1 Sa pagkamatuod ini ang siling sang Ginuo sa akon alagad nga si William Marks, kag amo man sa akon alagad nga si Newel K. Whitney, ipatapos sa ila ang tanan nila nga transaksyon sa negosyo sing gilayon kag palakta halin sa duta sang Kirtland, antes ako, nga Ginuo, magpadala liwat sang mga niyebe sa duta.

2 Pukawa sila, kag pabangona, kag palakta, kag indi magpabuyanbuyan pa, kay ako, nga Ginuo, nagasugo sini.

3 Gani, kon magpadugay sila indi ini mangin maayo sa ila.

4 Pahinulsola sila sang tanan nila nga sala, kag sang tanan nila nga maibogon nga mga handum sa akon panulok, siling sang Ginuo; kay ano man lang ang mga pagkabutang sa akon? siling sang Ginuo.

5 Ipabaligya ang mga pagkabutang sa Kirtland agud mabayaran ang mga utang, siling sang Ginuo. Buy-i ang mga ini, siling sang Ginuo, kag kon ano ang mabilin, pahawidan ini sa inyo mga kamot, siling sang Ginuo.

6 Kay indi bala akon ang mga kapispisan sang kalangitan, kag amo man ang mga isda sang kadagatan, kag ang mga kasapatan sang kabukiran? Wala ko bala ginhimo ang kalibutan? Wala ko bala ginauyatan ang mga kapalaran sang tanan nga kasoldadohan sang mga nasyon sang duta?

7 Gani, indi ko bala paghimuon ang masim-ong nga mga lugar nga magpamukol kag magpamulak, kag magpatubas sing bugana? siling sang Ginuo.

8 Indi pa bala bastante ang kalaparon sang kabukiran sang Adan-ondi-Aman, kag sang mga kapatagan sang Olas Sineas, ukon ang duta kon sa diin nagpuyo si Adan nga hingabuton pa ninyo inang tulo gid lamang, kag pabay-an ang mas importante nga mga butang?

9 Gani, magkadto diri sa duta sang akon katawhan, nga amo ang Sion.

10 Dapat mangin matutum ang akon alagad nga si William Marks sa pila ka mga butang, kag padumalahan sia sa madamo. Papanguloha sia sa tunga sang akon katawhan sa siyudad sang Far West, kag pakamaayohon sia sang mga pagpakamaayo nga ginabaton sang akon katawhan.

11 Dapat ikahuya sang akon alagad nga si Newel K. Whitney ang grupo sang mga Nicolaita kag ang tanan nila nga sekreto nga mga kangil-aran, kag ang tanan niya nga kagamay sang kalag sa akon atubang, siling sang Ginuo, kag dapat magkadto sia sa duta sang Adan-ondi-Aman, kag mangin obispo sa akon katawhan, siling sang Ginuo, indi sa ngalan kundi sa buhat, siling sang Ginuo.

12 Kag sa liwat, ginasiling ko sa inyo, ginadumdum ko ang akon alagad nga si Oliver Granger; tan-awa, sa pagkamatuod ginasiling ko sa iya nga ang iya ngalan pagadumdumon sing sagrado sa tanan nga henerasyon, tubtob sa wala’y katapusan, siling sang Ginuo.

13 Gani, patinguhaa sia sing matutum para sa pagtubos sang Unang Pangulohan sang akon Simbahan, siling sang Ginuo; kag kon matumba sia magabangon sia liwat kay ang iya sakripisyo mangin mas sagrado sa akon sangsa iya mga kadalag-an, siling sang Ginuo.

14 Gani, pakadtoa sia diri sing gilayon sa duta sang Sion; kag sa nagakaigo nga tion pagahimuon sia nga negosyante sa akon ngalan, siling sang Ginuo, para sa kaayohan sang akon katawhan.

15 Gani, wala sing bisan sin-o nga tawo ang magbale-wala sa akon alagad nga si Oliver Granger kundi nga ang mga pagpakamaayo nga ginabaton sang akon katawhan mangin iya man tubtob sa wala’y katapusan.

16 Kag sa liwat, sa pagkamatuod ginasiling ko sa inyo, ipahimo sa tanan ko nga alagad sa duta sang Kirtland nga dumdumon ang Ginuo nga ila Dios, kag amo man ang akon balay, nga amligan kag pakabalaanon ini, kag tabugon ang mga manugbaylo sang kwarta sa akon kaugalingon nga natalana nga tion, siling sang Ginuo. Kag gani amo sini. Amen.