Seksyon 119
Rebelasyon nga ginhatag paagi kay Joseph Smith nga Propeta sa Far West, Missouri sang ika-8 sang Hulyo 1838 bilang sabat sa iya pangamuyo: “O Ginuo! Ipakita sa amon nga imo mga alagad kon pila ang imo ginapangayo nga ika-pulo sa mga pagkabutang sang imo katawhan.” Ang layi sang ika-pulo, suno sa pagkahangop sa subong nga panahon, wala pa nahatag sa Simbahan antes sining rebelasyon. Ang pulong nga ika-pulo nga ginsambit sa pangamuyo kag sa nagligad nga mga rebelasyon (64:23; 85:3; 97:11) nagakahulugan indi lamang sang ika-napulo nga bahin kundi sang tanan nga halad-nga-kinabubut-on ukon mga kontribusyon sa mga pundo sang Simbahan. Nahatag na sadto anay sang Ginuo sa Simbahan ang layi sang pagkonsagrar kag pagkatulugyanan sang mga pagkabutang sa diin nagpakighisugot ang mga miyembro (ilabi na ang nagapangulo nga mga elder) nga dapat kuntani mangin tubtob sa wala’y katapusan. Bangod madamo ang napaslawan sa pagtuman sining kasugtanan, ginbawi ini anay sang Ginuo kag sa baylo ginhatag ang layi sang ika-pulo sa bilog nga Simbahan. Nagpamangkot ang Propeta sa Ginuo kon pila sa ila mga pagkabutang ang Iya ginapangayo para sa sagrado nga mga katuyoan. Ining rebelasyon amo ang sabat.
1–5, Ang mga Santos dapat magbayad sang ila sobra nga mga pagkabutang kag dayon maghatag, bilang ika-pulo, sang ika-napulo nga bahin sang ila ganansya sa kada tuig; 6–7, Ang amo nga paagi magapakabalaan sang duta sang Sion.
1 Sa pagkamatuod, ini ang siling sang Ginuo, ginapangayo ko ang tanan nila nga sobra nga mga pagkabutang nga itugyan sa mga kamot sang obispo sang akon simbahan sa Sion,
2 Para sa pagtukod sang akon balay, kag para sa pagpahamtang sang pundasyon sang Sion kag para sa pagkapari, kag para sa kautangan sang Pangulohan sang akon Simbahan.
3 Kag ini ang pagsugod sang pagbayad sang ika-pulo sang akon katawhan.
4 Kag pagkatapos sina, inang mga nagbayad sang ila ika-pulo suno sa nasambit nga paagi dapat magbayad sang ika-napulo nga bahin sang tanan nila nga ganansya sa kada tuig; kag mangin permanente ini nga layi sa ila tubtob sa wala’y katapusan, para sa akon balaan nga pagkapari, siling sang Ginuo.
5 Sa pagkamatuod ginasiling ko sa inyo, matabo ini nga inang tanan nga nagatipon sa duta sang Sion dapat magbayad sang ika-pulo sang sobra nila nga mga pagkabutang, kag dapat magtuman sining layi ukon indi sila makabig nga nagakaangay sa pagpuyo sa tunga ninyo.
6 Kag ginasiling ko sa inyo, kon indi pagtumanon sang akon katawhan ining layi, sa pagpakabalaan sini, kag paagi sining layi pakabalaanon ang duta sang Sion sa akon agud ang akon mga pagsulundan kag akon mga paghukom matuman dira, agud mangin pinakabalaan ini, tan-awa, sa pagkamatuod ginasiling ko sa inyo, indi ini mangin duta sang Sion sa inyo.
7 Kag mangin sulundan ini sa tanan nga estaka sang Sion. Kag gani amo sini. Amen.