Ɔfã 115
Nyikyerɛ a wɔnam Joseph Smith Nkɔnhyɛnyi no do dze mae, wɔ Far West, Missouri, Ebɔbira 26, 1838, ɔkyerɛ Nyame ne pɛ a ɔfa mbrɛ wobesi ayɛ bea no do yie na woesi Ewuradze ne fi. Dɛm nyikyerɛ yi wɔdze maa dzibewdzi banodzifo na asɔrmba a wɔwɔ Asɔr no mu.
1–4, Ewuradze to N’Asɔr no dzin Jesus Christ N’Asɔr a ɔwɔ hɔ ma Nda a Odzi Ekyir Ahotseweefo; 5–6, Zion na ne stake yɛ bambɔ na sumabew ma Ahotseweefo no; 7–16, Wɔhyɛ Ahotseweefo no dɛ wonsi Ewuradze Ne fi wɔ Far West; 17–19, Joseph Smith kura Nyankopɔn n’ahenman ne nsaafee wɔ asaase do.
1 Nokwar, dɛm na Ewuradze se ɔwo, m’akowaa Joseph Smith, Kakraba, nye m’akowaa Sidney Rigdon, nye m’akowaa Hyrum Smith so, nye w’apamfo a woeyi hɔn ama hom nye hɔn a wobeyi hɔn ekyir yi;
2 Na ɔwo so, m’akowaa Edward Partridge, nye w’apamfo;
3 Na mo nkowaa nokwafo no a wɔyɛ abaguafo etsitsir wɔ m’asɔr a ɔwɔ Zion mu, na dɛm na wɔbɛfrɛ no, nye hom a hom yɛ elderfo wɔ m’asɔr a ɔyɛ Jesus Christ N’Asɔr a ɔwɔ hɔ ma Nda a Odzi Ekyir Ahotseweefo no a wɔapetse wiadze nyina mu no;
4 Na dɛm na wɔbɛfrɛ m’asɔr wɔ nda a odzi ekyir no mu, Jesus Christ N’Asɔr a ɔwɔ hɔ ma Nda a Odzi Ekyir Ahotseweefo mpo.
5 Nokwar, mese hom nyina dɛ: Hom nsoɛr na hom nhyerɛn ama hom kan no aayɛ fasusu ama aman;
6 Ama hom ano a hom robɔboa wɔ Zion asaase do, nye ne stake horow mu no aabɛyɛ bambɔ nye guandɔbea ama hom wɔ ehum nye ebufuhyew a worubohue a wɔrommfora mu egu asaase nyina do no.
7 Hom mma kuropɔn Far West, no nyɛ asaase krɔnkrɔn a wɔatsew ho ama me; na wɔbɛfrɛ hɔ krɔnkrɔnbea kɛse, osiandɛ asaase a hom gyina do no yɛ krɔnkrɔn.
8 Dɛm ntsi, mehyɛ hom dɛ hom nsi fi mma me ama m’ahotseweefo aaboa hɔn ano wɔ hɔ na woeetum asom me.
9 Na hom mma wɔnhyɛ edwuma yi ase, na wɔntow fapem, na wɔnyɛ ahoboa edwuma wɔ dɛm ɔhyewber a ɔreba yi mu;
10 Na hom nhyɛ ase wɔ Ayɛwoho a ɔreba ne da a otsĩa anan no mu; na ofi dɛm aber dze kɔ no, hom mma mo nkorɔfo nyɛ edwuma enyiberdo nsi fi mfa mma me dzin;
11 Na ndɛ da yi n’afrenhyia pɛpɛɛpɛr hom mma wɔnhyɛ ase ntow me fi ne fapem no.
12 Dɛm na hom mma wɔnyɛ edwuma enyiberdo ofi dɛm aber yi kesi dɛ wobowie koraa, ofi kutuwdo-bo no do dze kesi etsifi hɔ, kodu dɛ biribiara nnkɛka a wonnwiee.
13 Nokwar, mese hom dɛ, mma hom mma m’akowaa Joseph anaa m’akowaa Sidney, anaa m’akowaa Hyrum, nnkenya kaw bio wɔ fi a worisi dze ama me dzin no ho.
14 Mbom hom mma wonsi fi mma me dzin wɔ nhwɛdo a mebɛkyerɛ hɔn dɛ wonsi no do.
15 Na sɛ mo nkorɔfo ennsi dan no wɔ nhwɛdo a mebɛkyerɛ hɔn president na n’apamfo no do a, merenngye hɔn nsamu dwumadzi no.
16 Mbom sɛ mo nkorɔfo si no wɔ nhwɛdo a mebɛkyerɛ hɔn president na n’apamfo no, m’akowaa Joseph na n’apamfo no do mpo a, mebɛgye mo nkorɔfo hɔn nsamu dwumadzi no.
17 Na bio, nokwar, mese hom dɛ, ɔyɛ me pɛ dɛ m’ahotseweefo bɔboaboa hɔn ano ntsɛm dze akyekyer kuropɔn Far West no;
18 Na ofi ber to ber wɔbɛkyerɛ m’akowaa Joseph mbea binom a ɔwɔ mantɔw no mu hɔ a hom besisi stake wɔ.
19 Na hwɛ, mebɛkã no ho, na matsew no ho wɔ nkorɔfo enyim; na medze ahenman yi nye no mu ɔsomdwuma no ne nsaafee no ama no. Ɔnyɛ hɔ dɛm. Amen.