sang akon ngalan sa tunga sang mga anak sang katawhan.

7 Gani, wagkosi ang imo balikawang para sa buluhaton. Kag sul-obi man ang imo mga tiil kay ginpili ka, kag ang imo banas yara sa kabukiran, kag sa tunga sang madamo nga nasyon.

8 Kag paagi sa imo pulong madamo nga mga matinaas-taason ang pakauboson, kag paagi sa imo pulong madamo nga mga mapainubuson ang pakataason.

9 Ang imo tingug magasaway sang nakasala; kag sa imo pagsaway pauntata ang dila sang nagabutang-butang sa iya kalainan.

10 Mangin mapainubuson; kag ang Ginuo nga imo Dios magatuytuy sa imo sa kamot, kag magahatag sa imo sang sabat sa imo mga pangamuyo.

11 Kilala ko ang imo tagipusuon, kag nabatian ang imo mga pangamuyo parte sa imo mga kauturan. Indi ka maghigugma sa ila sing labaw sa iban kundi higugmaa sila pareho sang paghigugma mo sa imo kaugalingon, kag higugmaa sing tuman ang tanan nga tawo, kag ang tanan nga nagahigugma sa akon ngalan.

12 Kag magpangamuyo para sa imo mga kauturan nga miyembro sang Dose. Sawaya sila sing matigdas para sa akon ngalan, kag sawaya sila sang tanan nila nga sala, kag mangin tampad ka sa akon atubang sa akon ngalan.

13 Kag pagkatapos sang ila mga pagtilaw, kag tuman nga pag-antos, tan-awa, ako, nga Ginuo, magapangita sa ila, kag kon indi sila magpatig-a sang ila mga tagipusuon, kag indi mangin batinggilan sa akon, magaliso sila sa akon, kag ayohon ko sila.

14 Karon, ginasiling ko sa imo, kag kon ano ang ginasiling ko sa imo ginasiling ko sa tanan nga Dose ka Apostoles: Magtindog kag wagkosi ang inyo mga balikawang, pas-ana ang inyo krus, magsunod sa akon, kag pahalba ang akon mga carnero.

15 Indi pagpakataason ang inyo mga kaugalingon; indi magrebelde sa akon alagad nga si Joseph; kay sa pagkamatuod ginasiling ko sa inyo, kaupod niya ako, kag ang akon kamot magatatap sa iya; kag ang mga yabi nga ginhatag ko sa iya, kag sa inyo man indi pagkuhaon sa iya tubtob sa akon pagkari.

16 Sa pagkamatuod ginasiling ko sa imo Thomas, alagad ko, ikaw ang tawo nga ginpili ko nga magkapot sang mga yabi sang akon ginharian parte sa Dose sa tanan nga nasyon—

17 Agud nga ikaw ang mangin akon alagad nga magabukas sang puwertahan sang ginharian sa tanan nga lugar nga ang akon alagad nga si Joseph, kag akon alagad nga si Sidney, kag akon alagad nga si Hyrum, indi makakadto;

18 Kay sa ila ginkarga ko ang responsibilidad sang tanan nga simbahan sa malip-ot lamang nga tion.

19 Gani, kon sa diin ka man nila ipadala, maglakat ka, kag makaupod mo ako; kag kon sa diin man nga lugar mo ibantala ang akon ngalan ang mabungahon nga puwertahan pagabuksan sa imo agud mabaton nila ang akon pulong.

20 Kon sin-o man ang nagabaton sang akon pulong nagabaton sa akon, kag kon sin-o man ang nagabaton sa akon, nagabaton sa ila, ang Unang Pangulohan nga akon ginpadala, nga akon ginhimo nga mga manuglaygay para sa akon ngalan sa inyo.

21 Kag sa liwat, ginasiling ko sa inyo nga kon sin-o man ang inyo ipadala sa akon ngalan suno sa tingug sang inyo mga kauturan, ang Dose, nga inyo ginrekomendar kag gin-awtorisar sing nagakaigo, magaangkon sang gahum sa pagbukas sang puwertahan sang akon ginharian sa bisan ano nga nasyon kon sa diin man ninyo sila ipadala—

22 Kon magpaubos sila sang ila mga kaugalingon sa akon atubang, kag magpabilin nga tampad sa akon pulong, kag magpamati sa tingug sang akon Espiritu.

23 Sa pagkamatuod, sa pagkamatuod, ginasiling ko sa inyo, ang kadulom nagatabon sang duta, kag ang tuman nga kadulom sang mga panghunahuna sang katawhan, kag ang tanan nga unod malain sa akon panulok.

24 Tan-awa, ang pagtimalus madasig nga magaabot sa mga pumuluyo sang duta, isa ka adlaw sang kaakig, adlaw sang pagsunog, adlaw sang kahalitan, sang paghibi, sang pagpangalisud, kag sang pagpanalambiton; kag pareho sang buhawi magatupa ini sa bug-os nga ibabaw sang duta, siling sang Ginuo.

25 Kag sa akon balay magasugod ini, kag halin sa akon balay magalapta ini, siling sang Ginuo;

26 Una sa mga yara sa tunga ninyo, siling sang Ginuo, nga nagasiling nga nakahibalo sang akon ngalan kag wala nakakilala sa akon, kag nagpasipala sa akon sa sulod sang akon balay, siling sang Ginuo.

27 Gani, siguroha nga indi kamo magkabalaka parte sa mga butang sang akon simbahan sa sining lugar, siling sang Ginuo.

28 Apang tinloi ang inyo mga tagipusuon sa akon atubang; kag dayon maglakat sa bilog nga kalibutan, kag iwali ang akon ebanghelyo sa tagsa ka tawo nga wala nakabaton sini;

29 Kag sia nga nagapati kag nabunyagan maluwas, kag sia nga wala nagapati, kag wala nabunyagan pagasilotan.

30 Kay sa inyo nga Dose, kag sa ila nga Unang Pangulohan nga ginpili upod sa inyo nga mangin inyo mga manuglaygay kag inyo mga lider, ginhatag ang gahum sining pagkapari para sa ulihing mga adlaw kag para sa katapusan nga tion nga amo ang dispensasyon sang kabug-osan sang mga panahon,

31 Ang amo nga gahum nga inyo ginakaptan upod sang tanan sinang nakabaton sang dispensasyon sa bisan ano nga tion halin sa ginsuguran sang pagtuga;

32 Kay sa pagkamatuod ginasiling ko sa inyo, ang mga yabi sang dispensasyon nga inyo nabaton ginpasa halin sa mga amay, kag katapusan sa tanan, ginpadala sa inyo halin sa langit.

33 Sa pagkamatuod ginasiling ko sa inyo, tan-awa kon daw ano ka importante sang inyo tawag sa pag-alagad. Tinloi ang inyo mga tagipusuon kag inyo mga biste agud nga ang dugo sang sining henerasyon indi pagsukton sa inyo mga kamot.

34 Mangin tampad tubtob nga magkari ako kay magakari ako sing madasig; kag magadala ako sang padya agud tumbasan ang tagsa ka tawo suno sa iya binuhatan. Ako ang Alfa kag Omega. Amen.